1, 2. (a) Nama penau ke patut dikemansangka kitai, lalu nama kebuah? (b) Nama deka dikerandauka kitai ba artikel tu?

 SEMUA kitai patut nemu chara nentuka siti-siti penerang ngambika bulih penemu ti betul. (J-lam. 3:21-23; 8:4, 5) Enti enda, Sitan enggau dunya iya senang deka ngelimpangka runding kitai. (Eps. 5:6; Kol. 2:8) Ngambika bulih penemu ti betul, kitai patut ngiga fakta. Jaku Dalam 18:13 madahka: “Mending dulu sebedau nuan nyaut. Enti nuan enda mending dulu, nuan beli sereta enda nemu bebasaka orang.”

² Ba artikel tu, kitai deka beratika utai ti ngasuh kitai tusah deka ngiga fakta lalu bulih penemu ti betul. Kitai mega deka belajarka prinsip enggau chunto ari Bup Kudus ke ulih nulung kitai nentuka siti-siti penerang.

 3. Nama kebuah kitai patut nitihka prinsip Bup Kudus ba Jaku Dalam 14:15? (Peda gambar ba pun artikel.)

³ Kemayaharitu, penerang ke diterima kitai datai ari Internet, TV, sereta media bukai. Kitai mega engka nerima mayuh email, SMS, sereta cherita ari bala pangan. Kadang-kadang  penerang ke diterima baka ke enda nemu abis. Nya alai kitai patut bejimat. Bala pangan kitai engka bisi tuju ti manah, tang bisi sekeda orang nya sengaja ngerembaika penerang ti enda amat tauka ngelimpangka fakta. Ni bagi prinsip Bup Kudus ke ulih nulung kitai nentuka utai ti didinga kitai? Jaku Dalam 14:15 madahka: “Orang ke beli deka arapka sebarang utai, tang orang ke pintar deka nyingkang enggau bejimat.”

 4. Baka ni Pilipi 4:8, 9 ulih nulung kitai milih utai ti dibacha, lalu nama kebuah nya beguna ngulihka penerang ti betul? (Peda mega kutak “ Utai ke Ulih Nulung Kitai Ngulihka Fakta.”)

⁴ Ngambika ulih ngaga pemutus enggau manah, kitai begunaka fakta ti tau dikeandalka. Nya alai, kitai patut bejimat milih utai ti dibacha. (Bacha Pilipi 4:8, 9.) Kitai enda patut masau jam meda berita ti enda ulih dikeandalka ba Internet tauka macha email ke ngerembaika berita ti selebubu ngapa. Kelebih agi kitai patut nyeliahka laman web ti dikena orang ke limpang ari pengarap ngerembaika penemu sida. Sida deka ngelemika pengarap nembiak Petara sereta ngelimpangka pemendar. Penerang ti enda ulih dikeandalka ngujungka orang ngaga pemutus ti enda manah. Anang ngumbai penerang ke baka nya enda ulih ngachau nuan.—1 Tim. 6:20, 21.

 5. Nama cherita bula ti didinga orang Israel, lalu baka ni nya ngachau sida?

⁵ Cherita ti bula tau ngujungka penusah ti besai. Maya jeman Moses, 12 iku orang dianjung matau Menua ti Udah Disemaya. Sepuluh iku pematau pulai mai berita ti enda manah. (P-pau. 13:25-33) Sida ngelangkung fakta, lalu nya ngasuh nembiak Jehovah takut sereta lemi. (P-pau. 14:1-4) Nama kebuah sida baka nya? Sida engka ngumbai utai nya amat, laban mayuh ari pematau nya nyebut utai ti sama. Nya alai sida enggai mendingka utai manah ti disebut dua iku agi pematau. (P-pau. 14:6-10) Ari ke ngiga fakta sereta bepanggai ba Jehovah, bala orang nya milih arapka cherita ti enda amat.

 6. Nama kebuah kitai enda tekenyit lebuh ninga berita ti enda betul pasal nembiak Jehovah?

⁶ Kitai kelebih agi patut bejimat lebuh ninga cherita pasal nembiak Jehovah. Kingatka, munsuh kitai Sitan “bedawaka bala menyadi kitai.” (Pem. 12:10) Jesus madahka, bala penyakal deka “nyebut semua macham utai ti bula” ngelaban kitai. (Mat. 5:11) Enti kitai mendingka jaku tangkan nya, kitai enda tekenyit lebuh ninga berita ti enda betul pasal nembiak Jehovah.

 7. Nama patut ditanya kitai sebedau ngirum email tauka SMS?

 ⁷ Kati nuan rindu ngirum email enggau SMS ngagai bala pangan? Lebuh nuan meda cherita ti narit ati ba berita tauka ninga peneleba ti manah, kati nuan deka jampat-jampat bekunsika utai nya? Sebedau nuan ngirum email tauka SMS, tanya diri empu: ‘Kati aku pechaya cherita nya amat? Kati aku bisi fakta?’ Enti sema nuan enda tentu nemu pasal pengamat cherita nya, nuan engka ngerembaika pemula enti ngirum iya. Nya alai enti nuan enda nemu sekalika cherita nya amat tauka enda, anang ngirum iya. Buai aja!

 8. Nama udah digaga bala penyakal ba sekeda menua, lalu baka ni kitai ulih nyeliahka diri ari nulung sida ngerembaika cherita bula?

⁸ Bisi penusah bukai ulih nyadi enti kitai beguai-guai ngirum email enggau SMS ke diterima kitai ngagai orang bukai. Ba sekeda menua, pengawa kitai ditagang tauka disekat. Bala penyakal ba menua tu engka sengaja ngerembaika cherita kena ngenakutka kitai tauka ngasuh kitai salah sangka enggau pangan diri. Pikirka utai ti nyadi ba Soviet Union menya. Bala polis resia ke dikumbai KGB, ngerembaika berita ngapa ke madahka sekeda bala menyadi Kristian lelaki ke megai tanggung pengawa udah bekerejasama enggau KGB. a (Peda nota kaki.) Sayau amat, mayuh bala menyadi arapka cherita bula tu, lalu ninggalka gerempung Jehovah. Mayuh ari sida nya bisi pulai baru, tang bisi mega nadai. Sida nejuka cherita bula  nya ngerusak pengarap sida. (1 Tim. 1:19) Baka ni kitai ulih nyeliahka penusah ke baka nya? Anang ngerembaika cherita ti enda amat tauka bedau ditentuka betul. Anang arapka semua utai ti didinga nuan. Tang tentuka nuan bisi fakta.

 9. Nama utai bukai ke ngasuh kitai tusah deka ngulihka cherita ti betul?

⁹ Kadang-kadang kitai ninga cherita ti setengah aja betul tauka enda meri semua fakta. Tu ngasuh tusah deka ngulihka cherita ti betul. Kitai anang sekali-kali arapka cherita ti setengah aja betul! Nama ulih digaga kitai ngambika enda ditipu cherita ke baka nya?—Eps. 4:14.

10. Nama kebuah sekeda orang Israel nyauka nyerang bala menyadi sida, lalu nama ngasuh sida enda nyadi nyerang?

¹⁰ Kitai ulih belajar ari utai ke nyadi ba orang Israel ke diau di barat Sungai Jordan maya jeman Josua menya. (Jos. 22:9-34) Sida ninga berita pasal orang Israel ke diau di timur Jordan udah nirika siti alta ti besai semak sungai. Berita pasal ngaga alta endang amat, tang semina sekeda ari cherita nya ke betul. Tu ngasuh orang Israel ti di barat ngumbai bala menyadi sida ti di timur udah angkat ngelaban Jehovah lalu deka nyerang sida. (Bacha Josua 22:9-12.) Tang sebedau nyerang, orang Israel ari barat nganjung beberapa iku orang mansik pekara nya. Nama ditemu orang nya? Orang Israel ti di timur ukai ngaga alta kena ngenjuk pemeri ngagai petara pelesu. Sida ngaga alta nyadika tanda kena nunjukka sida nyembah Jehovah. Orang Israel tentu berasai gaga laban enda nyadi nyerang bala menyadi sida, laban sida ngena awak nya ngiga fakta.

11. (a) Nama pengawa enda lurus ke nyadi ba Mepiboset? (b) Nama patut digaga David ngambika Mepiboset enda napi pengawa ke enda lurus?

¹¹ Bisi maya nya kitai pedis ati ketegal orang nusui cherita ti setengah aja betul pasal kitai. Tu meh utai ke nyadi ba Mepiboset. Raja David enggau ati ti gerah meri Mepiboset semua tanah ke diempu aki iya, Saul. (2 Sam. 9:6, 7) Tang udah nya David ninga cherita ti enda manah pasal Mepiboset. David enda mansik dulu pengamat cherita nya, lalu ngambi semua pesaka ke diempu Mepiboset. (2 Sam. 16:1-4) Pengudah David berandau enggau iya, nya baru David nemu diri udah ngereja penyalah. David mulaika sekeda pesaka nya ngagai Mepiboset. (2 Sam. 19:24-29) Enti sema David mansik dulu cherita nya lalu enda beguai-guai ngaga pemutus ketegal fakta ke bedau nyengala, Mepiboset tentu enda napi pengawa ke enda lurus.

12, 13. (a) Nama digaga Jesus lebuh orang bula pasal iya? (b) Nama ulih digaga kitai lebuh orang nusui utai ti bula pasal kitai?

¹² Nama ulih digaga nuan lebuh orang nusui utai ti bula pasal nuan? Tu nyadi ba Jesus enggau John Pemaptisa. (Bacha Matthew 11:18, 19.) Nama digaga Jesus? Iya enda masau jam enggau pengering iya ngasuh orang arapka cherita nya bula. Tang iya meransang orang ngiga fakta. Iya deka sida beratika utai ti digaga sereta diajar iya. Ku Jesus madahka: ‘Penemu-dalam Petara dikamatka ulih utai ti dikereja penemu-dalam nya empu.’

¹³ Kitai ulih belajarka siti utai ti berega ari Jesus. Kadang-kadang orang engka nyebut utai ke enda patut pasal kitai, lalu kitai engka irauka utai tu tau ngenyaika nama kitai. Tang chara pengidup kitai  ulih nunjukka sapa kitai ke bendar. Baka ke dipelajar ari chunto Jesus, ulah kitai ti manah ulih nunjukka cherita ti setengah aja betul nya utai ti bula.

14, 15. Nama kebuah kitai enda patut bepanggai ba penemu diri?

¹⁴ Baka ke udah dikerandauka, kitai tusah deka bulih fakta ke tau dikeandalka. Siti agi kebuah nya laban kitai enda sempurna. Kitai engka udah lama nyembah Jehovah lalu landik ba sekeda pekara. Orang bukai engka bebasaka kitai ketegal kitai nemu berunding. Kati tu ulih nyadi penanggul ngagai kitai?

¹⁵ Au. Kitai engka berengkah bepanggai ba penemu diri. Kitai engka ngelakka asai ati enggau penemu ke dikembuan kitai ngachau chara kitai berunding. Kitai engka berengkah ngumbai diri nemu pasal siti-siti utai taja pan nadai ngembuan semua fakta. Tu tau ngenusahka! Bup Kudus enggau terang nangkan, kitai enda patut bepanggai ba penemu diri.—J-lam. 3:5, 6; 28:26.

16. Ari chunto nya, nama utai ke nyadi ba sebuah restoran, lalu nama runding Tom?

¹⁶ Ambika chunto, uji gambarka, bisi sekali maya lemai hari, seiku tuai gempuru ti bepeneleba ke benama Tom ngagai sebuah restoran lalu tepedaka seiku tuai gempuru ke benama John, duduk semija enggau seiku indu ke ukai bini iya.  Seduai iya rindu berandau enggau pangan diri. Tom meda seduai iya ketawa sereta merap pangan diri. Iya berasai irau lalu berunding: ‘Kati John enggau bini iya deka sarak? Baka ni enggau bala anak seduai iya?’ Tom udah kala meda utai ti sama nyadi. Nama runding nuan enti sema nuan nya Tom?

17. Ari chunto nya, nama fakta ke ditemu Tom, lalu nama ulih dipelajarka kitai ari utai tu?

¹⁷ Tang pikirka dulu. Taja pan Tom engka ngumbai John enda tetap ati ngagai bini iya, kati Tom bisi semua fakta? Malam nya mega, Tom betelefon ngagai John lalu nemu, indu nya menyadi John ke datai ari menua jauh. John enggau menyadi indu iya udah lama enda betemu. Lalu ketegal iya sangkai beberapa jam aja, nya alai John semina ulih betemu lalu makai enggau iya ba restoran. Bini John enda ulih enggau. Tom berasai lantang laban iya enda madah ngagai orang bukai pasal utai ti diperundingka iya! Nama ulih dipelajarka kitai ari utai tu? Enda ngira ni pengelama kitai udah nyembah Jehovah, kitai patut ngulihka fakta enti deka bulih penemu ti betul.

18. Nama ulih ngasuh kitai arapka utai ti enda manah pasal menyadi Kristian kitai?

¹⁸ Kitai mega tusah deka nentuka sekalika siti-siti pekara nya betul enti pekara nya bisi kaul enggau menyadi Kristian ke enda ulih begulai enggau kitai. Enti kitai majak berunding pasal penanggul kitai enggau iya, kitai engka bisi runding ke enda betul pasal iya. Lalu enti kitai bisi ninga utai ti enda manah pasal iya, kitai engka deka arapka utai nya taja pan nadai bukti nunjukka utai nya amat. Nama ulih dipelajarka kitai? Enti kitai ngelakka diri ngembuan asai ati ti enda manah pasal bala menyadi Kristian kitai, tu ulih ngujungka kitai bulih penemu ke enda bepelasarka fakta. (1 Tim. 6:4, 5) Kitai enda patut ngelakka asai ati ti enda manah baka ati ti kepapas enggau chemburu meruan ba ati kitai. Anang enda ingat, Jehovah deka kitai rindu sereta ngampun bala menyadi Kristian ari ati.—Bacha Kolosi 3:12-14.

19, 20. (a) Ni bagi prinsip Bup Kudus ke ulih nulung kitai nentuka pengamat siti-siti penerang? (b) Nama deka dipejuraika kitai ba artikel pengudah tu?

¹⁹ Kemayaharitu, tusah deka bulih fakta ti tau dikeandalka lalu nentuka fakta nya betul. Nama kebuah? Mayuh ari penerang nya bedau tentu nyengala tauka semina setengah aja betul, lalu kitai enda sempurna. Nama ulih nulung kitai? Prinsip dalam Bup Kudus! Ambika chunto, bisi siti prinsip ke madahka kitai beli enti kitai nyaut sebedau kitai mendingka fakta dulu. (J-lam. 18:13) Siti agi prinsip nya kitai enda patut arapka semua utai ti didinga kitai sebedau mansik pengamat utai nya. (J-lam. 14:15) Lalu enda ngira ni pengelama kitai udah nyembah Jehovah, kitai enda tau andalka penemu diri. (J-lam. 3:5, 6) Prinsip Bup Kudus ulih nyaga kitai enti kitai ngena fakta ti tau dikeandalka ngulih penemu ti betul sereta ngaga pemutus enggau manah.

²⁰ Tang bisi siti agi kebuah ke ngasuh kitai tusah deka nemu utai ti bendar. Kitai jampat deka ngakim beduduk ba utai ti dipeda. Ba artikel pengudah tu, kitai deka bejuraika pekara ke ngujungka kitai ngereja pengawa ti salah nya lalu belajarka chara nyeliahka iya.