1. Nama pemutus ke pemadu manah ke ulih digaga semua orang?

 KESUAH IYA, pemutus ke digaga apai indai ulih meri empas ti lama ngagai anak sida. Enti apai indai salah ngaga pemutus, tu ulih ngenusahka anak sida. Tang enti sida ngaga pemutus ti manah, tu ulih meri pengelantang ngagai pengidup anak sida. Endang amat, anak mega patut ngaga pemutus ti manah. Pemutus ti pemadu manah ke ulih digaga semua orang iya nya nyembah Jehovah, Apai ti bepengerindu.—Mas. 73:28.

 2. Nama pemutus ti manah ke digaga Jesus enggau apai indai iya?

² Josep enggau Maria keran deka nulung anak sida nyembah Jehovah, lalu pemutus ke digaga seduai iya nunjukka nyembah Jehovah nya utai ti pemadu beguna ba pengidup. (Luk. 2:40, 41, 52) Jesus mega ngaga pemutus ti manah ngambika ulih ngereja peneka Jehovah. (Mat. 4:1-10) Jesus mansang besai nyadi orang ke manah, taluk, sereta berani. Apai indai tentu temegah ati sereta gaga enti bisi anak baka Jesus.

 3. Nama tanya ke deka disaut ba artikel tu?

³ Ba artikel tu, kitai deka nyaut tiga iti tanya: Nama pemutus ti manah ke digaga Jehovah bekaul enggau Jesus? Nama ulih dipelajar apai indai Kristian ari pemutus ke digaga Josep enggau Maria? Nama ulih dipelajarka orang Kristian ke biak ari pemutus ke digaga Jesus?

 4. Nama pemutus ke digaga Jehovah bekaul enggau Anak Iya?

⁴ Jehovah milih apai indai ti manah ke Jesus. (Mat. 1:18-23; Luk. 1:26-38) Maria seiku indu ke amat rinduka Jehovah enggau Jaku Iya. Kitai nemu tu lebuh macha asai ati Maria ke ditulis dalam Bup Kudus. (Luk. 1:46-55) Lalu chara Josep nitihka iring ari Jehovah nunjukka iya rinduka Petara sereta deka ngelantangka ati Iya.—Mat. 1:24.

5-6. Jehovah nejuka Jesus napi nama?

⁵ Peratika Jehovah enda milih apai indai ti kaya ke Jesus. Pemeri ke diberi Josep enggau Maria pengudah Jesus ada nunjukka sida orang ti seranta. (Luk. 2:24) Ba Nasaret, Josep engka bisi muka kedai mit sepiak rumah iya. Ba dia iya betukang kayu. Sida engka enda mayuh duit tauka mayuh utai, kelebih agi maya Josep seduai Maria bisi lebih ari tujuh iku anak.—Mat. 13:55, 56.

⁶ Jehovah nyaga Jesus ari sekeda utai ke ulih nganu. Tang Iya nejuka Jesus napi sekeda penanggul. (Mat. 2:13-15) Ambika chunto, Jesus bisi kaban belayan ke enda arapka iya. Keterubah, sida enda nerima Jesus nya Messiah. Tu tentu ngasaka ati iya. (Mrk. 3:21; Jhn. 7:5) Pia mega, Josep engka udah nadai lebuh Jesus agi biak. Lalu tu tentu tusah ba iya. Laban iya anak tuai, iya patut nganti apai iya nyadi tukang kayu. (Mrk. 6:3) Seraya iya mansang besai, Jesus mega megai tanggung pengawa nyaga sida sebilik. Iya bebendar gawa ngambika ulih nyediaka utai ke diguna sida. Nya alai, Jesus nemu asai lelak pengudah gawa sepemanjai hari.

 7. (a) Nama tanya ke ulih nulung laki bini ngajar anak sida? (b) Baka ni Jaku Dalam 2:1-6 ulih nulung apai indai ngelatih anak sida?

⁷ Enti nuan udah kawin sereta deka bisi anak, tanya diri empu: ‘Kati aku orang ke baruh ati ke rinduka Jehovah sereta Jaku Iya? Kati Jehovah arapka aku megai tanggung pengawa nyadi apai indai?’ (Mas. 127:3, 4) Enti nuan apai indai, tanya diri empu: ‘Kati aku ngajar anak aku bagas gawa?’ (P-jar. 3:12, 13) ‘Kati aku enggau naka ulih nyaga anak aku ari utai ti tau nganu ba dunya Sitan?’  (J-lam. 22:3) Nuan enda ulih nyaga anak nuan ari semua penanggul ke deka ditapi sida. Tang nuan ulih nulung sida bepanggai ba Bup Kudus lebuh napi penanggul. (Bacha Jaku Dalam 2:1-6.) Ambika chunto, enti diri sebilik nuan badu nyembah Jehovah, tulung anak nuan meda ari Bup Kudus kebuah iya patut tetap ati ngagai Jehovah. (Mas. 31:23) Tauka enti orang ke dikesayauka nuan udah nadai, tunjuk ayat Bup Kudus ngagai anak nuan ke ulih nulung sida mutarka asai ati ti tusah sereta bulih pengelantang.—2 Kor. 1:3, 4; 2 Tim. 3:16.

 8. Nama iring ke diberi ba Ulang Adat 6:6, 7, ke dititihka Maria seduai Josep?

⁸ Josep enggau Maria ulih nulung Jesus ngelantangka ati Petara. Tu ketegal seduai iya nitihka iring ke diberi Jehovah ngagai apai indai. (Bacha Ulang Adat 6:6, 7.) Josep enggau Maria amat rinduka Jehovah, lalu juluk ati seduai iya nulung anak sida ngembuan pengerindu ti sama.

 9. Nama dikemeratka Josep enggau Maria?

⁹ Josep, Maria sereta anak sida nyembah Jehovah enggau tetap. Ninting minggu sida ngagai balai gempuru di Nasaret. Lalu ninting taun sida mansang ngagai Jerusalem ngintu Pengerami Paska. (Luk. 2:41; 4:16) Ba pejalai nya, seduai iya engka ngajar Jesus enggau menyadi iya pasal utai ke nyadi ngagai nembiak Jehovah kelia menya. Sida engka ngabas endur ke disebut ba Jaku Petara. Lebuh anak seduai iya majak nambah, Josep enggau Maria engka tusah deka nyembah Jehovah enggau tetap. Tang pengawa seduai iya diberekat Jehovah. Ketegal seduai iya ngenuluka Jehovah, diri sebilik sida ulih mengkang semak enggau Jehovah.

10. Nama ulih dipelajar apai indai Kristian ari Josep enggau Maria?

¹⁰ Nama ulih dipelajar apai indai Kristian ari Josep enggau Maria? Utai ti pemadu beguna nya, tunjuk ngagai anak nuan pengerindu nuan ngagai Jehovah ari jaku sereta ulah. Pemeri ti berega ke ulih diberi nuan ngagai sida iya nya, nulung sida rinduka  Jehovah. Ajar sida chara belajarka Bup Kudus, besampi, ngagai gempuru sereta nginjil enggau tetap. (1 Tim. 6:6) Endang amat, nuan patut nyediaka utai ke diguna sida. (1 Tim. 5:8) Tang kingatka, kaul anak nuan enggau Jehovah, ukai utai ti dikemisi sida, ke deka nulung sida selamat lebuh dunya Sitan dipunaska. b—Esk. 7:19; 1 Tim. 4:8.

11. (a) Baka ni jaku lalau ba 1 Timoti 6:17-19 ulih nulung apai indai ngaga pemutus ti manah lebuh sida ngemesaika anak? (b) Nama juluk ati ke ulih diperundingka kita sebilik, lalu nama berekat ke deka diulih? (Peda kutak “ Nama Juluk Ati Kita Sebilik?”)

¹¹ Kitai gaga ati meda mayuh apai indai Kristian ngaga pemutus ti manah, iya nya nulung anak sida semak enggau Jehovah. Sida begulai nyembah Jehovah enggau tetap. Sida datai begempuru, konvensyen sereta enggau pengawa nginjil. Sekeda ruang bilik ulih nginjil ngagai endur ke jarang alai nginjil. Sekeda ngelawa Betel tauka nulung ba pengawa nirika bengunan teokratik. Ruang bilik ke milih deka ngereja pengawa tu patut nanggung ungkus kediri empu, lalu tu engka tusah ba sida. Tang Jehovah deka merekatka sida! (Bacha 1 Timoti 6:17-19.) Bala anak ke dibesai ba ruang bilik ke baka tu deka terus ngereja pengawa manah lebuh sida mansang besai. Lalu sida gaga ati laban apai indai udah ngaga pemutus ti manah! c—J-lam. 10:22.

12. Nama patut digaga Jesus seraya iya mansang besai?

¹² Apai Jesus di serega seruran ngaga pemutus ti manah. Pia mega, apai indai iya ba dunya, ngaga pemutus enggau bepenemu-dalam. Tang lebuh Jesus mansang besai, iya patut ngaga pemutus diri empu. (Gal. 6:5) Baka kitai, Jesus mega ulih bibas milih. Iya ulih milih ngenuluka pengingin diri empu. Tang iya milih deka ngembuan kaul ti manah enggau Jehovah. (Jhn. 8:29) Baka ni teladan iya nulung bala nembiak kemayaharitu?

13. Nama pemutus ke digaga Jesus lebuh iya agi biak?

¹³ Lebuh Jesus agi biak, iya milih deka ngasika apai indai iya. Iya enda kala ngelaban jaku apai indai tauka ngumbai diri mayuh agi penemu ari sida. Tang iya terus “ngasika seduai iya.” (Luk. 2:51) Ketegal iya anak tuai, Jesus tentu bisi tanggung pengawa. Iya enggau naka ulih bejalaika tanggung pengawa iya. Iya enggau bagas belajar pengawa betukang ari Josep ngambika iya ulih nulung ngintu sida sebilik.

14. Baka ni kitai nemu Jesus belajarka Jaku Petara enggau manah?

 ¹⁴ Apai indai Jesus engka bisi madah pasal utai ti ngalitka ati lebuh iya ada sereta utai ke ditusui bala melikat pasal iya. (Luk. 2:8-19, 25-38) Tang ukai nya aja. Jesus mega belajarka Jaku Petara kediri empu. Jesus nemu Jaku Petara enggau manah nyentukka lebuh iya agi biak, bala pengajar ba Jerusalem ‘balat alit ati ninga penalam penemu enggau saut iya.’ (Luk. 2:46, 47) Taja pan iya semina 12 taun aja, Jesus udah nemu Jehovah nya “Apai” iya.—Luk. 2:42, 43, 49.

15. Baka ni Jesus nunjukka diri milih deka ngereja peneka Jehovah?

¹⁵ Lebuh Jesus nemu utai ke deka diasuh Jehovah gaga iya, iya nerima pengawa nya. (Jhn. 6:38) Iya nemu mayuh orang deka begedika iya. Taja pia, iya agi milih deka ngasika Jehovah. Lebuh Jesus dibaptisa ba taun 29 Masihi, utai ti pemadu berat ba iya nya ngereja peneka Jehovah. (Heb. 10:5-7) Indah lebuh iya nyau ka mati ba tiang perinsa, iya agi keran deka ngereja peneka Apai iya.—Jhn. 19:30.

16. Nama ulih dipelajar bala anak ari Jesus?

¹⁶ Ngasika apai indai nuan. Baka Josep enggau Maria, apai indai nuan mega enda sempurna. Taja pia, Jehovah udah meri sida tanggung pengawa nyaga, ngelatih sereta ngiring nuan. Enti nuan nitihka jaku lalau sereta bebasaka sida, nuan deka “mujur.”—Eps. 6:1-4.

17. Nitihka Josua 24:15, nama pemutus ke patut digaga bala nembiak kediri empu?

¹⁷ Sapa ke deka disembah nuan? Nuan patut nemu sapa Jehovah kebendar iya, tuju Iya sereta baka ni peneka Iya bisi kaul enggau pengidup nuan. (Rom. 12:2) Udah nya, nuan ulih ngaga pemutus ti pemadu beguna ba pengidup nuan, iya nya nyembah Jehovah. (Bacha Josua 24:15; P-jar. 12:1) Enti nuan macha sereta belajarka Bup Kudus enggau tetap, pengerindu nuan ke Jehovah deka nambah lalu pengarap nuan ke Iya majak tegap.

18. Nama pemutus ke patut digaga bala nembiak, lalu nama asil iya?

 ¹⁸ Milih deka ngenuluka peneka Jehovah ba pengidup nuan. Dunya Sitan deka nuan ngumbai, enti nuan ngena pengelandik ke penguntung diri empu, nuan deka gaga ati. Tang kebendar iya, sida ke angkunka reta deka ngachuk diri empu “ngena mayuh macham pemedis.” (1 Tim. 6:9, 10) Tang, enti nuan mendingka Jehovah sereta milih ngenuluka peneka Iya ba pengidup, nuan deka mujur sereta ngereja utai enggau bepenemu-dalam.—Jos. 1:8.

19. Nama patut dikingatka apai indai?

¹⁹ Apai indai, enggau naka ulih nulung anak nuan nyembah Jehovah. Panggaika diri ba Jehovah, lalu Iya deka nulung nuan ngaga pemutus ti manah. (J-lam. 3:5, 6) Kingatka, anak nuan deka nitihka utai ke digaga nuan lebih agi ari utai ke disebut nuan. Nya alai, gaga meh pemutus ngambika anak nuan ulih ngelantangka ati Jehovah.

20. Nama berekat ke diulih bala nembiak enti sida milih nyembah Jehovah?

²⁰ Bala anak, apai indai nuan ulih nulung nuan ngaga pemutus ti manah ba pengidup. Tang nuan empu ke patut ngaga pemutus ngambika ulih ngelantangka ati Petara. Titihka teladan Jesus lalu milih nyembah Jehovah. Enti nuan ngereja nya, pengidup nuan deka lantang sereta bisi tuju. (1 Tim. 4:16) Lalu jemah ila, nuan deka idup enggau puas ati!