1. Nitihka Matthew 24:9, nama kebuah kitai enda tekenyit lebuh orang begedika kitai?

 JEHOVAH udah ngaga kitai ngambika rinduka orang bukai sereta berasai dikesayau. Tang lebuh orang begedika kitai, kitai berasai tusah ati, indah berasai takut. Ambika chunto, seiku menyadi indu ke benama Georgina, ke diau di Eropah, madahka: “Lebuh aku beumur 14 taun, indai aku begedika aku ketegal nyembah Jehovah. Aku berasai tusah ati sereta kediri. Lalu berengkah ngumbai diri ukai orang ti manah.” b Seiku menyadi lelaki ke benama Danylo madahka: “Lebuh soldadu malu aku, ngemaluka aku sereta ngemba aku ketegal aku seiku ari Saksi-Saksi Jehovah, aku berasai takut sereta malu.” Kitai berasai tusah ati lebuh orang begedika kitai. Tang tu enda ngasuh kitai tekenyit. Jesus udah madahka kitai deka dipegedika orang.—Bacha Matthew 24:9.

2-3. Nama kebuah murid Jesus dipegedi?

² Orang ba dunya tu begedika murid Jesus. Nama kebuah? Laban baka Jesus, kitai “ukai enggi dunya.” (Jhn. 15:17-19) Nya alai, taja pan kitai bebasaka perintah mensia, kitai enda nyembah sida tauka lambang menua. Kitai semina nyembah Jehovah seiku aja. Kitai ngetanka hak Jehovah merintah mensia. Tang Sitan enggau bala anak iya ngelaban hak tu. (P-kal. 3:1-5, 15) Lebuh nginjil, kitai madah semina Perintah Petara ke ulih mutarka penanggul mensia. Lalu Perintah nya deka ngemunaska orang ti ngelaban iya. (Dan. 2:44; Pem. 19:19-21) Berita nya berita manah ngagai orang ke baruh ati,  tang nya berita ti enda manah ke orang ti jai.—Mas. 37:10, 11.

³ Kitai mega dipegedika orang laban nitihka standard Petara. Standard Petara belaban enggau standard orang ba dunya tu. Ambika chunto, mayuh orang ngumbai enda salah ngereja ulah seks ti kamah. Tang ulah nya meh ke ngasuh Petara ngerusak orang ba Sodom enggau Gomorah! (Jud. 7) Ketegal kitai nitihka standard Bup Kudus bekaul enggau ulah nya, mayuh orang ngeleseka kitai lalu ngumbai kitai ngumba kediri.—1 Pet. 4:3, 4.

 4. Nama kualiti ke ulih ngeringka kitai lebuh dipegedika orang?

⁴ Nama ulih nulung kitai betan lebuh orang begedika kitai sereta ngeleseka kitai? Kitai begunaka pengarap ti tegap, iya nya Jehovah deka nulung kitai. Baka terabai, pengarap kitai ulih “madamka semua laja ti beapi-api ti ditimbakka Sitan.” (Eps. 6:16) Tang semina ngembuan pengarap enda chukup. Kitai mega begunaka pengerindu. Nama kebuah? Laban pengerindu “enda jampat ringat.” Pengerindu natka semua utai sereta tan dalam semua utai ti ulih ngemediska. (1 Kor. 13:4-7, 13) Diatu aram meh kitai berandauka baka ni pengerindu ke Jehovah, pengerindu ke bala menyadi Kristian, indah pengerindu ke bala munsuh kitai ulih nulung kitai betan taja pan dipegedi.

 5. Nama ulih digaga Jesus ketegal iya rinduka Apai iya?

⁵ Ba malam sebedau iya dibunuh, Jesus madah ngagai bala murid iya ke tetap ati: ‘Aku ngereja utai ti diasuh Apai, ngambika dunya nemu aku rinduka Apai.’ (Jhn. 14:31) Ketegal Jesus rinduka Jehovah, iya ulih betan napi penanggul ti balat. Pengerindu kitai ke Jehovah mega ulih nulung kitai ngereja utai ti sama.

 6. Nitihka Rome 5:3-5, nama asai ati nembiak Jehovah lebuh sida dipegedika orang ba dunya tu?

⁶ Pengerindu ke Petara suah meransang nembiak Jehovah betan lebuh diperinsa. Ambika chunto, lebuh bala rasul diasuh raban kunsil ngetu nginjil, pengerindu ke Petara meransang sida ‘ngasika Petara, ukai ngasika mensia.’ (SKR. 5:29; 1 Jhn. 5:3) Kemayaharitu, pengerindu ti dalam ke Jehovah mega nulung bala menyadi Kristian tetap ati taja pan diperinsa perintah mensia. Ari ke berasai asa, kitai berasai gaga ati ulih betan lebuh dipegedika dunya tu.—SKR. 5:41; Bacha Rome 5:3-5.

 7. Nama patut digaga kitai lebuh diri sebilik nyakal kitai?

⁷ Penguji ti pemadu tusah ke kitai engka datai ari diri sebilik. Lebuh kitai berengkah ngayanka minat ngagai pemendar, sida engka ngumbai kitai udah ditesatka, indah ngumbai kitai gila. (Bandingka Mark 3:21.) Sida engka mega ngemediska kitai. Tang kitai enda tekenyit enggau tu. Jesus madahka: “Munsuh kita ke pemadu jai nya kita sebilik empu.” (Mat. 10:36) Taja pan diri sebilik jai enggau kitai, kitai enda begedika sida. Tang majak agi kitai rinduka Jehovah, pengerindu kitai ke orang mega majak nambah. (Mat. 22:37-39) Taja pia, kitai enggai ngetu nitihka adat sereta prinsip Bup Kudus ketegal deka ngelantangka ati orang bukai.

8-9. Nama nulung seiku menyadi indu betan taja pan balat disakal?

⁸ Georgina ke disebut sebedau tu, ulih betan taja pan balat disakal indai iya. Georgina nerangka: “Aku enggau indai berengkah belajarka Bup Kudus enggau Saksi-Saksi Jehovah. Tang enam bulan pengudah nya, lebuh aku deka datai begempuru, indai aku  berengkah nyakal aku. Aku nyau nemu indai aku bisi berandau enggau orang ke limpang ari pengarap. Lalu iya ngena jaku tuduh sida lebuh bejaku enggau aku. Iya mega ngeleseka aku, narit buk aku, nyekak aku sereta muai litaricha aku. Pengudah aku beumur 15 taun, aku dibaptisa. Indai nguji nagang aku ari nyembah Jehovah enggau mindahka aku ngagai rumah ke bala nembiak. Sekeda ari sida makai dadah sereta ngereja jenayah. Sakal ke baka tu tusah ditapi laban datai ari orang ke patut rinduka sereta ibuhka nuan.”

⁹ Nama nulung Georgina betan? Ku iya madah: “Aku baru abis macha siti Bup Kudus lebuh indai aku berengkah nyakal aku. Aku andal aku bisi pemendar lalu ngasaika diri semak enggau Jehovah. Aku seruran besampi ngagai Iya, lalu Iya ningaka sampi aku. Lebuh aku diau enggau nembiak ke bukai, seiku menyadi indu mai aku ngagai rumah iya, lalu kami belajarka Bup Kudus begulai. Sepemanjai timpuh nya, aku berasai dikeringka bala menyadi ba gempuru. Sida nerima aku baka diri sebilik. Aku ulih ngasaika Jehovah kering agi ari munsuh kitai, enda ngira sapa sida.”

10. Nama ulih dikearapka kitai ari Jehovah, Petara kitai?

¹⁰ Rasul Paul nulis nadai utai ulih ‘nyeraraka kitai ari pengerindu Petara dalam Jesus Kristus Tuan kitai.’ (Rom. 8:38, 39) Taja pan kitai engka merinsa ba siti timpuh, Jehovah seruran enggau kitai, lalu ngelantang sereta ngeringka kitai. Baka ke dipeda ba peneleba Georgina, Jehovah mega nulung kitai nengah bala menyadi Kristian kitai ba eklisia.

11. Baka ni pengerindu ke dipadah Jesus ba John 15:12, 13 nulung bala murid iya? Beri chunto.

¹¹ Ba malam sebedau iya dibunuh, Jesus ngingatka bala murid iya ngambika rinduka pangan diri. (Bacha John 15:12, 13.) Iya nemu pengerindu ti enda berundingka diri empu ulih nulung sida beserakup sereta betan lebuh dipegedi. Peratika teladan eklisia di Tesalonika. Kenyau ari eklisia nya ditumbuhka, bala menyadi balat diperinsa. Tang sida nyadi teladan ti manah lebuh ngayanka pengerindu sereta betan enggau tetap ati. (1 Tes. 1:3, 6, 7) Paul meransang sida terus ngayanka pengerindu, indah “majak ngereja lebih agi ari nya.” (1 Tes. 4:9, 10) Pengerindu  deka nulung sida meransang orang ke balat tusah ati sereta nyukung sida ke lemi. (1 Tes. 5:14) Sida nitihka jaku lalau Paul, laban ba surat ti kedua ke ditulis setaun pengudah nya, Paul ulih madah ngagai sida: “Pengerindu genap iku kita ke pangan diri nambah-menambah.” (2 Tes. 1:3-5) Pengerindu sida nulung sida betan napi penusah sereta pemerinsa.

12. Baka ni bala menyadi Kristian ba siti menua ngayanka pengerindu ngagai pangan diri lebuh perang nyadi?

¹² Peratika peneleba Danylo, menyadi ke disebut tadi, enggau bini iya. Lebuh perang nyadi ba endur seduai diau, seduai iya agi datai begempuru, nginjil enggau naka ulih sereta bekunsika pemakai enggau bala menyadi Kristian ke bukai. Tang bisi sekali, bala soldadu ke mai senyata datai ngagai rumah Danylo. Ku Danylo: “Sida mejal aku ngambika badu nyadi Saksi. Lebuh aku nulak, sida malu aku lalu pura-pura nimbak aku, tang sida nimbak ke atas. Sebedau sida mupuk, sida ngemba aku lalu madahka sida deka pulai lalu masung bini aku. Tang bala menyadi Kristian enggau jampat ngasuh kami ngena kerita api ngagai bandar ke siti agi. Aku deka seruran ingatka pengerindu ke diayan bala menyadi tu. Lebuh kami datai ba endur ti baru, bala menyadi Kristian ba dia meri kami pemakai sereta nulung aku ngiga kereja sereta rumah. Asil iya, kami mega ulih nulung bala menyadi bukai ke rari ari endur ti bisi perang.” Peneleba ke baka tu nunjukka pengerindu ke diayanka orang Kristian ulih nulung kitai betan lebuh dipegedi.

13. Baka ni roh kudus nulung kitai terus nyembah Jehovah taja pan dipegedika orang?

¹³ Jesus ngasuh bala murid iya rinduka munsuh sida. (Mat. 5:44, 45) Kati tu utai ti senang dikereja? Tentu enda! Tang tu ulih dikereja enggau tulung ari roh kudus Petara. Buah roh kudus Petara nyengkaum pengerindu, pengeliat ati, penyiru, penelap sereta nagang diri. (Gal. 5:22, 23) Kualiti tu ulih nulung kitai betan taja pan dipegedi. Ketegal laki, bini, anak tauka orang ke berimbai diau ngayanka kualiti tu pengudah nyadi Saksi, mayuh orang ke nyakal kitai ulih ngaga ubah. Indah mayuh ari sida udah nyadi menyadi Kristian kitai. Nya alai, enti nuan ngasaika tusah deka rinduka orang ti begedika  nuan ketegal nuan nyembah Jehovah, besampi meh minta roh kudus. (Luk. 11:13) Lalu andal meh ngasika Petara nya utai ti pemadu manah.—J-lam. 3:5-7.

14-15. Baka ni Rome 12:17-21 nulung Yasmeen nunjukka pengerindu ngagai laki iya taja pan iya disakal?

¹⁴ Peratika peneleba seiku menyadi indu ke benama Yasmeen. Lebuh iya nyadi seiku ari Saksi-Saksi Jehovah, laki iya ngumbai iya udah ditipu, lalu nguji nagang Yasmeen ari nyembah Petara. Iya ngemaluka Yasmeen lalu ngasuh kaban belayan, tuai pengarap sereta seiku manang datai ngemba Yasmeen lalu nuduh iya mai penyarut ngagai ruang bilik. Laki iya indah nganu bala menyadi lelaki lebuh ba gempuru! Yasmeen suah nyabak laban iya ngasaika laki iya jai enggau iya.

¹⁵ Ba Palan Gempuru, bala menyadi Kristian ngeringka Yasmeen sereta ngelantangka ati iya. Bala tuai gempuru meransang iya nitihka jaku lalau ba Rome 12:17-21. (Bacha.) Ku Yasmeen: “Tu ukai pekara ti senang. Tang aku minta Jehovah nulung aku lalu enggau naka ulih nitihka jaku lalau Bup Kudus. Nya alai, lebuh laki aku ringat lalu nikauka tanah ba dapur, aku meresi dapur nya. Lebuh iya nganu aku, aku nyaut enggau nelap. Lalu lebuh iya sakit, aku nyaga iya.”

16-17. Nama ulih dipelajarka nuan ari teladan Yasmeen?

¹⁶ Yasmeen diberekat ketegal ngayanka pengerindu ngagai laki iya. Ku iya madah: “Laki aku berengkah pechayaka aku laban iya nemu aku enda bebula. Iya mega mending enggau basa lebuh kami duai berandau pasal jalai pengarap. Lalu iya besemaya deka begulai manah. Diatu iya meransang aku ngagai gempuru Kristian. Kaul aku enggau laki aku mega majak manah. Lalu ruang bilik kami bisi pengelantang. Aku arapka laki aku ulih muka ati iya nerima pemendar jemah ila, lalu sama-sama begulai nyembah Jehovah.”

¹⁷ Teladan Yasmeen nunjukka pengerindu “natka semua utai, . . . ngadang semua utai, tan dalam semua utai.” (1 Kor. 13:4, 7) Amat, lebuh orang begedika kitai, nya ulih ngemediska kitai. Tang pengerindu bekuasa agi. Enti kitai ngayanka pengerindu ngagai orang, sida engka ulih ngubah runding sida lalu badu nyakal kitai. Lalu tu mega deka ngasuh Jehovah gaga ati. Tang enti orang terus nyakal sereta begedika kitai, kitai agi ulih gaga ati. Baka ni?

18. Nama kebuah kitai ulih gaga ati taja pan dipegedi?

¹⁸ Jesus madah: “Beberekat meh kita lebuh orang begedika kita.” (Luk. 6:22) Kitai tentu enggai dipegedi. Kitai mega enda rindu lebuh orang merinsaka kitai ketegal pengarap kitai. Tang nama kebuah kitai ulih gaga ati taja pan dipegedi? Peratika tiga iti kebuah. Kesatu, lebuh kitai betan, Petara gaga ati enggau kitai. (1 Pet. 4:13, 14) Kedua, pengarap kitai nyadi berega agi sereta tegap. (1 Pet. 1:7) Lalu ketiga, kitai deka bulih upah ti pemadu berega, iya nya pengidup ti meruan belama iya.—Rom. 2:6, 7.

19. Nama kebuah bala rasul gaga ati pengudah sida disipat?

¹⁹ Pengudah Jesus diangkatka idup baru, bala rasul ngasaika pengaga ati ke ditusuika iya. Pengudah sida disipat sereta diasuh badu nginjil, sida gaga ati. Nama kebuah? Laban sida “udah dikira patut kena perinsa ketegal nama Jesus.” (SKR. 5:40-42) Pengerindu sida ke Jesus besai agi ari asai takut sida ke bala munsuh, lalu sida ngayanka pengerindu nya enggau enda ngetu-ngetu madah pasal berita manah. Mayuh ari bala menyadi Kristian kitai kemayaharitu mega terus nyembah Jehovah enggau tetap ati taja pan napi penanggul. Sida nemu Jehovah deka ingatka pengawa ti udah dikereja sida enggau pengerindu sida ke nama Iya.—Heb. 6:10.

20. Nama deka dikerandauka kitai ba artikel pengudah tu?

²⁰ Seagi-agi dunya tu dipegai Sitan, dunya deka begedika kitai. (Jhn. 15:19) Tang kitai enda ibuh takut. Baka ke deka dikerandauka ba artikel pengudah tu, Jehovah deka meri pengering lalu nyaga nembiak Iya ke tetap ati. (2 Tes. 3:3) Nya alai, aram meh kitai terus rinduka Jehovah, bala menyadi Kristian, indah rinduka bala munsuh kitai. Lebuh kitai nitihka jaku lalau tu, kitai deka beserakup lalu pengarap kitai deka majak tegap. Kitai deka mai mulia ngagai Jehovah lalu nunjukka pengerindu nya bekuasa agi ari pemenchi.