1-2. Nama reti ku Jesus lebuh iya nyebut jaku ke bisi ba John 4:35, 36?

 JESUS benung bejalai nengah madang barli. Leka barli baru berengkah tumbuh. (Jhn. 4:3-6) Leka barli nya tau diketau empat bulan udah nya. Tang utai ke disebut Jesus engka mimit nyelai. Ku iya madah: ‘Peda umai nyau mansau, sedia deka diketau.’ (Bacha John 4:35, 36.) Nama reti ku Jesus?

² Ke amat nya Jesus bejaku pasal pengawa ngempuruka orang, ukai ngumpul leka barli. Peratika utai ke baru udah nyadi. Kesuah nya, orang Judah nyeliahka diri ari orang Samaria. Tang Jesus udah nginjil ngagai seiku indu Samaria lalu indu nya ningaka iya! Lebuh Jesus benung bejaku pasal umai ke nyau mansau, seraban orang Samaria ke udah ninga pasal Jesus ari indu nya benung mansang ngagai Jesus laban sida deka belajar mayuh agi ari iya. (Jhn. 4:9, 39-42) Seiku pakar Bup Kudus bisi nyebut pasal pekara tu: “Orang berumban deka betemu enggau Jesus lalu ningaka iya. . . . Nya nunjukka sida baka barli ti sedia deka diketau.”

 3. Enti nuan bisi runding ti sama baka Jesus, baka ni tu nulung nuan nyadi penginjil ke manah agi?

³ Nama runding nuan pasal orang ke ditemu nuan maya nginjil? Kati nuan ngumbai sida baka barli ti sedia deka diketau? Enti pia, tiga iti pekara tu tentu deka nyadi: Kesatu, nuan deka berumban agi nginjil. Timpuh alai ngetau enda panjai. Nya alai anang masau jam. Kedua, nuan deka gaga ati lebuh nuan meda orang ningaka berita manah ari Bup Kudus. Bup Kudus bisi madah: ‘Orang rami gaga lebuh sida ngetau gandum.’ (Isa. 9:3) Lalu ketiga, nuan ulih beratika sida ulih nyadi murid Jesus. Nya alai, nuan deka ngubah chara nuan ngenataika Berita Manah ngambika ulih narit ati orang ke ninga.

 4. Nama deka dipelajar kitai ari rasul Paul ba artikel tu?

 ⁴ Sekeda murid Jesus engka enda pechaya orang Samaria ulih nyadi murid Jesus. Tang Jesus enda ngumbai baka nya. Kitai mega patut pechaya orang ke alai kitai nginjil ulih nyadi murid Jesus. Rasul Paul nyadi teladan ti manah ke kitai. Nama ulih dipelajar kitai ari iya? Ba artikel tu, kitai deka berandauka chara iya (1) ulih nemu utai ti dipechaya orang ke alai iya nginjil, (2) meretika utai ke ngerinduka ati sida, enggau (3) pechaya sida ulih nyadi murid Jesus.

 5. Nama kebuah Paul ulih meretika utai ti dipechaya bala orang ba balai gempuru?

⁵ Paul suah nginjil ba balai gempuru orang Judah. Ambika chunto, ba balai gempuru di Tesalonika, pengelama “tiga hari Sabat beturut-turut, iya betalat enggau [orang Judah] ari Bup Kudus.” (SKR. 17:1, 2) Paul tentu berasai andal betalat enggau sida dia laban iya empu orang Judah. (SKR. 26:4, 5) Iya nemu nama runding sida, nya alai iya ulih andal nginjil ngagai sida.—Plp. 3:4, 5.

 6. Nama utai ke enda sama entara orang ke ditemu Paul ba sebelah pasar Atens, enggau orang Judah ba balai gempuru?

⁶ Pengudah Paul ngerarika diri ari Tesalonika sereta Beria ketegal disakal orang, iya datai ba Atens. Sekali agi, ‘iya betalat enggau orang Judah dalam balai gempuru sereta enggau orang bansa bukai ke angkunka Petara.’ (SKR. 17:17) Tang lebuh Paul nginjil ba sebelah pasar, iya betemu enggau orang ke bisi runding ti enda sama. Sekeda ari peninga iya nya orang ke ngajar penemu mensia. Lalu bisi mega ke datai ari bansa bukai. Ba sida, pesan ke dibai Paul nya “ajar ti baru.” Ku sida madah ngagai iya: “Sekeda utai ti disebut nuan nyelai bendar didinga kami.”—SKR. 17:18-20, Berita Manah Ka Rebak Diatu.

 7. Nitihka Kereja Rasul 17:22, 23, baka ni Paul ngubah chara iya nginjil?

⁷ Bacha Kereja Rasul 17:22, 23. Chara Paul ngenataika pesan ngagai orang ari bansa bukai ba Atens enda sama enggau chara ke dikena iya nginjil ngagai orang Judah ba balai gempuru. Paul tentu berunding pasal utai ke dipechaya orang ba Atens. Iya enggau bejimat beratika utai ke ngelingi iya sereta adat ti bekaul enggau pengarap sida. Udah nya, Paul nguji beratika utai ke dipechaya orang ba Atens, ke sejalai enggau pemendar Bup Kudus. Seiku pemansik Bup Kudus madahka: “Paul nya orang bansa Judah ke nyadi orang Kristian. Nya alai iya nemu orang Gerika ke kapir enda nyembah Petara ke dikumbai orang Judah enggau orang Kristian, Petara ti ‘bendar.’ Tang Paul nguji  nunjukka Petara ke deka dipadah iya ngagai orang ba Atens nya ukai petara ti baru ba sida.” Nya alai Paul deka ngubah chara iya nginjil. Iya madah ngagai sida, pesan ke ditusui iya datai ari “petara ti enda dikelala” sida, iya nya petara ke disembah sida ngelama tu. Taja pan orang ari bansa bukai enda nemu pasal Bup Kudus, tang Paul ngumbai sida sempama barli ke sedia deka diketau. Iya pechaya sida ulih nyadi orang Kristian sereta murid Jesus. Nya alai iya ngubah chara iya ngenataika berita manah ari Bup Kudus.

 8. (a) Baka ni nuan ulih nemu jalai pengarap orang ba endur nginjil? (b) Enti sema orang madahka diri udah bisi jalai pengarap, baka ni nuan deka nyaut iya?

⁸ Baka Paul, beratika utai ti dipeda. Peratika utai ke ulih nulung nuan nemu utai ti dipechaya orang ba endur nuan nginjil. Baka ni chara orang ke bempu rumah ngias rumah tauka kerita iya? Nama ditemu kitai pasal jalai pengarap iya ari nama, gari, chara ngintu diri, tauka leka jaku ke dikena iya? Engka iya madahka diri udah bisi jalai pengarap. Lebuh orang bisi madah munyi nya, ku seiku pengerintis spesial ke benama Flutura nyaut: “Aku ukai datai deka ngasuh nuan arapka utai ti dipechaya aku. Aku datai deka berandau enggau nuan pasal topik tu . . . ”

 9. Nama topik ke ulih dikerandauka nuan enggau orang ke bisi jalai pengarap?

⁹ Nama sekeda topik ke ulih dikerandauka nuan enggau orang ke udah bisi jalai pengarap? Giga utai ti sama ke dipechaya seduai. Iya engka nyembah seiku aja Petara, nemu Jesus nya Penyelamat mensia, tauka iya engka pechaya orang ke jai deka dipunaska enda lama da agi. Bepelasarka utai ti sama ke dipechaya seduai, kenataika pesan ari Bup Kudus enggau chara ti narit ati iya.

10. Nama utai ke patut digaga kitai lebuh betemu enggau orang ke bisi jalai pengarap, lalu nama kebuah?

¹⁰ Kingatka meh, orang engka enda arapka semua utai ti diajar jalai pengarap sida. Nya alai pengudah nuan nemu nama jalai pengarap ke dipegai orang nya, uji giga utai ke amat dipechaya iya. Ku seiku pengerintis spesial ari Australia ke benama David madahka: “Mayuh orang kemayaharitu nyampurka penemu mensia enggau utai ti diajar jalai pengarap sida.” Seiku menyadi indu ke benama Donalta ari menua Albania madahka: “Sekeda orang ke ditemu kami lebuh kami nginjil madahka diri bisi jalai pengarap. Tang udah nya sida madahka diri enda tentu arapka Petara.” Lalu seiku menyadi lelaki ke nyadi pengerintis seberai tasik ba menua Argentina beratika, sekeda orang madahka diri pechayaka ajar pasal Triniti. Tang sida enda tentu pechaya Apai,  Anak, enggau roh kudus nya amat seiku Petara. Ku iya madah: “Lebuh aku nemu orang ke enggau aku bejaku nya engka enda arapka semua utai ti diajar jalai pengarap iya, aku senang agi deka berandauka utai ti sama ke dipechaya kami duai.” Nya alai, uji giga utai ke amat dipechaya orang. Baka Paul, nuan ulih “nyadi semua macham utai ke semua mensia.”—1 Kor. 9:19-23.

11. Nitihka Kereja Rasul 14:14-17, baka ni chara Paul narit ati orang ke enggau iya berandau ba Listra?

¹¹ Bacha Kereja Rasul 14:14-17. Paul beratika utai ti ngerinduka ati orang, lalu udah nya iya ngubah chara iya nginjil ngagai sida. Ambika chunto, lebuh Paul nginjil ngagai orang ba Listra, iya beratika sida semina nemu mimit tauka nadai penemu pasal jaku Petara. Nya alai Paul berandau enggau sida pasal utai ke ditemu sida. Iya berandau pasal pengawa bumai sereta chara tau bulih pengelantang ba pengidup. Iya ngena leka jaku tauka chunto ti ulih dimeretika orang ke enggau iya berandau.

12. Baka ni nuan ulih nemu utai ti ngerinduka ati orang, lalu udah nya ngubah chara nuan nginjil?

¹² Kena meh pemereti ati ngambika nemu utai ti ngerinduka ati orang, lalu udah nya ubah meh chara nuan nginjil. Baka ni nuan ulih nemu nama utai ti ngerinduka ati orang ke enggau nuan berandau? Chara iya, beratika utai ti dipeda nuan. Engka iya benung bekebun, macha bup, ngaduka basikal, tauka benung ngereja pengawa bukai. Engka nuan ulih ngepunka randau enggau bejaku pasal utai ke benung digaga iya. (Jhn. 4:7) Indah gari ke dikena orang ulih nulung kitai nemu pasal orang nya. Kitai ulih nemu bansa iya, kereja, tauka tim sukan ke dikerinduka iya. Gustavo madahka: “Aku ngepunka randau enggau seiku lelaki ke beumur 19 taun ke ngena baju T-shirt ti bisi gambar seiku penanyi ti tebilang. Aku nanya pasal baju iya. Lalu iya madahka kebuah iya rinduka penanyi nya. Pengujung iya, iya belajarka Bup Kudus. Diatu iya udah nyadi menyadi Kristian kitai.”

13. Baka ni nuan ulih narit ati orang ngagai pengawa belajarka Bup Kudus?

 ¹³ Lebuh nuan deka orang belajarka Bup Kudus, tentuka nuan mai iya belajarka nya enggau chara ti narit ati. Padahka baka ni pengawa belajarka Bup Kudus ulih nulung iya ba pengidup. (Jhn. 4:13-15) Ambika chunto, seiku indu ke bisi minat pasal Bup Kudus ngelaluka menyadi indu kitai ke benama Hester ngagai rumah iya. Lebuh menyadi Hester meda setipikit ke digantung ba dinding ti nunjukka indu nya profesor ke ngambi bidang pelajar, Hester madahka kitai mega ngajar orang nengah pengawa belajarka Bup Kudus sereta gempuru Kristian kitai. Indu nya deka belajarka Bup Kudus, hari siti iya datai begempuru, lalu enda lama udah nya iya enggau gempuru besai. Setaun udah nya, iya dibaptisa. Nya alai, lebuh datai ngabas, tanya diri empu: ‘Nama utai ti ngerinduka ati orang ke deka ditemu aku? Ulih aku nerangka pengawa belajarka Bup Kudus kitai enggau chara ti narit ati?’

14. Baka ni nuan ulih ngubah chara ngajar Bup Kudus nitihka utai ke diguna pemelajar?

¹⁴ Pengudah berengkah ngajar orang Bup Kudus, nuan patut besedia enggau manah tiap kali nuan deka belajar enggau sida. Pikirka pasal ruang bilik pemelajar nuan, tikas pelajar iya, peneleba iya, enggau utai ti ngerinduka ati iya. Lebuh nuan nyediaka diri, pikirka ayat Bup Kudus ke deka dibacha, video ke deka dipandangka, enggau sempama ke deka dikena nuan nerangka pemendar ari Bup Kudus. Tanya diri empu, ‘Nama ke lebih agi narit ati sereta negu ati pemelajar tu?’ (J-lam. 16:23) Ba Albania, seiku indu ke belajar enggau seiku pengerintis ke benama Flora madahka: “Aku enda ulih nerima ajar pasal orang mati diangkat idup baru.” Flora enda terus ngansak iya nerima ajar nya. Ku Flora madah: “Aku nemu sebedau iya ulih arapka ajar pasal pengangkat ari mati, iya patut ngelala Jehovah ke besemaya pasal ajar nya.” Nya alai, tiap kali lebuh belajar, Flora nyebut pasal pengerindu Petara, penemu-dalam enggau kuasa ke dikembuan Iya. Nyau kelama, indu nya nyau arapka ajar pasal orang mati diangkat idup baru. Diatu iya nyadi Saksi Jehovah ke ransing.

15. (a) Nitihka Kereja Rasul 17:16-18, baka ni ulah orang ba Atens kelia menya? (b) Tang nama kebuah Paul enda ngetu nginjil ngagai sida?

¹⁵ Bacha Kereja Rasul 17:16-18. Paul enda ngetu nginjil ngagai orang ba Atens, taja pan sida nyembah engkeramba, ngereja ulah seks ti kamah sereta arapka penemu ke datai ari orang kapir. Tang iya majak nginjil ngagai sida taja pan sida jai enggau iya. Paul empu nyau nyadi orang Kristian taja pan sebedau nya iya ‘udah bejaku busung ngelaban Petara, lalu udah merinsaka [“nembiak,”NWT] Iya.’ (1 Tim. 1:13) Baka Jesus ke pechaya Paul ulih nyadi murid iya, Paul mega pechaya orang ba Atens ulih nyadi murid Jesus. Lalu utai ke dipechaya Paul nya amat nyadi.—SKR. 9:13-15; 17:34.

16-17. Nama nunjukka orang ari bemacham chara pengidup ulih nyadi murid Jesus? Beri siti chunto.

¹⁶ Ba abad keterubah, orang ari bemacham chara pengidup bisi nyadi murid Jesus. Lebuh Paul nulis surat ngagai orang Kristian ke diau ba negeri Korint ke dipegai menua Gerika, iya madahka sekeda bala menyadi ba eklisia nya kala ngereja penyalah ti berat tauka ngembuan gaya pengidup ti balat enda bemoral. Lalu udah nya ku iya: “Baka nya meh sekeda bala kita suba. Tang kita udah dituchi.” (1 Kor. 6:9-11) Kati nuan pechaya sida ulih ngaga ubah ba pengidup lalu nyadi murid Jesus?

¹⁷ Kemayaharitu, mayuh orang deka ngaga ubah ngambika ulih nyadi murid Jesus. Ambika chunto, ba Australia, seiku pengerintis  spesial ke benama Yukina beratika sapa-sapa pan ulih ningaka pesan ari Bup Kudus. Nyadi sekali, lebuh ba opis, iya tepedaka seiku indu ke bisi pantang lalu ngena gari ti besai. Ku Yukina: “Terubah-rubah aku berasai kakang, tang udah nya aku nguji bejaku enggau iya. Aku beratika iya rindu deka nemu pasal Bup Kudus laban sekeda pantang ba tubuh iya bisi ayat ari bup Masmur!” Iya berengkah belajarka Bup Kudus lalu datai begempuru. b

18. Nama kebuah kitai enda patut ngakim orang?

¹⁸ Kati Jesus nyebut “umai nyau mansau, sedia deka diketau” ketegal iya ngarapka mayuh orang deka nyadi murid iya? Enda. Bup Kudus bisi madahka semina mimit aja orang ke arapka iya. (Jhn. 12:37, 38) Lalu Jesus ulih nemu utai ke bisi ba ati orang. (Mat. 9:4) Taja pan iya betatika sekeda orang ke arapka iya, tang iya enggau ransing nginjil ngagai semua orang. Kitai enda nemu utai ke bisi ba ati orang, nya alai, kitai lebih agi enda patut ngakim orang tauka endur kandang alai kitai nginjil! Tang, manah agi enti kitai pechaya orang ulih nyadi murid Jesus. Seiku pengerintis seberai tasik ba Burkina Faso ke benama Marc madahka: “Kesuah agi, orang ke dikumbai aku deka ngaga pemansang, sida nya ke ngetu belajar Bup Kudus. Tang orang ke dikumbai aku enda ulih ngaga pemansang, sida nya ke ngaga pemansang. Ari tu aku belajar, manah agi ngawakka roh kudus Jehovah ngiring kitai ngambika ulih ngiga orang ke amat deka nemu pasal pemendar.”

19. Nama runding ke patut dikembuan kitai pasal orang ke alai kitai nginjil?

¹⁹ Keterubah, nuan engka ngumbai enda mayuh orang ke deka nyadi murid Jesus. Tang kingatka utai ke dipadah Jesus ngagai murid iya. Umai nyau mansau, sedia deka diketau. Orang ulih ngaga ubah ba pengidup lalu deka nyadi murid Jesus. Jehovah ngumbai sida berega. (Hag. 2:7) Enti kitai ngembuan runding ti sama baka Jehovah enggau Jesus pasal orang ke alai kitai nginjil, kitai tentu deka nemu chara pengidup sereta utai ti ngerinduka ati sida. Kitai mega pechaya sida ulih nyadi menyadi Kristian kitai.