1. Nama asai ati Rasul Paul pasal bala penulung gempuru?

 RASUL Paul amat menghargai bala penulung gempuru. Bala menyadi tu ngereja pengawa ti amat penting ba raban gempuru. Lebuh Paul nulis ngagai orang Kristian ba Pilipi, iya bisi nyebut pasal bala penulung gempuru enggau bala tuai gempuru dalam jaku tabi iya.—Plp. 1:1.

 2. Nama asai ati siku menyadi lelaki ke benama Luis pasal tanggung pengawa iya nyadi penulung gempuru?

² Enda ngira tuai tauka biak, mayuh menyadi lelaki ke udah dibaptisa ngasaika pengaga ati lebuh nyadi penulung gempuru. Ambika chunto, Devan dilantik nyadi penulung gempuru lebuh iya beumur 18 taun. Lalu Luis dilantik nyadi penulung gempuru lebuh iya beumur lebih ari 50 taun. Baka ni asai ati iya lebuh iya nyadi penulung gempuru? Ku iya madah: “Aku ngasaika nya basa ti besai laban ulih nyadi penulung gempuru. Bala menyadi udah ngayanka pengerindu ti besai ngagai aku. Lalu diatu aku ulih ngayanka pengerindu aku ngagai sida nengah pengawa tu.” Mayuh penulung gempuru mega ngasaika utai ti sama.

 3. Nama tanya ke deka dikerandauka kitai dalam artikel tu?

³ Enti nuan siku menyadi lelaki ke udah dibaptisa, lalu bedau agi nyadi siku penulung gempuru, ulih nuan netapka nya nyadi juluk ati nuan? Nama ulih meransang nuan nyapai juluk ati nya? Lalu nama syarat ngambika nuan ulih layak nyadi penulung gempuru? Kitai deka berandauka tiga iti tanya tu dalam artikel tu. Tang sebedau nya, kitai deka berandauka nama pengawa penulung gempuru.

 NAMA PENGAWA PENULUNG GEMPURU?

 4. Nama pengawa penulung gempuru? (Peda mega gambar.)

⁴ Penulung gempuru nya menyadi lelaki ke udah dibaptisa, ke dipilih ngena kuasa kudus kena nulung bala tuai gempuru ngereja mayuh pengawa ti penting ba raban gempuru. Nama sekeda pengawa nya? Sida nentuka bala menyadi bisi endur nginjil sereta bisi chukup litaricha ke dikena nginjil. Sida nulung meresi sereta nyeruri Palan Gempuru. Sida mega nyadi atendan lalu nyaga perengka audio video maya gempuru dipejalaika. Tang ke pemadu penting, penulung gempuru rinduka Jehovah lalu idup nitihka standard Iya. Sida mega amat rinduka bala menyadi. (Mat. 22:​37-39) Baka ni menyadi lelaki ke udah dibaptisa ulih nyapai juluk ati nyadi penulung gempuru?

 5. Baka ni menyadi lelaki ulih nyapai juluk ati nyadi penulung gempuru?

⁵ Bup Kudus madahka syarat-syarat ngambika menyadi lelaki ulih layak nyadi penulung gempuru. (1 Tim. 3:​8-10, 12, 13) Nuan ulih nyapai juluk ati nya lebuh belajarka syarat-syarat nya, lalu bebendar nitihka syarat nya. Tang sebedau nya, nuan patut berunding, nama kebuah nuan deka nyadi penulung gempuru.

NAMA KEBUAH NUAN DEKA NYADI PENULUNG GEMPURU?

 6. Nama utai ke patut meransang nuan deka nulung bala menyadi Kristian? (Matthew 20:28; peda mega gambar.)

⁶ Perundingka teladan kitai ti pemadu manah, Jesus Kristus. Semua utai ke digaga iya ketegal iya rinduka Apai iya enggau orang bukai. Pengerindu nya meransang iya bebendar gawa sereta ngereja pengawa ke enda diperatika orang enggau dikumbai orang enda penting. (Bacha Matthew 20:28; Jhn. 13:​5, 14, 15) Enti pengerindu ke meransang nuan ngereja utai, Jehovah deka merekatka nuan lalu nulung nuan nyapai juluk ati nyadi penulung gempuru.—1 Kor. 16:14; 1 Pet. 5:5.

 7. Nama kebuah nya salah nyadi penulung gempuru ketegal deka dipuji orang bukai?

⁷ Orang ba dunya suah rinduka orang ke nguji nyadi pemadu manah ba utai ke digaga sida. Tang nembiak Jehovah enda baka nya. Baka Jesus, menyadi lelaki ke rinduka orang bukai enda gila kuasa, tauka keran deka merintah  atas orang bukai. Enti orang ke rindu dipuji dilantik ba raban gempuru, iya engka enggai ngereja pengawa ke dikumbai iya enda penting. Iya engka ngumbai diri kelalu penting lalu enggai ngereja pengawa nya taja pan pengawa nya ke penguntung bala menyadi. (Jhn. 10:12) Jehovah enggai merekatka orang ke ngereja pengawa ketegal deka dipuji orang.—1 Kor. 10:​24, 33; 13:​4, 5.

 8. Nama jaku lalau ke diberi Jesus ngagai bala rasul iya?

⁸ Kekadang, indah bala kaban rapat Jesus dekaka sekeda tanggung pengawa, tang tuju ati sida salah. Peratika utai ke digaga Rasul James enggau John. Seduai iya minta Jesus meri seduai iya penuduk ti penting ba Perintah Petara. Jesus enda muji pengingin seduai iya. Tang iya nerang ngagai 12 iku rasul iya: “Barang sapa deka nyadi lebih agi ba bala kita, iya patut ngintu kita. Lalu barang sapa ke deka nyadi dulu ba bala kita, iya patut nyadi ulun kita.” (Mrk. 10:​35-37, 43, 44) Bala menyadi lelaki ke bisi tuju ati ti betul, iya nya keran deka nulung orang bukai, deka nyadi siti berekat ke raban gempuru.—1 Tes. 2:8.

NAMA DEKA NEGAPKA PENGERAN NUAN TI DEKA NULUNG ORANG BUKAI?

 9. Nama deka negapka pengeran nuan ti deka nulung orang bukai?

⁹ Endang amat, nuan rinduka Jehovah lalu deka nulung bala menyadi. Taja pia, nuan engka nadai pengingin deka ngereja pengawa ti dikereja penulung gempuru. Nyadi, nama ulih nulung nuan deka ngereja pengawa tu? Perundingka pengaga ati ke deka diasaika nuan lebuh nulung bala menyadi. Jesus madahka: “Orang ke meri deka gaga agi ati ari orang ke nerima.” (SKR. 20:35) Jesus empu ngereja utai ke disebut iya. Iya amat gaga ati lebuh nulung orang bukai, lalu nuan mega ulih ngasaika pengaga ati ti sama.

10. Baka ni Jesus nunjukka iya gaga ati nulung orang bukai? (Mark 6:​31-34)

¹⁰ Peratika siti chunto ke nunjukka Jesus gaga ati nulung orang bukai. (Bacha Mark 6:​31-34.) Bisi sekali, Jesus enggau bala rasul iya berasai lelak. Sida benung mupuk ngagai siti endur ti sunyi ngambika ulih belelak. Taja pia, bisi seraban orang ke udah dulu agi datai ngagai endur nya ari sida. Sida deka diajar Jesus. Iya ulih madah enggai, laban iya enggau bala rasul iya “nadai peluang alai makai.” Tauka, Jesus ulih ngajar sida siti tauka dua iti utai, lalu udah nya ngasuh sida pulai. Taja pia, ketegal Jesus rinduka sida, iya “ngajar sida mayuh utai.” Iya terus ngajar sida taja pan hari “udah lemai.” (Mrk. 6:35) Jesus ngereja nya ukai ketegal terpaksa, tang ketegal iya “kasihka sida.” Iya deka ngajar sida laban iya rinduka sida. Au, nulung orang bukai mai pengaga ati ti besai ngagai Jesus.

11. Baka ni Jesus meri orang bantu ti praktikal? (Peda mega gambar.)

¹¹ Jesus ukai aja nulung orang lebuh iya ngajar sida pasal Petara, tang iya mega meri sida bantu ti praktikal. Iya nyediaka pemakai lalu ngasuh bala murid iya nyadung pemakai nya ngagai orang mayuh. (Mrk. 6:41) Enggau chara nya, iya ngajar bala murid iya chara nulung orang bukai. Iya mega nunjukka, meri bantu ke baka tu amat penting. Tu meh pengawa ke suah dikereja bala penulung gempuru. Perundingka pengaga ati ke diasaika bala rasul lebuh gawa enggau Jesus nyadung pemakai ngagai orang mayuh nyentukka “semua orang bela makai lalu kenyang magang.” (Mrk. 6:42) Tang, ukai maya tu aja alai Jesus ngenuluka utai ti diguna orang bukai ari utai ti diguna iya empu. Kebendar iya, Jesus ngereja utai nya sepemanjai pengidup iya ba dunya. (Mat. 4:23; 8:16) Jesus amat gaga ati ngajar orang sereta ngintu utai ke diguna sida. Nuan  mega ulih ngasaika pengaga ati tu enti nuan sanggup nulung orang bukai sebagai penulung gempuru.

12. Nama kebuah nadai siku ari kitai patut ngumbai diri nadai pengelandik nulung raban gempuru?

¹² Enti nuan ngasaika diri nadai pengelandik ti beguna, anang meh asa ati. Nuan tentu bisi sifat ke ulih dikena nuan nulung ba raban gempuru. Belematika utai ke dipadah Paul ba 1 Korint 12:​12-30, lalu minta Jehovah nulung nuan meda baka ni nuan ulih ngena prinsip ke dipadah dalam ayat tu. Jaku Paul enggau terang nunjukka, tiap iku nembiak Jehovah nyengkaum nuan, amat berega sereta penting ba raban gempuru. Enti nuan bedau agi layak nyadi penulung gempuru diatu, anang asa ati. Tang kereja meh utai ke ulih nuan ke Jehovah sereta ke bala menyadi nuan. Andal meh, bala tuai gempuru deka berunding pasal utai ke ulih digaga nuan lalu meri nuan pengawa ti sesuai.—Rom. 12:​4-8.

13. Nama utai ke ditemu kitai pasal sifat-sifat ke patut dikembuan bala menyadi lelaki ke dipilih?

¹³ Perundingka mega pasal tu: Mayuh ari sifat ke dipadah Bup Kudus ke patut dikembuan penulung gempuru nya, sifat-sifat ke patut bisi ba semua orang Kristian. Semua orang Kristian patut datai semak ngagai Jehovah, gaga ati lebuh meri ngagai orang bukai, sereta idup enggau chara ti ngelantangka ati Petara. Nyadi, nuan engka udah bisi mayuh ari sifat ke patut dikembuan siku penulung gempuru. Tang, nama utai ti spesifik ke patut digaga siku menyadi lelaki ngambika ulih layak nyadi penulung gempuru?

BAKA NI NUAN ULIH LAYAK NYADI PENULUNG GEMPURU?

14. Nama reti iya “berunding baka orang ke besai tuai”? (1 Timoti 3:​8-10, 12)

¹⁴ Diatu, kitai deka berandauka sekeda syarat ke ditulis ba 1 Timoti 3:​8-10, 12. (Bacha.) Penulung gempuru patut “berunding baka orang ke besai tuai.” Rambai jaku nya mega engka ulih disalin ngagai “serius,” “betanggungjawap,” tauka “mai diri enggau chara ti ulih dipebasaka orang.” Tang tu ukai reti iya, nuan enda ulih ketawa tauka ngereja utai ke ngerinduka ati. (P-jar. 3:​1, 4) Tu reti iya, nuan bebendar ngereja semua pengawa ti udah diberi ngagai nuan. Enti nuan seruran nembuka pengawa ke diberi ngagai nuan lalu ngereja nya enggau manah, bala menyadi deka nemu sida ulih bepanggai ba nuan lalu deka bebasaka nuan.

15. Nama reti “enda bula” enggau “enda amu ngulihka penguntung enggau chara ti enda lurus”?

 ¹⁵ “Enda bula” reti iya, nuan jujur sereta tau dikearapka. Nuan ngamatka semaya nuan sereta enda pepura. (J-lam. 17:20) “Enda amu ngulihka penguntung enggau chara ti enda lurus” reti iya, nuan jujur lebuh ngereja bisnis enggau orang bukai, sereta lebuh nuan nyaga duit raban gempuru. Nuan enda ngambi ulih ari bala menyadi ba raban gempuru semina ketegal nuan deka ngulihka mayuh agi duit.

16. (a) Nama reti “enda udu ngirup wain”? (b) Nama reti ngembuan “ati ti beresi”?

¹⁶ “Enda udu ngirup wain” reti iya, nuan enda udu ngirup ai bisa sereta enda ngembuan reputasi sebagai orang ke udu ngirup. Ngembuan “ati ti beresi” reti iya, nuan idup nitihka standard Jehovah. Taja pan nuan enda sempurna, tang nuan tau ngembuan kaul ti manah enggau Jehovah, lalu nya deka meri nuan pengelantang ba ati.

17. Nama reti “diuji dulu ngambika nemu sekalika sida layak tauka enda”? (1 Timoti 3:10; peda mega gambar.)

¹⁷ “Diuji dulu ngambika nemu sekalika sida layak tauka enda” reti iya, nuan udah nunjukka diri tau dikearapka enggau sesiti tanggung pengawa. Nya alai, lebuh bala tuai gempuru meri nuan siti pengawa, enggau bebendar meh nitihka iring ari sida sereta ari gerempung. Tentuka nuan faham utai ke patut digaga nuan sereta kemaya nuan patut nembuka pengawa nya. Lebuh nuan ngereja pengawa nuan enggau manah sereta enggau bagas, bala menyadi ba raban gempuru deka meda pemansang nuan. Nyadi, bala tuai gempuru, tentuka kita ngelatih bala menyadi lelaki ke udah dibaptisa. (Bacha 1 Timoti 3:10.) Kati bisi menyadi lelaki ke udah dibaptisa ba raban gempuru nuan, ke beumur 10 ngagai 14 taun tauka biak agi? Kati sida bisi tebiat belajarka Bup Kudus kediri empu enggau manah? Kati sida nyediaka diri ke gempuru enggau manah? Kati sida enggau tetap meri komen ba gempuru sereta nurun nginjil? Enti pia, beri meh sida pengawa ke sesuai enggau umur sereta situasi sida. Enggau chara tu, sida nunjukka diri ulih ngereja pengawa sida enggau manah. Lalu lebuh sida beumur entara 17 ngagai 19 taun, sida ulih layak nyadi penulung gempuru.

18. Nama reti “bibas ari jaku tuduh”?

¹⁸ “Bibas ari jaku tuduh” reti iya, orang nadai kebuah ti patut kena nuduh nuan ngereja  penyalah ti besai. Endang amat, orang Kristian engka dituduh ngereja utai ti enda dikereja sida. Nya meh utai ke nyadi ngagai Jesus, lalu iya madahka, nya mega utai ke deka nyadi ngagai bala murid iya. (Jhn. 15:20) Taja pia, enti nuan seruran nentuka ulah nuan tuchi, baka Jesus, nuan deka ngembuan reputasi ti manah ba raban gempuru.—Mat. 11:19.

19. Nama reti “bisi siku aja bini”?

¹⁹ “Bisi siku aja bini.” Enti nuan udah kawin, nuan mesti nitihka standard Jehovah pasal tikah, iya nya entara siku lelaki enggau siku indu. (Mat. 19:​3-9) Siku lelaki Kristian enda tau ngereja ulah seks ti kamah. (Heb. 13:4) Iya mega patut seruran setia ngagai bini iya. Iya enda sekali-kali ngayanka minat ngagai indu bukai.—Jop 31:1.

20. Baka ni siku lelaki “ngintu bala anak sereta ruang bilik iya enggau manah”?

²⁰ “Ngintu bala anak sereta ruang bilik iya enggau manah.” Enti nuan siku tuai bilik, kereja meh tanggung pengawa nuan enggau bebendar. Nuan patut enggau tetap belajarka Bup Kudus ba diri sebilik sereta nginjil begulai enggau bini sereta bala anak nuan. Tulung meh bala anak nuan ngembuan kaul sida empu enggau Jehovah. (Eps. 6:4) Siku lelaki ke ulih nyaga ruang bilik iya nunjukka iya mega ulih nyaga raban gempuru.—Banding 1 Timoti 3:5.

21. Enti nuan bedau agi nyadi penulung gempuru, nama ulih digaga nuan?

²¹ Bala menyadi lelaki, enti nuan bedau agi nyadi penulung gempuru, bacha meh artikel tu enggau manah, lalu besampi ngagai Jehovah pasal pekara tu. Belajar meh syarat-syarat pasal nyadi penulung gempuru, lalu bebendar nyapai syarat nya. Perundingka penalam pengerindu nuan ke Jehovah sereta ke bala menyadi nuan. Uji ngenalamka pengeran nuan deka nulung bala menyadi. (1 Pet. 4:​8, 10) Lebuh nuan bebendar gawa ke bala menyadi ba raban gempuru, nuan deka ngasaika pengaga ati. Awakka Jehovah merekatka usaha nuan ke deka nyadi siku penulung gempuru!—Plp. 2:13.