Orang Israel ninggalka Gunung Sinai lalu bejalai nengah menua puang Paran ngagai endur ti dikumbai Kades. Dia, Jehovah madahka Moses: ‘Anjung 12 iku lelaki, siku ari tiap raban bansa Israel, kena ngintip menua Kanaan, ti deka diberi Aku ngagai orang Israel.’ Moses lalu milih 12 iku lelaki, ku iya madahka sida: ‘Mupuk kita ngagai menua Kanaan, lalu peratika enti tanah ba menua nya ulih kena betanam. Peda enti orang dia lemi tauka kuat, enti sida diau ba langkau kain tauka ba kuta.’ 12 iku pengintip nya, nyengkaum Josua enggau Kalep mupuk ngagai menua Kanaan.

Pengudah 40 hari, bala pengintip pulai mai buah ara, delima enggau anggur. Ku sida: ‘Menua nya menua ti manah, tang orang ke diau ba menua nya kuat sereta kuta nya bisi dinding ti teguh.’ Kalep lalu bejaku: ‘Kitai ulih ngalahka sida. Aram kitai mupuk diatu!’ Nemu nuan kebuah Kalep madah munyi nya? Laban iya enggau Josua amat arapka Jehovah. Tang sepuluh iku pengintip ke bukai madah: ‘Anang! Orang din amat-amat besai, baka gerasi! Kitai tu baka buntak enti dibandingka enggau sida.’

Orang Israel lemi semengat. Sida berengkah mutap lalu bejaku enggau pangan diri: ‘Aram kitai milih siku tuai ke bukai, lalu pulai baru ngagai menua Ejip. Nama kebuah kitai patut ngagai menua nya lalu  dibunuh?’ Josua enggau Kalep madah: ‘Anang ngelaban Jehovah, lalu anang takut. Jehovah deka nyaga kitai.’ Tang, orang Israel enda ninga. Sida indah berunding deka munuh Josua enggau Kalep!

Nama digaga Jehovah? Iya madah ngagai Moses: ‘Mayuh amat utai ke udah dikereja Aku ke orang Israel, tang sida agi enda ngasika Aku. Nya alai, sida deka diau ba menua puang tu pengelama 40 taun, lalu ditu sida deka mati. Semina anak sida, Josua enggau Kalep deka diau ba menua ke udah disemayaka Aku.’