1. Nama utai ke deka dikerandauka kitai ba artikel tu?

 BALA anak lelaki Jakop begelumu ngelingi iya, lalu ninga enggau manah utai ti deka dipadah apai sida. Ba artikel ke sebedau tu, kitai belajar Jakop madah ngagai Reuben, Simion, Lewi, enggau Judah sekeda utai ke engka enda disadang sida. Nyadi sida engka berunding nama utai ke deka disebut Jakop ngagai lapan iku da agi anak lelaki iya. Aram kitai beratika nama ke ulih dipelajar kitai ari jaku Jakop ngagai Sebulun, Isakar, Dan, Gat, Aser, Naptali, Josep enggau Benjamin. a

SEBULUN

2. Nama utai ke dipadah Jakop ngagai Sebulun, lalu baka ni utai ti dipadah Jakop dikeamatka? (Pemungkal 49:13) (Peda mega  kutak.)

² Bacha Pemungkal 49:13. Jakop madahka bala peturun Sebulun deka diau ba tebing tasik tunga ke utara Menua ti Udah Disemaya. Lebih 200 taun pengudah nya, raban bansa Sebulun nerima tanah pesaka sida. Tanah nya entara Tasik Galili enggau Tasik Mediterranean. Moses meri jaku benabi pasal tu: “O Sebulun, gaga ati meh nuan lebuh nuan mupuk.” (U-dat. 33:18) Tu engka mai reti raban bansa Sebulun ulih mindah enggau senang ngagai dua tebing tasik nya lalu bedagang enggau orang ke datai ari menua bukai. Enda ngira nama kebuah Moses nyebut jaku nya, bala peturun Sebulun tentu bisi kebuah gaga ati.

3. Nama ulih nulung kitai puas ati?

 ³ Nama ulih dipelajarka kitai? Kitai bisi mayuh kebuah gaga ati, enda ngira dini alai kitai diau tauka nama situasi kitai. Lalu, ngambika mengkang gaga ati, kitai mesti puas ati enggau utai ti dikemisi. (Mas. 16:6; 24:5) Au, kekadang kitai engka suah agi befokus ba utai ke enda dikemisi kitai, tang enda befokus ba utai ke manah ke dikembuan kitai. Nyadi, uji meh betumpu ba utai ti manah ke bisi ba pengidup nuan.—Gal. 6:4.

ISAKAR

4. Nama utai ke dipadah Jakop ngagai Isakar lalu baka ni utai ke dipadah Jakop dikeamatka? (Pemungkal 49:​14, 15) (Peda mega  kutak.)

⁴ Bacha Pemungkal 49:​14, 15. Jakop muji Isakar ke bebendar gawa. Iya madahka, Isakar nya baka siku keledai ti kering tulang. Keledai nya jelu ke ulih ngesan mayuh utai ti berat. Jakop mega madahka, Isakar deka bulih tanah ti manah. Lalu jaku Jakop dikeamatka lebuh raban bansa Isakar nerima tanah ti subur ba tebing Sungai Jordan. (Jos. 19:22) Endang amat, raban bansa Isakar bebendar gawa kena nyaga tanah sida, tang sida mega bebendar gawa kena nulung orang bukai. (1 Raj. 4:​7, 17) Ambika chunto, lebuh Hakim Barak enggau nabi indu Deborah minta orang Israel nulung ngelaban Sisera, raban bansa Isakar nya siti ari raban bansa ke nulung. Lalu sida mega sanggup nulung beperang ba maya bukai.—P-ulu. 5:15.

5. Nama kebuah kitai patut bebendar gawa?

⁵ Nama ulih dipelajarka kitai? Baka Jehovah ke menghargai raban bansa Isakar ke bebendar gawa, Jehovah mega beterima kasih lebuh kitai bebendar gawa. (P-jar. 2:24) Ambika chunto, peratika bala tuai gempuru ke bebendar nyaga bala menyadi ba raban gempuru. (1 Tim. 3:1) Taja pan sida enda beperang baka raban bansa Isakar, tang sida bebendar nyaga bala menyadi ari utai ti ulih ngerusakka kaul sida enggau Jehovah. (1 Kor. 5:​1, 5; Jud. 17-23) Sida mega bebendar gawa nyediaka cheramah lalu ngenataika cheramah nya ba gempuru kena meransang bala menyadi.—1 Tim. 5:17.

DAN

6. Nama tanggung pengawa ke diberi ngagai raban bansa Dan? (Pemungkal 49:​17, 18) (Peda mega  kutak.)

⁶ Bacha Pemungkal 49:​17, 18. Jakop nyemaka Dan baka ular ke nyerang jelu ti besai agi, chunto baka kuda ke dikena beperang. Raban bansa Dan amat berani sereta sedia nyerang munsuh orang Israel. Maya orang Israel ba pejalai ngagai Menua ti Udah Disemaya, raban bansa Dan “nyaga semua raban kem ke bukai ari belakang.” (P-pau. 10:25) Taja pan tanggung pengawa nya enda dipeda orang Israel, tang tanggung pengawa nya amat penting.

7. Nama patut dikingatka kitai pasal sebarang pengawa ke diterima kitai ari gerempung Jehovah?

⁷ Nama ulih dipelajarka kitai? Kekadang, nuan engka ngereja sekeda tanggung pengawa lalu ngumbai nadai orang beratika utai ke digaga nuan. Engka nuan nulung meresi tauka nyeruri palan gempuru, nyadi sukarela ba gempuru besai tauka konvensyen, tauka ngereja pengawa bukai. Kingatka, Jehovah seruran meda sereta beterima kasihka semua utai ke digaga nuan ke Iya. Lalu Iya amat gaga ati lebuh nuan nyembah Iya ukai ketegal nuan deka minta puji ari orang bukai, tang ketegal nuan deka ngayanka pengerindu ti besai ngagai Iya.—Mat. 6:​1-4.

GAT

8. Nama kebuah raban bansa Gat senang diserang bala munsuh orang Israel? (Pemungkal 49:19) (Peda mega  kutak.)

⁸ Bacha Pemungkal 49:19. Jakop madahka  Gat deka diserang bala perumpak. Kira-kira 200 taun pengudah nya, raban bansa Gat bulih tanah pesaka ba begian timur Sungai Jordan. Endur tu ngimbai sempadan mayuh munsuh. Nyadi, bala munsuh ari menua bukai ulih nyerang sida enggau senang. Taja pia, raban bansa Gat keran deka diau dia laban endur nya amat manah kena nupi jelu sida. (P-pau. 32:​1, 5) Orang Gat amat berani. Taja pia, utai ti penting agi, sida pechaya Jehovah deka nulung sida ngelaban bala munsuh sida sereta nyaga tanah ke udah diberi ngagai sida. Pengelama betaun-taun, sida mega nganjung bala soldadu sida kena nulung raban bansa bukai ngulihka tanah pesaka ba begian barat Sungai Jordan. (P-pau. 32:​16-19) Sida pechaya Jehovah deka nyaga bala bini sereta anak sida lebuh sida ke lelaki beperang. Jehovah merekatka sida laban sida berani sereta sanggup nulung orang bukai taja pan enda senang.—Jos. 22:​1-4.

9. Enti kitai pechayaka Jehovah, nama pemutus ke deka digaga kitai?

⁹ Nama ulih dipelajarka kitai? Ngambika ulih terus nyembah Jehovah ba maya ti tusah, kitai patut mengkang pechayaka Iya. (Mas. 37:3) Mayuh menyadi Kristian kemayaharitu nunjukka diri arapka Jehovah lebuh sida ngaga pengorbanan ngambika ulih nyukung pengawa nirika bengunan teokratik, nginjil ba endur ke begunaka mayuh agi penginjil, tauka ngereja pengawa bukai ba gerempung Jehovah.  Sida ngereja nya laban sida pechaya Jehovah deka seruran nyaga sida.—Mas. 23:1.

ASER

10. Nama utai ke enda digaga raban bansa Aser? (Pemungkal 49:20) (Peda mega  kutak.)

¹⁰ Bacha Pemungkal 49:20. Jakop madahka, raban bansa Aser deka nyadi kaya, lalu utai nya amat nyadi. Raban bansa Aser nerima tanah pesaka ke pemadu subur ba menua Israel. (U-dat. 33:24) Tanah sida mega ngimbai Tasik Mediterranean sereta nyengkaum endur penyangkai kapal ba Sidon ti kaya. Tang, raban bansa Aser enda muru orang Kanaan ari tanah nya. (P-ulu. 1:​31, 32) Ketegal nya, sida engka nitih gaya pengidup orang Kanaan lalu berengkah ngemeratka reta tengkira. Tu engka ngasuh raban bansa Aser kurang agi ransing ngereja pengawa ke Jehovah. Ambika chunto, lebuh Hakim Barak minta orang Israel nulung ngelaban soldadu Kanaan, raban bansa Aser enda nulung. Ketegal nya, sida enda meda utai ti ngalitka ati ke dikereja Jehovah kena nulung orang Israel menang “semak sungai ba Megido.” (P-ulu. 5:​19-21) Raban bansa Aser engka berasai malu lebuh sida ninga Barak enggau Deborah belagu: “Raban bansa Aser duduk dugau-dugau ba tebing tasik.”—P-ulu. 5:17.

11. Nama kebuah kitai deka ngembuan runding ti seimbang pasal duit?

¹¹ Nama ulih dipelajarka kitai? Kitai deka  meri Jehovah utai ti pemadu manah. Kena ngereja nya, kitai patut bejimat ngambika enda ngembuan runding orang dunya tu, ke ngumbai duit enggau reta tengkira nya utai ti pemadu penting ba pengidup. (J-lam. 18:11) Kitai deka ngembuan runding ti seimbang pasal duit. (P-jar. 7:12; Heb. 13:5) Kitai enggai masau jam enggau pengering kitai kena ngulihka utai ti enda entu diguna kitai. Tang kitai deka ngena awak enggau pengering kitai gawa ke Jehovah diatu. Lalu kitai nemu enti kitai mengkang tetap ati, Jehovah deka meri kitai pengidup ti pemadu manah jemah ila.—Mas. 4:8.

NAPTALI

12. Baka ni jaku Jakop ngagai Naptali engka dikeamatka? (Pemungkal 49:21) (Peda mega  kutak.)

¹² Bacha Pemungkal 49:21. Jakop madahka, Naptali deka nyebut “jaku ti manah didinga.” Tu engka merujuk ngagai chara Jesus bejaku lebuh iya nginjil ba dunya. Jesus ngena mayuh awak ba Kapernaum, iya nya dalam kawasan raban Naptali. Nya kebuah Kapernaum dikumbai “nengeri [Jesus] empu.” (Mat. 4:13; 9:1; Jhn. 7:46) Lalu Nabi Isaiah madahka, Jesus deka nyadi baka “penampak ti besai” ke orang Sebulun enggau Naptali. (Isa. 9:​1, 2) Nengah utai ti diajar iya, Jesus nyadi “penampak ti bendar ke deka manchar ngagai semua macham orang.”—Jhn. 1:9.

13. Baka ni kitai ulih nentuka jaku kitai ngelantangka ati Jehovah?

¹³ Nama ulih dipelajarka kitai? Utai ke disebut sereta chara kitai bejaku penting ba Jehovah. Nyadi, baka ni kitai ulih nyebut “jaku ti manah didinga” ke ngelantangka ati Jehovah? Kesatu, kitai enda bula. (Mas. 15:​1, 2) Kedua, kitai nyebut utai ti meransang orang bukai. Ambika chunto, kitai muji sida lebuh sida ngereja utai ti manah. Kitai mega nguji enda bejaku pasal pengelemi orang bukai tauka kompelin pasal sida. (Eps. 4:29) Lalu ketiga, kitai ulih nguji nyadi landik agi ngepunka randau enggau orang bukai lalu madah ngagai sida pasal Jehovah.

JOSEP

14. Baka ni jaku benabi pasal Josep dikeamatka? (Pemungkal 49:​22, 26) (Peda mega  kutak.)

¹⁴ Bacha Pemungkal 49:​22, 26. Jakop tentu amat temegah enggau Josep, laban Jehovah udah milih Josep “ari bala menyadi iya” lalu ngena iya enggau chara ti spesial. Jakop ngangauka Josep “dan pun kayu ke bebuah lebat.” Jakop nya meh pun kayu nya, lalu anak iya Josep dan pun kayu nya. Josep nya anak tuai Jakop enggau bini ti dikesayauka iya, Rachel. Jakop madahka Josep deka nerima pesaka ke enggi anak tuai Leah, iya nya Reuben. (P-kal. 48:​5, 6; 1 Ban. 5:​1, 2) Jaku benabi tu dikeamatka lebuh dua iku anak lelaki Josep, iya nya Efraim enggau Manasi, nyadi dua iti raban bansa Israel lalu dua raban bansa tu bulih tanah pesaka sida empu.—P-kal. 49:25; Jos. 14:4.

15. Nama reaksi Josep lebuh napi utai ti enda lurus?

¹⁵ Jakop mega madahka, bala orang ke ngena panah deka “majak nyerang [Josep], lalu nimbak iya ngena anak panah.” (P-kal. 49:23) Tu merujuk ngagai bala menyadi Josep ke kepapaska iya, enda adil enggau iya, sereta merinsaka iya. Tang Josep enda begedika bala menyadi iya tauka nyalahka Jehovah ketegal utai ti nyadi ngagai iya. Baka ke dipadah Jakop: “Panah ke dipegai iya enda bekinsit. Jari iya mengkang kering sereta laju nimbakka anak panah.” (P-kal. 49:24) Josep baka ke ngena “anak panah” pengasih enggau pengerindu kena nyeliahka ari ngembuan asai ati ti begedi ngagai bala menyadi lelaki iya. Lalu iya ukai semina ngampunka bala menyadi iya, tang iya  mega ngintu sida enggau manah. (P-kal. 47:​11, 12) Josep bepanggai ba Jehovah lebuh napi penguji. Josep ngasuh penguji ke ditapi iya nulung iya nyadi orang ke manah agi. (Mas. 105:​17-19) Asil iya, Jehovah ulih ngena Josep ngereja mayuh utai ti penting.

16. Baka ni kitai ulih neladan Josep lebuh napi penguji?

¹⁶ Nama ulih dipelajarka kitai? Lebuh napi penguji, anang meh ngenyauhka diri ari Jehovah tauka ari bala menyadi Kristian kitai. Kingatka, Jehovah ulih ngelatih kitai seagi-agi kitai mengkang nyembah Iya, taja pan napi penguji. (Heb. 12:​7, nota kaki.) Iya ulih nulung kitai ngemansangka sifat Kristian kitai, baka pengasih sereta sedia ngampun. (Heb. 12:11) Kitai ulih yakin, baka Jehovah ke udah merekatka Josep, Iya mega deka merekatka kitai.

BENJAMIN

17. Baka ni jaku benabi pasal Benjamin dikeamatka? (Pemungkal 49:27) (Peda mega  kutak.)

¹⁷ Bacha Pemungkal 49:27. Jakop madahka, raban bansa Benjamin deka nyadi pahlawan ti landik belaban baka serigala. (P-ulu. 20:​15, 16; 1 Ban. 12:2) Raja keterubah orang Israel nya Saul ari raban bansa Benjamin. Lalu Saul enggau berani belaban enggau orang Pilistin. (1 Sam. 9:​15-17, 21) Betaun-taun pengudah nya, Kuin Ester enggau Mordikai, ke mega ari raban bansa Benjamin, nyelamatka orang Israel ari dibunuh.—Est. 2:​5-7; 8:3; 10:3.

18. Baka ni kitai ulih neladan penetap ati raban bansa Benjamin?

¹⁸ Nama ulih dipelajarka kitai? Semua orang ari raban bansa Benjamin tentu amat gaga ati lebuh Saul, ke ari raban bansa sida, nyadi raja. Tang pengudah nya, Jehovah ngelantik David, ke ari raban bansa Judah, nyadi raja. Terubah iya, ukai semua orang Benjamin nyukung David. Tang nyau kelama, sida ulih nerima David nyadi raja sida. (2 Sam. 3:​17-19) Bepuluh taun pengudah nya, lebuh raban bansa bukai angkat ngelaban, raban bansa Benjamin mengkang tetap ati ngagai raban bansa Judah sereta raja ke dipilih Jehovah. (1 Raj. 11:​31, 32; 12:​19, 21) Baka raban bansa Benjamin, aram meh kitai enggau tetap ati nyukung sida ke dipilih Jehovah ngiring bala nembiak Iya kemayaharitu.—1 Tes. 5:12.

19. Baka ni kitai tau bulih penguntung ari jaku benabi Jakop?

¹⁹ Jaku benabi ke dipadah Jakop sebedau iya mati ulih mai penguntung ke kitai. Utai ti dipelajarka kitai pasal jaku benabi Jakop sereta baka ni jaku nya dikeamatka, ngasuh kitai yakin agi jaku benabi ke bukai dalam jaku Petara tentu deka dikeamatka. Lalu kitai ulih faham agi baka ni kitai ulih ngelantangka ati Jehovah.