1. Nama kebuah sekeda orang patut dibasa, lalu nama deka dipelajarka kitai ba artikel tu?

 BAKA NI kitai ngayanka basa ngagai orang? Kitai ngereja tu enggau berundingka sida sereta masa sida. Kesuah iya, kitai masa orang ke udah ngereja utai ti ngasuh orang nya patut dibasa tauka orang ke ngembuan siti-siti pengawa ti besai tauka penuduk ti tinggi. Ba artikel tu, kitai deka nemu sapa ke patut dibasa lalu nama kebuah.

2, 3. (a) Kelebih agi, nama kebuah Jehovah patut dibasa? (Peda gambar ba pun artikel.) (b) Sapa Anak Domba ke disebut ba Pemandang 5:​13, lalu nama kebuah kitai patut masa iya?

² Pemandang 5:​13 madahka, “Iya ke duduk ba kerusi diraja” enggau “Anak Domba” patut dibasa. “Iya ke duduk ba kerusi diraja” nya Jehovah. Ba Pemandang bab 4, bala melikat ti di serega meri kitai siti kebuah Jehovah, “ke idup belama-lama iya,” patut dibasa. Ku sida madahka: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.’​​—Pem. 4:​9-11.

³ “Anak Domba” ke disebut ba Pemandang 5:​13 nya Jesus Kristus. Baka ni kitai nemu? Lebuh Jesus ba dunya, iya dikumbai ‘Anak Domba Petara, ke muai dosa dunya!’ (Jhn. 1:​29) Kati bisi raja bukai ke sanggup mati nebus bala rayat iya? Tu endang kebuah ti manah masa Jesus. Iya patut dibasa laban iya ‘Raja ti siku aja, ke ari atas semua raja, enggau Tuan ari atas semua tuan.’ (1 Tim. 6:​14-​16) Nuan engka ngasaika utai ti diasaika bala melikat ti di serega ke belagu: ‘Anak Domba ti udah dibunuh endang patut nerima kuasa, pengaya, penemu-dalam, enggau pengering, basa, mulia enggau puji!’​​—Pem. 5:​12.

 4. Nama kebuah nya manah kitai masa Jehovah enggau Jesus?

⁴ John 5:​22, 23 madahka, Jehovah udah ngeletak Jesus nyadi hakim ke semua mensia. Tu meh batang kebuah kitai patut masa Jesus. Lalu enti kitai masa Jesus, kitai mega masa Jehovah. Lebuh kitai milih deka masa Jesus enggau Apai iya, kitai tau bulih pengidup ti meruan belama iya.​​—Bacha Masmur 2:​7, 11.

 5. Nama kebuah semua orang layak nerima basa ke patut?

⁵ Mensia digaga “neladan gamal” Petara. (P-kal. 1:​27) Reti nya, orang ngembuan penau ngayanka kualiti ti sama baka enggi Petara. Ngambika chunto, mensia ulih ngayanka pengerindu, pemanah ati, enggau pengasih. Mensia mega digaga ngambika ngembuan pengasai ati ke ulih nulung nemu bagi utai ti betul tauka salah, lurus tauka enda lurus, patut tauka enda patut. (Rom. 2:​14, 15) Mayuh orang rinduka utai ti beresi sereta manah, lalu deka idup bebaik enggau orang bukai. Tu enda ngenyitka ati, laban Jehovah nya Petara ti teratur sereta bisi pemaik. Amat, semua mensia digaga ngembuan penau ke ulih neladan Jehovah ba mayuh pekara. Ketegal tu, kitai patut masa sida.​​—Mas. 8:⁠5.

6, 7. Baka ni Saksi-Saksi Jehovah bebida lebuh ngayanka basa ngagai orang bukai?

⁶ Kitai nemu semua mensia patut dibasa, tang kitai engka tusah deka nemu bagi basa sereta ni pemesai basa ke patut diberi. Tu ketegal mensia ke enda sempurna balat dikachau ulah ke bisi ba dunya Sitan. Mayuh orang nyadika sida ke lelaki tauka indu nyadi idola sida. Ari ke meri basa baka ke udah ditatak Jehovah, sida meri orang bukai kelalu mayuh basa sereta ngaga sida baka petara. Sida engka nunda pisin gari, ulah, sereta pendiau orang politik enggau bala tuai pengarap, bala atlet, bala pelakun cherita wayang, sereta bala selebriti ke bukai.

⁷ Orang Kristian ke bendar nemu, kelalu meri basa ngagai mensia nya salah. Ari semua mensia ke kala idup, semina Jesus aja ke netapka teladan ti sempurna ke patut dititihka kitai. (1 Pet. 2:​21) Kitai patut ingat, ‘semua bela udah bedosa magang lalu jauh ari mulia Petara.’ (Rom. 3:​23) Nadai seiku mensia ke patut disembah. Enti kitai meri kelalu mayuh basa ngagai mensia ari ke patut, tu ngasuh Jehovah enda lantang ati.

8, 9. (a) Nama runding Saksi-Saksi Jehovah pasal bala pegawai perintah? (b) Ni maya kitai enda patut ngasika bala pegawai perintah?

⁸ Bisi sekeda orang patut dibasa kitai ketegal penuduk sida. Ngambika chunto, perundingka bala pegawai perintah sereta utai ti digaga sida ke nuan. Sida nulung nyaga pengelikun ba genturung pendiau, sereta nyediaka utai ti diguna rayat. Pengawa sida mai mayuh penguntung. Rasul Paul madahka, kitai patut ngumbai bala perintah tu “perintah ti megai menua.” Iya mega madahka, kitai patut nitihka undang-­undang sida: “Bayar ngagai sida utai ti patut dibayar kita. Bayar chukai ngagai orang ke patut alai kita mayar chukai,” lalu “beri basa ngagai orang ke patut dibasa kita.”​​—Rom. 13:​1, 7.

⁹ Kitai ke nyadi Saksi-Saksi Jehovah enggau naka ulih mandangka diri bebasaka bala pegawai perintah. Endang amat, tiap iti menua ngembuan adat kediri empu, nya alai utai ti dikedekaka bala pegawai perintah ba siti-siti menua engka bebida ari pangan diri. Tang, kitai besaup enggau bala pegawai perintah seraya sida bejalaika pengawa sida. Taja pia, enti sida ngasuh kitai ngereja utai ke ulih ngujungka kitai enda ngasika Jehovah, kitai enda patut nitihka utai ku sida. Ba pekara nya, kitai ngasi sereta masa Jehovah, ukai mensia.​​—Bacha 1 Peter 2:​13-​17.

10. Baka ni nembiak Jehovah menya netapka chunto ti manah ke kitai kemaya hari tu?

¹⁰ Kitai ulih belajar ari nembiak Jehovah menya, ke mandangka basa ngagai bala perintah sereta bala pegawai sida. Josep seduai Maria nyadi chunto ti manah. Lebuh perintah Rome deka nemu penyampau orang ke diau di menua nya, Josep seduai Maria mupuk ngerejister diri ngagai Betlehem taja pan Maria nyau semak hari deka beranak. (Luk. 2:​1-5) Siti agi chunto orang ke bebasaka pemerintah mensia, iya nya Rasul Paul. Lebuh iya dituduh ngereja utai ti salah, iya enggau bebasa ngarika diri empu di mua Raja Herod Agripa sereta Pestus, gabenor Rome ke megai menua Judah.​​—SKR. 25:​1-​12; 26:​1-3.

11, 12. (a) Nama kebuah kitai enda kelalu masa bala tuai pengarap? (b) Nama nyadi lebuh seiku Saksi ke bansa Austria ngayanka basa ngagai seiku orang politik?

¹¹ Baka ni enggau bala tuai pengarap? Patut kitai kelalu masa sida? Kitai meri sida basa ti sama baka ke diberi kitai ngagai orang bukai. Tang nya salah enti kitai kelalu meri sida basa, taja pan sida ngarapka nya. Nama kebuah? Laban pengarap ti pelesu nadai ngajar utai ti bendar pasal Petara sereta Jaku Iya, Bup Kudus. Jesus ngutuk bala pengajar pengarap pelesu, lalu ngumbai sida pepura sereta bala tuai ti jai. (Mat. 23:​23, 24) Taja pia, enda salah ngayanka basa ti lebih ngagai bala pegawai perintah. Ketegal kitai masa sida, sida kekadang nulung kitai.

¹² Seiku ari pegawai politik nya, Dr. Heinrich Gleissner ke bansa Austria. Maya Perang Dunya II, iya ditangkap bala soldadu Nazi. Lebuh iya dianjung ngena kerita api ngagai kem alai ngetan orang tangkap, iya betemu enggau Leopold Engleitner, seiku Saksi ke ransing ari menua Austria. Menyadi Kristian Engleitner enggau bebasa nerangka utai ti dipechaya iya ngagai Dr. Gleissner ke mendingka iya enggau manah. Pengudah perang ngetu, Gleissner suah ngena penuduk iya nulung bala Saksi di menua Austria. Nuan engka nemu sekeda chunto manah ke bisi nyadi ketegal orang Kristian bebasaka bala pegawai perintah.

13. Kelebih agi sapa ke patut dibasa kitai, lalu nama kebuah?

¹³ Bala menyadi Kristian kitai patut dibasa. Tu endang amat kelebih agi bala menyadi Kristian lelaki ke ngiring, baka bala tuai gempuru, bala tuai ti ngabas, raban Komiti Pampang Opis, sereta bala Raban ti Megai. (1 Tim. 5:​17) Semua sida nyediaka utai ti diguna nembiak Petara, lalu Bup Kudus ngumbai sida “mensia ke diberi” Petara. (Eps. 4:​8, NW) Nya kebuah kitai deka masa sida enda ngira bansa, pelajar, pengaya, pengelama dalam pemendar, tauka pengelandik nginjil sereta ngajar. Orang Kristian ba kurun keterubah netapka chunto ti manah ke kitai. Sida masa orang ke ngiring, lalu kitai kemaya hari tu pan sama. Lebuh kitai enggau sida, kitai enda ngaga sida baka melikat, reti nya, baka orang ke sempurna. Tang kitai masa sida ketegal sida bagas sereta baruh ati.​​—Bacha 2 Korint 1:⁠24; Pemandang 19:⁠10.

14, 15. Baka ni bala tuai gempuru ke Kristian bebida ari bala tuai pengarap?

¹⁴ Bala tuai gempuru nya baka pengibun ti baruh ati. Sida enggai digaga baka selebriti. Nya alai, sida bebida ari bala tuai pengarap maya jeman kitai sereta jeman Jesus. Ku Jesus madah pasal bala tuai pengarap: “Sida rindu duduk ba penuduk ti di atas lebuh pengerami makai besai, enggau duduk ba penuduk ti pemadu manah dalam balai gempuru.”​​—Mat. 23:​6, 7.

¹⁵ Bala tuai gempuru ke Kristian ngasika jaku Jesus: ‘Kita enda tau dikumbai Pe­ngajar, laban kita semina bisi siku aja Pe­ngajar, lalu semua kita tu diri menyadi magang. Lalu anang ngumbai orang di dunya tu apai, laban kita semina bisi siku aja Apai, Iya ke di serega. Lalu kita pen enda mega tau dikumbai kepala, laban kita semina bisi siku aja kepala, iya nya Kristus. Orang ke pemadu besai ba bala kita deka nyadi kuli kita. Semua orang ke ngeninggika diri, deka dikemaruhka, lalu semua orang ke ngemaruhka diri, deka ditinggika.’ (Mat. 23:​8-​12) Lebuh bala tuai gempuru ba eklisia di serata dunya baruh ati sereta ngasika jaku Jesus, bala menyadi Kristian deka rindu sereta masa sida.

16. Nama kebuah kitai patut terus bebendar ngayanka basa?

¹⁶ Kitai engka begunaka awak enti deka belajar masa orang bukai. Tu mega nyadi ba orang Kristian kurun keterubah. (SKR. 10:​22-​26; 3 Jhn. 9, 10) Tang bisi asil ti manah. Enti kitai masa orang bukai nitihka chara ti dikedekaka Jehovah, kitai deka bulih mayuh penguntung.

17. Nama sekeda penguntung ke datai ari ngayanka basa ngagai orang ke bekuasa?

¹⁷ Enti kitai masa orang ke bisi penuduk ba komuniti kitai, sida ulih nulung ngetanka hak kitai nginjil. Sida indah bisi runding ti manah pasal pengawa nginjil kitai. Tu utai ke nyadi beberapa taun suba di menua Jerman lebuh seiku pengerintis ke ­benama Birgit datai ngagai pengawa nyuaka setipikit tembu belajar ba sekula anak indu iya. Bala pengajar madah ngagai Birgit, sida berasai gaga laban bisi bala anak Saksi dalam kelas sida ngelama tu. Sida ngasaika bala anak Saksi ngasuh sekula nya manah agi. Ku Birgit madah ngagai sida, “Bala anak kami diajar nitihka standard ulah ari Petara, lalu tu nyengkaum ngayanka basa ngagai bala pengajar.” Seiku pengajar madahka, enti semua bala nembiak sekula baka bala Saksi, pengawa ngajar tentu senang dipejalaika. Sida bisi runding ti manah pasal bala anak Saksi nyentukka beberapa minggu udah nya, seiku ari bala pengajar nya datai ngulu konvensyen.

18, 19. Nama patut dikingatka kitai lebuh meri basa ngagai bala tuai gempuru?

¹⁸ Prinsip ke bisi ba Jaku Petara ulih nulung kitai nemu chara masa bala tuai gempuru ba eklisia. (Bacha Hebrew 13:​7, 17.) Kitai ulih sereta patut muji pemagas sida. Enti kitai nitihka iring ti diberi sida, tu deka nulung sida gawa ke kitai enggau ati ti gaga. Bup Kudus madahka, kitai mega patut nunda pengarap sida. Tang tu ukai reti nya kitai patut nitihka chara tuai gempuru “ti di atas” begari, bejaku sereta ngajar. Enti kitai baka nya, kitai nitihka mensia, ukai nitihka Kristus. Kitai patut ingat, bala tuai gempuru enda sempurna baka kitai.

¹⁹ Enti kitai masa bala tuai gempuru sereta enda ngaga sida baka selebriti, tu manah ke sida. Nama kebuah? Sida deka senang agi mengkang baruh ati sereta nyeliahka runding ke ngumbai diri manah agi ari orang bukai tauka ngumbai utai ti dikereja diri seruran ngena.

20. Nama penguntung enti kitai masa orang bukai?

²⁰ Masa orang bukai nulung kitai nyeliah ari berundingka diri empu sereta nulung kitai mengkang baruh ati lebuh orang bukai berundingka kitai. Ulah nya mega nyaga kitai ngambika enda tersangkut enti orang ke dibasa kitai ngereja utai ti ngemediska ati kitai. Siti agi penguntung, iya nya kitai ulih mengkang beserakup enggau gerempung Jehovah. Gerempung Jehovah nadai meri basa ti kelalu ngagai orang ke nyembah tauka ke enda nyembah Jehovah.

21. Nama penguntung ti pemadu besai enti mandangka basa ngagai orang bukai?

²¹ Penguntung ti pemadu besai enti mandangka basa ngagai orang bukai, iya nya kitai ngelantangka ati Petara. Kitai deka ngereja utai ti diasuh Petara sereta mengkang tetap ati ngagai Iya. Enggau tu Jehovah ulih nyaut Sitan ke madahka nadai orang deka mengkang tetap ati. (J-lam. 27:11) Mayuh orang ba dunya enda nemu chara ti patut meri basa ngagai orang bukai. Kitai amat beterima kasih laban kitai nemu meri basa nitihka chara ti dikedekaka Jehovah!