Pikirka penusah ati kitai maya kaban belayan tauka orang ke begulai rapat enggau kitai, dibuai ari gerempung ketegal enggai nesal ati pengudah ngereja penyalah. Chara kitai nitihka atur ari Bup Kudus ulih nunjukka pengerindu kitai ngagai Jehovah sereta penaluk kitai ngagai atur Iya. * Peratika sekeda tanya pasal pekara tu.

Baka ni kitai nyaga kaul enggau orang ke dibuai ari gerempung? Bup Kudus “enda nyagi kita begulai enggau orang ke ngaku diri orang Kristian, tang ngereja ulah ti kamah, tauka amu, tauka nyembah engkeramba, tauka bejai orang, tauka pemabuk, tauka penchuri. Indah makai enggau orang ke baka nya, deh kita enda tau.” (1 Korint 5:11) Pasal orang ke “enda bepegai ba ajar Kristus,” kitai macha: “Anang ngelaluka sida. Meri tabi basa ngagai sida pen enda meh tau, laban enti kita nabi sida, reti nya kita bekunsi enggau sida ngereja pengawa sida ti jai.” (2 John 9-11) Kitai nadai kaul ba pengarap tauka enda begulai enggau sida ke udah dibuai ari gerempung. The Watchtower 15 September 1981, lambar 25, madah: “Semina nyebut ‘Nama berita?’ ngagai orang nya ulih ngepunka randau, lalu engka deka begulai enggau iya. Deka kitai ngereja tu ngagai orang ke dibuai ari gerempung?”

Kati kitai patut mutuska terus kaul kitai enggau orang nya? Ya, bepanggai ba sekeda kebuah. Kesatu, laban kitai nunjukka diri tetap ati ngagai Petara enggau Bup Kudus. Kitai ngasika Jehovah ukai semina maya senang, tang mega maya tusah. Pengerindu ngagai Jehovah meransang kitai ngasika pesan Iya. Kitai mega nemu Iya bisi pengelurus  enggau pengerindu sereta ukum Iya pulaika pemanah kitai. (Isaiah 48:17; 1 John 5:3) Kedua, ngenyauhka diri ari orang ke enggai nesal ati nyaga kitai enggau bala menyadi Kristian ke bukai, ngambika pengarap enggau ulah kitai enda dirusak sereta nyaga nama gerempung Jehovah. (1 Korint 5:6, 7) Ketiga, mengkang bepegai ba ajar Bup Kudus ulih meri penguntung ngagai orang ke udah dibuai ari gerempung. Enggau nyukung pemutus ari gerempung Jehovah, kitai engka ulih ngasuh orang ke ngereja penyalah nya pulai baru. Ketegal iya enda ulih begulai enggau orang ti dikesayau iya, iya engka “sedarka” penyalah diri, lalu deka pulai baru ngagai Jehovah.—Luke 15:17.

Baka ni enti kaban belayan kitai dibuai ari gerempung? Ba pekara tu, kaul enggau diri sebilik ulih nyadi penguji ti besai. Kitai engka tusah ngasika atur tu. Baka ni chara kitai nyaga kaul enggau kaban belayan ke dibuai ari gerempung? Bup tu nadai madahka enggau silik pasal pekara tu, tang aram kitai beratika dua chunto ditu.

Kekadang, orang ke dibuai ari gerempung agi sebilik enggau kitai. Taja pan iya udah dibuai ari gerempung, iya agi ulih ngaga pengawa ninting hari enggau kitai. Tang, iya nadai kaul ba pengarap enggau kitai. Nya alai, kitai enda ulih berandau pasal pengarap enggau iya. Chunto, kitai enda mai iya maya belajarka Bup Kudus enggau diri sebilik. Taja pia, enti orang ke dibuai ari gerempung nya agi biak sereta dijaga apai indai, apai indai agi betanggungjawap ngajar iya. Nya alai, apai indai ulih belajar Bup Kudus enggau iya. *—Jaku Dalam 6:20-22; 29:17.

Bisi mega kaban belayan ke dibuai ari gerempung, enda sebilik enggau kitai. Ba pekara tu, kitai patut nyekat kaul enggau iya. Kitai semina bejaku enggau iya maya bisi kebuah  ti berat aja. Enti kitai ngasika atur Jehovah, kitai enda patut ngiga kebuah deka berandau enggau kaban belayan ke dibuai ari gerempung. Pia mega, taluk ngagai Jehovah enggau gerempung Iya meransang kitai bepegai teguh ba atur Bup Kudus pasal orang ke dibuai ari gerempung. Penaluk kitai pulaika pemanah orang ke ngereja penyalah, lalu nulung iya bulih penguntung ari disiplin ke diberi ngagai iya. *—Hebrew 12:11.