Sepuluh hari pengudah Jesus pulai ke serega, bala murid iya nerima kuasa kudus. Tu nyadi ba Pentikos 33 M., lebuh orang ari mayuh bengkah endur datai ke Jerusalem ngintu pengerami nya. Bisi kira-kira 120 iku murid Jesus begempuru ba sadau rumah. Enggau ngenyit, utai ti ngalitka ati nyadi. Utai ti baka api ti mit ayan ba atas pala bala murid, lalu sida berengkah bejaku ngena mayuh bansa jaku. Munyi inggar baka ribut ti deras ngemenuhka rumah nya.

Orang ari menua bukai ke datai ngagai Jerusalem ninga munyi nya lalu belanda kia meda utai ti nyadi. Sida alit ati lebuh ninga bala murid bejaku ngena bansa jaku sida. Ku sida: ‘Tang sida orang ari menua Galili. Baka ni sida ulih bejaku ngena bansa jaku kitai empu?’

Peter enggau bala rasul lalu bediri ba mua orang mayuh. Peter madahka baka ni Jesus udah dibunuh lalu Jehovah udah ngangkatka iya idup baru. Ku Peter: ‘Diatu Jesus ba serega mua ari kanan Petara, lalu iya udah nuangka kuasa kudus ke disemayaka  iya. Nya alai, kita udah meda lalu ninga pasal kereja ajih tu.’

Orang mayuh balat tusah ati lebuh ninga jaku Peter, lalu nanya: “Nama utai ke patut digaga kami?” Iya nyaut sida: ‘Nesal ati ke dosa kita, lalu dibaptisa dalam nama Jesus. Kita deka nerima pemeri Petara, iya nya kuasa kudus.’ Ba hari nya, kira-kira 3,000 iku orang dibaptisa. Berengkah ari hari nya, penyampau bala murid majak nambah enggau jampat ba Jerusalem. Enggau tulung ari kuasa kudus, bala rasul ngepunka mayuh agi raban gempuru ngambika sida ulih ngajar bala murid semua utai ke udah dipesan Jesus.