1. Nama utai ti udah dipelajarka nuan lebuh nuan berengkah belajarka Bup Kudus?

 KATI nuan agi ingat lebuh nuan berengkah belajarka Bup Kudus? Nuan engka tekenyit lebuh nemu Petara bisi nama. Nuan engka berasai lantang lebuh nemu Petara enda merinsa orang ba api neraka. Nuan mega engka gagit ati laban ulih meda orang ti dikesayauka nuan idup baru, lalu ulih diau begulai enggau sida ba dunya Paradais.

 2. Kelimpah ari belajarka pemendar ari Bup Kudus, nama agi pemansang ke bukai ti udah digaga nuan? (Epesus 5:1, 2)

² Lebuh nuan belajarka mayuh agi pasal Jaku Petara, pengerindu nuan ke Jehovah deka majak dalam agi. Pengerindu nya meransang nuan nitihka utai ti udah dipelajarka nuan. Ketegal nuan nitihka prinsip ari Bup Kudus, nuan ulih ngaga pemutus ti manah agi. Nuan belajar berunding sereta ngereja utai ti betul laban nuan deka ngerinduka ati Petara. Sama baka siku anak ke neladan apai indai iya ti bepengerindu, nuan mega benung neladan Apai nuan ti di serega.—Bacha Epesus 5:1, 2.

 3. Nama sekeda tanya ke engka diperundingka kitai?

³ Kitai engka nanya diri empu: ‘Kati pengerindu aku ke Jehovah majak dalam agi diatu enti dibandingka enggau maya aku baru aja dibaptisa? Kenyau ari maya aku dibaptisa, kati runding tauka ulah aku majak agi neladan Jehovah, kelebih agi ba chara aku ngayanka pengerindu ngagai bala menyadi Kristian?’ Enti “pengerindu nuan ti keterubah” enda entu mau baka suba, anang meh asa ati. Utai ti sama kala nyadi ngagai orang Kristian ba abad  keterubah. Jesus enda putus asa ba sida, lalu iya tentu enda putus asa ba kitai. (Pem. 2:4, 7) Iya nemu kitai ulih belajar ngasaika baru pengerindu ti kala diasaika kitai lebuh kitai terubah iya belajar pasal pemendar.

 4. Nama deka dipejuraika kitai dalam artikel tu?

⁴ Artikel tu deka bejuraika chara kitai ulih terus ngenalamka agi pengerindu kitai ke Jehovah enggau ke orang bukai. Udah nya, kitai deka belajar pasal sekeda utai ti manah ke deka nyadi lebuh kitai rindu agi ke Jehovah enggau ke bala menyadi Kristian.

5-6. Nama cabaran ti ditapi rasul Paul ba pengawa nginjil, tang nama utai ti meransang iya terus nyembah Jehovah?

⁵ Rasul Paul amat gaga ati laban ulih gawa ke Jehovah, tang nya enda seruran senang. Paul suah bejalai jauh lalu pejalai ba jeman nya enda senang. Kekadang Paul “nyauka bebadi ba sungai” sereta “nyauka bebadi laban perumpak.” Bisi maya iya mega, bala munsuh iya malu iya. (2 Kor. 11:23-27) Lalu bala menyadi Kristian enda seruran beterima kasihka utai ti udah digaga iya kena nulung sida.—2 Kor. 10:10; Plp. 4:15.

⁶ Nama utai ti nulung Paul terus gawa ke Jehovah? Paul belajar mayuh utai pasal personaliti Jehovah ari Bup Kudus sereta ari pengalaman iya empu. Paul amat yakin Petara Jehovah rinduka iya. (Rom. 8:38, 39; Eps. 2:4, 5) Lalu iya pan amat rinduka Jehovah. Paul ngayanka pengerindu iya ke Jehovah lebuh iya “terus nulung bala nembiak [Petara] ti kudus.”—Heb. 6:10.

 7. Nama siti chara kitai ulih ngenalamka pengerindu kitai ke Jehovah?

⁷ Kitai ulih ngenalamka pengerindu kitai ke Petara lebuh kitai rajin belajarka Jaku Iya. Lebuh nuan macha Bup Kudus, uji beratika utai ti ulih dipelajarka nuan pasal Jehovah ari tiap iti ayat ke dibacha nya. Tanya diri empu: ‘Baka ni cherita tu nunjukka Jehovah rinduka aku? Baka ni cherita tu meransang aku rinduka Jehovah?’

 8. Baka ni sampi ulih nulung ngenalamka agi pengerindu kitai ke Petara?

⁸ Siti agi chara kitai ulih ngenalamka agi pengerindu kitai ke Jehovah, iya nya enggau besampi ngagai Iya ninting hari lalu madahka Iya utai ti amat bisi dalam ati kitai. (Mas. 25:4, 5) Lalu Jehovah deka nyaut sampi kitai. (1 Jhn. 3:21, 22) Khanh, siku menyadi indu ba Asia madahka: “Terubah iya aku rinduka Jehovah ketegal utai ti udah dipelajarka aku pasal Iya, tang lebuh aku meda Iya nyaut sampi aku, aku majak agi rinduka Iya. Tu ngasuh aku deka ngereja semua utai ti ngerinduka ati Iya.” b

 9. Baka ni Timoti ngayanka diri benung ngemansangka pengerindu iya ke bala menyadi Kristian?

⁹ Beberapa taun pengudah Paul nyadi orang Kristian, iya betemu enggau siku lelaki ke biak ti manah ke benama Timoti. Timoti rinduka Jehovah enggau orang bukai. Paul madahka tu ngagai orang Pilipi: “Nadai orang bukai ke baka [Timoti], ke amat ibuhka semua kita.” (Plp. 2:20) Ditu, Paul ukai muji penau Timoti ti landik ngatur utai tauka meri cheramah. Tang, Paul ulih meda Timoti amat rinduka bala menyadi Kristian. Endang amat, raban gempuru ke deka diabas Timoti tentu enda sabar nganti penatai iya.—1 Kor. 4:17.

10. Baka ni Anna enggau laki iya ngayanka pengerindu ngagai bala menyadi Kristian?

¹⁰ Kitai mega ngiga chara kena nulung bala menyadi Kristian kitai. (Heb. 13:16) Peratika pengalaman Anna ke disebut ba artikel sebedau tu. Pengudah kabut ti balat nyadi, Anna enggau laki iya ngabas siti ruang bilik ke Saksi. Kabut nya udah ngerusak perabung rumah ruang bilik nya. Ketegal nya, ruang bilik nya nadai gari ti  beresi. Ku Anna madahka: “Kami ngambi gari sida, nuchi, nyenerika, sereta ngelipat gari nya lalu mulaika gari nya ngagai sida. Ba kami, utai nya enda tusah, tang ketegal utai ti digaga kami, kami ulih bekaban rapat enggau sida nyentukka diatu.” Pengerindu Anna enggau laki iya ngagai bala menyadi Kristian meransang seduai iya meri bantu enggau chara ti praktikal.—1 Jhn. 3:17, 18.

11. (a) Kesuah iya, nama asai ati orang lebuh kitai ngayanka pengerindu ngagai sida? (b) Nitihka Jaku-Dalam 19:17, nama deka digaga Jehovah lebuh kitai ngayanka pengerindu?

¹¹ Lebuh kitai manah ati sereta ngayanka pengerindu ngagai orang, sida ulih meda kitai nguji neladan Jehovah. Lalu asai ati terima kasih sida ke pemanah kitai engka lebih agi ari ke ditemu kitai. Khanh, ke disebut tadi, agi ingatka orang ti udah nulung iya. Ku iya: “Aku amat beterima kasihka semua bala menyadi indu ke mai aku pansut nginjil. Sida ngambi aku, mai aku pansut makai, sereta nganjung aku pulai. Diatu aku nemu, semua tu begunaka mayuh pengawa. Lalu sida ngereja nya enggau pengerindu.” Endang amat, ukai semua orang deka meri terima kasih ketegal utai ti digaga kitai ke sida. Khanh nyebut pasal orang ke udah nulung iya: “Aku arap aku ulih malas semua pemanah ati sida, tang aku enda nemu dini sida diau. Taja pia, Jehovah nemu, lalu aku besampi ngambika Jehovah deka nulung aku malas pemanah ati sida.” Utai ku Khanh nya endang amat. Jehovah beratika tiap iti utai ti manah ke digaga kitai ke orang bukai taja pan utai ti digaga kitai nya mit. Iya ngumbai pengorbanan kitai nya amat berega sereta baka siti utang ti deka dibayar Iya.—Bacha Jaku-Dalam 19:17.

12. Baka ni bala menyadi lelaki ngayanka pengerindu sida ke raban gempuru? (Peda mega gambar.)

¹² Enti nuan siku menyadi lelaki, baka ni nuan ulih ngayanka pengerindu ke orang bukai sereta ngereja utai kena nulung sida? Siku menyadi lelaki ti biak ke benama Jordan nanya siku tuai  gempuru pasal chara iya ulih ngereja mayuh agi kena nulung raban gempuru. Tuai gempuru nya muji pemansang ke udah digaga iya. Udah nya, iya meri Jordan sekeda jaku lalau pasal utai bukai ke ulih dikemansangka agi. Ambika chunto, iya meransang Jordan datai tumu agi ngagai Palan Gempuru, lalu ngelaluka orang ke datai, meri komen ba gempuru, seruran nginjil enggau raban nginjil iya, sereta ngiga chara ti praktikal kena nulung orang bukai. Lebuh Jordan ngereja tu, iya ukai aja belajarka pengelandik ti baru, tang iya mega ngemansangka pengerindu iya ke bala menyadi Kristian. Jordan nyau nemu lebuh siku menyadi lelaki nyadi penulung gempuru, nya ukai maya iya baru deka berengkah nulung orang; tang, nya maya iya deka terus nulung orang.—1 Tim. 3:8-10, 13.

13. Baka ni pengerindu meransang siku menyadi lelaki ke benama Christian ngambika ulih layak nyadi tuai gempuru baru?

¹³ Baka ni enti nuan kala nyadi siku tuai gempuru tauka penulung gempuru? Jehovah agi ingatka pengawa ti udah digaga nuan suba sereta pengerindu ti meransang nuan ngereja nya. (1 Kor. 15:58) Iya mega beratika pengerindu ti terus diayanka nuan. Siku menyadi lelaki ke benama Christian asa ati lebuh iya enda agi diasuh nyadi tuai gempuru. Tang iya madahka: “Aku mutuska diri deka ngereja semua utai ti ulih digaga aku kena nyembah Jehovah, enda ngira sekalika aku siku tuai gempuru tauka enda.” Nyau kelama, iya dilantik baru nyadi tuai gempuru. Christian ngaku: “Aku mimit takut deka nyadi tuai gempuru baru. Tang aku ngaga pemutus, enti Jehovah deka aku nyadi tuai gempuru baru, aku deka ngereja nya laban aku rinduka Iya sereta bala menyadi Kristian aku.”

14. Nama ulih dipelajarka nuan ari utai ti disebut siku menyadi indu ari Georgia?

¹⁴ Bala nembiak Jehovah mega ngayanka pengerindu ngagai orang bukai. (Mat. 22:37-39) Ambika chunto, Elena, siku menyadi indu  ba Georgia madahka: “Terubah iya, semina siti aja utai ti meransang aku nginjil, iya nya pengerindu aku ke Jehovah. Tang seraya pengerindu aku ke Jehovah majak dalam, pengerindu aku ke orang bukai mega majak dalam. Aku nguji ngambarka penanggul ti ditapi sida, sereta topik ke engka ulih negu ati sida. Lebuh aku suah agi berunding pasal sida nengah chara tu, ati aku deka agi nulung sida.”—Rom. 10:13-15.

15-16. Baka ke diayan dalam gambar, nama berekat ke datai ari ngayanka pengerindu ngagai orang bukai?

¹⁵ Maya kitai ngayanka pengerindu ngagai bala menyadi Kristian, ukai sida aja ke bulih penguntung. Pengudah pandemik COVID-19 berengkah, siku menyadi ke benama Paolo enggau bini iya nulung mayuh menyadi indu ke tuai belajarka chara nginjil ngena perengka elektronik sida. Siku menyadi indu, terubah iya tusah deka ngena perengka elektronik iya. Tang nyau kelama iya ulih mujur. Iya ulih ngena perengka elektronik nya mai kaban belayan iya datai ngagai pengawa Ngingatka Pemati Jesus. Enam puluh iku ari kaban belayan iya sama enggau pengawa nya nengah konferen vídeo. Menyadi indu nya enggau bala kaban belayan iya bulih penguntung ari usaha ke digaga Paolo enggau bini iya. Enda lama udah nya, menyadi indu nya nulis ngagai Paolo: “Terima kasih laban udah ngajar kami ti udah tuai tu. Aku deka seruran ingatka pemesai pengibuh Jehovah ke kami sereta usaha nuan ti bebendar deka nulung kami.”

¹⁶ Pengalaman ke baka tu ngajar Paolo siti utai ti penting. Iya belajar pengerindu nya penting  agi ari penemu tauka penau diri empu. Iya ngenang baru: “Aku kala gawa nyadi tuai ti ngabas. Diatu, aku sedar, taja pan bala menyadi Kristian engka enda agi ingatka cheramah aku, tang sida agi ingatka utai ti udah digaga aku ke sida.”

17. Sapa agi ke deka bulih penguntung lebuh kitai ngayanka pengerindu?

¹⁷ Lebuh kitai ngayanka pengerindu ngagai orang bukai, kitai empu bulih penguntung enggau chara ti enda dijangka. Jonathan, ke diau ba New Zealand, amat udah ngasaika tu. Bisi sekali maya ngalih hari Hari Enam, iya meda siku menyadi lelaki ke ngerintis benung nginjil kediri. Jonathan ngaga pemutus deka gawa enggau menyadi lelaki nya ninting Hari Enam maya ngalih hari. Maya nya, iya enda sedar iya empu deka bulih penguntung ari pemanah ati ti diayanka iya. Jonathan ngaku, “Maya nya, aku enda entu rinduka pengawa nginjil. Tang seraya aku meda chara menyadi nya ngajar sereta beratika asil ti manah ari pengawa nginjil iya, aku berengkah rindu agi ke pengawa nginjil. Menyadi nya mega nyadi kaban rapat aku, lalu iya nulung aku rinduka pengawa nginjil, sereta datai semak agi ngagai Jehovah.”

18. Nama utai ti dikedekaka Jehovah kereja kitai?

¹⁸ Jehovah dekaka semua kitai ngenalamka agi pengerindu kitai ke Iya sereta ke orang bukai. Baka ke udah dipelajarka kitai, kitai ulih ngenalamka agi pengerindu kitai ke Jehovah lebuh kitai macha sereta belematika Jaku Iya, sereta lebuh kitai seruran bejaku enggau Iya nengah sampi. Kitai ulih ngenalamka agi pengerindu kitai ke bala menyadi Kristian lebuh kitai nulung sida enggau chara ti praktikal. Seraya pengerindu kitai majak dalam, kitai deka majak semak ngagai Jehovah sereta bala menyadi Kristian kitai. Lalu kitai deka gaga ati laban ulih bekaban enggau sida belama iya!