Lebuh aku berengkah nyadi pengerintis, pengidup aku berubah enggau chara ti enda dijangka aku. (Eps. 3:20) Tang nuan engka berunding baka ni semua tu ulih nyadi. Awakka aku nusui cherita pasal aku ari pun.

Aku ada ba Berlin di Jerman dalam taun 1939, beberapa bulan pengudah Perang Dunya II nyadi. Lebuh perang nyauka badu ba ujung taun 1945, bilun perang ke mai bom suah nyerang Berlin. Bisi sekali, kandang endur kami diau balat dibom lalu kami sebilik pindah ngagai endur ke udah disedia kena nyelamatka diri ari serang ke baka tu. Ketegal deka nyaga pengelikun diri sebilik, kami rari ngagai Erfurt, menua asal indai aku.

Indai aku keran deka ngiga pemendar. Nya alai, iya macha bup ke ditulis orang pakar lalu mansik mayuh bengkah jalai pengarap, tang iya agi enda puas ati. Kira ba taun 1948, dua iku Saksi-Saksi Jehovah datai ke rumah kami. Indai aku ngelaluka seduai iya tama lalu betanya pasal mayuh utai. Kurang ari sejam udah nya, iya madah ngagai aku enggau menyadi indu aku ke biak: “Aku udah tetemuka pemendar!” Enda lama udah nya, kami tiga berengkah enggau gempuru ba Erfurt.

Ba taun 1950, aku pulai baru ke Berlin, endur kami begulai enggau Eklisia Berlin-Kreuzberg. Udah nya, kami pindah baru tang agi ba Berlin. Maya nya, kami enggau Eklisia Berlin-Tempelhof. Nyau kelama, indai aku dibaptisa, tang aku bedau besedia. Nama kebuah?

Aku tusah deka ngaga pemansang ketegal kelalu malu. Taja pan aku udah dua taun enggau nginjil, aku nadai kala bejaku enggau orang ke ditemu aku ba pengawa nginjil. Tang udah nya aku ngelala mayuh bala menyadi Kristian ke udah ngayanka pemerani enggau penetap ati ngagai Jehovah. Sekeda ari sida udah kala dijil ba kem alai Nazi ngetanka orang tangkap tauka ba rumah jil di menua Jerman Timur. Sekeda ke bukai belalai nganjung litaricha ngagai Jerman Timur, taja pan  nya ulih ngujungka sida ditangkap lalu dijil. Teladan sida amat meransang aku. Aku berunding, enti bala menyadi nya ulih berambunka nyawa indah dijil ketegal Jehovah sereta bala menyadi Kristian bukai, aku mega patut nguji ngurangka asai ati aku ti malu.

Aku berengkah mutarka asai ati ti malu lebuh enggau siti kimpin ke pengawa nginjil ti spesial ba taun 1955. Ba siti surat ke dipandangka ba Informant, a Menyadi Nathan Knorr madahka kimpin nya deka nyadi siti ari pengawa ti pemadu besai ke kala diatur gerempung Jehovah. Iya madahka enti semua penginjil Saksi-Saksi Jehovah enggau pengawa tu, “kitai deka ngasaika bulan nginjil ti pemadu manah ke kala diasaika ba dunya tu.” Jaku nya endang amat! Enda lama udah nya, aku nyerahka diri ngagai Jehovah, lalu ba taun 1956, aku, apai enggau menyadi indu aku dibaptisa. Tang enda lama udah nya, aku patut ngaga siti agi pemutus ti besai.

Betaun-taun, aku nemu aku patut berengkah nyadi pengerintis. Tang aku majak betangguh deka nyadi pengerintis. Keterubah, aku mutuska deka belajarka chara import-eksport ba Berlin. Udah nya, aku deka gawa enda lama ngambika bulih peneleba sebedau aku berengkah nyadi pengerintis. Nya alai, ba taun 1961, aku nerima kereja ba Hamburg, nengeri ke bisi penyangkai kapal ti pemadu besai di Jerman. Ketegal aku kelalu rindu enggau kereja tu, nya alai aku majak betangguh deka nyadi pengerintis. Nama deka digaga aku?

Aku beterima kasih laban Jehovah ngena bala menyadi Kristian nulung aku nemu, gawa ke Jehovah nya utai ti pemadu manah. Sekeda ari bala bakih aku udah berengkah nyadi pengerintis lalu nyadi teladan ti manah. Nambahka nya, Menyadi Erich Mundt ke kala ditan ba kem Nazi, meransang aku bepanggai ba Jehovah. Iya madahka, lebuh ba kem nya, bala menyadi ke bepanggai ba diri empu nyau nyadi lemi. Tang sida ke bepanggai ba Jehovah enggau pengabis ati, mengkang tetap ati lalu ulih nulung gerempung Jehovah.

Pia mega, Menyadi Martin Poetzinger, ke udah nya enggau Raban ti Ngiring, terus meransang bala menyadi. Ku iya madahka: “Pemerani nya utai ti pemadu berega ke dikembuan nuan!” Pengudah belematika jaku iya, aku badu kereja sekular lalu berengkah nyadi pengerintis kena Jun 1963. Nya meh pemutus ti pemadu manah ke udah digaga aku! Pengudah dua bulan, indah sebedau aku berengkah ngiga kereja ti baru, aku dikangau nyadi pengerintis ti spesial. Beberapa taun udah nya, Jehovah ngereja utai ti ngelui ari ke dijangka aku. Aku dikangau enggau kelas ke-44 ba Sekula Gilead.

“Anang jampat mantul bejalaika pengawa nuan.” Nya ajar ti pemadu beguna ke dipelajarka aku, kelebih agi ari Menyadi Nathan Knorr enggau Lyman Swingle. Sida meransang kami ngambika mengkang ba pengawa kami taja pan tusah. Menyadi Knorr madahka: “Nama deka diperatika nuan ba menua ke alai nuan dianjung? Pengamah, indu utai, penyeranta? Tauka kati nuan deka beratika pun kayu, bungai tauka mua orang ti gaga ati? Belajar rinduka orang!” Bisi sekali, lebuh Menyadi Swingle nerangka kebuah sekeda bala menyadi jampat amat mantul, iya ngenyit ngayanka penusah ati lalu nyau ka nyabak. Iya ngetu bejaku enda lama lalu nyambung jaku iya baru. Tu amat negu ati aku lalu aku enggai ngasaka ati Kristus tauka bala menyadi kitai ke tetap ati.—Mat. 25:40.

Lebuh kami nerima pengawa, sekeda bala menyadi ke gawa ba Betel, nanyaka kini penunga kami deka dianjung. Sida nyebut utai ti manah pasal semua endur nya. Tang lebuh aku madahka diri ngagai Congo (Kinshasa), sida ngetu lalu madah: “Apu! Congo pia? Arapka Jehovah enggau nuan!” Maya nya, bisi mayuh berita pasal orang ke belaya sereta bebunuhka pangan diri ba menua Congo (Kinshasa). Tang aku mengkang berundingka utai ti udah dipelajar ba Gilead. Enda lama pengudah tembu belajar ba Sekula Gilead kena September 1967, Heinrich Dehnbostel, Claude Lindsay enggau aku mupuk ngagai indu nengeri Congo, Kinshasa.

Pengudah datai ba Kinshasa, kami belajarka jaku Perancis sepengelama tiga bulan. Udah nya kami mupuk ngagai Lubumbashi, ke dikumbai Elisabethville suba. Endur tu semak adan menua Zambia ba selatan menua Congo. Kami pindah ngagai rumah alai bala pengerintis seberai tasik diau. Rumah nya ba tengah-tengah nengeri nya.

Nadai orang udah kala nginjil ba Lubumbashi. Nya alai, orang ba endur nya enda kala ninga pasal Perintah Petara. Enda lama udah nya, kami bisi mayuh pemelajar Bup Kudus nyentukka kami nadai chukup jam belajar enggau semua sida. Kami mega nginjil ngagai bala pegawai ke gawa enggau perintah tauka polis. Mayuh ari sida bebasaka Bup Kudus sereta pengawa nginjil kami. Orang ba menua nya ngena jaku Swahili, nya alai kami duai Claude Lindsay belajarka jaku nya. Enda lama udah nya, kami duai dianjung ngagai eklisia ke ngena jaku Swahili.

Taja pan kami rindu nginjil ba endur nya, tang kami mega napi mayuh penanggul. Kesuah agi bala soldadu ke mabuk ti mai senyata tauka bala polis ti kasar nuduh kami ngereja utai ti enda digaga kami. Bisi sekali, seraban polis ke mai senyata ngenyit datai ngagai rumah kami lebuh kami benung begempuru. Sida mai kami ngagai balai polis. Kami ditan lalu diasuh duduk ba geladak nyentuk ngagai kira pukul 10 malam sebedau kami dilepaska.

Ba taun 1969, aku diasuh bejalaika pengawa tuai ti ngabas. Lebuh aku nyadi tuai ti ngabas, kadang-kadang aku bejalai jauh nengah jalai ti luchak  sereta bisi babas ti tinggi. Tu utai ke biasa ba Afrika. Ba siti genturung pendiau, seiku indu manuk enggau anak iya udu tinduk ba baruh katil aku. Aku seruran ingatka baka ni indu manuk nya ngasuh aku tedani maya tumu pagi lebuh hari agi petang. Indu manuk nya inggar amat. Aku rindu ngenang utai ke digaga aku enggau bala menyadi bukai lebuh kami duduk ngelingi tugung api lalu berandau pasal pemendar.

Siti ari penanggul ti pemadu besai ke ditapi kami iya nya, orang ke pura-pura nyadi Saksi-Saksi Jehovah, tang kebendar iya, sida nyukung raban Kitawala. b Sekeda ari sida udah dibaptisa lalu indah nyadi tuai gempuru ba eklisia. Mayuh ari sida tu ke “ngamahka gempuru,” enda ulih nipu bala menyadi Kristian ke tetap ati. (Jud. 12) Pengujung iya, Jehovah muai sida tu ari eklisia lalu udah nya majak mayuh orang nerima pemendar.

Ba taun 1971, aku dianjung ngagai pampang opis ba Kinshasa. Lebuh dia, aku bejalaika mayuh pengawa baka gawa ba opis ke nulis enggau nyaut surat, opis litaricha, sereta utai ke bisi kaul enggau pengawa nginjil. Ba Betel, aku belajarka chara ngatur pengawa ba menua ti besai tang servis ke disedia ngagai mensia mayuh agi kurang. Kadang-kadang surat kami ngambi awak bebulan-bulan datai ngagai eklisia. Surat nya dipunggah ari bilun ngagai bot, lalu bot nya beminggu-minggu sangkut ba sungai ketegal sebengkah bungai ke mayuh tumbuh ba ai ke ngembuan urat ti tau ngachau pejalai bot. Taja pan napi penanggul tu sereta iya ke bukai, pengawa kami ulih tembu.

Aku alit ati meda chara bala menyadi ngatur konvensyen besai ngena duit ke mimit aja. Sida nirika panggau ngena sarang indu sampuk, ngena rumput ti tinggi nyadika dinding, lalu ngulung rumput nya nyadika penuduk. Sida ngena buluh nyadika tiang lalu ngena tikai ke dianyam ari rumput nyadika atap sereta mija. Ketegal sida nadai paku lawang, sida ngena kulit kayu ke udah dikerat alus. Aku seruran alit ati meda semua chara ke pintar ti dikena bala menyadi mutarka penanggul nyediaka utai ti diguna ba konvensyen. Aku amat rinduka sida. Aku lelengauka sida lebuh aku diasuh bejalaika pengawa ti baru ke bukai.

Ba taun 1974, aku pindah ngagai pampang opis ba Nairobi, Kenya. Kami bisi mayuh pengawa lebuh dia, laban pampang opis Kenya nyukung pengawa nginjil ba 10 buah menua bukai ke semak. Sekeda ari menua tu nagang pengawa kitai. Aku suah dianjung ngelawa menua tu kelebih agi, menua Etiopia. Ba menua nya, mayuh bala menyadi kitai diperinsa sereta natka penusah ti balat. Sekeda ari sida balat dipenyati tauka dijil; sekeda ari sida indah dibunuh. Tang sida enggau tetap ati betan ketegal sida bisi kaul ti manah enggau Jehovah sereta pangan diri.

Ba taun 1980, bisi utai ti manah ke nyadi ba aku. Aku jadi enggau Gail Matheson. Iya ari menua Kanada lalu sama kelas enggau aku ba Sekula Gilead. Kami duai bekirumka surat ngagai pangan diri. Gail nya pengerintis seberai tasik ba menua Bolivia. Pengudah 12 taun, kami duai betemu baru ba New York. Enda lama udah nya, kami duai jadi ba Kenya. Aku amat beterima kasih ke Gail laban iya seruran berundingka utai nitihka peneka Jehovah lalu iya seruran puas enggau utai ti dikemisi diri. Nyentuk ke diatu, iya agi nyukung lalu nyadi kaling aku ti bepengerindu.

Ba taun 1986, kami duai Gail dianjung bejalaika pengawa ngabas lalu aku mega gawa ba Komiti Pampang Opis. Pengawa ngabas nya nyengkaum ngabas menua bukai ke dipegai pampang opis Kenya.

Aku agi ingat lebuh kami ngaga sedia kena ngatur konvensyen ba Asmara (di Eritrea) kena taun 1992. Maya nya, pengawa kitai enda ditagang ba menua nya. Tang sinu amat, kami semina ulih tetemuka siti kandang jelu ke enda manah dipeda ari luar, tang ba dalam balat agi. Ba hari konvensyen nya, aku alit ati meda chara bala menyadi ngubah endur nya nyadi endur ti engkeman alai nyembah Jehovah. Mayuh ruang bilik mai kain kena ngias sereta nutup semua utai ke enda tentu manah  dipeda. Kami gaga sereta gagit ati meda 1,279 iku orang datai ngulu konvensyen nya.

Pengawa ngabas nya siti ubah ti besai ba kami duai laban endur kami diau selalu berubah. Bisi sekali, kami diau ba rumah ti besai sereta chukup manah ke semak tebing tasik. Tang bisi sekali, kami diau ba langkau ke digaga ari besi lalu bisi jamban ke ngenyauh 100 m (300 kaki). Taja pia, enda ngira dini alai kami duai bejalaika pengawa ngabas, utai ke suah dikenang kami iya nya, lebuh kami kisuk ba pengawa nginjil enggau bala pengerintis sereta penginjil ti ransing. Lebuh kami nerima pengawa ti baru, kami ninggalka mayuh bala bakih ti balat dikerindu.

Ba taun 1987 ngagai taun 1992, pengawa kitai ba beberapa menua ke dipegai pampang opis Kenya udah dikemendarka perintah. Ketegal tu, kitai numbuhka pampang opis sereta opis menua ti bukai. Ba taun 1993, kami duai Gail dianjung gawa ba opis menua Addis Ababa di Etiopia ke alai pengawa kitai diatu udah dikemendarka pengudah betaun-taun dipejalaika enggau chara ti belalai.

Jehovah udah merekatka pengawa ba Etiopia. Mayuh bala menyadi Kristian nyadi pengerintis. Lebih ari 20 peratus bala penginjil udah nyadi pengerintis biasa ninting taun kenyau ari 2012. Pia mega, sekula teokratik bisi nyediaka latih ke diguna, lalu lebih ari 120 buah Palan Gempuru udah didirika nyentuk ngagai taun 2017. Ba taun 2004, bala menyadi ke diau ba Betel pindah ngagai bengunan ti baru. Lalu Palan Gempuru Besai ba endur nya mega mai asil ti manah.

Sekumbang ba Etiopia, kami duai Gail rapat amat enggau bala menyadi Kristian dia. Kami amat rinduka sida laban sida amat manah sereta bepengerindu. Apin lama ti udah, kami bisi penanggul ba pengerai lalu patut pulai ngagai pampang opis ba Eropah Tengah. Dia, kami diintu enggau manah, tang kami balat lelengauka bala bakih kami ba Etiopia.

Kami duai Gail udah meda chara Jehovah ngemansangka pengawa nginjil. (1 Kor. 3:6, 9) Ambika chunto, lebuh aku berengkah nginjil ngagai orang Rwanda ke gawa ngiga engkeraju ba Congo, nadai penginjil ti bukai ke bisi ba Rwanda. Diatu bisi lebih ari 30,000 iku menyadi Kristian kitai ba menua nya. Kena taun 1967, Congo (Kinshasa) bisi kira-kira 6,000 iku penginjil. Diatu bisi kira-kira 230,000 iku penginjil, lalu lebih ari sejuta iku orang enggau pengawa Ngingatka Pemati Jesus ba taun 2018. Ba semua menua ke kala dipegai pampang opis Kenya, penyampau penginjil udah nambah lebih ari 100,000 iku orang.

Lebih ari 50 taun ti udah, Jehovah ngena mayuh bala menyadi Kristian nulung aku berengkah nyadi pengerintis penuh jam. Taja pan aku agi malu, aku belajar, aku patut bepanggai ba Jehovah enggau pengabis ati. Utai ke ditapi aku ba Afrika nulung aku ngemansangka ati ti liat sereta puas ati enggau utai ti dikemisi. Kami duai Gail temegah ati enggau bala menyadi Kristian ke ngayanka pengerah jari, tan lebuh napi pemerinsa, sereta bepanggai ba Jehovah. Aku amat beterima kasih ke pemanah ati ti diayanka Jehovah ngagai kami duai. Berekat Jehovah endang ngelui utai ke dijangka aku.—Mas. 37:4.