1. Nama nyadi ngagai ruang bilik Josep ketegal bala menyadi iya kepapaska iya?

 JAKOP sayauka semua anak lelaki iya. Tang iya sayau agi ke Josep ke beumur 17 taun. Baka ni asai ati bala menyadi Josep? Sida kepapaska iya, lalu tu ngasuh sida pedis ati ngagai iya. Josep nadai ngereja nama-nama utai ke tau ngasuh sida begedika iya. Taja pia, sida nyual iya lalu bulaka apai sida madahka iya udah dibunuh jelu babas. Ketegal sida kepapaska Josep, sida ngasuh ruang bilik sida charut lalu ngasuh apai sida balat tusah ati.—P-kal. 37:3, 4, 27-34.

 2. Bepelasarka Galatia 5:19-21, nama kebuah ati ti kepapas ulih ngemediska?

² Nitihka Bup Kudus, ati ti kepapas b nya siti ari “utai ti dikereja mensia” ke nagang sida ari bempu Perintah Petara. (Bacha Galatia 5:19-21.) Asai ati ke baka nya suah ngasuh pemangah, laya, enggau pengeringat nyadi.

 3. Nama deka dikerandauka kitai ba artikel tu?

³ Chunto bala menyadi Josep nunjukka ati ti kepapas ulih ngerusak kaul sereta ngachau pemaik ba ruang bilik. Taja pan kitai enda ngereja utai ke udah digaga bala menyadi Josep, kitai semua enda sempurna lalu bisi ati ti nemu ngakal. (Jer. 17:9) Nya alai, kadang-kadang kitai kepapaska orang bukai. Aram kitai berandauka sekeda chunto ari Bup Kudus ke  nulung kitai meda kebuah ati ti kepapas ulih tumbuh ba ati kitai. Udah nya, kitai deka beratika sekeda chara kitai ulih ngelaban asai ati nya lalu ngemansangka pemaik.

 4. Nama kebuah orang Pilistin kepapaska Isak?

⁴ Bepemisi agi. Isak nya orang ti kaya bendar lalu bulih mayuh utai. Tu ngasuh orang Pilistin kepapaska iya. (P-kal. 26:12-14) Sida indah ngalitka semua telaga ngambika Isak enda ulih meri ai ngagai jelu tupi iya. (P-kal. 26:15, 16, 27) Baka orang Pilistin, sekeda orang kemayaharitu kepapaska orang ke bisi mayuh agi utai ari sida. Sida ukai semina inginka utai orang tang mega ngarapka orang ke dikepapaska sida enda bulih utai.

 5. Nama kebuah bala tuai pengarap orang Judah kepapaska Jesus?

⁵ Dikerinduka mayuh orang. Bala tuai pengarap orang Judah kepapaska Jesus laban iya dikerinduka mayuh orang. (Mat. 7:28, 29) Jesus nya pengari Petara, lalu iya ngajar utai ti bendar. Taja pia, bala tuai pengarap ngerembaika cherita bula sereta ngenyaika nama iya. (Mrk. 15:10; Jhn. 11:47, 48; 12:12, 13, 19) Nama ulih dipelajar kitai ari tu? Enti bisi bala menyadi kitai ke ngembuan kualiti ti manah lalu mayuh orang rinduka sida, kitai anang kepapaska sida. Tang kitai patut nguji neladan sida.—1 Kor. 11:1; 3 Jhn. 11.

 6. Baka ni Diotrepes nunjukka diri kepapaska orang bukai?

⁶ Nerima pengawa teokratik. Ba abad keterubah, Diotrepes kepapaska sida ke ngiring eklisia Kristian. Iya deka “nyadi tuai” ba eklisia. Ketegal nya, iya bejaku bula pasal rasul John sereta bala menyadi lelaki ke ngiring ngambika bala menyadi ke bukai enda bebasaka sida. (3 Jhn. 9, 10) Taja pan kitai enda ngereja utai baka ke digaga Diotrepes, kitai mega engka berengkah kepapaska menyadi Kristian ke nerima pengawa teokratik ke dikinginka kitai. Kelebih agi enti kitai ngasaika diri ulih ngereja pengawa nya enggau manah agi.

 7. Baka ni ati ti kepapas ulih ngachau kitai?

⁷ Ati ti kepapas disemaka baka rumput ti berachun. Enti asai ati tu berengkah tumbuh ba ati kitai, kitai tusah deka muai iya. Penyumbung enggau ulah ti berundingka diri empu ulih ngasuh orang balat agi kepapas. Baka rumput ke nagang bungai ari tumbuh, ati ti kepapas ulih nagang orang ari ngemansangka kualiti ti badas baka pengerindu, penyiru enggau penelap. Enti kitai berengkah kepapaska orang, kitai patut lengkas muai iya ari ati kitai. Baka ni kitai ulih ngelaban asai ati tu?

 8. Nama kualiti ke patut dikembuan kitai ngambika ulih ngelaban ati ti kepapas?

⁸ Kitai ulih ngelaban ati ti kepapas enti kitai ngemansangka ulah ti baruh ati sereta puas ati enggau utai ti dikemisi diri. Enti kitai ngembuan kualiti tu, kitai deka nyeliah ari kepapaska orang. Orang ti baruh ati enda ngumbai diri pama agi ari orang bukai. Iya mega enda ngumbai diri patut bulih lebih agi ari orang bukai. (Gal. 6:3, 4) Orang ti puas ati enggau utai ti dikemisi diri enda mandingka diri enggau orang bukai. (1 Tim. 6:7, 8) Lebuh meda orang bukai bulih utai ti manah, iya gaga ati ke orang nya.

 9. Nitihka Galatia 5:16 enggau Pilipi 2:3, 4, baka ni roh kudus ulih nulung kitai?

⁹ Kitai begunaka roh kudus Jehovah kena nulung kitai enda kepapas lalu ngemansangka ulah ti baruh ati sereta puas ati enggau utai ti dikemisi diri. (Bacha Galatia 5:16; Pilipi 2:3, 4.) Roh kudus ulih nulung kitai meresa runding sereta tuju ati kitai. Enggau bantu ari  Jehovah, kitai ulih ngubah runding sereta ati ti kepapas ngena utai ti ulih meransang. (Mas. 26:2; 51:10) Peratika chunto Moses enggau Paul. Seduai iya mujur ngelaban ati ti kepapas.

10. Nama utai ke engka ulih nguji pemaruh ati Moses? (Peda gambar ba kulit majalah.)

¹⁰ Moses megai mayuh tanggung pengawa kena ngiring nembiak Jehovah. Tang iya enda nguji nagang orang bukai ari megai tanggung pengawa nya. Ambika chunto, bisi sekali, Jehovah ngambi sekeda roh kudus Iya ari Moses lalu meri nya ngagai seraban bala tuai orang Israel ke bediri semak Langkau Kain Jehovah. Enda lama pengudah nya, Moses ninga pasal dua iku tuai ke enda enggau sida datai ngagai Langkau Kain Jehovah. Tang seduai iya mega nerima roh kudus lalu belabuh benabi. Nama digaga Moses lebuh Josua ngasuh iya nagang dua iku tuai nya? Moses enda kepapas. Iya baruh ati lalu gaga ati ketegal seduai iya ulih benabi. (P-pau. 11:24-29) Nama ulih dipelajarka kitai ari Moses?

11. Baka ni tuai gempuru ulih neladan Moses?

¹¹ Enti nuan nya tuai gempuru, kati nuan kala diasuh ngelatih orang bukai megai tanggung pengawa ke dikerinduka nuan ba eklisia? Ambika chunto, nuan engka rindu ngiring pengawa belajarka majalah Menara Jaga tiap minggu. Enti nuan baruh ati baka Moses, nuan enda ngasaika diri dikemaruhka lebuh diasuh ngelatih menyadi lelaki ke bukai ngiring pengawa belajarka majalah nya. Nuan tentu gaga ati deka ngelatih iya ngambika iya ulih bejalaika pengawa nya enggau manah dudi hari.

12. Baka ni menyadi Kristian kitai ngayanka pemaruh ati sereta puas ati enggau utai ke dikemisi diri?

¹² Peratika siti agi utai ke ditapi mayuh bala menyadi lelaki ke udah tuai. Betaun-taun sida udah nyadi tuai ti ngatur raban tuai gempuru. Tang lebuh umur sida nyau manggai 80 taun, sida enda agi megai tanggung pengawa nya. Tuai ti ngabas ke udah manggai 70 taun, enda agi megai tanggung pengawa sida lalu diberi pengawa ti bukai. Empai lama ti udah, mayuh bala menyadi kitai ke gawa ba Betel di serata dunya udah dianjung ngereja pengawa nginjil. Sida enda kepapaska menyadi bukai ke engka bejalaika tanggung pengawa ke kala digaga sida suba.

13. Nama utai ke engka tau ngasuh Paul kepapaska 12 iku rasul Jesus?

¹³ Seiku agi chunto ke ngayanka pemaruh ati sereta puas ati enggau utai ti dikemisi diri iya nya, rasul Paul. Iya enda ngelakka asai ati ti kepapas nyadi ba iya. Iya bebendar nginjil, tang enggau ati ti baruh iya madahka: “Aku tu rasul ke pemadu mit ari semua bala rasul, lalu enda patut dikumbai rasul.” (1 Kor. 15:9, 10) Dua belas iku rasul nitihka Jesus lebuh Jesus bejalaika pengawa nginjil. Tang Paul belabuh nyadi orang Kristian pengudah pengangkat Jesus ari mati. Taja pan pengudah nya Paul nyadi “rasul ke orang bansa bukai,” iya tetap enda dipilih nyadi seiku ari 12 iku rasul Jesus nya. (Rom. 11:13; SKR. 1:21-26) Ari kepapaska 12 iku rasul ti rapat enggau Jesus nya, Paul tetap puas ati enggau utai ke dikemisi iya.

14. Nama deka digaga kitai enti kitai baruh ati sereta puas ati enggau utai ti dikemisi diri?

¹⁴ Enti kitai baruh ati sereta puas ati enggau utai ti dikemisi diri, kitai deka nyadi baka Paul sereta ngayanka basa ngagai sida ke dipilih Jehovah megai tanggung pengawa. (SKR. 21:20-26) Jehovah udah milih bala tuai gempuru ngambika ngiring nembiak Iya ba eklisia. Taja pan sida enda sempurna, Jehovah ngumbai sida pemeri ke mensia. (Eps. 4:8, 11) Enti kitai bebasaka sida lalu nitihka iring sida enggau baruh ati, kitai ulih mengkang semak  enggau Jehovah sereta diau bebaik enggau bala menyadi Kristian kitai.

15. Nama patut digaga kitai?

¹⁵ Enti kitai kepapaska orang tauka orang kepapaska kitai, kitai enda ulih diau bebaik enggau pangan diri. Kitai patut muai asai ati ti kepapas ari ati kitai, lalu nyeliahka asai ati nya ari majak tumbuh ba ati kitai. Kitai patut ngereja dua iti utai tu enti deka ngasika pesan Jehovah ke ngasuh kitai “ngereja utai ti mai pemaik, enggau utai ti tau ngeringka pangan diri.” (Rom. 14:19) Baka ni kitai ulih nulung orang ngelaban asai ati ti kepapas lalu ngemansangka pemaik?

16. Baka ni kitai ulih nulung orang ngelaban ati ti kepapas?

¹⁶ Ulah enggau runding kitai ulih ngachau orang bukai. Orang ba dunya kemayaharitu meransang kitai mandangka utai ke dikemisi diri. (1 Jhn. 2:16) Tang ulah tu ngasuh orang kepapaska kitai. Kitai ulih nyeliah ari ngasuh orang kepapaska kitai enti kitai enda suah bejaku pasal utai ke dikemisi diri tauka utai ke deka dibeli. Siti agi chara kitai ulih nyeliah ari ngasuh orang kepapaska kitai iya nya, kitai patut nyaga ulah lebuh diberi tanggung pengawa ba eklisia. Enti kitai suah nyebut pasal tanggung pengawa kitai ba eklisia, tu tau ngasuh ati ti kepapas tumbuh ba ati orang. Tang lebuh kitai ngenuluka orang bukai sereta  meda pemanah ke dikembuan sida lebuh ngereja pengawa, tu ulih meransang sida puas ati enggau utai ke dikemisi diri. Lalu kitai ngemansangka penyerakup sereta pemaik ba eklisia.

17. Nama utai ke ulih digaga bala menyadi Josep enggau diri sebilik, lalu nama kebuah?

¹⁷ Kitai ulih ngelaban ati ti kepapas! Peratika baru chunto bala menyadi Josep. Betaun pengudah sida jai enggau Josep, sida betemu enggau iya ba menua Ejip. Sebedau madahka sapa iya ti bendar ngagai bala menyadi iya, Josep nguji sida sekalika sida udah berubah tauka enda. Iya mai bala menyadi iya makai begulai, lalu iya meri mayuh agi pemakai ngagai Benjamin ari bala menyadi iya ke bukai. (P-kal. 43:33, 34) Taja pia, bala menyadi iya enda kepapaska Benjamin. Sida amat ibuhka iya sereta apai sida, Jakop. (P-kal. 44:30-34) Ketegal bala menyadi Josep badu agi kepapas, sida ulih diau bebaik enggau diri sebilik. (P-kal. 45:4, 15) Pia mega enggau kitai. Enti kitai muai ati ti kepapas, kitai tentu ulih diau bebaik enggau diri sebilik sereta bala menyadi kitai ba eklisia.

18. Nitihka James 3:17, 18, nama deka nyadi enti kitai ngemansangka pemaik?

¹⁸ Jehovah deka kitai ngemansangka pemaik sereta ngelaban asai ati ti kepapas. Kitai patut bebendar ngereja nya. Baka ke udah dikerandauka tadi, kitai ulih nyadi kepapas. Tu ketegal kitai diau ba dunya ke ngemansangka ati ti kepapas. Enti kitai baruh ati, puas ati enggau utai ke dikemisi diri lalu nemu beterima kasih, kitai tentu ulih nyeliah ari kepapas. Tu deka nulung kitai diau bebaik enggau orang, lalu kitai deka rindu, siru sereta nelap agi enggau orang.—Bacha James 3:17, 18.