1, 2. (a) Ba sapa jaku Jesus di Matthew 24:12 dulu nyadi? (b) Baka ni bup Kereja Rasul nunjukka mayuh orang Kristian ba abad keterubah ngetanka pengerindu sida ngambika mengkang teguh? (Peda gambar ba pun artikel.)

 LEBUH Jesus ba dunya, iya nerangka chara orang deka nemu pasal “pengujung dunya.” Iya madahka, siti ari chara nya: “Mayuh orang enda agi rinduka pangan diri.” (Mat. 24:3, 12) Jaku nya dulu nyadi ba orang Judah kena abad keterubah. Sida ngaku diri nyadi nembiak Petara tang ngelakka pengerindu sida ke Petara majak kurang.

² Taja pia, mayuh orang Kristian maya nya ngembuan ulah ti enda sebaka. Sida ransing nusui berita manah pasal Kristus sereta ngayanka pengerindu ke Petara, ke bala menyadi Kristian ke sama pengarap, sereta ke orang ti bedau agi nemu pasal pemendar. Orang Kristian tu ngetanka pengerindu ti teguh ke Petara. (SKR. 2:44-47; 5:42) Taja pia, pengerindu sekeda orang Kristian ba abad keterubah majak kurang. Baka ni kitai nemu?

 3. Nama udah ngasuh pengerindu sekeda orang Kristian majak kurang?

 ³ Ku Jesus madah ngagai orang Kristian ba abad keterubah ke diau di Epesus: “Nuan udah ngelengkaka pengerindu nuan ti keterubah.” (Pem. 2:4) Tu engka ketegal orang Kristian di Epesus dikuingka orang ke diau ngelingi sida ti deka agi ngelantangka diri empu. (Eps. 2:2, 3) Epesus nya nengeri ti kaya ke alai orang beberat agi ke pengelantang enggau pengaya lebih ari semua utai. Mayuh orang di Epesus mega ngembuan ulah ti amat kamah sereta nadai ngayanka basa ke adat Petara. Sida semina berunding deka ngelantangka diri empu, ari ngayanka pengerindu ti enda bebagi ke Petara sereta orang bukai.

 4. (a) Baka ni pengerindu udah majak kurang kemaya hari tu? (b) Ba tiga bengkah pekara ni kitai patut ngetanka pengerindu ngambika mengkang teguh?

⁴ Jaku Jesus pasal pengerindu ke majak kurang mega dituju ngagai kitai kemaya hari tu. Orang kemaya hari tu majak nadai pengerindu ke Petara. Bejuta iku orang ngiga gerempung mensia, ukai ngiga Petara kena mutarka penanggul ba dunya. Pengerindu sida majak kurang. Indah pengerindu nembiak Jehovah ulih majak kurang, baka ke nyadi ba eklisia di Epesus kelia. Nya alai, aram kitai berandauka tiga bengkah pekara alai kitai patut ngetanka pengerindu ngambika mengkang teguh: (1) pengerindu ke Jehovah, (2) pengerindu ke pemendar Bup Kudus, lalu (3) pengerindu ke bala menyadi Kristian kitai.

 5. Nama kebuah kitai patut rinduka Petara?

⁵ Kelebih agi, sapa ke patut dikerinduka kitai? Jesus madahka: “‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ Tu pesan ti keterubah sereta pemadu besai.” (Mat. 22:37, 38) Pengerindu ke Petara nulung kitai ngasika pesan Iya, tan, sereta begedika utai ti jai. (Bacha Masmur 97:10.) Tang Sitan enggau dunya iya nguji ngelemi sereta ngerusak pengerindu kitai ke Petara.

 6. Nama nyadi lebuh orang lenyau pengerindu ke Petara?

⁶ Dunya ngembuan runding ti salah pasal pengerindu. Mayuh orang “berundingka [rinduka] diri empu,” tang enda rinduka Petara. (2 Tim. 3:2) Sida betumpu ba “utai ti dikinginka tubuh, utai ti dikinginka mata, temegahka pengaya.” (1 Jhn. 2:16) Rasul Paul nangkan pasal utai ke ulih nyadi enti kitai ngelantangka diri empu dulu. Ku iya madahka: “Runding ti ditumpuka ngagai peneka mensia, nuju ngagai pemati.” Nama kebuah? Laban kebendar iya, orang ke ngereja tu nyadi munsuh Petara. (Rom. 8:6, 7) Orang ke ngena pengidup sida ngiga duit tauka ngemuaska pengingin seksual, pengujung iya deka balat asa.—1 Kor. 6:18; 1 Tim. 6:9, 10.

 7. Nama penemu ke ulih ngachau orang Kristian kemaya hari tu?

⁷ Mayuh ateis, agnostik, sereta orang ke nyukung teori evolusi nguji deka ngasuh orang bukai enda rinduka Petara tauka enda pechaya Petara endang amat bisi. Ba sida, semina orang ke beli tauka enda tepelajar ti deka pechayaka Penempa. Nambahka nya, mayuh orang bebasa agi ke bala saintis, ukai bebasaka Penempa. (Rom. 1:25) Indah orang Kristian ulih  dikuingka penemu ke baka tu. Kaul kitai enggau Jehovah ulih nyadi lemi, lalu pengerindu kitai ulih majak kurang.—Heb. 3:12.

 8. (a) Nama utai ke ngasuh nembiak Jehovah berasai enda diperansang? (b) Baka ni Masmur 136 ngelantangka ati kitai?

⁸ Ketegal kitai diau ba dunya Sitan, bisi mayuh kebuah ke ngasuh kitai kekadang berasai enda diperansang. (1 Jhn. 5:19) Tang enti kitai ngelakka diri kelalu berasai enda diperansang, pengarap kitai nyadi lemi, lalu pengerindu kitai ke Petara majak kurang. Ngambika chunto, kitai napi penanggul ketegal majak tuai, enda bepengerai, tauka bisi penanggul ba belanja. Tauka kitai berasai tusah ati ketegal enda ulih ngereja sekeda utai manah agi ari ti dikedekaka kitai. Kitai berasai asa ketegal sekeda utai ba pengidup enda nyadi baka ke dikearapka kitai. Enda ngira nama pemar ke ditapi, kitai enda patut ngumbai Jehovah ninggalka kitai. Pikirka jaku ti ngelantangka ati ba Masmur 136:23: “Iya nadai kala enda ingatka kitai lebuh kitai alah, laban pengerindu Iya meruan belama iya.” Kitai tau arap, Jehovah ningaka “sampi” kitai ke minta tulung, lalu Iya deka nyaut sampi nya.—Mas. 116:1; 136:24-26.

 9. Nama nulung Paul ngetanka pengerindu ti teguh ke Jehovah?

⁹ Rasul Paul nya nembiak Jehovah ke belematika chara Jehovah nyukung iya, lalu tu nulung iya mengkang teguh. Ku iya nulis: ‘Jehovah endang penyaup aku, nya alai aku enda takut. Nama utai ulih dikereja orang ngagai aku?’ (Heb. 13:6) Pengandal Paul ba Jehovah nulung iya mutarka penanggul ba pengidup. Lebuh Paul napi penanggul, iya enda lenyau pengandal ba Jehovah. Indah lebuh dalam rumah jil, iya nulung bala menyadi Kristian enggau nulis surat peransang ngagai eklisia. (Eps. 4:1; Plp. 1:7; Plm. 1) Enda ngira nama penanggul ke ditapi Paul, iya ngetanka pengerindu ti teguh ke Jehovah. Paul bepanggai ba ‘Petara ti pun semua pengelantang, ke merindang kami lebuh kami dituntung semua macham penusah.’ (2 Kor. 1:3, 4) Baka ni kitai ulih neladan Paul?

10. Baka ni kitai ulih ngetanka pengerindu ti teguh ke Jehovah?

 ¹⁰ Paul madahka siti chara kitai ulih ngetanka pengerindu ti teguh ke Jehovah lebuh iya nulis: “Seruran besampi.” Udah nya iya mega nulis: “Majak besampi.” (1 Tes. 5:17; Rom. 12:12) Nama kebuah sampi ulih mai kitai semak agi ngagai Jehovah? Lebuh kitai besampi, kitai bejaku enggau Jehovah. Tu nulung kitai bisi kaul ti manah enggau Iya. (Mas. 86:3) Lebuh kitai madah ngagai Apai kitai ti di serega pasal utai ke amat dalam runding sereta ati, kitai majak semak ngagai Iya. (Mas. 65:2) Pia mega, pengerindu kitai ke Jehovah deka nambah seraya kitai meda chara Iya nyaut sampi kitai. Kitai pechaya, ‘Jehovah diau semak sida ke ngangauka Iya.’ (Mas. 145:18) Pengandal kitai ba pengerindu Jehovah sereta sukung ari Iya deka nulung kitai mutarka penanggul ke ditapi kitai diatu sereta ke jemah ila.

11, 12. Baka ni kitai ulih nambahka pengerindu ke pemendar Bup Kudus?

¹¹ Ketegal nyadi orang Kristian, kitai rinduka pemendar. Kitai ulih tetemuka pemendar dalam Bup Kudus. Jesus madah ngagai Apai iya: “Jaku Nuan nya pemendar.” (Jhn. 17:17) Ngambika ulih rinduka pemendar Bup Kudus, kitai patut nemu utai ke bisi dalam Bup Kudus. (Kol. 1:10) Tang ukai nya aja. Peratika baka ni penulis Masmur 119 ulih nulung kitai nemu utai ke patut digaga. (Bacha Masmur 119:97-100.) Sepemanjai hari, kitai patut belematika utai ti dibacha kitai dalam Bup Kudus. Seraya kitai belematika chara kitai tau bulih penguntung ari nitihka pemendar Bup Kudus ba pengidup, kitai deka rindu agi ke pemendar Bup Kudus.

¹² Pemasmur mega madahka: “Naka meh pemanis ajar Nuan, manis agi ari ai manyi dalam mulut aku!” (Mas. 119:103) Litaricha ti bepelasarka Bup Kudus ke disediaka gerempung Petara nya baka pemakai ti nyamai. Lebuh kitai makai utai ti dikerinduka kitai, kitai enda berumban makai iya. Pia mega, kitai enda berumban lebuh belajarka Bup Kudus. Udah nya kitai deka ngasaika “jaku ti tau ngenyamaika ati” ari pemendar nya, lalu tu ngenyenangka kitai ingatka utai ti dibacha lalu ngena nya nulung orang bukai.—P-jar. 12:10.

13. Nama nulung Jeremiah rinduka jaku Petara? Baka ni tu bekaul enggau iya?

¹³ Nabi Jeremiah rinduka jaku Petara. Ku iya madahka: ‘Nuan udah bejaku ngagai aku, lalu aku mendingka semua leka jaku Nuan. Aku endang enggi Nuan, Jehovah Petara ti Pemadu Bekuasa, lalu leka jaku Nuan ngasuh ati aku gaga sereta lantang.’ (Jer. 15:16) Jeremiah belematika jaku Petara ti berega, lalu iya rinduka jaku Petara. Jeremiah gaga ati laban ulih ngarika Petara sereta nusui pesan Iya. Enti kitai rinduka pemendar Bup Kudus, kitai deka nemu kitai bisi peluang ti manah ulih nyadi Saksi-Saksi Jehovah sereta ulih madah pasal Perintah Petara ba hari ti penudi tu.

14. Nama agi digaga kitai kena nambahka pengerindu ke pemendar Bup Kudus?

¹⁴ Nama agi deka nulung kitai ngenalamka pengerindu ke pemendar Bup Kudus? Kitai patut bejarit datai ngagai gempuru. Nya chara Jehovah ngajar kitai. Belajarka Bup Kudus ninting minggu ngena Menara Jaga nya siti chara kitai belajar. Enti kitai deka bulih mayuh penguntung ari gempuru tu, kitai patut tumu nyediaka  saut. Ngambika chunto, kitai ulih beratika tiap iti ayat Bup Kudus ke dikena. Kemaya hari tu, mayuh orang ulih macha tauka download Menara Jaga ngena perengka elektronik. Majalah tu bisi dalam mayuh bengkah jaku ba laman web jw.org sereta ba aplikasi JW Librari. Sekeda format perengka elektronik nulung kitai ngiga ayat Bup Kudus ke dikena enggau jampat. Taja pia, enda ngira bagi artikel ke dipelajarka kitai, enti kitai macha ayat Bup Kudus enggau bejimat sereta belematika ayat nya, pengerindu kitai ke pemendar Bup Kudus deka nambah.—Bacha Masmur 1:2.

15, 16. (a) Nitih ku John 13:34, 35, nama pesan ke diberi Jesus ngagai kitai? (b) Baka ni pengerindu ke Petara sereta Bup Kudus bekaul enggau pengerindu kitai ke bala menyadi Kristian?

¹⁵ Kena malam penudi Jesus ba dunya, iya madah ngagai bala murid iya: ‘Aku meri kita pesan ti baru: rinduka pangan diri. Baka aku ke udah rinduka kita, baka nya meh kita patut rinduka pangan diri. Enti kita rinduka pangan diri, nya baru semua orang deka nemu kita murid aku.’—Jhn. 13:34, 35.

¹⁶ Rinduka bala menyadi Kristian bekaul enggau rinduka Jehovah. Enti kitai enda rinduka Petara, kitai enda ulih rinduka bala menyadi Kristian kitai. Lalu enti kitai enda rinduka sida, kitai enda ulih rinduka Petara. Rasul John nulis: ‘Orang ke enda rinduka menyadi diri ke ulih dipeda iya, enda ulih rinduka Petara ke enda dipeda iya.’ (1 Jhn. 4:20) Pengerindu ke Jehovah enggau bala menyadi Kristian mega bekaul enggau pengerindu kitai ke Bup Kudus. Nama kebuah? Laban enti kitai rinduka utai ti dipelajarka ari Bup Kudus, kitai deka ngasika pesan ti ditemu kitai dalam Bup Kudus ke ngasuh rinduka Petara sereta bala menyadi Kristian kitai.—1 Pet. 1:22; 1 Jhn. 4:21.

17. Nama sekeda chara kitai ulih ngayanka pengerindu?

 ¹⁷ Bacha 1 Tesalonika 4:9, 10. Nama sekeda chara ke ulih dikena kitai ngayanka pengerindu ngagai orang ba eklisia kitai? Seiku menyadi Kristian lelaki tauka indu ke udah tuai engka begunaka perengka pengangkut kena datai sereta pulai ari gempuru. Seiku indu balu engka begunaka tulung ngaduka utai ba rumah. (Jas. 1:27) Bala menyadi Kristian ke lemi semengat, tusah ati, tauka napi penanggul bukai begunaka pengibuh, peransang, sereta pengelantang ati ari kitai. (J-lam. 12:25; Kol. 4:11) Kitai ngayanka diri rinduka ‘orang ke sama pengarap enggau kitai’ ari jaku tauka utai ti dikereja kitai.—Gal. 6:10.

18. Nama deka nulung kitai mutarka penemu ke enda sebaka enggau bala menyadi Kristian kitai?

¹⁸ Bup Kudus madahka, ba “hari ti penudi” dunya ti jai tu, mayuh orang deka berundingka diri empu sereta amu. (2 Tim. 3:1, 2) Ketegal nyadi orang Kristian, kitai patut bebendar ngemansangka pengerindu ke Jehovah, Bup Kudus, sereta pangan diri. Ketegal enda sempurna, kekadang kitai engka enda entu sepenemu enggau bala menyadi Kristian. Tang ketegal rinduka pangan diri, kitai nguji deka mutarka penanggul enggau manah sereta lengkas. (Eps. 4:32; Kol. 3:14) Arapka kitai enda ngelakka pengerindu kitai majak kurang! Tang aram meh kitai ngembuan pengerindu ti dalam ke Jehovah, Bup Kudus, sereta bala menyadi Kristian.