1. Nama dipadah Bup Kudus pasal chara Jehovah meda mensia?

 KATI nuan rindu enti orang ngakim nuan pengudah sida meda chura kulit, gamal, tauka sais tubuh nuan? Nuan tentu enggai. Kesuah iya, runding orang pasal kitai bepelasar ba utai ke dipeda sida. Tang kitai berasai diperansang laban Jehovah enda baka nya! Ambika chunto, lebuh Samuel meda bala anak Jesi, utai ke dipeda iya enda sebaka enggau Jehovah. Jehovah udah madah ngagai Samuel, seiku ari anak Jesi deka nyadi raja orang Israel. Tang sapa ke diperatika Samuel? Lebuh meda anak Jesi ke benama Eliap, ku Samuel berunding, “Tu tentu orang ke udah dipilih Iya.” Enti dipeda mata, Eliap endang ngena nyadi raja. ‘Tang ku Jehovah bejaku enggau Samuel, “Anang ngira peninggi tauka penyigat gamal orang. Aku udah nulak iya.”’ Nama dipelajar kitai? Ku Jehovah agi: “Aku enda ngira mensia ngena chara mensia. Mensia meda gamal, tang Aku meda ati.”—1 Sam. 16:1, 6, 7.

 2. Nitihka John 7:24, nama kebuah kitai enda patut beratika orang ari gamal enggau pendiau aja enti deka nemu sapa sida ke bendar? Beri siti chunto.

² Ketegal enda sempurna, semua kitai jampat deka ngakim orang bepelasar ba utai ke dipeda kitai ba orang nya. (Bacha John 7:24.) Tang enti kitai semina beratika gamal enggau pendiau iya, enda mayuh utai ke ulih ditemu kitai pasal iya. Ambika chunto, enda mayuh utai ke ditemu lutur enti iya semina beratika gamal pesakit iya aja. Lutur patut mending enggau manah enti deka nemu pasal penyakit ke kala ditapi pesakit iya. Lutur mega patut nemu asai ati, tauka tanda-tanda penyakit pesakit iya. Lutur engka ngasuh iya X-ray tubuh ngambika ulih nemu bansa penyakit ke ngachau perengka tubuh iya. Enti  enda, lutur engka nyau salah madahka bansa penyakit iya lalu meri chara berubat ti salah. Pia mega, kitai enda tentu ulih meretika bala menyadi enggau manah enti kitai semina beratika sida ari gamal enggau pendiau aja. Kitai patut nguji meretika sapa sida ke bendar. Endang amat, kitai enda ulih nemu ati orang. Nya alai kitai enda ulih meretika orang enggau manah baka Jehovah. Taja pia kitai ulih neladan Iya. Baka ni chara iya?

 3. Baka ni cherita pasal nembiak Jehovah dalam Bup Kudus ke disebut ba artikel tu ulih nulung kitai neladan Jehovah?

³ Nama digaga Jehovah ngagai nembiak Iya? Iya mendingka sida. Iya berundingka utai ke ditapi sida sereta semua utai ke nyadi ba sida. Lalu Iya ngayanka penyiru ngagai sida. Lebuh kitai beratika Jehovah ngayanka semua nya ba Jonah, Elijah, Hagar enggau Lot, aram kitai beratika mega chara kitai ulih neladan Jehovah lebuh nulung bala menyadi kitai.

 4. Nama kebuah kitai engka bisi runding ti salah pasal Jonah?

⁴ Ketegal kitai enda nemu semua utai ke ditapi Jonah, kitai engka ngumbai iya enda ulih dikearap sereta enda ngasi. Jonah diasuh nusui pesan pasal Jehovah ke deka ngukum orang ba Nineweh. Tang iya enda ngasika Jehovah, lalu nepan kapal ngagai endur bukai, laban deka ‘ngerarika diri ari Jehovah.’ (Jon. 1:1-3) Pengudah meda ulah Jonah baka nya, kati nuan deka ngasuh iya ngereja pengawa ti sama nya baru? Nuan engka enggai. Tang Jehovah ngumbai Jonah patut diberi siti agi peluang.—Jon. 3:1, 2.

 5. Nama dipelajar kitai pasal Jonah ari sampi iya ba Jonah 2:1, 2, 9?

⁵ Jonah nunjukka sapa iya ke bendar ari sampi ke disebut iya. (Bacha Jonah 2:1, 2, 9.) Jonah tentu suah amat besampi ngagai Jehovah. Siti ari sampi nya nunjukka iya orang ti manah. Taja pan iya rari ari pengawa ke diasuh Jehovah, sampi iya nunjukka iya orang ti baruh ati, nemu beterima kasih sereta keran deka ngasika Jehovah. Nya kebuah Jehovah enda betatika penyalah iya. Jehovah nyaut sampi iya, lalu terus ngena iya nyadika nabi!

 6. Nama penguntung ke diulih enti kitai mending enggau manah?

⁶ Ngambika ulih mending enggau manah, kitai patut baruh ati sereta sabar. Bisi tiga iti penguntung ke diulih enti kitai ngereja nya. Kesatu, kitai ulih nyeliah ari bisi runding ti salah pasal orang. Kedua, kitai ulih meretika asai ati sereta kebuah iya ngereja siti-siti utai, lalu tu  ulih nulung kitai siru agi ngagai iya. Ketiga, lebuh kitai ngawakka menyadi kitai bejaku, nya ulih nulung iya nemu agi pasal diri empu. Kadang-kadang orang enda tentu meretika asai ati diri enti iya bedau madahka nya ngagai orang. (J-lam. 20:5) Ku seiku tuai gempuru ari menua Asia madahka: “Nyadi sekali, aku kelalu jampat meri jaku ajar ngagai seiku menyadi Kristian indu sebedau mendingka iya. Aku ngasuh iya ngemanahka agi komen ke deka diberi iya lebuh begempuru. Tang udah nya baru aku nemu, iya enda tentu nemu macha lalu tusah deka meri komen.” Endang manah enti tuai gempuru “mending dulu” sebedau meri jaku ajar!—J-lam. 18:13.

 7. Nama dipelajar kitai ari chara Jehovah nulung Elijah?

⁷ Sekeda bala menyadi kitai tusah deka madahka asai ati diri ketegal utai ke udah nyadi ba sida, tauka ketegal personaliti sida sereta chara sida dibesaika. Baka ni nuan ulih ngasuh sida nyamai agi deka madahka asai ati diri ngagai nuan? Kingatka chara Jehovah nulung Elijah lebuh iya ngerarika diri ari Jesebel. Nyau kelama, nya baru Elijah ulih madahka asai ati diri ngagai Jehovah. Jehovah mendingka iya enggau manah. Iya udah nya meransang Elijah lalu meri iya pengawa ti besai. (1 Raj. 19:1-18) Bala menyadi kitai engka begunaka awak ti lama sebedau sida ulih nyamai berandau enggau kitai. Enti sida nyamai berandau enggau kitai, nya baru kitai ulih meretika utai ke amat diasaika sida. Enti kitai sabar baka Jehovah, nyau kelama sida deka arapka kitai. Nya alai lebuh sida sedia deka madahka asai ati diri, kitai patut mendingka enggau manah.

 8. Nitihka Pemungkal 16:7-13, baka ni Jehovah nulung Hagar?

⁸ Hagar nya ulun Sarai. Tang iya udah ngereja utai ti beli pengudah Sarai meri iya nyadika bini Abram. Hagar betubuh-bisi lalu udah nya belabuh enda bebasaka Sarai ke nadai anak. Ulah Hagar majak enda manah, nya alai Sarai muru iya. (P-kal. 16:4-6) Ketegal enda sempurna, kitai engka ngumbai Hagar nya orang ke jai lalu patut diukum. Tang Jehovah enda ngumbai baka nya. Iya ngirumka seiku melikat ngagai Hagar. Lebuh melikat nya tetemuka iya, melikat nya nulung iya ngubah runding lalu merekatka iya. Hagar nemu Jehovah bisi ngemataka iya lalu nemu utai ke ditapi iya. Nya kebuah iya ngumbai Jehovah nya ‘Petara Ke Meda.’—Bacha Pemungkal 16:7-13.

 9. Nama diperatika Jehovah lebuh Iya nulung Hagar?

⁹ Nama diperatika Jehovah ba Hagar? Iya nemu pasal pengidup Hagar ke bendar sereta utai ke ditatka iya. (J-lam. 15:3) Hagar nya orang Ejip ke diau enggau siti ruang bilik ke bansa Hebrew. Kati Hagar kadang-kadang ngasaika diri baka orang kampar? Kati iya lelengauka diri sebilik sereta menua asal iya? Lalu pia mega, Abram bisi bini bukai kelimpah ari Hagar. Maya nya suba, sekeda lelaki bansa Hebrew ke nyembah Jehovah ngembuan lebih ari seiku bini. Tang nya ukai tuju asal Jehovah. (Mat. 19:4-6) Utai ke baka tu suah ngujungka penanggul ti besai. Diri sebilik engka kepapas sereta begedika pangan diri. Jehovah nemu pengawa Hagar ke enda bebasaka Sarai nya salah. Tang Iya mega meretika asai ati sereta utai ke ditatka Hagar. Nya kebuah Jehovah nulung iya.

10. Baka ni kitai ulih ngelala bala menyadi kitai enggau dalam agi?

¹⁰ Kitai ulih neladan Jehovah enti kitai nguji meretika bala menyadi kitai. Uji ngelala sida enggau dalam agi. Berandau enggau sida sebedau sereta pengudah begempuru. Nginjil enggau sida, lalu enti ulih, bai sida begulai makai. Enggau nya, nuan engka enda nyangka menyadi indu ke dikumbai enggai begulai  enggau orang, kebendar nya iya orang ke pemalu. Lalu menyadi lelaki ke dikumbai bepemisi, kebendar nya iya ukai orang ke angkunka reta, tang orang ke gerah jari. Tauka seiku menyadi indu enggau anak iya ke suah laun datai begempuru, kebendar nya sida benung napi sakal ba rumah. (Rom. 14:4) Endang amat, kitai enda patut masuk champur ba pengawa orang. (1 Tim. 5:13) Taja pia, manah mega enti kitai nemu sekeda utai pasal bala menyadi kitai sereta utai ke nyadi ba sida. Tu ulih nulung kitai meretika sida enggau manah agi.

11. Nama kebuah tuai gempuru patut ngelala nembiak Jehovah enggau dalam?

¹¹ Kelebih agi tuai gempuru. Sida patut ngelala bala menyadi ke diintu sida. Peratika chunto seiku tuai ti ngabas ke benama Artur. Iya enggau seiku tuai gempuru ngusung seiku menyadi indu ke pemalu. Ku Artur madah: “Laki iya nadai enda lama pengudah seduai iya jadi. Taja pan pengidup iya tusah, iya ngajar dua iku anak indu iya rinduka Jehovah lalu seduai iya nyembah Jehovah enggau tetap ati. Tang diatu mata menyadi indu nya enda lansik agi lalu iya empu bisi penyakit depression (kemurungan). Taja pia, pengerindu enggau penetap ati iya ke Jehovah mengkang tegap. Kami duai belajar mayuh utai ari teladan manah iya.” (Plp. 2:3) Tuai ti ngabas nya nitihka teladan Jehovah. Jehovah ngelala nembiak Iya ke tetap ati sereta pemedis ke ditatka sida. (P-sut. 3:7) Tuai gempuru ke ngelala nembiak Jehovah enggau dalam ulih nulung sida enggau manah agi.

12. Nama asil manah ke diulih Menyadi Yip Yee ketegal iya ngelala seiku menyadi indu ba eklisia iya enggau dalam?

¹² Sekeda menyadi engka bisi perangai ke ngasuh nuan enda liat ati. Tang enti nuan ngelala sida enggau dalam, nuan tentu deka siru enggau sida. Peratika siti chunto. Ku seiku menyadi indu ke benama Yip Yee, ti diau ba menua Asia madahka: “Seiku menyadi indu ba eklisia aku kelalu besai nyawa lebuh bejaku. Aku ngumbai iya enda bebasaka orang. Tang lebuh nginjil enggau iya, aku nyau nemu iya kala nulung apai indai bejualka ikan ba pasar. Nyawa iya patut inggar ngambika ulih narit pelangan. Ari nya aku nemu, aku patut ngelala bala menyadi enggau dalam enti deka meretika sida.” Enda mudah deka ngelala bala menyadi Kristian enggau dalam. Tang, enti nuan nitihka jaku ajar ari Bup Kudus ke ngasuh nukangka ati ngagai orang, nuan neladan Jehovah ke rinduka “semua mensia.”—1 Tim. 2:3, 4; 2 Kor. 6:11-13.

13. Nitihka Pemungkal 19:15, 16, nama digaga dua iku melikat lebuh Lot enda beguai nitihka iring ari Jehovah, lalu nama kebuah?

¹³ Lot enda beguai nitihka iring ari Jehovah lebuh bisi utai ti tau ngemediska iya nyadi. Dua iku melikat datai lalu ngasuh Lot mai diri sebilik pansut ari nengeri Sodom. Nama kebuah? Ku melikat nya madah: “Kami duai deka ngerusak nengeri tu.” (P-kal. 19:12, 13) Hari siti, sida Lot sebilik agi ba rumah. Nya alai melikat nya nangkan Lot baru. Tang “Lot ngerindang diri.” Kitai engka ngumbai Lot enda ngasi tauka enda ibuhka utai ti diasuh Jehovah. Taja pia, Jehovah enda ngetu nguji deka nyelamatka iya lalu ngayanka penyiru. Nya alai, melikat nya “megai jari Lot lalu ngiring iya, bini iya, enggau dua iku anak indu iya, lalu nguluka sida pansut ari nengeri nya.”—Bacha Pemungkal 19:15, 16. b

14. Nama utai ke ngasuh Jehovah siru enggau Lot?

¹⁴ Jehovah tentu bisi kebuah deka siru enggau Lot. Lot engka takutka orang ba luar nengeri Sodom. Nya kebuah iya enda beguai ngerarika diri. Kelimpah ari nya, bisi mega penanggul bukai. Ba Emperan Sidim semak nengeri Sodom bisi mayuh lubang tar lalu Lot tentu nemu pasal dua iku raja ke labuh ngagai lubang tar nya. (P-kal. 14:8-12) Ketegal Lot nya seiku tuai bilik, iya tentu irauka sida sebilik. Iya mega orang ti kaya lalu tentu bisi rumah ti manah ba Sodom. (P-kal. 13:5, 6) Tang semua nya ukai kebuah ke tau ngasuh iya enda beguai ngasika Jehovah. Taja pia, Jehovah enda betatika penyalah Lot, tang ngumbai Lot “orang ke lurus.”—2 Pet. 2:7, 8.

15. Ari ke bisi runding ti salah pasal pengawa ke digaga menyadi Kristian, nama patut digaga kitai?

¹⁵ Ari ke bisi runding ti salah pasal pengawa ke digaga menyadi Kristian, manah agi kitai nguji meretika asai ati iya. Nya meh utai ke deka digaga seiku menyadi Kristian indu ba Eropah ke benama Veronica. Ku iya madah: “Seiku menyadi Kristian indu selalu  enda manah mood. Iya selalu ngenyauhka diri ari menyadi Kristian bukai. Kekadang, aku takut deka bejaku enggau iya. Tang aku berunding, ‘Enti sema aku baka iya, aku tentu begunaka bakih.’ Nya alai aku nanya kati gaya iya. Lalu iya pan berengkah madahka asai ati diri! Diatu aku ulih meretika iya enggau manah agi.”

16. Nama kebuah kitai patut besampi minta tulung ngambika ulih ngayanka penyiru ngagai bala menyadi?

¹⁶ Semina Jehovah aja ke ulih meretika semua utai pasal kitai. (1 Jhn. 3:20) Nya alai nuan ulih minta Iya nulung nuan, ngambika nuan mega ngembuan runding ti sama baka Iya pasal orang bukai, lalu nemu chara deka ngayanka penyiru ngagai sida. Sampi nulung seiku menyadi indu ke benama Anzhela deka agi ngayanka penyiru. Ba eklisia iya, bisi seiku menyadi indu ke tusah enggau begulai. Ku Anzhela madahka: “Kitai engka jampat deka bisi runding ti salah pasal iya lalu deka nyeliahka diri ari iya. Tang aku minta Jehovah nulung aku ngambika ulih siruka iya.” Kati Jehovah nyaut sampi Anzhela? Ku iya madah: “Kami duai begulai nginjil lalu lama berandau enggau pangan diri pengudah nginjil. Aku enggau siru mendingka iya. Diatu aku rindu agi ke iya, lalu keran deka nulung iya.”

17. Nama patut digaga kitai enggau naka ulih?

¹⁷ Nuan enda ulih milih bagi menyadi Kristian ke deka alai nuan ngayanka penyiru. Semua sida napi penanggul baka Jonah, Elijah, Hagar, enggau Lot. Kesuah agi, sida napi penanggul ketegal pemutus tauka utai ke digaga diri empu. Kebendar iya, bisi maya nya semua kitai mega ulih mai penanggul ngagai diri empu. Nya kebuah Jehovah ngasuh kitai siruka pangan diri. (1 Pet. 3:8) Lebuh kitai ngasika Jehovah, kitai negapka penyerakup ba ruang bilik Jehovah ke datai ari serata dunya. Nya alai, enggau naka ulih meh kitai neladan Jehovah. Lebuh nulung bala menyadi Kristian, kitai deka mendingka sida, berundingka utai ke ditapi sida sereta ngayanka penyiru ngagai sida.