PANGAN ti manah endang berega, lalu kaul ti meruan enda datai kediri empu. Enti siti-siti kaul bisi penanggul, baka ni ulih mutarka iya? Dalam Bup Kudus, kitai ulih belajar ari sekeda orang ke nyadi pangan ti bendar tang udah nya kaul sida bisi penanggul.

David ke nyadi pengibun bedus sereta raja, tentu bisi bala pangan ti manah. Jona­tan nya seiku ari sida. (1 Samuel 18:⁠1) Tang David mega bisi bala pangan ke bukai, lalu seiku ari sida nya nabi Natan. Bup Kudus nadai madahka kemaya kaul seduai iya berengkah. Tang bisi sekali, David besebana ngagai Natan sama baka nuan ke engka besebana ngagai pangan nuan. David keran deka nirika rumah ke Jehovah. Raja David tentu beterima kasih ke penemu ari Natan ke nyadi pangan sereta nyadi orang ke ngembuan roh kudus Jehovah.​​—2 Samuel 7:​2, 3.

Taja pia, bisi utai ti nyadi ke ngasuh kaul seduai iya bisi penanggul. Raja David beleman enggau Batseba, lalu udah nya iya munuh Uriah, laki Batseba. (2 Samuel 11:​2-​21) Betaun David taluk ngagai Jehovah sereta  ngetanka utai ti lurus. Tang udah nya iya ngereja dosa ti besai amat! Nama udah nyadi ngagai raja ti manah nya? Kati iya enda meda ulah iya nya amat jai? Kati iya ngumbai diri ulih ngelalaika dosa nya ari Petara?

Nama deka digaga Natan? Kati iya deka ngelakka orang bukai madahka penyalah nya ngagai raja? Sekeda orang nemu, baka ni David udah ngatur ngambika Uriah mati dibunuh. Nya alai, nama kebuah Natan deka ngiruh diri sereta ngerusak kaul seduai iya ti manah ngelama tu? Tu engka mega ulih ngasuh Natan lenyau nyawa enti iya madahka pekara nya. Nambahka nya, David udah munuh Uriah ke enda salah.

Tang Natan nya orang ke bejaku ngarika Petara. Nabi nya nemu, enti iya mengkang enda bejaku, kaul iya enggau David enda agi sama, lalu pengasai ati iya empu deka tusah. Pangan iya David udah ngereja utai ti enda diterima Jehovah. Raja David amat begunaka tulung kena ngemanahka kaul iya enggau Jehovah. Amat, David begunaka pangan ti bendar, baka Natan. Iya mutarka penanggul ngena sempama ke ulih negu ati David ke kala nyadi pengibun bedus. Natan ngenataika pesan Petara, tang ngena chara ke ulih nulung David meda pemesai penyalah diri, lalu meransang iya nesal ati sereta nerima disiplin.​​—2 Samuel 12:​1-​14.

Nama deka digaga nuan enti bisi pangan ke ngereja dosa ti besai? Nuan engka berunding, kaul seduai deka rusak enti madahka penyalah iya. Tauka nuan engka ngasaika diri deka ngerusak kaul seduai, enti madahka ulah iya ti bedosa ngagai tuai gempuru taja pan nya ulih nulung iya ba pengarap. Nama deka digaga nuan?

Gianni, ke disebut ba pun tadi ngenang: “Aku nemu bisi utai ke udah berubah. Maurizio enda agi beterus terang. Aku deka bejaku enggau iya, tang aku tusah deka ngereja nya. Aku berunding: ‘Nama utai ke ulih dipadah aku ngagai iya? Iya udah nemu utai ke patut digaga iya. Iya tentu enggai ninga!’ Tang ngenangka kami duai udah kala sama belajar, aku bulih pemerani dikena bejaku enggau iya. Maurizio pan ngereja utai ti sama lebuh aku begunaka bantu. Aku enggai lenyau kaul enggau iya, tang aku deka nulung iya laban aku ibuhka iya.”

Ku Maurizio: “Gianni endang amat deka nulung​​—lalu utai ke digaga iya endang betul. Aku nemu, penusah ke ninggang aku ketegal ngaga pemutus ti salah ukai salah iya tauka Jehovah. Nya alai aku nerima jaku lalau ari tuai gempuru, lalu nyau kelama pengarap aku kering baru.”

David bisi pangan ke bukai ti taluk ngagai iya lebuh iya napi maya ti tusah. Orang nya Husai, ke dikumbai Bup Kudus “pangan ke dikarapka David.” (2 Samuel 16:16; 1 Bansa Israel 27:33) Iya bekereja ba istana, nyadi pangan sereta kaling raja, ti kekadang bejalaika pengawa ti enda tau ditemu orang mayuh.

Lebuh anak David, Absalom, ngerampas penuduk diraja, mayuh orang Israel nyukung Absalom, tang Husai enda nyukung. Lebuh David ngerarika diri, Husai ngiga iya. David balat pedis ati ketegal dibudi anak iya empu sereta sekeda orang ti dikearapka iya. Taja pia, Husai mengkang taluk, sanggup berambunka nyawa diri sereta nulung ngemuntanka pelan Absalom. Husai ukai ngereja nya ketegal iya pegawai istana. Iya nunjukka diri pangan ti taluk.​​—2 Samuel 15:​13-​17, 32-​37; 16:⁠15–​17:⁠16.

Endang ngagaka ati meda bala menyadi Kristian kemaya hari tu beserakup ukai ketegal sida bejalaika ungkup tauka pengawa ba eklisia. Ari pengawa sida, sida enggau bendar madahka: “Aku pangan nuan, ukai ketegal aku patut, tang ketegal nuan amat besai reti ba aku.”

 Tu meh utai ti diasaika seiku menyadi Kristian lelaki ke benama Federico. Ketegal tulung ari pangan ti dikerinduka iya, Antonio, iya ulih napi maya ti tusah ba pengidup iya. Federico ngenang: “Lebuh Antonio pindah ngagai eklisia kami, enda lama udah nya kami duai bepangan. Kami duai sama nyadi penulung gempuru, lalu kami duai rindu sama bekereja enggau pangan diri. Lalu enda lama udah nya, Antonio dipilih nyadi tuai gempuru. Kelimpah nyadi pangan aku, iya mega nyadi teladan aku ba pengarap.” Tang udah nya, Federico ngereja utai ke salah. Iya jejampat ngiga bantu ba pengarap, tang iya enda agi layak nyadi pengerintis tauka penulung gempuru. Baka ni Antonio nerima utai tu?

Federico ngenang: “Aku ulih meda Antonio ngasaika pemerinsa aku. Iya enggau naka ulih ngelantangka ati aku. Iya deka aku kering baru ba pengarap sereta enda ninggalka aku. Iya meransang aku ngambika kering baru ba pengarap sereta enda lemi semengat.” Antonio madahka: “Aku ngena mayuh agi awak enggau Federico. Aku ka iya berasai senang bejaku enggau aku pasal sebarang utai, indah pasal pemerinsa ke ditapi iya.” Nyau kelama, Federico kering baru ba pengarap, lalu udah nya ulih nyadi pengerintis enggau penulung gempuru baru. Antonio nyimpul: “Taja pan kami duai diatu enggau eklisia ke enda sama, tang kami duai rapat agi ari ke udah.”

Baka ni asai ati nuan enti pangan rapat ninggalka nuan lebuh nuan amat begunaka iya? Sekeda utai engka balat agi ngemediska ati. Kati ulih nuan ngampun penyalah iya? Kati kaul seduai deka kering baka ke udah?

Perundingka utai ke nyadi ba Jesus lebuh beberapa hari ti penudi iya ba dunya. Iya ngena mayuh awak enggau bala rasul iya ke tetap ati, lalu sida beserakup ketegal kaul ti manah. Jesus ngumbai sida pangan iya.  (John 15:15) Tang, nama nyadi maya Jesus ditangkap? Bala rasul rari. Ba mua bala rasul ti bukai, Peter madahka diri enggai ninggalka Tuan iya, tang ba malam nya, Peter besangkalka diri enda ngelala Jesus!​​—Matthew 26:​31-​33, 56, 69-​75.

Jesus nemu, iya deka napi penguji ti penudi kediri. Lalu iya bisi kebuah berasai lebu, indah pedis ati. Tang, randau iya enggau bala rasul beberapa hari pengudah iya diangkatka idup baru nadai nunjukka iya berasai lebu, pedis ati, tauka nesal ati. Jesus enda ngumbai iya patut ngitung pengelemi bala murid iya, nyengkaum utai ti udah digaga sida ba malam iya ke kena tangkap.

Tang, Jesus meransang Peter enggau bala rasul ke bukai. Iya nunjukka diri arapka sida enggau meri sida iring pasal pengawa ngajar ti besai reti dalam sejarah mensia. Ba Jesus, bala rasul nya agi pangan iya. Pengerindu iya meruan dikingatka sida. Sida deka enggau naka ulih enda agi ngenusahka ati Tuan sida. Amat, sida mujur bejalaika pengawa ke diberi iya ngagai sida.​​—Kereja Rasul 1:8; Kolosi 1:​23.

Seiku menyadi Kristian indu ke benama Elvira agi ingat lebuh iya bisi penanggul enggau pangan iya Giuliana. Elvira ngenang: “Lebuh iya madahka diri pedis ati enggau utai ti udah dikereja aku, aku berasai pedis ati. Enda salah enti iya ringat ngagai aku. Tang utai ti negu ati aku, iya nya iya balat ibuhka aku sereta utai ke ulih nyadi ketegal ulah aku. Aku seruran deka beterima kasih laban iya enda beratika penyalah ke udah dikereja aku ba iya, tang beratika baka ni ulah nya ulih ngenusahka aku. Aku beterima kasih ngagai Jehovah ketegal aku bisi pangan ti ibuhka aku lebih ari asai ati iya empu.”

Nya alai, nama deka digaga pangan ti manah lebuh kaul seduai iya bisi penanggul? Iya deka bejaku enggau siru tang beterus terang, enti patut. Iya deka baka Natan enggau Husai, ke mengkang taluk indah ba maya ti tusah, sereta baka Jesus ke deka ngampun. Kati nuan pangan ke baka nya?