Nemu Nuan?
Nama kebuah Jehovah ngemendarka orang Israel meri burung tekukur sereta burung achang nyadika pemeri?
DI BARUH Adat Moses, burung tekukur enggau burung achang sama ulih diberi nyadika pemeri ngagai Jehovah. Dua iti bansa burung tu suah disebut begulai dalam adat pasal pemeri ngagai Jehovah. Pia mega, orang Israel tau milih sekalika sida deka ngena burung achang tauka burung tekukur nyadika pemeri. (Lew. 1:14; 12:8; 14:30) a Nama kebuah atur tu amat beguna? Siti kebuah nya, burung tekukur enda selalu bisi. Nama kebuah?
Burung tekukur
Maya musin angat, burung tekukur bisi ba semua endur di menua Israel. Ninting taun maya bulan Oktober, burung tekukur deka terebai ngagai menua ba selatan, endur ti angat agi. Udah nya, lebuh musin bungai, burung tekukur deka pulai baru ngagai menua Israel. (P-dai. 2:11, 12; Jer. 8:7) Nyadi, maya jeman Israel suba, orang Israel tusah deka ngulihka burung tekukur nyadika pemeri maya musin chelap.
Burung achang
Enda baka burung tekukur, burung achang nadai mindah ngagai endur bukai. Nya alai, sida seruran bisi ba menua Israel sepemanjai taun. Nambahka nya mega, burung achang ulih nyadi jinak. (Bandingka John 2:14, 16.) Nitihka bup Bible Plants and Animals, “nyauka semua orang ba kampung sereta ba bandar Palestin bisi nupi burung achang ke udah jinak. Tiap iku orang ke nupi burung tu bisi ngaga sangkar, tauka lubang ba dinding, alai burung achang ulih diau.”—Bandingka Isaiah 60:8.
Burung achang ba tansang
Jehovah nerima bansa burung ke bisi ba menua Israel sepemanjai taun nyadika pemeri. Tu nunjukka Jehovah nya Petara ti bepengerindu sereta meretika situasi bala nembiak Iya.
a “Burung puna” ke disebut ba ayat tu kebendar iya “burung tekukur” ba jaku asal Bup Kudus.
