1-2. Nama basa ti besai ke diberi Jehovah ngagai bala penyembah Iya ti setia?

 ENTI bisi orang nanya, ‘Sapa Jehovah ba pengidup nuan?’ nama deka disaut nuan? Nuan engka nyaut, ‘Jehovah nya Apai aku, Petara aku, enggau Kaban aku.’ Nuan mega engka bisi berundingka gelar bukai kena ngambarka Jehovah. Taja pia, kati nuan kala ngumbai Jehovah nya baka siku tuai rumah ti ngelaluka temuai tama ngagai rumah iya?

² Raja David mandingka kaul Jehovah enggau bala penyembah Iya ti setia baka siku tuai rumah enggau bala temuai iya. David nanya: ‘Jehovah, sapa tau tama ngagai Rumah Sembiang [tauka, langkau kain] Nuan? Sapa tau nyembah Nuan di Sion, bukit Nuan ti kudus?’ (Mas. 15:1) Ari ayat tu, kitai belajar kitai ulih nyadi temuai ba langkau kain Jehovah, iya nya nyadi kaban Iya. Nya endang basa ti besai!

JEHOVAH DEKAKA KITAI NYADI TEMUAI IYA

 3. Sapa temuai Jehovah ti keterubah, lalu nama asai ati seduai iya pasal pangan diri?

³ Sebedau Jehovah berengkah ngaga semua utai, Iya kediri aja. Tang udah nya, Iya ngaga Anak Iya ti keterubah. Jehovah baka siku tuai rumah ke ngelaluka temuai Iya ti keterubah tama ngagai langkau kain Iya, lalu Iya amat gaga ati ngereja  nya. Bup Kudus madahka, Anak Iya “ngasuh ati Iya gaga.” Lalu Anak Iya mega “seruran lantang ati begulai enggau Iya.”—J-lam. 8:30.

 4. Sapa agi ke nyadi temuai Jehovah?

⁴ Udah nya, Jehovah ngaga bala melikat, lalu sida dibai nyadi temuai Iya. Bup Kudus ngangauka bala melikat nya “bala orang serega,” lalu madahka sida gaga ati begulai enggau Jehovah. (Jop 38:7; Dan. 7:10) Pengelama betaun-taun, semina sida ke diau ba serega aja ke nyadi temuai Petara. Tang udah nya, Jehovah ngaga mensia lalu sida mega nyadi temuai Iya. Sekeda ari temuai nya baka Enok, Noah, Abraham, enggau Jop. Bup Kudus madahka, sida kaban Jehovah laban sida “bejalai enggau Petara ti bendar.”—P-kal. 5:24; 6:9; Jop 29:4; Isa. 41:8.

 5. Nama ulih dipelajarka kitai ari jaku benabi ke dipadah ba Esekiel 37:​26, 27?

⁵ Kenyau ari suba, Jehovah terus mai bala kaban Iya nyadi temuai Iya. (Bacha Esekiel 37:​26, 27.) Ambika chunto, ari jaku benabi Esekiel, kitai belajar Jehovah amat dekaka kaul ti rapat enggau bala penyembah Iya ti tetap ati. Iya besemaya deka ngaga “siti sempekat enggau sida kena nyamin pengelikun sida.” Jaku benabi nya merujuk ngagai timpuh lebuh sida ke bisi harapan diau ba serega, sereta sida ke bisi harapan idup ba dunya deka beserakup dalam langkau kain Jehovah baka “siti raban.” (Jhn. 10:16) Utai nya benung nyadi diatu!

PETARA IBUHKA KITAI ENDA NGIRA DINI ALAI KITAI

 6. Baka ni sesiku orang ulih nyadi temuai ba langkau kain Jehovah, lalu dini kitai ulih tetemuka langkau kain nya?

⁶ Dalam Bup Kudus, langkau kain nya siti endur alai orang ulih belelak sereta belindung ari mua hari ti enda manah. Lalu siku temuai dalam langkau kain tentu nemu iya deka dijaga enggau manah. Baka nya mega, lebuh kitai nyerahka diri ngagai Jehovah, kitai nyadi temuai ba langkau kain Iya. (Mas. 61:4) Kitai bisi mayuh pemakai rohani lalu kitai mega ngembuan kaul ti rapat enggau sida ke bukai, ke nyadi temuai Jehovah. Tang langkau kain Jehovah ukai semina bisi ba sesiti endur. Nuan engka kala ngagai menua bukai, engka kena enggau konvensyen spesial. Lalu ba dia, nuan betemu enggau orang bukai ke gaga ati laban ulih tama ngagai langkau kain Petara. Amat, langkau kain Jehovah bisi ba sebarang endur ke bisi bala penyembah Iya ti tetap ati.—Pem. 21:3.

 7. Nama kebuah kitai ulih madah, sida ke tetap ati ke udah mati, agi nyadi temuai ba langkau kain Jehovah? (Peda mega gambar.)

 ⁷ Baka ni enggau sida ke tetap ati ke udah mati? Kati sida agi nyadi temuai ba langkau kain Jehovah? Au, agi. Nama kebuah kitai ulih bejaku munyi nya? Laban Jehovah agi ingatka sida. Ba Iya, sida agi idup. Jesus nerangka: “Ba cherita pasal babas ti diempa api, Moses kala nyebut pasal orang ke mati ti diidupka baru. Maya nya, iya madahka Jehovah nya ‘Petara Abraham, Isak, enggau Jakop.’ Iya ukai Petara ke orang ti mati, tang Petara ke orang ti idup, laban ba mata Iya semua sida agi idup.”—Luk. 20:​37, 38.

KITAI BULIH PENGUNTUNG, TANG BISI TANGGUNGJAWAP

 8. Nama penguntung ke diulih kitai laban bisi ba langkau kain Jehovah?

⁸ Siti langkau kain ulih nyadi endur belelak sereta alai belindung ari mua hari ti enda manah. Baka nya mega, langkau kain Jehovah nyaga bala temuai Iya ari utai ti ulih ngerusakka kaul sida enggau Iya, sereta meri sida harapan ti bendar ke jemah ila. Enti kitai mengkang semak enggau Jehovah, Sitan enda ulih ngereja nama-nama utai ke ulih ngemediska kitai belama iya. (Mas. 31:23; 1 Jhn. 3:8) Ba dunya baru, Jehovah deka terus nyaga bala kaban Iya ti tetap ati, ukai semina ba pengarap, tang mega ari pemati.—Pem. 21:4.

 9. Nama utai ti dikearapka Jehovah ari bala temuai Iya?

⁹ Endang basa ti besai ulih nyadi temuai ba langkau kain Jehovah. Kitai ulih ngembuan kaul ti tan belama iya enggau Jehovah. Tang, nama utai ke patut digaga kitai ngambika ulih terus nyadi temuai Iya? Perundingka tu: Enti nuan dibai tama ngagai rumah orang, nuan tentu deka ngereja utai ti ngagaka ati tuai rumah nya. Ambika chunto, iya engka minta nuan muka kasut sebedau tama ngagai rumah iya, lalu nuan tentu deka ngereja nya. Baka nya mega, kitai tentu deka nemu utai ti dikearapka Jehovah ari sida ke deka terus nyadi temuai ba langkau kain Iya. Pengerindu kitai ke Jehovah meransang kitai ngereja semua utai ke ulih kitai ngambika ulih “ngelantangka ati Iya enggau pengabis iya.” (Kol. 1:10) Amat, Jehovah nya Kaban kitai. Tang Iya mega Petara sereta Apai kitai, ke layak nerima basa kitai. (Mas. 25:14) Kitai patut seruran ingatka nya, lalu ngembuan basa ti dalam ngagai Iya. Basa ti dalam tu deka nulung kitai nyeliahka ulah ke ulih ngemediska ati Iya. Kitai deka seruran ‘diau begulai sejalai enggau Petara kitai enggau ati ti baruh.’—Mik. 6:8.

JEHOVAH ENDA BEPILIH MATA LEBUH NGINTU ORANG ISRAEL

10-11. Baka ni Jehovah ngintu orang Israel ba menua puang Sinai, lalu baka ni tu nunjukka Iya enda bepilih mata?

¹⁰ Jehovah enda bepilih mata lebuh ngintu bala temuai Iya. (Rom. 2:11) Kitai ulih belajarka utai tu ari chara Iya ngintu orang Israel ba menua puang Sinai.

¹¹ Pengudah nyelamatka bala nembiak Iya ari nyadi ulun ba menua Ejip, Jehovah milih bala imam gawa ba Langkau Sembiang. Iya mega ngasuh orang Lewi ngereja pengawa bukai ba Langkau Sembiang nya. Kati Jehovah ngintu sida ke gawa ba Langkau Sembiang enggau sida ke diau semak endur nya manah agi ari orang bukai? Enda! Jehovah enda bepilih mata.

12. Ari chara Jehovah ngintu orang Israel ba menua puang, baka ni kitai nemu Iya enda bepilih mata? (Pemansut 40:38) (Peda mega gambar.)

¹² Tiap iku orang Israel ulih nyadi kaban  rapat Jehovah enda ngira sekalika sida gawa ba Langkau Sembiang, tauka langkau kain sida semak enggau Langkau Sembiang tauka enda. Ambika chunto, Jehovah nentuka semua orang Israel ulih meda tiang remang sereta tiang api ke bisi ba atas Langkau Sembiang nya. (Bacha Pemansut 40:38.) Lebuh tiang remang nya berengkah mindah ngagai endur ti baru, indah sida ke diau jauh ari Langkau Sembiang nya ulih meda nya. Lalu udah nya, sida ulih nyimpan semua barang sida, muka langkau kain sida, lalu mupuk mindah sama enggau orang bukai. (P-pau. 9:​15-23) Semua orang ulih ninga bunyi ti inggar ke datai ari dua iti terumpit ke digaga ari pirak. Tu nunjukka sida patut begelumu sereta berengkah mindah. (P-pau. 10:2) Nyadi, taja pan sesiku orang diau semak enggau Langkau Sembiang, tang tu ukai reti iya kaul iya enggau Jehovah rapat agi ari sida ke diau jauh ari Langkau Sembiang nya. Tiap iku orang Israel ulih nyadi temuai Jehovah, lalu andal Jehovah deka nyaga sereta ngiring iya. Baka nya mega kemayaharitu, enda ngira dini alai kitai diau ba dunya tu, Jehovah deka rinduka kitai, ngintu kitai, sereta nyaga kitai.

KEMAYAHARITU JEHOVAH MEGA ENDA BEPILIH MATA

13. Nama kebuah kitai ulih madahka, Jehovah mega enda bepilih mata kemayaharitu?

¹³ Kemayaharitu, sekeda bala menyadi kitai diau semak indu opis tauka pampang opis Saksi-Saksi Jehovah. Ke bukai gawa ba endur nya. Ketegal nya, sida ulih enggau pengawa ke dipejalaika ba endur nya, lalu begulai enggau bala menyadi ke ngulu pengawa kitai. Lalu bisi mega ke nyadi tuai ti ngabas tauka nyadi pekereja spesial penuh jam. Taja pan nuan engka nadai peluang ngereja pengawa nya, tang kingatka meh, Jehovah agi ngumbai nuan temuai Iya, lalu Iya rinduka nuan. Iya amat ngelala nuan sereta deka meri utai ti diguna nuan. (1 Pet. 5:7) Jehovah meri pemakai rohani ngagai tiap iku nembiak Iya, lalu Iya mega ngiring sereta nyaga sida.

14. Nama siti agi chara Jehovah nunjukka Diri enda bepilih mata?

 ¹⁴ Siti agi chara Jehovah nunjukka Diri enda bepilih mata, iya nya Iya nentuka semua orang ba serata dunya ulih macha Bup Kudus. Bup Kudus ti asal ditulis dalam tiga iti bansa jaku, iya nya jaku Hebrew, jaku Aram, enggau jaku Gerika. Kati sida ke ulih macha Bup Kudus dalam jaku asal nya ngembuan kaul ti rapat agi enggau Jehovah ari sida ke enda ulih ngereja nya? Tentu enda.—Mat. 11:25.

15. Nama agi bukti ke nunjukka Jehovah enda bepilih mata? (Peda mega gambar.)

¹⁵ Kati Jehovah semina mai kitai nyadi kaban Iya enti kitai bepelajar tinggi tauka enti kitai nemu jaku asal Bup Kudus? Enda. Jehovah nentuka semua orang ba serata dunya tau bulih penemu-dalam Iya, ukai semina sida ke bepelajar tinggi aja. Jaku Iya, Bup Kudus, udah disalin ngagai beribu iti bansa jaku. Enggau nya, orang ba serata dunya tau bulih penguntung ari utai ti diajar Iya, lalu belajarka chara sida ulih nyadi kaban Iya.—2 Tim. 3:​16, 17.

MENGKANG NYADI TEMUAI JEHOVAH

16. Nitihka Surat Kereja Rasul 10:​34, 35, baka ni kitai ulih mengkang nyadi temuai Jehovah?

¹⁶ Endang basa ti besai laban ulih nyadi temuai ba langkau kain Jehovah. Iya Petara ti pemadu manah, pemadu bepengerindu, sereta pemadu gerah jari. Nambahka nya, Iya mega enda bepilih mata. Iya ngelaluka semua kitai enda ngira dini alai kitai diau, latar belakang, pelajar, bansa, raban bansa, umur, sereta sekalika kitai lelaki tauka indu. Taja pia, Jehovah semina nerima sida ke ngasika Iya nyadika temuai Iya.—Bacha Surat Kereja Rasul 10:​34, 35.

17. Dini kitai ulih tetemuka penerang bukai pasal nyadi temuai ba langkau kain Jehovah?

¹⁷ Ba Masmur 15:​1, David nanya: ‘Jehovah, sapa tau tama ngagai Rumah Sembiang Nuan? Sapa tau nyembah Nuan di Sion, bukit Nuan ti kudus?’ Udah nya, Jehovah ngena David nyaut tanya nya dalam Masmur 15. Artikel ke nangkanka tu deka berandauka sekeda utai ti patut dikereja kitai kena ngelantangka ati Jehovah sereta mengkang nyadi kaban Iya.