1-2. Nama dua pekara ti beguna ke Saksi-Saksi Jehovah?

 PEKARA ti beguna ke semua kitai kemayaharitu iya nya, nyukung hak Jehovah merintah sereta nguduska nama Iya. Ketegal kitai Saksi-Saksi Jehovah, kitai rindu berandauka pekara tu. Hak Jehovah merintah sereta nguduska nama Iya, bisi kaul enggau pangan diri.

² Semua kitai nemu, nama Petara endang patut dikuduska. Kitai mega udah belajar, hak Jehovah merintah nya amat beguna lalu chara Iya merintah nya ti pemadu badas. Nya alai, dua iti pekara nya patut dikemeratka kitai.

 3. Nama utai ti disengkaum dalam nama Jehovah?

³ Nama Jehovah bekaul enggau semua utai pasal Petara kitai ti Pemadu Bekuasa. Nya nyengkaum chara Iya merintah. Nya alai, enti kitai deka nguduska nama Iya, reti nya kitai ngumbai chara Iya merintah nya ti pemadu badas.—Peda kutak “Utai ti Disengkaum ba Pekara ti Beguna.”

 4. Nama dipadah Masmur 135:13 pasal nama Petara, lalu nama tanya ke deka disaut kitai ba artikel tu?

⁴ Nama Jehovah lain ari nama ke bukai. (Bacha Masmur 135:13.) Nama kebuah nama Iya beguna bendar? Baka ni nama Iya dipetenah? Baka ni Petara nguduska nama Iya? Lalu baka ni kitai ulih ngetanka nama Iya? Aram kitai nyaut tanya nya.

 5. Nama engka diperundingka sekeda orang pasal nguduska nama Petara?

⁵ “Kudus meh nama Nuan.” (Mat. 6:9) Tu meh utai ti dikemeratka Jesus dalam sampi. Nama reti ku Jesus? Nguduska siti-siti utai reti nya ngaga iya nyadi kudus, beresi tauka tuchi. Tang sekeda orang engka ngumbai, ‘Enti nama Jehovah udah kudus, beresi sereta tuchi, nama kebuah nama Iya patut dikuduska agi?’ Kena nemu saut iya, kitai patut nemu utai ti disengkaum ba nama Jehovah.

 6. Nama kebuah nama beguna bendar?

⁶ Nama ukai semina utai ke ditulis ba keretas tauka disebut. Peratika utai ku Bup Kudus: “Pilih pemanah nama, ukai milih pengaya.” (J-lam. 22:1; P-jar. 7:1) Nama kebuah nama beguna bendar? Laban nya bekaul enggau runding sereta asai ati orang pasal orang ke ngempu nama nya.

 7. Baka ni orang ngenyaika nama Petara?

⁷ Lebuh orang madahka pemula pasal Jehovah, sida kebendar iya ngenyaika nama Iya. Nama Jehovah terubah iya dipetenah maya ba Kebun Eden. Nama ulih dipelajarka kitai ari utai ke nyadi nya?

 8. Nama ditemu Adam enggau Awa, lalu nama tanya bukai ke ulih diperundingka kitai?

⁸ Adam enggau Awa nemu nama Petara nya Jehovah. Seduai iya mega nemu mayuh utai pasal Iya. Ambika chunto, seduai iya nemu Jehovah ke nempa semua utai, meri pengidup, meri endur diau ti manah, sereta meri kaling pengidup ti sempurna. (P-kal. 1:26-28; 2:18) Tang kati seduai iya seruran berundingka semua utai ti udah diberi Jehovah? Kati seduai iya rindu sereta beterima kasih ngagai Jehovah? Kitai deka nemu saut iya lebuh Sitan nguji seduai iya.

 9. Nitihka Pemungkal 2:16, 17 enggau 3:1-5, nama dipadah Jehovah ngagai Adam seduai Awa, lalu baka ni Sitan ngemulaka sida?

⁹ Bacha Pemungkal 2:16, 17 enggau 3:1-5. Ngena seiku ular, Sitan nanya Awa: ‘Kati amat Petara enda nyagi seduai makai buah ari semua kayu ti dalam kebun tu?’  Tanya nya ngundan pemula pasal Petara lalu ngujungka Awa bisi runding ti salah pasal Iya. Kebendar iya, Petara semina nangkan seduai iya anang makai buah ari siti pun kayu aja. Adam seduai Awa ulih makai buah ari pun kayu ke bukai. (P-kal. 2:9) Jehovah endang gerah jari. Tang Sitan ngena tanya ngambika seduai iya berunding, Petara enda gerah jari. Awa engka belabuh ngumbai, ‘Kati bisi utai manah ke enggai diberi Petara ngagai aku?’

10. Baka ni Sitan enggau terang betenah Petara, lalu nama nyadi?

¹⁰ Maya nya, Awa agi ngasika Jehovah. Awa madah ngagai Sitan utai ke dipesan Petara. Awa indah madahka, iya enggau Adam enda tau negu pun kayu nya. Iya nemu enti enda ngasika Petara, seduai iya deka mati. Tang ku Sitan nyaut: “Enda seduai mati.” (P-kal. 3:2-4) Enggau nya, Sitan terang-terang betenah Petara lalu madah ngagai Awa, Petara nya pemula. Kenyau ari nya, Sitan dikumbai Antu, tauka orang ti madah bula pasal orang bukai. Awa kena tipu. (1 Tim. 2:14) Iya arap agi ngagai Sitan, ukai Jehovah. Nya ngujungka iya ngaga pemutus ti salah, iya nya enggai ngasika Jehovah. Iya makai buah ti ditagang Petara lalu meri sekeda ari buah nya ngagai Adam.—P-kal. 3:6.

11. Nama utai ke enda digaga Adam seduai Awa?

¹¹ Uji gambarka utai ke ulih dipadah Awa ngagai Sitan: “Aku enda ngelala nuan, tang aku ngelala Apai aku, Jehovah. Lalu aku rindu sereta arapka Iya. Iya udah meri kami duai Adam utai ti manah. Berani nuan nyebut utai ti jai pasal Iya? Rari nuan!” Jehovah tentu gaga ati enti Awa nyebut munyi nya! (J-lam. 27:11) Tang Adam seduai Awa enda taluk ngagai Jehovah. Ketegal nya seduai iya enda ulih ngetanka nama Petara ari dipetenah.

12. Baka ni Sitan ngasuh Awa kakang ati, lalu nama utai ke enda digaga Adam seduai Awa?

¹² Baka ke udah diperatika kitai tadi, Sitan bejai nama Jehovah. Iya ngereja nya lebuh iya ngasuh Awa kakang ati sekalika Jehovah ulih nyadi Apai ti manah. Ketegal Adam seduai Awa enda ngetanka nama Jehovah, seduai iya mudah amat dibai Sitan ngelaban Jehovah. Kemayaharitu, Sitan ngena chara ti sama iya nya, betenahka nama Jehovah. Orang ke arapka pemula Sitan nya enggai diperintah Jehovah.

13. Bepelasarka Esekiel 36:23, nama batang pesan Bup Kudus?

¹³ Kati Jehovah ngelakka Sitan bejaika nama Iya? Enda! Bup Kudus bisi madahka  baka ni Jehovah nunjukka utai ke disebut pasal Iya ba Kebun Eden nya bula. (P-kal. 3:15) Kebendar iya, kitai ulih nyimpulka batang pesan Bup Kudus: Jehovah nguduska nama Iya ngena perintah ke deka dipegai Anak Iya, Jesus. Lalu perintah nya deka mulaika pengelurus sereta pemaik ba dunya. Bup Kudus bisi nerangka chara Jehovah nguduska nama Iya.—Bacha Esekiel 36:23.

14. Baka ni chara Jehovah mutarka penanggul ba Kebun Eden nguduska nama Iya?

¹⁴ Sitan bebendar deka nagang Jehovah ari ngamatka tuju Iya. Tang Sitan seruran enda mujur. Bup Kudus nunjukka utai ke udah digaga Jehovah, lalu tu nunjukka Iya Apai ti bepengerindu sereta Pemerintah ti pemadu badas. Pengawa Sitan ke ngelaban sereta orang ke nyukung iya udah ngasuh Jehovah balat pedis ati. (Mas. 78:40) Tang ari chara Jehovah mutarka penanggul nya nunjukka, Iya bepenemu-dalam, sabar, lurus, enggau bekuasa. Kelebih agi Iya nunjukka Diri ngembuan pengerindu. (1 Jhn. 4:8) Iya enda ngetu-ngetu nguduska nama Iya.

15. Baka ni Sitan betenahka nama Petara kemayaharitu, lalu nama nyadi?

¹⁵ Sitan agi betenahka nama Petara nyentukka seharitu. Iya deka orang pechaya, Petara nya lemi, enda lurus, enda bepenemu, sereta enda sayauka mensia. Ambika chunto, Sitan deka orang pechaya, Jehovah nya ukai Petara ti nempa semua utai. Tang, enti sema orang arapka Petara nya bisi, Sitan deka sida ngumbai Petara enggau standard Iya kelalu terit sereta enda lurus. Iya mega deka orang ngumbai Jehovah nya Petara ti nadai penyinu sereta jai, ke nunu orang ba api neraka. Lebuh sida  arapka jaku bula Sitan, sida tentu enggai diperintah Jehovah. Seagi-agi Sitan bedau dipunaska, iya deka terus betenahka nama Jehovah lalu ngelimpangka kitai ari nyembah Jehovah. Kati iya mujur?

16. Nama ulih digaga kitai ke enda digaga Adam seduai Awa?

¹⁶ Jehovah mai kitai nguduska nama Iya. Enggau nya, kitai ngereja utai ke enda digaga Adam seduai Awa. Mayuh orang ba dunya tu bejai sereta betenahka nama Jehovah. Tang kitai ulih ngetanka nama Jehovah lebuh kitai madah ngagai sida, Petara nya kudus, lurus, manah, sereta bepengerindu. (Isa. 29:23) Kitai ulih nunjukka diri deka Iya merintah kitai. Kitai ulih nulung orang nemu, semina chara Jehovah merintah aja ke lurus sereta ulih mai pemaik enggau pengelantang.—Mas. 37:9, 37; 146:5, 6, 10.

17. Baka ni Jesus madahka nama Jehovah ngagai orang?

¹⁷ Baka Jesus, kitai ngetanka nama Jehovah. (Jhn. 17:26) Jesus madahka nama Apai iya lebuh iya ngena sereta ngetanka nama Jehovah. Ambika chunto, orang Parisi ngumbai Jehovah nya kasar, terit, jauh ari mensia, sereta enggai ngampun. Tang Jesus nulung orang nemu, Jehovah nya Petara ti enda berundingka Diri Empu, sabar, bepengerindu, sereta deka ngampun. Iya mega nulung orang ngelala Jehovah lebuh iya mandangka kualiti Jehovah ba pengidup besehari-sehari.—Jhn. 14:9.

18. Baka ni kitai ulih nunjukka utai jai ke disebut pasal Jehovah nya bula?

¹⁸ Kitai neladan Jesus lebuh kitai ngajar orang pasal Jehovah. Asil iya, sida deka nemu sereta bebasaka nama Jehovah ti kudus. Kitai mega madahka, Jehovah nya Petara ti manah sereta bepengerindu. Enggau  nya, kitai nunjukka utai jai ke disebut pasal Jehovah nya bula. Kitai mega deka neladan Jehovah. Tu ulih dikereja taja pan kitai enda sempurna. (Eps. 5:1, 2) Enti kitai neladan Jehovah nengah jaku enggau ulah, tu ulih nulung orang ngelala sapa Jehovah ke bendar iya. Kitai mega nunjukka mensia ti enda sempurna ulih taluk ngagai Jehovah.—Jop 27:5.

19. Nitihka Isaiah 63:7, nama juluk ati kitai lebuh ngajar orang Bup Kudus?

¹⁹ Bisi siti agi utai ke ulih digaga kitai kena nguduska nama Jehovah. Lebuh ngajar pemendar ari Bup Kudus, kitai suah madah pasal hak Jehovah merintah dunya raya. Taja pan ngajar pasal Adat Petara nya beguna, tang juluk ati kitai nya nulung sida rinduka sereta tetap ati ngagai Jehovah. Nya alai lebuh ngajar, kitai deka madahka pasal kualiti Iya. (Bacha Isaiah 63:7.) Enggau nya, sida deka taluk ngagai Jehovah laban sida rindu sereta deka ngasika Iya.

20. Nama deka dikerandauka kitai ba artikel pengudah tu?

²⁰ Tang baka ni kitai ulih nentuka ulah enggau utai ke diajar kitai nulung orang bisi runding ti manah pasal Jehovah? Lalu baka ni nya ulih mai sida semak ngagai Iya? Artikel pengudah tu deka nyaut tanya nya.