Lebuh Jesus enggau bala rasul iya ba sadau rumah, iya madah ngagai sida: “Malam tu, semua kita deka ninggalka aku magang.” Ku Peter: ‘Ukai aku! Enti sema sida ninggalka nuan, aku enda sekali-kali deka ninggalka nuan!’ Tang Jesus madah ngagai Peter: ‘Sebedau manuk mengkukuk, nuan deka madahka diri enda ngelala aku tiga kali.’

Lebuh bala soldadu mai Jesus ngagai rumah Kaiapas, mayuh ari rasul ngerarika diri. Tang dua iku ari sida nitih orang mayuh. Siku nya Peter. Iya tama ngagai tengah laman rumah Kaiapas lalu bekindu semak api. Ba penampak api nya, siku indu ulun meda mua Peter lalu madah: ‘Aku ngelala nuan! Nuan bisi enggau Jesus!’

Ku Peter: ‘Nadai aku enggau iya! Enda aku nemu utai ku nuan!’ Iya lalu mansang ngagai pintu penama. Tang enda lama udah nya, siku da agi indu ulun meda iya lalu madahka orang mayuh: ‘Orang tu bisi enggau Jesus!’ Peter madah: ‘Aku enda ngelala Jesus!’ Siku lelaki madah: ‘Nuan tentu siku ari sida! Aku nemu ari chara nuan bejaku, nuan ari Galili baka Jesus.’ Tang, Peter besumpah: ‘Aku enda ngelala iya!’

Tekala nya, manuk engkukuk. Peter meda Jesus nguing lalu meda iya. Nya baru Peter ingat utai ti udah disebut Jesus ngagai iya. Peter pansut lalu duie-duie nyabak.

Ba maya nya, Raban Kunsil Orang Judah begempuru ngambika Jesus dipechara ba rumah Kaiapas. Sida udah mutuska deka munuh Jesus, lalu diatu sida ngiga kebuah ngereja nya. Tang sida nadai tetemuka kebuah deka munuh Jesus. Pengujung iya, Kaiapas nanya Jesus enggau terang: ‘Kati nuan Anak Petara?’ Saut Jesus: ‘Au.’ Kaiapas madah: ‘Kitai enda begunaka bukti bukai. Iya bejaku ngelaban Petara!’ Raban Kunsil setuju: ‘Iya patut dibunuh.’ Sida nampar Jesus, ngeludah sereta mampul mata iya, malu iya lalu madah: “Enti nuan amat nabi, padahka ngagai kami sapa ke malu nuan!”

 Ba hari siti, sida mai Jesus ngagai Raban Kunsil Orang Judah lalu nanya iya sekali agi: ‘Kati nuan Anak Petara?’ Saut Jesus: “Kita empu ke ngumbai aku Anak Petara.” Udah nya sida ngumbai iya salah laban bejaku ngelaban Petara lalu mai iya ngagai istana Pontius Pilate, gabenor Rome. Nama nyadi udah nya? Aram kitai meda.