ARTIKEL DIPELAJAR 27
LAGU 79 Ngajar Sida Bediri Tegap
Tulung Pemelajar Bup Kudus Nuan Nyembah Jehovah
“Bepegai rat ba pengarap kita, nyadi berani.”—1 KOR. 16:13.
TUJU ARTIKEL TU
Artikel tu deka beratika baka ni kitai ulih nulung pemelajar Bup Kudus ngemansangka pengarap enggau pemerani ke diguna sida ngambika ulih ngaga ubah sereta nyembah Jehovah.
1-2. (a) Nama kebuah sekeda pemelajar Bup Kudus kakang ati deka nyadi siku ari Saksi-Saksi Jehovah? (b) Nama deka dikerandauka kitai ba artikel tu?
KATI nuan kala kakang ati deka nyadi siku ari Saksi-Saksi Jehovah? Engka nuan takut orang ke sama gawa, bala kaban, tauka diri sebilik nuan deka ringat enti nuan nyadi siku Saksi. Tauka nuan engka ngumbai nya tusah deka idup nitihka standard Jehovah. Enti pia, nuan ulih faham asai ati pemelajar Bup Kudus nuan, ke engka kakang ati deka nyadi siku ari Saksi-Saksi Jehovah.
2 Jesus nemu utai ke baka tu ulih nagang sesiku orang ari nyembah Jehovah. (Mat. 13:20-22) Tang Jesus enda putus asa nulung sida ke kakang ati deka nitihka iya. Nyadi, iya nunjuk ngagai bala murid iya chara sida ulih nulung orang ke kakang ati ngambika ulih (1) nemu cabaran ke ulih nagang pemansang sida, (2) ngenalamka pengerindu sida ke Jehovah, (3) ngenuluka Jehovah ba pengidup, sereta (4) mutarka sakal ari orang bukai. Baka ni kitai ulih neladan chara Jesus ngajar lebuh kitai ngena bup Idup enggau Lantang Belama Iya! kena nulung pemelajar Bup Kudus kitai nyembah Jehovah?
TULUNG PEMELAJAR NUAN NEMU CABARAN KE ULIH NAGANG PEMANSANG IYA
3. Nama utai ke engka nagang Nikodimus ari nyadi murid Jesus?
3 Nikodimus nya siku ketuai orang bansa Judah. Nama utai ke nagang iya ari nyadi murid Jesus? Jesus baru nginjil pengelama enam bulan, tang Nikodimus ulih meda Jesus nya Messiah. (Jhn. 3:1, 2) Taja pia, Nikodimus belalai betemu enggau Jesus laban iya “takutka orang Judah.” (Jhn. 7:13; 12:42) Iya engka irau iya deka lenyau penuduk sereta sekeda ari pengaya iya enti iya nyadi murid Jesus. a
4. Baka ni Jesus nulung Nikodimus faham utai ti dikedekaka Petara ari iya?
4 Nikodimus nemu pasal Adat Moses, tang iya begunaka tulung kena faham utai ti dikedekaka Jehovah ari iya. Baka ni Jesus nulung iya? Jesus sanggup meri awak berandau enggau Nikodimus, indah maya malam hari. Lalu Jesus enggau terus terang madah ngagai Nikodimus utai ke patut dikereja ngambika ulih nyadi murid iya. Nikodimus patut nesal ati ke dosa iya, dibaptisa ngena ai, sereta arapka Anak Petara.—Jhn. 3:5, 14-21.
5. Baka ni kitai ulih nulung pemelajar Bup Kudus nemu utai ke ulih nagang pemansang iya?
5 Taja pan pemelajar Bup Kudus kitai ulih faham enggau manah utai ke diajar dalam Bup Kudus, tang iya engka begunaka tulung kena nemu utai ke ulih nagang pemansang iya. Ambika chunto, engka kereja tauka sakal ari diri sebilik ngasuh iya tusah deka ngaga pemansang ba pengarap. Nyadi, baka Jesus, kena meh awak nulung pemelajar nuan. Nuan engka ulih mai iya makai tauka ngirup ba kedai. Lebuh seduai ngereja utai ke baka tu, pemelajar nuan engka deka agi madahka pasal pengidup iya, lalu nuan ulih nemu pasal cabaran ke ditapi iya. Udah nya, nuan ulih meransang iya ngaga ubah ti patut. Lalu iya deka ngereja nya ukai ketegal deka ngelantangka ati nuan, tang ketegal iya rinduka Jehovah.
6. Baka ni nuan ulih nulung pemelajar Bup Kudus yakin agi nitihka utai ke dipelajar iya? (1 Korint 16:13)
6 Lebuh pemelajar Bup Kudus nuan andal Jehovah deka nulung iya idup nitihka standard Bup Kudus, tu deka nulung iya yakin agi nitihka utai ke dipelajar iya. (Bacha 1 Korint 16:13.) Pengajar Bup Kudus tau disemaka baka cikgu ba sekula. Sapa cikgu ti dikerinduka nuan? Nuan engka rinduka cikgu nya laban iya enggau sabar nulung nuan majak yakin enggau pengelandik nuan. Endang amat, pengajar Bup Kudus deka madah ngagai pemelajar iya utai ti dikedekaka Petara. Tang pengajar Bup Kudus ti manah deka ngereja lebih agi. Pengajar nya deka nulung pemelajar iya yakin, Jehovah deka nulung iya ngaga ubah ba pengidup. Nyadi, baka ni nuan ulih ngereja tu?
TULUNG PEMELAJAR NUAN NGENALAMKA PENGERINDU IYA KE JEHOVAH
7. Baka ni Jesus nulung bala peninga iya ngenalamka agi pengerindu sida ke Jehovah?
7 Jesus nemu, pengerindu ke Petara deka meransang bala murid iya nitihka utai ke dipelajarka sida. Jesus suah ngajar utai ke nulung bala murid iya ngenalamka agi pengerindu sida ke Jehovah. Ambika chunto, iya mandingka Jehovah baka siku apai ke meri utai ti manah ngagai bala anak iya. (Mat. 7:9-11) Sekeda ari bala murid Jesus engka nadai apai ke baka nya. Gambarka asai ati sida lebuh Jesus madahka sempama pasal siku apai ti bepengerindu ke nerima anak iya pulai baru, taja pan anak iya udah ngereja mayuh utai ti jai. Jesus nulung sida sedar, Jehovah amat sayauka sida sereta deka nulung sida.—Luk. 15:20-24.
8. Baka ni nuan ulih nulung pemelajar Bup Kudus ngenalamka agi pengerindu iya ke Jehovah?
8 Nuan ulih nulung pemelajar Bup Kudus ngenalamka agi pengerindu iya ke Jehovah lebuh nuan suah berandau pasal sifat-sifat Jehovah. Tiap kali seduai belajar, tulung iya meda kaul entara utai ke dipelajar iya enggau pengerindu Jehovah. Lebuh berandau pasal tebus, tulung iya faham baka ni tu nunjukka Jehovah rinduka iya. (Rom. 5:8; 1 Jhn. 4:10) Lebuh pemelajar nuan nemu Jehovah amat sayauka iya, tu deka nulung ngenalamka agi pengerindu iya ke Jehovah.—Gal. 2:20.
9. Nama nulung Michael ngaga ubah ba pengidup iya?
9 Michael, ari Indonesia, dibesaika dalam pemendar, tang iya enda kala dibaptisa. Lebuh iya beumur 18 taun, iya pindah ngagai menua bukai. Ba menua nya, iya gawa mai lori. Udah nya, iya pulai baru ngagai Indonesia ngambika ulih kawin. Taja pia, iya agi gawa ba menua bukai, ke jauh ari diri sebilik iya. Ba maya nya, bini enggau anak indu iya berengkah belajarka Bup Kudus lalu ngaga pemansang. Pengudah indai iya nadai, Michael ngaga pemutus pulai baru ngagai Indonesia kena nyaga apai iya. Iya mega setuju deka belajarka Bup Kudus. Lebuh belajarka begian “Belajar Mayuh Agi” ba Pelajar 27 bup Idup enggau Lantang Belama Iya!, ati Michael balat ditegu. Iya nyabak lebuh iya berundingka asai ati Jehovah ke meda Jesus merinsa. Lalu lebuh iya faham pemesai pengerindu Jehovah enggau Jesus ke iya, tu ngasuh iya beterima kasih. Michael pan ngaga ubah ba pengidup iya lalu dibaptisa.
TULUNG PEMELAJAR NUAN NGENULUKA JEHOVAH BA PENGIDUP
10. Baka ni Jesus nulung bala murid iya ngaga ubah ngambika ulih ngereja mayuh agi ke Jehovah? (Luke 5:5-11) (Peda mega gambar.)
10 Sekeda bala murid Jesus nemu iya meh Messiah. Tang sida begunaka tulung ngambika ulih ngenuluka pengawa nginjil ba pengidup sida. Peter enggau Andrew udah lama nyadi murid Jesus sebedau seduai iya dibai nginjil penuh jam enggau Jesus. (Mat. 4:18, 19) Seduai iya gawa begulai enggau James enggau John, lalu sida bisi bisnis berikan ti mujur. (Mrk. 1:16-20) Peter enggau Andrew badu gawa nyadi orang berikan ngambika ulih nitihka Jesus penuh jam. Lebuh seduai iya ngaga pemutus tu, seduai iya tentu udah ngaga atur ngambika diri sebilik bisi utai ke diguna sida lebuh seduai iya nitihka Jesus. Nama kebuah seduai iya sanggup ninggalka bisnis berikan nya? Bup Luke madahka Jesus ngereja siti kereja ajih ke nulung seduai iya andal, Jehovah ulih nyediaka utai ke diguna sida.—Bacha Luke 5:5-11.
Nama ulih dipelajarka kitai pasal chara Jesus nulung bala murid iya ngaga ubah ngambika ulih ngereja mayuh agi ke Jehovah? (Peda genteran 10) b
11. Baka ni kitai ulih ngena pengalaman kitai negapka pengarap pemelajar Bup Kudus kitai?
11 Jesus ulih ngereja kereja ajih, tang kitai enda ulih. Taja pia, kitai ulih bekunsika pengalaman ke nunjukka baka ni Jehovah udah nyukung sida ke ngenuluka Iya ba pengidup. Ambika chunto, kati nuan agi ingat baka ni Jehovah nulung nuan lebuh nuan berengkah datai begempuru? Nuan engka patut betemu enggau tuke kena nerangka kebuah nuan enda ulih agi gawa overtime enti nya ngachau pengawa begempuru nuan. Padahka ngagai pemelajar nuan baka ni pengalaman nya udah negapka pengarap nuan lebuh nuan meda Jehovah udah nulung nuan seraya nuan ngenuluka Iya ba pengidup.
12. (a) Nama kebuah kitai patut mai bala menyadi ke bukai lebuh kitai ngajar Bup Kudus? (b) Baka ni nuan ulih ngena video kena nulung pemelajar nuan ngenuluka Jehovah ba pengidup? Beri siti chunto.
12 Nuan mega ulih mai bala menyadi ke bukai ari mayuh macham latar belakang lebuh nuan ngajar Bup Kudus. Nuan ulih nanya menyadi nya baka ni sida nemu pemendar sereta nama utai ke digaga sida ngambika ulih ngenuluka Jehovah ba pengidup. Pengalaman sida ulih mai penguntung ngagai pemelajar Bup Kudus nuan. Pia mega, kena meh awak meda video enggau pemelajar nuan ba begian “Belajar Mayuh Agi” tauka “Aram Belajar” dalam bup Idup enggau Lantang Belama Iya! Ambika chunto, lebuh belajarka Pelajar 37, nuan ulih nekanka prinsip ari video Jehovah Deka Meri Utai Diguna Kitai.
TULUNG PEMELAJAR NUAN MUTARKA SAKAL ARI ORANG BUKAI
13. Baka ni Jesus nyediaka bala murid iya kena napi sakal?
13 Jesus suah madah ngagai bala murid iya, sida deka napi sakal ari orang bukai, indah ari diri sebilik. (Mat. 5:11; 10:22, 36) Enda lama sebedau Jesus mati, iya madah ngagai bala murid iya, sida engka dibunuh ketegal nyembah Jehovah. (Mat. 24:9; Jhn. 15:20; 16:2) Iya mega ngasuh sida bejimat lebuh nginjil. Ambika chunto, iya madah ngagai sida ngambika enda bekelikuh enggau orang ke nyakal sida, lalu bejimat enggau utai ke disebut sereta utai ke dikereja sida ngambika ulih terus nginjil.
14. Baka ni kitai ulih nulung pemelajar Bup Kudus besedia napi sakal? (2 Timoti 3:12)
14 Baka ni kitai ulih nulung pemelajar Bup Kudus besedia napi sakal? Kitai ulih madah ngagai iya utai ke engka disebut tauka digaga orang ke sama gawa, bala kaban, tauka diri sebilik ketegal iya belajar Bup Kudus. (Bacha 2 Timoti 3:12.) Sekeda orang ke sama gawa engka ngeleseka chara pengidup iya ti baru. Ke bukai, indah diri sebilik iya, engka bejaika utai ke dipelajarka iya ari Bup Kudus. Enti kitai nulung pemelajar kitai besedia tumu agi, iya enda tekenyit lebuh utai tu nyadi. Lalu, iya nemu utai ke patut digaga tauka disebut lebuh orang bukai nyakal iya.
15. Nama ulih nulung pemelajar Bup Kudus kitai napi sakal ari diri sebilik?
15 Enti pemelajar nuan napi sakal ari diri sebilik, tulung iya berunding pasal nama kebuah sida engka ringat. Diri sebilik iya engka ngumbai iya udah ditipu, tauka sida engka ngumbai Saksi-Saksi Jehovah nya orang jai. Indah sekeda ari diri sebilik enggau kaban belayan Jesus ngumbai iya udah gila. (Mrk. 3:21; Jhn. 7:5) Nyadi, tulung meh pemelajar nuan mengkang sabar sereta bejaku enggau nelap enggau orang bukai, nyengkaum ngagai diri sebilik.
16. Baka ni kitai ulih nulung pemelajar Bup Kudus bekunsika utai ke dipechaya iya enggau chara ti nelap?
16 Lebuh kaban belayan tauka diri sebilik pemelajar nuan deka nemu mayuh agi pasal Bup Kudus, manah agi enti iya enda nerangka semua utai ba maya ti sama. Nama kebuah? Penerang ti kelalu mayuh engka tusah deka diterima diri sebilik iya ba maya nya. Ketegal nya, sida engka enggai agi bejaku pasal pengarap iya. Nyadi, peransang pemelajar nuan bekunsika utai ke dipechaya iya enggau chara ti senang. Enggau nya, sida engka deka agi berandau pasal Bup Kudus ba maya bukai. (Kol. 4:6) Iya mega engka ulih ngasuh sida ngelawa laman web jw.org. Tu deka nulung sida belajar mayuh agi pasal Saksi-Saksi Jehovah ba maya ti ngena sereta nitihka pemayuh penerang ti dikedekaka sida.
17. Baka ni nuan ulih ngelatih pemelajar Bup Kudus ngambika nyaut tanya ke engka dikembuan orang pasal Saksi-Saksi Jehovah? (Peda mega gambar.)
17 Nuan engka ulih ngena siri artikel “Utai ke Suah Ditanya” ba jw.org kena nulung pemelajar nuan nyediaka saut ti senang ngagai tanya ke dikembuan kaban belayan, diri sebilik, tauka orang ke sama gawa. (2 Tim. 2:24, 25) Seduai mega ulih berandauka begian “Bisi Orang Madah” tauka “Orang Engka Nanya” ba ujung tiap iti pelajar bup Idup enggau Lantang Belama Iya! Peransang pemelajar nuan belatih chara iya deka nerangka utai ti dipechaya iya ngagai orang bukai. Nuan mega ulih meri iya cadangan ngambika iya ulih ngemanahka agi chara iya nyaut. Lebuh nuan meri awak belatih enggau iya, tu deka ngasuh iya yakin agi ngetanka pengarap iya.
Lebuh belajarka Bup Kudus, belatih meh chara nginjil enggau pemelajar nuan ngambika iya senang agi nginjil (Peda genteran 17) c
18. Baka ni nuan ulih meransang pemelajar Bup Kudus nyadi penginjil ke bedau dibaptisa? (Matthew 10:27)
18 Jesus meransang bala murid iya nusui Berita Manah ngagai semua orang. (Bacha Matthew 10:27.) Lebuh pemelajar nuan berengkah nginjil ari rumah ke rumah, iya deka ngasaika tulung ari Jehovah. Tu deka nulung iya arap agi ngagai Jehovah. Baka ni nuan ulih nulung pemelajar Bup Kudus netapka juluk ati tu? Lebuh bisi jaku gerah pasal kimpin nginjil ba endur nuan, tulung pemelajar nuan nemu baka ni chara iya ulih layak nyadi penginjil. Nuan mega ulih madah, kesuah iya senang agi berengkah nginjil maya bisi kimpin. Siti agi juluk ati ke ulih ditetapka pemelajar nuan, iya nya enggau latih ke diberi maya gempuru tengan minggu. Seraya iya nguji deka nyapai juluk ati tu, iya deka belajarka chara nerangka utai ke dipechayaka iya enggau manah agi.
TUNJUKKA NUAN YAKIN ENGGAU PEMELAJAR NUAN
19. Baka ni Jesus nunjukka iya yakin enggau bala murid iya, lalu baka ni kitai ulih neladan iya?
19 Sebedau Jesus pulai baru ngagai serega, iya madah ngagai bala murid iya, sida deka begulai baru enggau iya. Maya nya sida enda faham Jesus benung bejaku pasal harapan sida idup ba serega. Taja pan sida enda faham semua utai, tang Jesus befokus ba penetap ati sida. (Jhn. 14:1-5, 8) Jesus nemu sida begunaka awak kena faham sekeda utai, baka harapan idup ba serega. (Jhn. 16:12) Baka Jesus, kitai mega ulih nunjukka diri yakin, pemelajar kitai deka ngelantangka ati Jehovah.
Lebuh pemelajar nuan berengkah nginjil ari rumah ke rumah, iya deka ngasaika tulung ari Jehovah. Tu deka nulung iya arap agi ngagai Jehovah
20. Baka ni siku menyadi indu ba Malawi nunjukka diri yakin pemelajar iya deka ngereja utai ti betul?
20 Kitai patut yakin pemelajar Bup Kudus kitai deka ngereja utai ti betul. Tu meh utai ke digaga Chifundo, siku menyadi indu ba Malawi. Iya ngena bup Idup enggau Lantang Belama Iya! kena belajarka Bup Kudus enggau siku indu ke megai pengarap Katolik, ke benama Alinafe. Ba pengujung Pelajar 14, Chifundo nanya Alinafe nama runding iya pasal ngena patung ba pengawa sembah. Alinafe nyadi ringat lalu madahka: “Nya pemutus aku!” Taja pia, Chifundo yakin sereta arap, nyau kelama pemelajar iya deka faham pasal pekara tu. Iya mega enda ngetu belajar enggau Alinafe. Beberapa bulan pengudah nya, Chifundo nanya Alinafe tanya ba Pelajar 34: “Nama penguntung ke diulih nuan kenyau ari maya nuan berengkah belajarka Bup Kudus sereta ngelala Jehovah, Petara ti bendar?” Chifundo madahka utai ke disaut Alinafe: “Iya nyebut mayuh poin ti manah. Siti ari nya, Saksi-Saksi Jehovah enda ngereja utai ti dipegedika dalam Bup Kudus.” Enda lama udah nya, Alinafe badu agi nyembah patung, lalu layak dibaptisa.
21. Baka ni kitai ulih nulung pemelajar Bup Kudus ngaga pemutus deka nyembah Jehovah?
21 Taja pan Jehovah “ke ngasuh utai nya tumbuh,” tang kitai mega ulih nulung pemelajar Bup Kudus ngaga pemansang. (1 Kor. 3:7) Kitai ukai semina ngajar iya utai ti dikedekaka Petara kereja iya. Tang kitai mega nulung iya ngenalamka pengerindu iya ke Jehovah. Kitai meransang iya ngayanka pengerindu nya lebuh iya ngenuluka Jehovah ba pengidup. Lalu kitai ngajar iya chara iya ulih bepanggai ba Jehovah lebuh napi sakal. Lebuh kitai nunjukka diri yakin enggau pemelajar Bup Kudus kitai, iya mega deka andal, iya ulih idup nitihka standard Jehovah sereta ngaga pemutus deka nyembah Jehovah.
LAGU 55 Anang Takutka Sida!
a Dua taun setengah pengudah iya betemu enggau Jesus, Nikodimus agi siku ari raban kunsil orang Judah. (Jhn. 7:45-52) Sekeda pakar sejarah madahka, Nikodimus semina nyadi murid Jesus pengudah Jesus mati.—Jhn. 19:38-40.
