Ba siti malam, Raja Nebukadnesar bisi mimpi ti nyelai. Mimpi nya ngachau runding iya nyentukka iya enda ulih tinduk. Iya ngangauka bala tukang majik lalu ngasuh sida: ‘Terangka reti mimpi ngagai aku.’ Ku sida: ‘Padahka mimpi nuan ngagai kami, Tuan Raja.’ Tang Nebukadnesar madahka sida: ‘Enggai! Kita madahka aku reti mimpi nya, enti enda aku deka munuh kita.’ Sekali agi sida madah ngagai iya: ‘Padah ngagai kami, nama mimpi nuan. Nya baru kami nerangka reti iya.’ Ku iya: ‘Semua kita nguji deka nipu aku. Padahka reti mimpi aku!’ Sida madahka raja: ‘Nadai orang ulih ngereja utai nya. Utai ke dipinta nuan kelalu tusah.’

Nebukadnesar balat ringat nyentukka iya ngasuh semua bala penyanding penemu raja ba menua nya dibunuh. Tu nyengkaum Daniel, Sadrak, Mesak enggau Abednego. Daniel minta raja meri iya awak. Udah nya, iya enggau bala pangan iya besampi ngagai Jehovah minta Iya mantu sida. Nama digaga Jehovah?

Ngena siti genera, Jehovah mandangka mimpi Nebukadnesar ngagai Daniel lalu madah ngagai iya reti mimpi nya. Ba hari siti, Daniel mansang ngagai orang gaji raja lalu ku iya: ‘Anang munuh bala penyanding penemu. Aku ulih nerangka reti mimpi raja.’ Orang gaji nya mai Daniel betemu enggau Nebukadnesar. Daniel madahka raja: ‘Petara udah nunjukka utai ti deka nyadi jemah ila. Tu mimpi nuan: Nuan tepeda siti patung ti besai. Pala iya digaga ari emas, dada enggau lengan iya digaga ari pirak, punggung enggau pun pah iya digaga ari temaga, betis iya digaga ari besi, lalu kaki iya digaga ari besi bechampur enggau tanah liat. Udah nya, siti batu ti diputung ari bukit datai, lalu mangkaka kaki besi ke bechampur enggau tanah liat patung nya. Patung nya  redak lalu nyadi sepur baka debu lalu dikebuka ribut. Batu nya nyadi bukit ti besai lalu ngelamun semua dunya.’

Daniel lalu madah: ‘Tu meh reti mimpi nuan: Perintah nuan nya pala ke digaga ari emas. Pirak nya siti perintah ke deka datai pengudah nuan. Udah nya, bisi siti perintah baka temaga ti deka merintah semua dunya. Perintah pengudah nya, deka kering baka besi. Pengujung iya, bisi siti perintah ke bebagi, sebagi kering baka besi lalu sebagi lemi baka tanah liat. Batu ke datai ari bukit nya, Perintah Petara. Iya deka ngerusak semua perintah tu, lalu meruan belama iya.’

Nebukadnesar nyungkurka diri ba tanah ba mua Daniel. Ku iya: ‘Petara nuan udah madahka reti mimpi tu ngagai nuan. Nadai Petara bukai baka Iya.’ Ari ke munuh Daniel, Nebukadnesar milih iya nyadi tuai semua bala penyanding penemu sereta nyadi tuai ba menua Babilon. Ulih nuan meda baka ni Jehovah nyaut sampi Daniel?