Nuan Ulih Mujur!

TU meh maya alai nuan “enda tau enda kering, lalu ngereja pengawa nya.” (1 Bansa Israel 28:10) Nama chara bukai ke patut digaga nuan?

Tetapka haribulan. Nitihka Jabatan Kesihatan enggau Perkhimatan Masyarakat Amerika Serikat, pengudah nuan mutuska deka ngetu nginsap, anang nganti lebih ari dua minggu ari ngereja nya. Tentuka haribulan nuan patut ngereja nya, lalu tuliska nya ba kalindar. Padahka ngagai bala kaban nuan, lalu anang sesekali ngubah haribulan nya enda ngira nama utai nyadi.

Ngaga nota. Dalam nota tu, tuliska utai ti ulih meransang pengeran nuan. Chunto iya:

● Kebuah deka ngetu nginsap

● Lumur orang ke ulih digiga enti nuan enda tetagangka diri ari nginsap

● Jaku peransang baka ba Galatia 5:22, 23

Selalu bai meh nota tu, lalu bacha nya beberapa kali dalam sehari. Taja pan nuan udah mujur, tang bacha baru nota tu enti nuan bisi pengingin deka nginsap baru.

Berubah enggau jampat. Sebedau haribulan ke udah ditetapka, uji ubah meh rutin nuan. Chunto iya, enti nuan teleba nginsap pengudah nuan dani, uji meh nunda nya pengelama sejam. Enti nuan teleba nginsap maya tauka pengudah makai, uji meh seliahka diri ari ngereja nya. Seliahka mega alai orang udu nginsap. Maya nuan kediri, latih meh diri nyebut, “Enggai! Aku udah ngetu nginsap.” Chara tu ulih nyediaka nuan sereta ngingatka nuan, nuan deka badu nyadi penginsap.

Besedia ke utai bukai. Lebuh haribulan ke udah ditetapka nya majak semak, sediaka meh utai ke ulih dikunyah nuan baka kachang, lobak, tauka chewing gum. Padahka ngagai diri sebilik sereta bala kaban kemaya nuan deka berengkah badu nginsap, lalu padahka chara sida ulih nyukung nuan. Buai meh abus insap, api tekis tauka pemetik api, sereta sebarang utai bukai ke ulih meransang nuan deka nginsap. Tentuka nadai insap ba rumah, kerita, endur gawa, kuchik baju, sereta utai bukai. Ke pemadu penting nya, terus besampi minta bantu ari Petara. Bebendar meh besampi ngambika nuan nadai agi pengingin deka nginsap.​—Luke 11:13.

Mayuh orang udah mujur ngelepaska diri ari “kaban” ke ngerusak sida. Nuan mega ulih mujur! Lalu gambarka meh, pengerai ti manah sereta bibas ari nyadi ulun insap benung nganti nuan!

[Gambar]

Selalu bai meh nota tu, lalu bacha nya beberapa kali dalam sehari