1. Nama reti “pemendar”?

 “BAKA NI nuan bulih pemendar?” “Kati nuan dibesaika dalam pemendar?” “Berapa lama nuan udah dalam pemendar?” Kala orang nanya nuan tanya tu? Tauka nuan kala nanya tu ngagai sida. Nama reti “pemendar”? Kesuah iya, lebuh kitai nyebut “pemendar,” kitai bejaku pasal utai ke dikearapka kitai, chara sembah kitai ngagai Petara, sereta chara pengidup. Orang ke dalam “pemendar” nemu utai ke diajar Bup Kudus, lalu nitihka prinsip nya ba pengidup. Asil iya, sida ulih dilepaska ari ajar pengarap pelesu lalu ulih lantang ati taja pan diau ba dunya ke dipegai Sitan.—Jhn. 8:32.

 2. Nitihka John 13:34, 35, nama ke narit orang ngagai pemendar?

² Nama narit ati nuan ngagai pemendar? Engka ketegal nuan meda ulah manah nembiak Jehovah. (1 Pet. 2:12) Tauka engka ketegal pengerindu ke diayanka sida. Mayuh sida ke terubah kali datai gempuru agi ingat pengerindu ke diayan bala menyadi, lebih agi ari utai ke disebut ba gempuru. Jesus madahka, bala murid iya deka dikelala ari pengerindu. (Bacha John 13:34, 35.) Tang pengerindu aja enda chukup enti kitai deka ngembuan pengarap ti tegap.

 3. Nama deka nyadi enti pengarap kitai bepanggai ba pengerindu ke diayan bala menyadi Kristian?

³ Pengarap kitai enda patut bepanggai ba pengerindu ke diayan bala menyadi Kristian aja. Nama kebuah? Enti  pengarap kitai baka nya, kitai senang ninggalka Jehovah. Semaka jaku, enti bisi menyadi Kristian, tuai gempuru tauka pengerintis ngereja dosa ti besai, enti bisi menyadi Kristian ke ngemediska ati kitai, tauka limpang ari pengarap, lalu nuduh pengarap kitai salah, kitai senang labuh ba pengarap sereta badu nyembah Jehovah. Nya alai, pengarap ti tegap bepanggai ba kaul kitai enggau Jehovah. Endang amat, pengerindu kitai ke Jehovah sereta nembiak Iya ulih nulung kitai negapka pengarap. Tang lebih ari nya, kitai patut belajarka Bup Kudus, meretika utai ke dipelajar, sereta ngaga pansik ngambika kitai andal utai ke dipelajar nya endang pemendar pasal Jehovah.—Rom. 12:2.

 4. Nitihka Matthew 13:3-6, 20, 21, nama digaga sekeda orang lebuh pengarap sida diuji?

⁴ Jesus madahka, sekeda orang nerima pemendar “enggau ati ti gaga.” Tang lebuh napi penusah, pengarap sida “layu.” (Bacha Matthew 13:3-6, 20, 21.) Nama kebuah? Sida engka enda sedar pengawa nitihka Jesus nya deka mai penguji enggau penusah. (Mat. 16:24) Tauka engka sida ngumbai pengidup orang Kristian deka seruran lantang laban Petara deka merekatka sida sereta muai penanggul sida. Tang ketegal kitai diau ba dunya Sitan, pengidup kitai tentu bisi penguji. Sekeda utai ke nyadi ba pengidup ulih ngasuh kitai lenyau pengaga ati.—Mas. 6:6; P-jar. 9:11.

 5. Nama nunjukka menyadi Kristian andal sida bisi pemendar?

⁵ Mayuh menyadi Kristian andal sida bisi pemendar. Baka ni kitai nemu? Pengarap sida enda mudah lemi enti bisi menyadi Kristian ngemediska ati sida tauka ngereja ulah ti salah. (Mas. 119:165) Tiap kali sida napi penguji, pengarap sida majak tegap, ukai lemi. (Jas. 1:2-4) Baka ni kitai ulih ngembuan pengarap ti baka nya?

 6. Pengarap bala murid Jesus bepelasarka nama?

⁶ Pengarap bala murid Jesus ba kurun keterubah bepelasarka penemu ba Jaku Petara sereta ajar Jesus, iya nya “pemendar ti dibai Berita Manah.” (Gal. 2:5) Pemendar nya semua utai ke dipechaya nembiak Jehovah, nyengkaum fakta pasal genselan tebus Jesus sereta pengangkat iya ari mati. Rasul Paul pechaya nya ajar ti bendar. Nama kebuah kitai nemu? Laban iya ngena beberapa iti ayat kena nunjukka “Kristus endang enda tau enda kena perinsa, lalu angkat idup baru ari mati.” (SKR. 17:2, 3) Bala murid Jesus ba kurun keterubah nerima ajar nya, lalu bepanggai ba roh kudus kena nulung sida meretika Jaku Petara. Sida ngaga pansik kena nentuka ajar nya bepelasarka Jaku Petara. (SKR. 17:11, 12; Heb. 5:14) Pengarap sida ukai bepanggai ba asai ati aja, lalu sida enda nyembah Jehovah ketegal rindu begulai enggau bala menyadi Kristian. Tang pengarap sida bepanggai ba ‘penemu pasal Petara.’—Kol. 1: 9, 10.

 7. Baka ni pengarap ba pemendar Bup Kudus ulih nulung kitai?

⁷ Pemendar Bup Kudus enda berubah. (Mas. 119:160) Ambika chunto, enti menyadi Kristian bisi ngemediska ati kitai, tauka ngereja dosa ti besai, tauka lebuh kitai napi penusah, pemendar Bup Kudus enda kala berubah. Nya alai, kitai patut nemu ajar Bup Kudus enggau manah sereta nentuka ajar nya endang amat. Baka sauh ke ulih ngenanka kapal ngambika enda rarat maya kabut besai nyadi, baka nya mega pengarap kitai ti bepelasarka Bup Kudus ulih nyaga kitai lebuh  dituntung penusah. Baka ni nuan ulih andal agi nuan bisi pemendar?

 8. Nitihka 2 Timoti 3:14, 15, baka ni Timoti nemu iya bisi pemendar?

⁸ Timoti nemu iya bisi pemendar. Baka ni iya nemu? (Bacha 2 Timoti 3:14, 15.) Ini enggau indai iya orang keterubah ngajar “Bup Kudus” ngagai iya. Tang iya mega ngena awak sereta bebendar belajarka Jaku Petara. Asil iya, Timoti nemu utai ti dikearapka iya nya pemendar. Udah nya, Timoti, ini enggau indai iya, belajar pasal ajar Kristian. Timoti tentu rindu begulai enggau bala menyadi Kristian ketegal pengerindu ke diayan sida, lalu tu meransang iya deka nulung sida. (Plp. 2:19, 20) Taja pia, pengarap iya ukai bepelasarka pengerindu ke orang, tang ba ajar ari Bup Kudus ke ditemu iya endang amat lalu tu meransang iya nyadi pangan Jehovah. Baka Timoti, nuan mega enda tau enda belajar Bup Kudus lalu nentuka utai ke dibacha nuan pasal Jehovah nya endang amat.

 9. Nama tiga iti batang pemendar ke patut ditentuka nuan nya amat?

⁹ Kena nulung nuan ngereja nya, nuan patut nentuka tiga iti batang pemendar tu amat. Kesatu, nuan patut nentuka Jehovah endang Petara ke nempa semua utai. (P-sut. 3:14, 15; Heb. 3:4; Pem. 4:11) Kedua, nuan patut nentuka Bup Kudus nya endang pesan Petara ke mensia. (2 Tim. 3:16, 17) Lalu ketiga, nuan patut nentuka Jehovah bisi ngatur seraban mensia ke nyembah Iya dibaruh iring Kristus. Sida nya dikumbai Saksi-Saksi Jehovah. (Isa. 43:10-12; Jhn. 14:6; SKR. 15:14) Kena nentuka tiga iti batang  pemendar tu amat, nuan enda ibuh nemu semua utai ba Bup Kudus. Tang juluk ati nuan iya nya ‘mansik’ lalu nentuka utai ti dikearapka nuan nya endang pemendar.—1 Tes. 5:21, Berita Manah Ka Rebak Diatu.

10. Kelimpah ari nemu pemendar, nama agi patut digaga kitai?

¹⁰ Pengudah nuan nentuka batang ajar pasal Petara, Bup Kudus, sereta nembiak Petara nya amat, kati nuan ulih ngena ayat Bup Kudus nerangka ajar nya ngagai orang bukai? Nama kebuah tu beguna? Ketegal kitai murid Kristus, kitai bisi tanggung pengawa ngajar pemendar ngagai sida ke deka mendingka kitai. b (1 Tim. 4:16) Lalu lebuh kitai nulung orang arapka pemendar Bup Kudus, pengarap kitai ba ajar nya mega dikeringka.

11. Baka ni kitai ulih nunda Paul lebuh ngajar?

¹¹ Lebuh rasul Paul ngajar orang, iya “nguji nguingka sida ngagai Jesus ngena jaku ari Adat Moses enggau ngena jaku sida nabi.” (SKR. 28:23) Baka ni kitai ulih nunda Paul lebuh ngajar? Kitai ukai semina madah utai ke diajar Bup Kudus ngagai pemelajar, tang nulung sida belajar sereta belemati pasal utai ke dipelajar sida ari Bup Kudus. Kitai deka sida nerima pemendar ketegal sida udah nentuka utai ke dipelajar sida nya amat, ukai ketegal sida bebasaka sereta rinduka kitai.

12-13. Baka ni apai indai ulih nulung anak mengkang dalam pemendar?

¹² Apai indai, kita tentu deka anak mengkang dalam pemendar. Bisi apai indai ngumbai enti anak sida bisi bakih ti manah dalam eklisia, anak deka ngembuan pengarap ti tegap. Tang tu enda chukup. Anak enda tau enda bisi kaul enggau Petara sereta nentuka utai ke diajar Bup Kudus nya amat.

¹³ Enti apai indai deka ngajar anak pemendar pasal Petara, sida empu patut nyadi teladan ti manah. Sida patut belajarka Bup Kudus sereta ngena awak belematika utai ke dipelajar. Enggau nya, sida ulih nulung anak sida. Ajar meh anak chara ngena perengka kena ngaga pansik, baka ke ngajar pemelajar Bup Kudus ngaga pansik. Tu deka nulung anak rinduka Jehovah sereta arapka “ulun ke tetap ati sereta bepenemu-dalam” ke dikena Iya mantu kitai meretika ajar Bup Kudus. (Mat. 24:45-47) Nya alai, apai indai ukai semina ngajar batang ajar pemendar aja, tang enggau naka ulih ngajar anak “utai ti dalam” runding Petara nitihka umur sereta penau sida.—1 Kor. 2:10.

14. Nama kebuah kitai patut mansik jaku ti benabi ba Bup Kudus? (Peda kutak “ Ulih Nuan Nerangka Jaku ti Benabi tu?”)

¹⁴ Jaku ti benabi ba Bup Kudus amat beguna kena ngeringka pengarap kitai ngagai Jehovah. Ni bagi jaku ti benabi ke ngeringka pengarap nuan? Nuan engka berundingka pasal “hari ti penudi.” (2 Tim. 3:1-5; Mat. 24:3, 7) Tang kati bisi jaku ti benabi ke bukai ti ulih ngeringka utai ke dikearapka nuan? Ambika chunto, kati nuan ulih nerangka jaku ti benabi ba bup Daniel bagi 2 tauka ba Daniel bagi 11 ke udah sereta benung dikeamatka? c Enti pengarap nuan bepanggai ba Bup Kudus, pengarap nuan deka nyadi tegap. Pikirka chunto bala menyadi Kristian kitai ke balat diperinsa ba Jerman lebuh Perang Dunya II. Sida enda entu meretika jaku ti benabi pasal hari ti penudi, tang sida bisi pengarap ti tegap ngagai Jaku Petara.

15-17. Baka ni belajarka Bup Kudus ngeringka bala menyadi Kristian lebuh sida diperinsa perintah Nazi?

¹⁵ Ba baruh perintah Nazi Jerman, beribu iku menyadi Kristian kitai dianjung ngagai kem alai ngetan orang tangkap. Hitler enggau seiku pemesai ti besai pangkat ke benama Heinrich Himmler begedika Saksi-Saksi Jehovah. Seiku menyadi Kristian indu madahka utai ke disebut Himmler ngagai seraban menyadi indu ba kem: “Jehovah kita nya engka merintah ba serega, tang ba dunya tu, kami ke bekuasa! Peda meh sapa ulih tan lama, kita tauka kami!” Nama nulung nembiak Jehovah mengkang tetap ati?

¹⁶ Nembiak Bup Kudus nemu Perintah Petara udah berengkah merintah ba taun 1914. Nya alai, sida enda tekenyit lebuh balat diperinsa. Sida nemu nadai utai ulih nagang peneka Petara ari nyadi. Hitler enda ulih ngerusak sembah ti bendar tauka numbuhka  perintah ti bekuasa agi ari Perintah Petara. Bala menyadi Kristian kitai pechaya, perintah Hitler deka nadai agi.

¹⁷ Utai ke dikearapka sida amat nyadi. Betaun udah nya, perintah Nazi alah. Heinrich Himmler ke kala nyebut: “Ba dunya tu, kami [Nazi] ke bekuasa,” benung ngerarika diri lebuh iya tetemuka Menyadi Lübke. Himmler nemu Menyadi Lübke seiku ari Saksi ke kala kena jil. Enggau ati ti tusah, Himmler nanya iya: “Nembiak Bup Kudus, nama deka nyadi diatu?” Menyadi Lübke madahka Saksi-Saksi Jehovah udah lama nemu perintah Nazi deka alah lalu bala Saksi deka dilepaska. Tu ngasuh Himmler, ke kala bejai Saksi-Saksi Jehovah, enda nemu nyaut agi. Enda lama udah nya, iya munuh diri. Nama ulih dipelajarka kitai? Lebuh kitai belajarka Bup Kudus, nyengkaum jaku ti benabi, tu ulih negapka pengarap kitai ba Petara lalu nulung kitai betan lebuh napi penguji.—2 Pet. 1:19-21.

18. Ari utai ke nyadi ba John 6:67, 68, nama kebuah penemu enggau penalam runding amat beguna?

¹⁸ Endang amat, tiap iku kitai patut ngayanka pengerindu, laban nya nunjukka kitai orang Kristian ti bendar. Tang kitai mega begunaka “penemu” enggau penalam runding. (Plp. 1:9) Enti enda, kitai senang “ditabanka kia-kia ulih genap macham ajar ti datai ari akal mensia,” nyengkaum sida ke udah limpang ari pengarap. (Eps. 4:14) Lebuh mayuh bala murid ba kurun keterubah ngetu nitihka Jesus, rasul Peter enda kakang ati madahka Jesus “ngembuan jaku ti meri pengidup ti meruan belama iya.” (Bacha John 6:67, 68) Taja pan maya nya Peter enda entu mereti utai ke dipadah Jesus, tang iya mengkang tetap ati laban iya nemu pemendar pasal Jesus. Nuan mega ulih nentuka utai ke diajar ba Bup Kudus nya bendar. Enti nuan ngereja nya, pengarap nuan deka terus tegap enda ngira nama nyadi. Lalu nuan mega ulih nulung orang bukai ngembuan pengarap ti tegap.—2 Jhn. 1, 2.