Jesebel bisi siku anak indu ke benama Ataliah ti sama jai baka iya. Ataliah jadi enggau raja menua Judah. Lebuh laki iya mati, anak lelaki iya berengkah merintah. Tang lebuh anak lelaki iya mati, Ataliah milih diri empu nyadi pemerintah menua Judah. Udah nya iya nguji deka munuh sapa-sapa ke ulih nyadi raja, nyengkaum bala uchu lelaki iya empu. Semua orang takutka iya.

Imam Besai Jehoyada enggau bini iya, Jehoseba, nemu utai ke digaga Ataliah nya amat jai. Seduai iya berambunka nyawa ngelalaika siku ari uchu Ataliah ke benama Jehoas. Seduai ngemesaika iya ba Rumah Sembiang.

Lebuh Jehoas beumur tujuh taun, Jehoyada ngempuruka bala ketuai enggau orang Lewi lalu madahka sida: ‘Jaga pintu Rumah Sembiang, lalu anang ngasuh sapa-sapa tama.’ Jehoyada lalu ngelantik Jehoas nyadi raja menua Judah sereta ngengkahka makota ba pala iya. Orang Judah manjung: ‘Idup raja!’

Kuin Ataliah ninga munyi panjung lalu beguai ngagai Rumah Sembiang. Lebuh iya meda raja ti baru, iya manjung: “Sida ngelaban! Sida ngelaban!” Bala ketuai ngambi kuin ti jai nya, mai iya pansut ari Rumah Sembiang lalu munuh iya. Tang nama nyadi enggau pengawa jai iya ba menua nya?

Jehoyada nulung bansa Judah ngaga siti sempekat enggau Jehovah, iya nya semaya sida deka nyembah Jehovah aja. Jehoyada ngasuh sida ngeruntuhka kuil Baal lalu mechahka patung. Iya ngasuh bala imam enggau orang Lewi bekereja ba Rumah Sembiang ngambika rayat ulih  nyembah Jehovah ba dia baru. Iya ngasuh bala jejaga nyaga pintu Rumah Sembiang ngambika orang ke enda tuchi enda ulih tama. Udah nya Jehoyada enggau bala ketuai mai Jehoas ngagai istana lalu ngasuh iya duduk ba kerusi diraja. Bansa Judah gaga ati. Sida ulih nyembah Jehovah, bibas ari Ataliah ti jai enggau sembah Baal. Kati nuan ulih meratika baka ni pemerani Jehoyada udah nulung mayuh orang?