1. Nama sekeda utai ke udah diberi Jesus ngagai kitai?

 NADAI mensia ti lebih agi gerah jari ari Jesus. Maya ba dunya, Jesus suah ngaga kereja ajih kena nulung orang bukai. (Luk. 9:​12-17) Iya mega meri pemeri ti pemadu besai lebuh iya nyerahka nyawa iya ke kitai. (Jhn. 15:13) Kenyau ari maya Jesus diangkatka idup baru, iya terus nulung kitai. Baka ke udah disemayaka iya, iya udah minta Jehovah meri kuasa kudus kena ngajar sereta ngelantangka ati kitai. (Jhn. 14:​16, 17, nota kaki; 16:13) Lalu nengah gempuru kitai, Jesus terus meri utai ke diguna kitai ngambika ulih ngaga murid ba serata dunya.—Mat. 28:​18-20.

 2. Nitihka Epesus 4:​7, 8, sapa ke diberi Jesus nyadika “pemeri”?

² Peratika siti agi pemeri ari Jesus. Rasul Paul nulis, pengudah Jesus niki ke serega, iya “meri [bala menyadi lelaki] nyadika pemeri.” (Bacha Epesus 4:​7, 8.) Paul nerangka, Jesus meri bala menyadi lelaki tu kena nulung raban gempuru nengah mayuh macham chara. (Eps. 1:​22, 23; 4:​11-13) Kemayaharitu, bala menyadi lelaki tu nyengkaum penulung gempuru, tuai gempuru, enggau tuai ti ngabas. a Endang amat, bala menyadi lelaki tu enda sempurna. Nyadi, sida tentu bisi ngaga penyalah. (Jas. 3:2) Tang Tuan kitai, Jesus Kristus, ngena bala menyadi lelaki ti berega tu nulung kitai.

 3. Baka ni kitai ulih nyukung pengawa bala menyadi lelaki ke dipilih? Padahka siti sempama.

³ Jesus meri bala menyadi lelaki tu pengawa ti penting, iya nya negapka raban gempuru. (Eps. 4:12) Tang semua kitai mega ulih nulung sida bejalaika tanggung pengawa ti penting nya. Kitai  ulih nyemaka tu baka pengawa nirika Palan Gempuru. Sekeda ngereja pengawa nirika bengunan nya. Ke bukai nyukung pengawa nya enggau nyediaka pemakai, perengka pengangkut, tauka utai bukai. Baka nya mega, semua kitai ulih nyukung usaha bala penulung gempuru, tuai gempuru, enggau tuai ti ngabas nengah utai ti disebut sereta dikereja kitai. Aram kitai beratika baka ni kitai tau bulih penguntung ari usaha sida, sereta baka ni kitai ulih ngayanka asai beterima kasih ngagai sida enggau Jesus Kristus, ke meri sida nyadika pemeri.

BALA PENULUNG GEMPURU NULUNG “NGEREJA PENGAWA KE ORANG BUKAI”

 4. Nama sekeda chara bala penulung gempuru nulung orang bukai ba abad keterubah?

⁴ Ba abad keterubah, sekeda bala menyadi lelaki dipilih nyadi penulung gempuru. (1 Tim. 3:8) Sida tu meh ke engka “ngereja pengawa ke orang bukai” ke disebut Paul ba 1 Korint 12:28. Nyadi, bala penulung gempuru ngereja mayuh pengawa ti penting sereta praktikal ngambika bala tuai gempuru ulih betumpu ba pengawa ngajar sereta meransang bala menyadi. Ambika chunto, bala penulung gempuru tu engka bisi nulung ngupi ayat Bup Kudus tauka meli utai kena ngaga salinan nya.

 5. Nama sekeda pengawa ke dikereja bala penulung gempuru kemayaharitu?

⁵ Perundingka sekeda pengawa ti penting ke dikereja bala penulung gempuru ba raban gempuru nuan. (1 Pet. 4:10) Sida engka diasuh ngatur akaun raban gempuru tauka peta nginjil, ngudar litaricha ke raban gempuru, nyaga perengka audio video, nyadi atendan, tauka nulung meresi sereta nyeruri Palan Gempuru. Semua pengawa tu amat penting. Ketegal nya, bala menyadi ulih gaga ati begempuru, lalu pengawa nginjil mega ulih dipejalaika enggau chara ti teratur. (1 Kor. 14:40) Kelimpah ari nya, sekeda penulung gempuru mega ngenataika begian ba Gempuru Pengidup enggau Pengawa Kristian sereta meri cheramah ke orang mayuh. Siku penulung gempuru mega engka dipilih kena nulung tuai raban. Kekadang, penulung gempuru ti layak mega engka diasuh enggau tuai gempuru ngabas sereta meransang bala menyadi.

 6. Nama sekeda kebuah kitai beterima kasihka pengawa ke dikereja bala penulung gempuru?

⁶ Baka ni utai ke dikereja bala penulung gempuru mai penguntung ngagai raban gempuru? Beberly, b siku menyadi indu ba Bolivia madahka: “Ketegal utai ke digaga bala penulung gempuru, aku ulih gaga ati begempuru. Aku ulih belagu, meri komen, ningaka cheramah, sereta belajar ari video enggau gambar. Sida nyaga pengelikun bala menyadi ke datai ngagai Palan Gempuru sereta nentuka bala menyadi ke enda ulih enggau gempuru betunga mua, ulih enggau gempuru nengah konferen video. Pengudah gempuru, sida nulung enggau pengawa meresi, ngatur akaun, sereta nentuka kitai bisi litaricha ke diguna kitai. Aku amat beterima kasihka sida!” Leslie, bini siku tuai gempuru, ba Colombia madahka: “Laki aku begunaka tulung ari bala penulung gempuru. Enti sida nadai, iya deka sibuk agi. Nyadi, aku beterima kasih laban sida amat ransing sereta sanggup nulung.” Semua kitai tentu amat beterima kasih ketegal utai ke dikereja bala penulung gempuru.—1 Tim. 3:13.

 7. Baka ni kitai ulih ngayanka diri beterima kasih ngagai bala penulung gempuru? (Peda mega gambar.)

⁷ Taja pan kitai engka berasai beterima kasih ke utai ti digaga bala penulung gempuru, tang Bup Kudus meransang kitai: “Ayanka diri beterima kasih.” (Kol. 3:15) Kristofer, siku tuai gempuru ba Finland, madahka chara iya ngayanka diri beterima kasih: “Aku nganjung kad tauka mesej. Aku nulis ayat Bup Kudus, lalu nyebut utai ti dipadah tauka dikereja penulung  gempuru nya ke meransang aku, tauka kebuah aku beterima kasihka utai ti digaga iya.” Pascal enggau Jael, ke diau ba New Caledonia, suah besampika bala penulung gempuru. Pascal madahka: “Baru-baru tu, kami suah besampika bala penulung gempuru. Kami meri terima kasih ngagai Jehovah ketegal tulung sida. Lalu kami mega minta Jehovah nulung bala menyadi tu.” Jehovah ningaka sampi ke baka nya. Lalu asil iya, semua bala menyadi deka bulih penguntung.—2 Kor. 1:11.

BALA TUAI GEMPURU “BEBENDAR GAWA BA BALA KITA”

 8. Nama kebuah Paul madahka, bala tuai gempuru ba abad keterubah “bebendar gawa”? (1 Tesalonika 5:​12, 13)

⁸ Bala tuai gempuru ba abad keterubah bebendar gawa ke raban gempuru. (Bacha 1 Tesalonika 5:​12, 13; 1 Tim. 5:17) Baka ni sida ngereja nya? Sida ngiring ba gempuru sereta ngaga pemutus ke raban gempuru. Sida mega meri bala menyadi jaku lalau ti bepengerindu ngambika bala menyadi ulih mengkang tegap ba pengarap. (1 Tes. 2:​11, 12; 2 Tim. 4:2) Endang amat, bala menyadi lelaki tu mega bebendar gawa kena nyediaka utai ke diguna diri sebilik sereta nentuka pengarap enggau kaul sida enggau Jehovah mengkang tegap.—1 Tim. 3:​2, 4; Tit. 1:​6-9.

 9. Nama sekeda tanggungjawap ke dikembuan bala tuai gempuru kemayaharitu?

⁹ Kemayaharitu, bala tuai gempuru bisi mayuh tanggungjawap. Ambika chunto, sida nyadi penginjil. (2 Tim. 4:5) Sida ransing ngulu ba pengawa nginjil, ngatur pengawa nginjil ba endur sida, sereta ngelatih kitai ngambika ulih nginjil sereta ngajar enggau manah agi. Sida mega nyadi hakim ti pengasih sereta adil. Lebuh menyadi ba raban gempuru ngereja dosa ti besai, bala tuai gempuru bebendar nulung iya ngaduka baru kaul iya enggau Jehovah. Ba maya ti sama, sida deka nentuka raban gempuru mengkang tuchi. (1 Kor. 5:​12, 13; Gal. 6:1) Tang tanggungjawap sida ti pemadu penting, iya nya nyadi pengibun bedus. (1 Pet. 5:​1-3) Sida meri cheramah Bup Kudus ti disediaka enggau manah, bebendar ngelala tiap iku orang ba raban gempuru, sereta ngabas enggau meransang bala menyadi. Sekeda tuai gempuru mega nulung ba pengawa niri enggau nyeruri Palan Gempuru, ngatur konvensyen, nulung ba Komiti Besilih Penemu Sepital enggau Raban Ngabas Orang Sakit, sereta pengawa ke bukai. Amat, bala tuai gempuru bebendar gawa ke kitai!

10. Nama sekeda kebuah kitai beterima kasihka bala tuai gempuru kitai ti bagas gawa?

¹⁰ Jehovah madahka, bala pengibun bedus tauka bala tuai gempuru deka nyaga kitai enggau manah, lalu kitai “nadai agi nangi tauka takut.” (Jer. 23:4) Tu meh utai ti diasaika siku menyadi indu ba Finland ke benama Johanna, pengudah indai iya balat sakit. Ku iya madahka: “Aku tusah deka madahka asai ati enggau pengirau aku ngagai orang bukai. Tang siku tuai gempuru ke enda entu dikelala aku, amat sabar ningaka aku lebuh aku madahka pengirau aku. Iya besampi enggau aku, lalu ngasuh aku andal, Jehovah rinduka aku. Aku enda entu ingat utai ti disebut iya, tang utai ti dikingatka aku, iya nya aku enda agi berasai takut. Aku pechaya, Jehovah meh ke nganjung iya kena nulung aku ba maya ti chun.” Baka ni bala tuai gempuru ba raban gempuru nuan udah nulung nuan?

11. Baka ni kitai ulih nunjukka diri beterima kasihka bala tuai gempuru? (Peda mega gambar.)

¹¹ Jehovah dekaka kitai ngayanka asai ati ti beterima kasih ngagai bala tuai gempuru “ketegal pengawa ke digaga sida.” (1 Tes. 5:​12, 13) Henrietta, ke mega diau ba Finland, madahka: “Bala tuai gempuru sanggup nulung bala menyadi bukai. Tang tu ukai reti iya, sida bisi mayuh  agi pengering enggau awak ari orang bukai tauka sida nadai penanggul ba pengidup sida. Nyadi, kekadang aku madah ngagai sida: ‘Aku semina ka nuan nemu, nuan siku tuai gempuru ti amat manah!’” Sera, siku menyadi indu ba Türkiye c madahka: “Bala tuai gempuru begunaka peransang ngambika ulih neruska pengawa sida. Nyadi, kitai ulih meri sida kad, mai sida makai begulai, tauka enggau sida nginjil.” Kati bisi tuai gempuru ke amat dihargai nuan ketegal pengawa iya? Giga meh chara ngayanka terima kasih ngagai iya.—1 Kor. 16:18.

TUAI TI NGABAS NGERINGKA RABAN GEMPURU

12. Nama atur ke bukai ke dikena Jesus ngeringka raban gempuru ba abad keterubah? (1 Tesalonika 2:​7, 8)

¹² Jesus mega ngatur sekeda menyadi lelaki nulung raban gempuru nengah chara bukai. Di baruh iring iya, bala tuai gempuru ba Jerusalem nganjung Paul, Barnabas, sereta menyadi lelaki ke bukai nyadi tuai ti ngabas. (SKR. 11:22) Nama kebuah? Baka bala penulung gempuru enggau bala tuai gempuru ke dipilih kena ngeringka raban gempuru, bala tuai ti ngabas mega dipilih kena ngereja utai ti sama. (SKR. 15:​40, 41) Bala menyadi lelaki tu ngaga mayuh pengorbanan ngambika ulih ngereja pengawa tu. Kekadang sida indah sanggup berambunka nyawa diri ngambika ulih ngajar sereta meransang orang bukai.—Bacha 1 Tesalonika 2:​7, 8.

13. Nama sekeda tanggungjawap bala tuai ti ngabas?

¹³ Bala tuai ti ngabas patut mindah ngagai mayuh endur. Kekadang pengudah ngabas siti raban gempuru, sida patut mupuk ngagai raban gempuru ke bukai, ke beratus kilometer penyauh iya. Ninting minggu tuai ti ngabas meri beberapa iti cheramah, ngabas sereta meransang bala menyadi, ngiring aum  pengerintis, aum tuai gempuru, sereta gempuru sebedau nginjil. Iya mega nyediaka cheramah sereta ngatur gempuru besai enggau konvensyen. Iya ngajar ba sekula pengerintis sereta ngatur aum spesial enggau bala pengerintis ba pelilih iya. Kelimpah ari nya, kekadang pampang opis engka ngasuh iya ngereja sekeda pengawa ti penting ke patut dikereja enggau lengkas.

14. Nama sekeda kebuah kitai beterima kasihka bala tuai ti ngabas kitai ti bebendar gawa?

¹⁴ Baka ni raban gempuru bulih penguntung ari pengawa ti dikereja bala tuai ti ngabas? Siku menyadi lelaki ba Türkiye madahka: “Tiap kali tuai ti ngabas datai, aku diperansang ngena mayuh agi awak nulung bala menyadi aku. Aku udah betemu enggau mayuh tuai ti ngabas, tang aku nadai kala ngasaika sida kelalu kisuk tauka enggai bejaku enggau aku.” Johanna ke dipadah tadi, nginjil enggau siku tuai ti ngabas, tang maya nya sida nadai tetemuka orang ba rumah. Johanna madahka: “Aku deka seruran ingatka hari nya. Dua iku menyadi indu aku baru aja pindah ngagai endur bukai, lalu aku amat lelengauka seduai iya. Tuai ti ngabas nya meransang aku lalu nulung aku sedar, lebuh kitai gawa ke Jehovah, kitai engka jauh ari pangan diri. Tang nya semina sementara aja, laban ba dunya baru kitai bisi mayuh peluang begulai enggau pangan diri.” Mayuh ari kitai mega engka bisi kenangan ti manah pasal tuai ti ngabas ke udah nulung kitai.—SKR. 20:37–21:1.

15. (a) Sejalai enggau 3 John 5-8, baka ni kitai ulih ngayanka asai ati ti beterima kasih ngagai tuai ti ngabas? (Peda mega gambar.) (b) Nama kebuah kitai patut ngayanka asai ati ti beterima kasih ngagai bini menyadi lelaki ke dipilih, lalu baka ni kitai ulih ngereja nya? (Peda kutak “ Kingatka Bini Sida.”)

¹⁵ Rasul John meransang Gaius ngayanka pengerah jari ngagai bala menyadi lelaki ke datai ngeringka raban gempuru. Iya madah ngagai  Gaius: “Lebuh sida mupuk, tulung meh sida ngena chara ti ngelantangka ati Petara.” (Bacha 3 John 5-8.) Siti chara kitai mega ulih ngereja nya, iya nya mai tuai ti ngabas makai begulai. Kitai mega ulih nyukung atur nginjil maya penemuai iya. Leslie, ke bisi disebut tadi, ngayanka asai beterima kasih nengah chara bukai. Ku iya madah: “Aku besampi ngambika Jehovah nyediaka utai ti diguna sida. Aku enggau laki aku mega bisi nulis surat ngagai sida, lalu madahka baka ni penemuai sida udah nulung kami.” Kingatka meh, baka kitai, bala tuai ti ngabas mega bisi penanggul sereta nemu lelak. Kekadang sida engka sakit, irau pasal utai, sereta indah berasai asa ati. Engka jaku ti manah tauka pemeri ari nuan nya meh saut ngagai sampi tuai ti ngabas nuan.—J-lam. 12:25.

KITAI BEGUNAKA BALA MENYADI LELAKI KE ULIH NGIRING

16. Sejalai enggau Jaku-Dalam 3:​27, nama tanya ti ulih diperundingka bala menyadi lelaki?

¹⁶ Ba serata dunya, kitai begunaka mayuh agi bala menyadi lelaki kena ngiring raban gempuru. Enti nuan siku menyadi lelaki ke udah dibaptisa, kati nuan ulih nulung ba senentang tu? (Bacha Jaku-Dalam 3:27.) Kati nuan sanggup nyapai juluk ati nyadi penulung gempuru? Enti nuan udah nyadi penulung gempuru, kati nuan sanggup bebendar nyapai juluk ati gawa ke bala menyadi sebagai siku tuai gempuru? d Kati nuan ulih ngaga ubah ba pengidup nuan ngambika ulih enggau Sekula Penginjil Perintah Petara? Sekula tu deka ngelatih sereta nulung nuan ngambika ulih dikena Jesus enggau mayuh agi. Enti nuan ngasaika diri enda ulih ngereja semua tu, besampi meh ngagai Jehovah. Pinta meh kuasa kudus ari Iya kena nulung nuan ngereja sebarang tanggung pengawa ke diberi ngagai nuan.—Luk. 11:13; SKR. 20:28.

17. Nama ditemu kitai pasal Raja kitai Jesus Kristus, ke udah meri kitai bala menyadi lelaki kena ngiring kitai?

¹⁷ Nama ditemu kitai pasal Raja kitai Jesus Kristus, ke udah meri kitai bala menyadi lelaki kena ngiring kitai? Tu bukti ke nunjukka iya benung ngiring kitai ba hari ti penudi tu. (Mat. 28:20) Kitai amat beterima kasih laban kitai bisi siku Raja ti bepengerindu, gerah jari, sereta nemu utai ti diguna kitai, lalu meri bala menyadi lelaki kena nulung kitai. Nyadi, giga meh peluang ngayanka terima kasih ngagai bala menyadi lelaki ti bebendar gawa tu. Kelimpah ari nya, beterima kasih mega ngagai Jehovah, laban Iya meh ke meri “tiap iti pemeri ti manah sereta sempurna.”—Jas. 1:17.