1. Nama dipadah Jesus ngagai empat iku orang ke berikan, lalu nama digaga sida?

 MURID Jesus ke benama Peter, Andrew, James, enggau John nya orang berikan ke bedagang. Sida tentu tekenyit lebuh ninga Jesus madah: ‘Titihka aku. Aku deka ngajar [kita] jalai ngulihka mensia.’ b Nama digaga sida? Bup Kudus madah: ‘Tekala nya [sida] lalu ninggalka jala, lalu nitihka Jesus.’ (Mat. 4:18-22) Pemutus ke digaga sida deka ngubah pengidup sida belama iya. Ari ke ngulihka ikan, sida deka “ngulihka mensia.” (Luk. 5:10) Kemayaharitu, Jesus mega mai orang ti rinduka pemendar ngereja utai ti sama. (Mat. 28:19, 20) Kati nuan udah nitihka Jesus lalu nyadi penginjil berita manah?

 2. Nama kebuah nyadi penginjil nya pemutus ti berat, lalu nama nulung kitai ngaga pemutus nya?

² Nuan engka udah lama belajarka Bup Kudus lalu ngaga mayuh ubah ba pengidup. Tang diatu nuan patut ngaga pemutus, sekalika deka nyadi penginjil berita manah tauka enda. Enti nuan kakang ati deka nitihka Jesus, anang lemi semengat. Nuan engka irau laban nya pemutus ti berat. Taja pan Bup Kudus madahka Peter enggau bala pangan iya “tekala nya” ninggalka jala sida, tang tu ukai reti Peter enggau menyadi iya enda berunding dulu. Sida udah ngelala sereta  nerima Jesus nya Messiah lebih ari enam bulan sebedau nya. (Jhn. 1:35-42) Sama mega, nuan engka udah nemu mayuh pasal Jehovah enggau Jesus, lalu nuan deka terus ngaga pemansang ba pengarap. Tang, sebedau mutus deka nyadi penginjil, nuan patut berunding enggau manah pasal pekara nya. Nama nulung Peter, Andrew, sereta ke bukai ngaga pemutus?

 3. Nama ulih nulung nuan nyadi penginjil ti landik?

³ Bala murid Jesus ti terubah bisi ati ti keran, penemu, pemerani, sereta bebendar deka nembuka pengawa. Nya alai sida mujur ba pengawa berikan. Semua pemanah nya mega tentu udah nulung sida nyadi penginjil ti landik. Artikel tu deka bejuraika baka ni nuan ulih ngemansangka semua pemanah nya ngambika ulih landik ba pengawa nginjil sereta ngajar.

 4. Nama kebuah Peter berikan?

⁴ Peter berikan kena ngintu diri sebilik iya. Taja pia, iya enda ngumbai nya semina kereja aja. Peter amat rindu berikan. (Jhn. 21:3, 9-15) Iya mega belajar rindu nginjil. Enggau saup ari Jehovah, iya nyadi landik agi ba pengawa nginjil.—SKR. 2:14, 41.

 5. Nitihka Luke 5:8-11, nama kebuah Peter takut, lalu nama ulih nulung kitai mutarka asai ati ti takut?

⁵ Pengerindu ke Jehovah meransang kitai nginjil. Ketegal rinduka Jehovah, kitai diperansang bejaku pasal Iya ngagai orang bukai, taja pan kitai engka ngasaika diri enda ulih ngereja nya. Lebuh Jesus mai Peter nyadi penginjil, Jesus madah ngagai iya: “Anang takut.” (Bacha Luke 5:8-11.) Peter ukai takut enggau utai ke deka nyadi enti nyadi murid  Jesus. Tang, iya berasai tekenyit enggau pemayuh ikan ke diulih sida ketegal pengawa ajih Jesus. Peter ngasaika diri enda layak gawa enggau Jesus. Baka Peter, nuan engka berasai takut sereta irau lebuh nemu utai ke patut digaga enti deka nyadi penginjil. Enti nuan ngasaika nya, kemansangka pengerindu nuan ke Jehovah, Jesus, sereta orang bukai. Enggau nya, nuan deka keran agi nerima kangau Jesus nyadi penginjil.—Mat. 22:37, 39; Jhn. 14:15.

 6. Nama kebuah bukai ke meransang kitai nginjil?

⁶ Peratika kebuah bukai ke meransang kitai nginjil. Kitai deka ngasika pesan Jesus: “Bejalai . . . lalu gaga sida nyadi murid.” (Mat. 28:19, 20) Kitai mega nginjil laban orang “irau ati sereta nadai daya” lalu patut belajar pasal Perintah Petara. (Mat. 9:36) Jehovah deka semua orang nemu pasal pemendar lalu diselamatka.—1 Tim. 2:4.

 7. Baka ni Rome 10:13-15 nunjukka pengawa nginjil nya beguna?

⁷ Lebuh kitai mikirka baka ni pengawa nginjil ulih nyelamatka orang, kitai tentu diperansang ngereja pengawa nya. Enda baka orang berikan ke nyual tauka makai ikan ke diulih sida, kitai “ngulihka” orang ngambika ulih nyelamatka sida.—Bacha Rome 10:13-15; 1 Tim. 4:16.

8-9. Nama patut ditemu orang berikan, lalu nama kebuah?

⁸ Ba jeman Jesus, orang Israel ke berikan patut nemu bansa ikan ke tau ditangkap iya. (Lew. 11:9-12) Iya mega patut nemu dini alai ikan ulih ditemu. Ke suah agi, ikan rindu diau ba ai ke ngena ba sida sereta bisi mayuh pemakai. Indah maya orang berikan pansut nangkap ikan mega beguna. Peratika utai ke dipadah seiku menyadi Kristian ari Pulau Pasifik lebuh iya mai seiku pengerintis seberai tasik nangkap ikan. Ku pengerintis nya, “Aku betemu enggau nuan pukul 9 pagila.” Lalu saut menyadi nya, “Tua mupuk ba maya ti ngena nangkap ikan, ukai nitihka maya ti ngena ke tua.”

⁹ Pia mega, bala murid Jesus ba kurun keterubah nginjil nitihka maya sereta endur alai bisi mayuh orang. Ambika chunto, sida nginjil dalam Rumah Sembiang, balai gempuru, ari rumah ke rumah, sereta ba pasar. (SKR. 5:42; 17:17; 18:4) Nya alai, amat beguna enti kitai nemu ni maya orang ke bisi ba rumah tauka dini kitai ulih betemu enggau sida. Kitai patut sedia ngaga ubah ngambika ulih nginjil nitihka jam sereta ba endur kitai ulih betemu enggau mayuh orang.—1 Kor. 9:19-23.

10. Nama perengka ke udah disediaka gerempung Jehovah ke kitai?

¹⁰ Orang berikan begunaka perengka kena nangkap ikan lalu patut nemu ngena nya. Kitai mega begunaka perengka kena nginjil lalu patut nemu ngena nya enggau manah. Jesus meri iring chara nginjil ti nyemetak ngagai bala murid iya. Iya madah ngagai sida utai ke ulih dibai, dini alai nginjil, lalu nama patut disebut. (Mat. 10:5-7; Luk. 10:1-11) Kemayaharitu, gerempung Jehovah nyediaka Perengka Kena Ngajar lalu ngajar kitai chara ngena tiap iti perengka. c Latih ke diterima nulung kitai andal agi lebuh nginjil sereta belajar nyadi pengajar ke manah.—2 Tim. 2:15.

11. Nama kebuah kitai patut berani?

¹¹ Orang berikan patut berani. Kekadang  gaya hari nemu berubah, lalu kabut tau datai enggau enda disadang. Sida mega suah ngiga ikan maya malam hari. Kitai mega begunaka pemerani. Lebuh kitai berengkah nginjil sereta madahka diri Saksi-Saksi Jehovah, kitai engka disakal diri sebilik tauka dikelese bala bakih. Bisi mega orang enggai ningaka pesan ke dibai kitai. Tang tu enda ngenyitka kitai. Jesus udah madah, iya deka nganjung bala murid iya nginjil ngagai orang ke deka ngelaban sida.—Mat. 10:16.

12. Nitihka Josua 1:7-9, nama ulih nulung kitai ngemansangka pemerani?

¹² Baka ni nuan ulih ngemansangka pemerani? Terubah, pechaya meh Jesus terus ngiring pengawa nginjil ari serega. (Jhn. 16:33; Pem. 14:14-16) Pengudah nya, tegapka pengarap nuan ngagai semaya Jehovah ke deka ngintu nuan. (Mat. 6:32-34) Majak nuan negapka pengarap diri, majak agi nuan nyadi berani. Peter enggau bala bakih iya ngayanka pengarap ti besai lebuh sida ninggalka pengawa berikan lalu nitihka Jesus. Sama mega, nuan udah ngayanka pengarap ti besai lebuh madah ngagai diri sebilik sereta bala bakih, nuan benung belajarka Bup Kudus enggau Saksi-Saksi Jehovah lalu datai begempuru. Nuan mega tentu udah ngaga ubah ba ulah sereta chara idup ngambika sejalai enggau standard Jehovah. Tu mega begunaka pengarap sereta pemerani. Lebuh nuan ngemansangka pemerani, nuan ulih andal  ‘Jehovah Petara nuan bisi enggau nuan di sebarang endur nuan bejalai.’—Bacha Josua 1:7-9.

13. Baka ni belemati sereta besampi nulung nuan ngemansangka pemerani?

¹³ Nama chara bukai ngemansangka pemerani? Besampi meh minta pemerani. (SKR. 4:29, 31) Jehovah deka nyaut sampi nuan lalu enda ninggalka nuan. Iya deka terus nyukung nuan. Kelimpah ari nya, nuan ulih belematika chara Jehovah nyelamatka nembiak Iya kelia menya. Pikirka baka ni Iya udah nulung nuan mutarka penanggul sereta meri nuan pengering ngaga ubah ba pengidup. Enti Jehovah ulih ngelepaska bala nembiak Iya ba Tasik Mirah, Iya tentu ulih nulung nuan nyadi murid Kristus. (P-sut. 14:13) Nuan mega ulih ngembuan pengarap ti sama enggau pemasmur ke madahka: ‘Aku enda takut laban Jehovah bisi ngimbai aku. Nama utai ti ulih dikereja orang ngagai aku?’—Mas. 118:6.

14. Nama ulih dipelajarka kitai ari Menyadi Masae sereta Menyadi Tomoyo?

¹⁴ Siti agi chara ngemansangka pemerani iya nya, belajar baka ni Jehovah nulung nembiak Iya ke malu nyadi berani. Pikirka peneleba menyadi Kristian indu ke benama Masae. Iya orang ke malu lalu ngasaika diri tusah deka nginjil. Ba iya, bejaku enggau orang ke enda dikelala amat tusah, sempama baka niki dinding ti amat tinggi, lalu ngumbai diri enda ulih ngereja nya. Tang, iya enggau naka ulih ngemansangka pengerindu ke Jehovah sereta orang bukai. Iya belemati pasal kebuah pengawa nginjil patut digaga enggau lengkas diatu lalu besampi ngambika iya keran agi deka nginjil. Iya mujur mutarka asai ati iya ti takut, indah nyadi pengerintis biasa. Jehovah mega ulih nulung penginjil ti baru nyadi “berani.” Peratika peneleba menyadi Kristian indu ke benama Tomoyo. Lebuh iya berengkah nginjil ari rumah ke rumah, orang ke bempu rumah keterubah ditemu iya nganu: “Aku enggai bejaku enggau Saksi-Saksi Jehovah!” lalu nikup pintu enggau balat. Tomoyo enda takut lalu madah ngagai kaling nginjil iya: “Bisi nuan ninga? Iya empu udah nemu aku Saksi-Saksi Jehovah, enda ibuh aku madah ngagai iya. Aku amat gaga ati!” Tomoyo diatu nyadi pengerintis biasa.

15. Lebuh kitai ngasaika pengawa nginjil nya tusah, baka ni kitai ulih nunda orang berikan? Nama kebuah nya beguna ke orang Kristian?

¹⁵ Orang berikan ti mujur bebendar nembuka pengawa ke patut digaga. Ambika chunto, enti sida bedagang, sida patut nentuka diri ulih tumu dani, enda ngetu gawa nyentukka pengawa sida tembu, sereta neruska pengawa taja pan napi gaya hari ti enda manah. Kitai mega ulih nunda orang berikan ngambika ulih betan lalu nembuka pengawa.—Mat. 10:22.

16. Nama ulih nulung kitai ngereja siti-siti pengawa ke engka tusah digaga kitai?

¹⁶ Kitai rindu ngereja pengawa ngena chara ti senang. Tang kekadang, pengawa ti beguna nya tusah dikereja. Nya alai, kitai patut belajar kualiti nagang diri. Kitai begunaka bantu ngambika ulih matih diri nembuka siti-siti pengawa, taja pan engka tusah digaga kitai. Jehovah meri roh kudus Iya kena mantu kitai.—Gal. 5:22, 23.

17. Nitihka 1 Korint 9:25-27, nama dipadah rasul Paul pasal utai ke patut dikereja iya kena ngemansangka disiplin diri?

¹⁷ Rasul Paul mega bebendar ngereja utai ti ngena. Tang iya bisi madah, iya patut “mandam” tubuh diri ngambika ulih bisi  disiplin diri. (Bacha 1 Korint 9:25-27.) Iya meransang orang bukai disiplin diri empu lalu ngereja utai “enggau menyana sereta meruan atur magang.” (1 Kor. 14:40) Kitai mega patut enggau naka ulih terus nyembah Jehovah, nyengkaum seruran nginjil sereta ngajar orang Bup Kudus.—SKR. 2:46.

18. Nama kebuah Jehovah ulih ngumbai kitai mujur?

¹⁸ Orang berikan dikumbai mujur enti iya bulih mayuh ikan. Tang pemujur kitai ba pengawa nginjil ukai bepanggai ba pemayuh orang ke ditulung kitai nyadi Saksi-Saksi Jehovah. (Luk. 8:11-15) Seagi-agi kitai terus nginjil sereta ngajar orang Bup Kudus, Jehovah ngumbai kitai mujur ba pengawa nya. Nama kebuah? Laban kitai ngasika Jehovah sereta Anak Iya.—Mrk. 13:10; SKR. 5:28, 29.

19-20. Nama kebuah bukai kitai deka ransing nginjil diatu?

¹⁹ Ba sekeda menua, pengawa berikan semina dipejalaika ba sekeda bulan aja. Ketegal nya, orang berikan deka ransing agi nangkap ikan seraya sida nyau semak enggau pengujung timpuh nya. Kemayaharitu, pengujung dunya nyau majak semak! Semina bisi mimit aja awak kena kitai bekunsika berita manah ti ulih nyelamatka nyawa. Aram meh kitai ransing agi ba pengawa nginjil! Anang betangguh tauka nganti gaya idup ti manah agi sebedau mutuska deka enggau ba pengawa ke beguna tu.—P-jar. 11:4.

²⁰ Diatu meh maya kitai ngemansangka pengeran deka nginjil, ngenalamka agi penemu pasal Bup Kudus, ngemansangka pemerani, sereta bebendar nembuka pengawa. Lebuh nuan sama gawa enggau lebih ari lapan juta iku nembiak Jehovah ke nusui berita manah di serata dunya, nuan deka ngasaika pengaga ati ke diberi Jehovah. (Neh. 8:10) Enggau naka ulih meh ngereja pengawa nginjil nyentukka Jehovah madah pengawa tu udah tembu. Ba artikel pengudah tu, kitai deka berandauka tiga iti chara kitai ulih ngemansangka pengeran kitai terus nusui berita manah pasal Perintah Petara.