1-2. (a) Nama sekeda utai ke engka ngasuh bala nembiak Jehovah berasai kakang ati? (b) Nama deka dikerandauka kitai dalam artikel tu?

 SEMUA kitai, enda ngira tuai tauka biak, kekadang berasai kakang ati. a Peratika tiga iti chunto tu. Siku nembiak engka berunding sekalika Jehovah amat ibuhka iya. Ketegal nya, iya kakang ati deka dibaptisa. Siku menyadi lelaki milih ngenuluka peneka Perintah Petara lebuh iya agi biak, ari ke ngenuluka kereja sekular. Tang diatu iya engka berunding sekalika pemutus ke digaga iya suba betul tauka enda, laban duit iya semina chukup-chukup aja kena nyediaka utai ke diguna diri sebilik iya. Siku menyadi indu ke udah tuai enda agi kering baka suba. Iya engka berasai asa ati laban enda ulih ngereja utai ke ulih dikereja iya suba. Baka ni enggau nuan? Kati nuan kala ngembuan runding ke baka tu: ‘Kati Jehovah ibuhka aku? Kati pengorbanan ke udah digaga aku ke Jehovah berbaloi? Kati aku agi beguna ba Jehovah?’

² Enti kitai enda ngiga saut ngagai tanya ke baka tu, tu ulih ngasuh kitai lenyau pengarap ngagai Jehovah, indah badu agi nyembah Iya. Nyadi dalam artikel tu, kitai deka beratika baka ni Bup Kudus ulih nulung kitai enti kitai kakang ati sekalika (1) Jehovah ibuhka kitai tauka enda, (2) pemutus ke digaga kitai  suba betul tauka enda, sereta (3) kitai agi beguna ba Jehovah tauka enda.

CHARA MUTARKA ASAI ATI TI KAKANG

 3. Nama siti chara kitai ulih mutarka asai ati ti kakang?

³ Siti chara kitai ulih mutarka asai ati ti kakang, iya nya ngiga saut ke tanya kitai dalam Bup Kudus. Enti kitai ngereja nya, pengarap sereta kaul kitai enggau Jehovah deka majak tegap, lalu kitai ulih “bepegai rat ba pengarap” kitai.—1 Kor. 16:13.

 4. Baka ni kitai ulih ‘meresa semua utai’? (1 Tesalonika 5:21)

⁴ Bacha 1 Tesalonika 5:21. Bup Kudus meransang kitai ‘meresa semua utai.’ Baka ni kitai ulih ngereja nya? Lebuh kitai enda entu pasti pasal sesiti utai, kitai patut meresa dulu utai ke dipadah Bup Kudus bekaul enggau pekara nya. Ambika chunto, peratika nembiak tadi ke kakang ati sekalika Jehovah amat ibuhka iya tauka enda. Ketegal iya bisi runding tu, kati iya patut terus ngumbai Jehovah endang enda ibuhka iya? Tentu enda. Iya patut ‘meresa semua utai.’ Iya ulih ngereja nya enggau belajarka Bup Kudus ngambika iya ulih nemu runding Jehovah ti bendar pasal iya.

 5. Baka ni kitai ulih tetemuka saut Jehovah ke tanya kitai?

⁵ Lebuh kitai macha Bup Kudus, nya baka ke Jehovah benung bejaku ngagai kitai. Tang enti kitai deka nemu saut Jehovah ke tanya kitai, kitai patut ngereja lebih agi ari ke semina macha Bup Kudus. Kitai patut mansik utai ke bekaul enggau topik nya ngambika kitai ulih tetemuka saut ke bepelasarka Bup Kudus. Kitai ulih ngena mayuh perengka mansik ke udah disediaka gerempung Jehovah. (J-lam. 2:​3-6) Kitai ulih besampi minta Jehovah nulung kitai ngiga saut ke tanya kitai. Udah nya, kitai ulih ngiga prinsip Bup Kudus enggau penerang ke ulih nulung ba situasi kitai. Kitai mega tau bulih penguntung lebuh kitai beratika cherita dalam Bup Kudus pasal sida ke napi situasi ti sama enggau kitai.

 6. Baka ni gempuru nulung kitai mutarka asai ati kitai ti kakang?

⁶ Lebuh kitai belajarka Bup Kudus ba gempuru, tu mega baka Jehovah benung bejaku enggau kitai. Enti kitai datai ngagai gempuru enggau tetap, kitai ulih tetemuka saut ti nyemetak ke tanya kitai. Ambika chunto, saut nya engka bisi ba cheramah tauka komen bala menyadi. (J-lam. 27:17) Diatu, kitai deka beratika utai ke ulih nulung kitai tetemuka saut ngagai sekeda tanya ke ngasuh kitai kakang ati.

LEBUH NUAN KAKANG ATI ENTI JEHOVAH IBUHKA NUAN

 7. Nama tanya ke engka dikembuan sekeda orang?

⁷ Kala nuan berundingka tu: ‘Kati Jehovah amat bisi beratika aku?’ Enti nuan ngasaika diri enda penting, nuan engka ngumbai diri enda ulih nyadi kaban Petara ke ngaga semua utai. Raja David mega kala berundingka utai ti sama. Iya ngumbai nya ngalitka ati laban Jehovah ibuhka mensia. Nya kebuah iya nanya: ‘O Jehovah, sapa mensia alai Nuan deka ibuhka sida? Sapa anak mensia, alai Nuan deka ibuhka sida?’ (Mas. 144:3) Enti nuan mega kala berundingka tanya nya, dini nuan ulih tetemuka saut iya?

 8. Nitihka 1 Samuel 16:​6, 7, 10-12, nama utai ti diperatika Jehovah ba orang?

⁸ Bup Kudus ngajar kitai, Jehovah beratika sida ke dikumbai orang enda penting. Ambika chunto, Jehovah nganjung Samuel ngagai Jesi kena milih siku ari anak lelaki iya nyadi raja orang Israel. Jesi mai tujuh ari lapan iku anak lelaki iya betemu enggau Samuel. Tang iya enda mai David, anak iya ti pemadu  biak. b Taja pia, David meh ke dipilih Jehovah. (Bacha 1 Samuel 16:​6, 7, 10-12.) Jehovah beratika sapa David kebendar iya. Iya nemu nembiak lelaki tu amat rinduka Iya.

 9. Nama kebuah nuan ulih yakin Jehovah ibuhka nuan? (Peda mega gambar.)

⁹ Perundingka chara Jehovah udah nunjukka Diri amat bisi beratika nuan. Iya meri nuan jaku lalau ti pemadu manah, ke ngena enggau situasi nuan. (Mas. 32:8) Tu nunjukka Iya amat nemu utai ti diguna nuan. (Mas. 139:1) Lebuh nuan ngasika jaku lalau Jehovah lalu meda baka ni nya nulung nuan, nuan deka yakin agi Jehovah ibuhka nuan. (1 Ban. 28:9; SKR. 17:​26, 27) Jehovah beratika usaha nuan. Iya mega beratika sifat nuan ti manah lalu deka nyadi kaban nuan. (Jer. 17:10) Lalu, Iya tentu deka gaga ati enti nuan deka nyadi kaban Iya.—1 Jhn. 4:19.

LEBUH NUAN KAKANG ATI PASAL PEMUTUS KE DIGAGA NUAN SUBA

10. Lebuh kitai berundingka pemutus ke digaga kitai suba, nama tanya ke engka dikembuan kitai?

¹⁰ Kekadang, sekeda orang engka ngenang baru pemutus ke digaga sida suba. Sida engka berasai kakang ati sekalika sida udah ngaga pemutus ti betul tauka enda. Sida engka ninggalka kereja ti manah ke begaji besai, tauka ngaga pemutus enda ngembuan bisnis ti besai ngambika ulih ngereja mayuh agi ke Jehovah. Tang diatu, betaun-taun udah belalu. Sida meda sekeda orang ke dikelala sida, ke udah ngaga pemutus ti enda sama enggau sida, ngembuan mayuh agi duit sereta idup enggau selesa agi. Ketegal nya, sida engka berunding: ‘Kati pemutus aku ti deka gawa mayuh agi ke Jehovah suba nya pemutus ti pemadu  manah? Tauka kati aku patut bebendar gawa suba ngambika ulih ngembuan mayuh agi duit diatu?’

11. Nama utai ke ngachau runding penulis Masmur 73?

¹¹ Enti nuan bisi tanya ti sama, perundingka utai ti dipadah Bup Kudus pasal penulis Masmur 73. Iya beratika orang ke enda nyembah Jehovah nya gerai, kaya, lalu baka ke nadai penanggul. (Mas. 73:​3-5, 12) Lebuh iya meda pengidup sida baka ke manah agi, tu ngasuh iya berunding pemutus iya ke nyembah Jehovah nya enda berbaloi. Runding ke ngasaka ati tu ngasuh iya “natka pemerinsa sepemanjai hari.” (Mas. 73:​13, 14) Baka ni iya mutarka asai ati ti negatif tu?

12. Nitihka Masmur 73:​16-18, baka ni pemasmur nya mutarka asai ati iya ti negatif?

¹² Bacha Masmur 73:​16-18. Pemasmur nya ngagai Rumah Jehovah ti kudus. Ba dia, dikelingi bala nembiak Jehovah, iya ulih berunding enggau manah. Iya faham, taja pan sekeda orang bisi pengidup ti selesa, tang sida nadai ngembuan harapan ke jemah ila. Tu nulung iya enda agi berasai asa ati. Iya andal, pemutus iya ti deka ngenuluka Jehovah ba pengidup nya pemutus ti pemadu manah, lalu iya keran agi deka terus nyembah Jehovah.—Mas. 73:​23-28.

13. Nama ulih digaga nuan enti nuan asa ati ketegal sekeda pemutus ke digaga nuan suba? (Peda mega gambar.)

¹³ Baka pemasmur tadi, nuan mega ulih mutarka asai ati ti negatif. Baka ni nuan ulih ngereja nya? Perundingka semua utai ti manah ke dikembuan nuan, nyengkaum berekat ari Jehovah. Lalu kingatka mega, sida ke enda nyembah Jehovah nadai nerima tulung ari Iya. Ba mayuh ari sida, utai ti pemadu penting nya ngembuan kereja ti manah  sereta pengidup ti nyamai ba dunya tu, laban sida ngumbai pengidup sida naka tu aja. Tang nuan ukai semina nerima mayuh pemeri ari Jehovah diatu, tang Jehovah mega besemaya deka meri nuan mayuh agi utai ti manah jemah ila. (Mas. 145:16) Pia mega, perundingka tu: Enti sema nuan ngaga pemutus ti bebida suba, nuan agi enda nemu nama kesan pemutus nya ba pengidup nuan diatu. Tang, bisi siti utai ke ulih ditemu nuan: Lebuh nuan ngaga pemutus bepelasarka pengerindu nuan ke Jehovah enggau ke orang bukai, nuan deka seruran bisi utai ba pengidup nuan ke ngasuh nuan amat gaga ati.

LEBUH NUAN NGUMBAI DIRI ENDA BEGUNA BA JEHOVAH

14. Nama sekeda situasi ke ditapi bala menyadi, lalu nama tanya ke engka diperundingka sida?

¹⁴ Sekeda bala nembiak Jehovah enda ulih ngereja mayuh baka ke dikedekaka sida. Sida engka udah tuai, sakit, tauka bisi penanggul ba pengerai ke bukai. Tu engka udah ngasuh sida ngumbai diri enda berega ba mata Jehovah. Sida engka berunding: ‘Kati aku agi beguna ba Jehovah?’

15. Nama utai ke dikeandalka penulis Masmur 71?

¹⁵ Penulis Masmur 71 mega bisi asai ati ti sama laban iya nyau lemi. Iya besampi: “Anang ninggalka aku ketegal aku nyau lemi.” (Mas. 71:​9, 18) Taja pan iya ngasaika diri lemi tang iya andal, enti iya enggau tetap ati gawa ke Jehovah, Jehovah deka ngiring sereta nyukung iya. Baka ke dipelajarka pemasmur nya, Jehovah gaga ati enggau sida ke bebendar gawa ke Iya taja pan bisi pengelemi.—Mas. 37:​23-25.

16. Baka ni bala menyadi ke udah tuai agi ulih ngereja utai ke Jehovah? (Masmur 92:​12-15)

¹⁶ Bala menyadi ke udah tuai, perundingka asai ati Jehovah pasal nuan. Iya ulih nulung nuan terus nyembah Iya enggau tetap ati, taja pan pengering nuan majak kurang. (Bacha  Masmur 92:​12-15.) Ari ke kelalu berundingka utai ke enda ulih dikereja nuan agi, perundingka meh utai ke ulih dikereja nuan. Ambika chunto, nuan ulih negapka bala menyadi ke bukai ari teladan nuan ti tetap ati sereta pengibuh ke diayanka nuan. Nuan ulih madahka sida baka ni Jehovah udah betaun-taun nyukung nuan. Nuan mega ulih bekunsi ngagai sida pasal harapan ke jemah ila ti dianti nuan. Pia mega, ingat meh, sampi nuan ke orang bukai amat bekuasa. (1 Pet. 3:12) Enda ngira nama situasi ke ditapi kitai, semua kitai ulih ngereja utai ke Jehovah enggau ke orang bukai.

17. Nama kebuah kitai enda patut mandingka diri empu enggau orang bukai?

¹⁷ Enti nuan berasai asa ati ketegal enda ulih ngereja mayuh agi ke Jehovah, andal meh sebarang utai ke ulih dikereja nuan ke Jehovah nya berega ba Iya. Nuan engka mandingka utai ke ulih dikereja nuan enggau orang bukai. Tang anang meh ngereja nya. Nama kebuah? Laban Jehovah enda mandingka nuan enggau orang bukai. (Gal. 6:4) Ambika chunto, Maria meri Jesus minyak wangi ti mar amat rega. (Jhn. 12:​3-5) Tang siku indu ke balu sereta seranta, nepuka dua singkap duit seling ke mimit amat rega ba Rumah Sembiang. (Luk. 21:​1-4) Jesus nadai kala mandingka dua iku indu tu. Tang iya ngumbai pemeri ke diberi seduai iya nya ngayanka pengarap. Jesus neladan Apai iya enggau sempurna. Nyadi nuan ulih andal, lebuh nuan ngereja utai ke Jehovah ketegal nuan arap sereta rinduka Iya, Jehovah meda semua utai nya. Jehovah ngumbai semua utai ke digaga nuan ke Iya amat berega, taja pan nuan engka ngumbai nya mit aja.

18. Nama deka nulung kitai mutarka asai ati ti kakang? (Peda mega kutak “ Jaku Jehovah Ulih Nulung Nuan Mutarka Asai Ati ti Kakang.”)

¹⁸ Semua kitai kekadang bisi asai ati ti kakang. Tang baka ke udah dipelajarka kitai, Bup Kudus ulih nulung kitai mutarka asai ati nya. Nyadi, lebuh nuan bisi pengirau, giga meh saut ari Bup Kudus. Enti nuan ngereja nya, nuan deka andal agi lalu enda irau. Kingatka meh, Jehovah nemu semua utai pasal nuan. Iya beterima kasihka pengorbanan nuan ngambika ulih ngenuluka Iya ba pengidup nuan. Iya keran deka merekatka nuan. Nyadi andal meh, Jehovah rindu sereta ibuhka tiap iku nembiak Iya ti setia.