Nemu Nuan?
Kelimpah ari utai ke dipadah ba Bup Kudus, nama bukti bukai ke nunjukka orang Israel nyadi ulun di menua Ejip kelia?
Bup Kudus bisi madah, pengudah orang Midian mai Josep ngagai Ejip, Jakop iya nya apai Josep, mai sida sebilik pindah ari menua Kanaan ngagai menua Ejip. Di Ejip, sida ngentapka diri ba Gosen, ba nanga Sungai Nil. (P-kal. 47:1, 6) Orang Israel “nyau mayuh agi sereta kering agi.” Nya alai, orang Ejip berengkah takutka orang Israel lalu ngaga sida nyadi ulun.—P-sut. 1:7-14.
Sekeda orang ke mantah enda arapka pekara nya, lalu ngumbai nya cherita ngapa. Taja pia, bisi bukti ke nunjukka peturun Sem a nyadi ulun di menua Ejip kelia.
Ambika chunto, bala arkeologi udah tetemuka endur diau kelia menya ba utara menua Ejip. Seiku pakar Bup Kudus ke benama John Bimson madahka, bisi 20 tauka lebih endur diau ke peturun Sem ba utara menua Ejip. Nambahka nya, pakar ke nemu pasal gaya pengidup orang Ejip kelia ke benama James K. Hoffmeier madahka: “Kira ba urung taun 1800 nyentuk ngagai 1540 S.M., menua Ejip nya endur alai pindah ti manah amat ke orang ti ngena bansa jaku Sem ti datai ari Asia Barat [menua asal sida Jakop sebilik].” Ku iya agi: “Timpuh nya serambau enggau jeman Abraham, Isak enggau Jakop lalu timpuh nya mega serambau enggau jeman sereta utai ke nyadi baka ke dibacha kitai ba bup Pemungkal.”
Bisi bukti bukai ke ditemu ba selatan menua Ejip. Siti gulung surat papairus ke ditulis kira entara taun 2000 S.M enggau taun 1600 S.M. bisi ngundan nama bala ulun ke gawa enggau siti ruang bilik di selatan menua Ejip. Lebih ari 40 iti nama ulun ke bisi ba gulung surat nya dalam bansa jaku Sem. Bala ulun tu nyadi tukang manduk, betenun enggau ngereja pengawa berat. Hoffmeier mega madahka: “Ketegal lebih ari 40 iku peturun Sem ke gawa enggau siti ruang bilik ba Thebaid [selatan Ejip], nya alai penyampau peturun Sem di menua Ejip tentu mayuh amat, kelebih agi ba nanga Sungai Nil.”
Seiku arkeologi ke benama David Rohl bisi nulis pekara ke bekaul enggau nama ulun nya. Ku iya: “Sekeda nama ulun nya sebaka enggau nama ke dibacha nuan ba Bup Kudus.” Ambika chunto, gulung surat papairus nya ngundan nama baka Isakar, Aser enggau Siprah. (P-sut. 1:3, 4, 15) Ku iya agi: “Tu bukti nyata ke nunjukka orang Israel kala nyadi ulun di menua Ejip maya nya.”
John Bimson madahka: “Utai ke bekaul enggau ulun di menua Ejip enggau utai ke disebut ba bup Pemansut pasal ulun nya sejalai enggau sejarah.”
a Sem nya seiku ari tiga iku anak Noah. Peturun Sem nyengkaum orang Israel, orang Elam, orang Asiria, orang Kaldea, orang Siria enggau bemacham raban bansa orang Arab.
