BA JEMAN Bup Kudus, lebuh orang deka kawin, pengantin lelaki tauka ruang bilik iya deka meri pemeri ngagai ruang bilik piak indu. Pemeri nya tau nyengkaum utai ti berega, jelu, tauka duit. Kekadang, pemeri tu diberi nengah pengawa. Ambika chunto, Jakop setuju deka gawa pengelama tujuh taun ke apai Rachel ngambika iya ulih kawin enggau Rachel. (P-kal. 29:17, 18, 20) Nama tuju adat tu?

Seiku pakar Bup Kudus ke benama Carol Meyers madahka: “Pemeri diberi nyadika ganti rugi ngagai ruang bilik piak indu. Tu ketegal anak indu sida nadai agi ulih nulung sida, kelebih agi ba pengawa betanam-betupi.” Pemeri ke diberi nya mega tau negapka kaul entara dua iti ruang bilik nya. Sida ulih nulung pangan diri ba maya ti tusah. Nambahka nya, adat tu mega nunjukka indu nya udah betunang lalu iya enda lama agi deka dijaga laki iya, ukai apai iya.

Taja pia, pemeri ke diberi nya ukai reti iya indu nya udah dibeli tauka dijual. Bup Ancient Israel—Its Life and Institutions madahka: “Ketegal piak lelaki patut mayar duit ngagai piak indu, mayuh orang engka ngumbai pengawa kawin orang Israel kelia baka ke ngereja pengawa dagang. Tang pemeri ke diberi nya nyadika ganti rugi ngagai ruang bilik indu nya, ukai rega ke dikena meli indu nya.”

Ba sekeda menua kemayaharitu, orang agi nitihka adat meri pemeri ngagai piak indu. Nya alai, apai indai Kristian ke nitihka adat tu deka nentuka sida enda minta penyampau ti kelalu tinggi. (Plp. 4:5; 1 Kor. 10:32, 33) Enggau tu, sida nunjukka diri enda “angkunka duit,” tauka amu. (2 Tim. 3:2) Enti sema apai indai ke Kristian minta penyampau ti kelalu tinggi, tu engka tau ngujungka pengantin lelaki nya nangguhka pengawa kawin lalu patut gawa ngambika ulih mayar penyampau ke dipinta. Tauka pengantin lelaki nya engka ngasaika iya patut badu ngerintis ngambika ulih gawa penuh jam. Enggau nya, iya ulih meri penyampau duit ke dipinta piak indu.

Ba sekeda endur, perintah menua udah netapka penyampau ke patut diberi ngagai piak indu. Enti pia, apai indai ke Kristian deka ngasika undang-undang tu. Nama kebuah? Laban Bup Kudus madahka orang Kristian patut “nunduk ngagai perintah ti megai menua” lalu nitihka undang-undang ti enda ngelanggar adat Petara.—Rom. 13:1; SKR. 5:29.