1, 2. Nama pemeri ari Petara ti berega kemaya hari tu, lalu nama kebuah?

 APAI kitai ti di serega udah meri kitai utai ti amat berega, iya nya idup nyadi mensia ke ngembuan pengelandik sereta ulih neladan kualiti Iya. (Pemungkal 1:27) Kitai beterima kasih ke pemeri tu laban iya ulih nulung kitai berunding nitihka ajar Bup Kudus. Enggau tu, nuan ulih nyadi orang ke kering ba pengarap, rinduka Jehovah, lalu “udah matihka diri ngelala bida entara utai ti badas enggau utai ti jai.”—Hebrew 5:14.

² Ulih nitihka ajar Bup Kudus endang beguna kemaya hari tu, laban dunya kitai majak tusah diatur nyentuk ke ukum enda ulih mungkur tiap iti pekara ti engka deka nyadi ba pengidup. Tu ulih dipeda kitai ba ubat sereta chara berubat ti ngena darah. Nya alai, enti deka ngasika Jehovah, kitai patut nemu berunding nitihka ajar Bup Kudus pasal pekara tu. Enti kitai meretika ajar Bup Kudus, kitai ulih ngaga pemutus ti ulih ngemuaska ati sereta meruan dalam pengerindu Petara. (Jaku Dalam 2:6-11) Peratika sekeda ajar Bup Kudus tu.

3, 4. Ni maya Bup Kudus keterubah iya nunjukka darah nya tuchi, lalu tu nitihka ajar Bup Kudus siti ni?

³ Jehovah keterubah iya nunjukka kaul entara nyawa  enggau darah, pengudah Kain munuh Abel. Jehovah nunjukka nyawa enggau darah nya tuchi. Petara bejaku enggau Kain: “Darah menyadi nuan nyabak ngangauka Aku ari tanah.” (Pemungkal 4:10) Ba mata Jehovah, darah Abel ngambarka nyawa iya, ke udah dibunuh. Darah Abel ngangau minta balas ari Petara.—Hebrew 12:24.

⁴ Pengudah Bah maya jeman Noah, Petara ngemendarka mensia makai dagin jelu, tang enda ngasuh sida makai darah. Ku Petara: “Kita enda tau makai dagin ti agi bedarah, laban darah ngundan seput. Aku deka meri ukum bunuh ngagai sebarang sapa munuh orang.” (Pemungkal 9:4, 5) Pesan tu diberi ngagai semua peturun Noah enggau semua kitai nyentuk ke diatu. Pesan tu neguhka utai ti dipadah Petara ngagai Kain, iya nya darah ngambarka nyawa semua utai idup. Pesan tu mega nunjukka Jehovah deka ngukum semua mensia ke enda bebasaka nyawa enggau darah.—Masmur 36:9.

5, 6. Baka ni Adat Moses nunjukka darah nya tuchi enggau berega? (Peda mega kutak “ Bebasaka Nyawa Jelu.”)

⁵ Adat Moses mega nunjukka nyawa enggau darah nya tuchi. Adat Lewi 17:10, 11 madahka: “Enti orang . . . makai dagin ti agi bedarah, TUHAN deka ngelaban sida, lalu Iya deka badu agi ngumbai sida nembiak Iya. Seput semua utai ti idup endang dalam darah. Nya kebuah TUHAN udah bejaku ngasuh semua darah dituang magang ba alta, kena muai dosa orang mayuh. Darah, iya nya nyawa, muai dosa.” a—Peda kutak “ Darah Ulih Ngampunka Dosa.”

⁶ Enti darah jelu ke udah dibunuh enda dikena ba alta, darah nya patut dituang ke tanah. Reti iya, nyawa  pulai baru ngagai Pun pengidup. (Ulang Adat 12:16; Esekiel 18:4) Tang, orang Israel enda ibuh muai semua darah ari dagin jelu. Asal jelu nya udah dibunuh sereta darah iya pansut manah, orang Israel ulih makai iya enggau ati ti beresi, laban tu nunjukka sida bebasaka Pemeri Nyawa.

7. Baka ni David ngayanka diri bebasaka darah?

 ⁷ David, “orang ke ngerinduka ati [Petara]” meretika ukum Petara pasal darah. (Kereja Rasul 13:22) Bisi sekali lebuh iya balat aus, tiga iku soldadu iya bejalai ngerenchah kem munsuh, nyauk ai ari telaga, lalu mai ai nya ngagai iya. Nama digaga David? Ku iya: “Aku baka ke ngirup darah orang ke udah berambunka nyawa nyauk ai nya!” Ba mata David, ai nya disempama baka nyawa enggau darah soldadu iya. Taja pan aus, iya “nyiuhka ai nya” ngagai Jehovah.—2 Samuel 23:15-17.

8, 9. Kati runding Petara pasal nyawa enggau darah berubah pengudah gerempung Kristian didirika? Terangka.

⁸ Kira-kira 2,400 taun pengudah Jehovah meri pesan pasal darah tauka kira-kira 1,500 taun pengudah Adat Moses digaga, Iya ngasuh bala tuai gempuru Kristian ti keterubah nulis: ‘Dalam runding roh kudus enggau dalam runding kami, kami enda patut nating kita enggau utai bukai, kelimpah ari atur tu, iya nya: anang makai pemakai ti udah diberi ngagai engkeramba, anang makai darah, anang makai jelu ti mati dichekal, anang ngereja ulah ti kamah.’—Kereja Rasul 15:28, 29.

⁹ Nyadi, bala tuai Kristian ti keterubah nemu darah nya tuchi, lalu ngena darah enggau chara ti salah nya sebaka enggau penyalah besai ke nyembah engkeramba tauka ngereja ulah ti kamah. Orang Kristian ti bendar setuju enggau pekara tu. Pia mega, laban runding sida sejalai enggau ajar Bup Kudus, sida ulih ngelantangka ati Jehovah maya ngaga pemutus pasal darah.

10, 11. (a) Nama penemu Saksi-Saksi Jehovah pasal nerima darah enggau empat bengkah bansa darah? (b) Ni maya orang Kristian tau enda sepenemu pasal darah?

¹⁰ Saksi-Saksi Jehovah nemu, “anang makai darah”  reti iya enda nerima darah, meri darah tauka nyimpan darah diri ngambika dikena maya begunaka iya. Ketegal bebasaka ukum Petara, sida mega enda nerima empat bengkah bansa darah: sel darah mirah, sel darah burak, platelet enggau plasma.

¹¹ Kemaya hari tu, empat bengkah bansa darah tu ulih dibagi ngagai begian darah ke mit agi, ti ulih dikena enggau mayuh chara. Kati orang Kristian ulih ngena begian darah ke mit agi nya? Kati sida ngumbai iya “darah”? Kitai patut mutuska pekara tu kediri empu. Tu nyengkaum chara berubat baka nuchi buah pinggang, nganchurka darah (hemodilution), enggau nyelamatka darah (cell salvage) diri empu, asal darah nya enda pansut tauka disimpan.—Peda Penerang, “Begian Darah ke Mit Agi Enggau Chara Beputung.”

12. Baka ni kitai patut meda sereta mutarka pekara ti bekaul enggau ati?

 ¹² Kati Jehovah ibuhka pemutus ti digaga kitai? Ya, laban Iya rindu ati deka nemu runding enggau tuju ati kitai. (Bacha Jaku Dalam 17:3; 24:12.) Pengudah besampi minta iring ari Jehovah enggau mansik bansa ubat tauka chara berubat ti deka diguna, kitai patut nitihka ati ti udah dilatih ngena Bup Kudus. (Rome 14:2, 22, 23) Endang amat, orang bukai enda patut ngansak kitai nitihka runding sida. Kitai mega enda patut nanya, “Nama deka digaga nuan enti bisi penusah ke sebaka enggau aku?” Ba pekara tu, genap iku orang Kristian patut “mai ma diri empu.”—Galatia 6:5; Rome 14:12; peda kutak “ Kati Aku Ngumbai Darah Nya Tuchi?”

13. Nama diayanka ukum enggau ajar Jehovah pasal Iya? Terangka.

¹³ Ukum enggau ajar ba Bup Kudus ngayanka Jehovah nya, Pengaga Ukum sereta Apai ti balat ibuhka nembiak Iya. (Masmur 19:7-11) Taja pan pesan “enda tau makai darah” ukai chara nyaga pengerai, tang iya amat ngelindung kitai ari penusah ke nyadi pengudah nerima darah. (Kereja Rasul 15:20) Iya ke amat, mayuh orang ke landik ba pengawa berubat ngumbai chara beputung ke enda ngena darah, nya chara ti pemadu manah kemaya hari tu. Tu nunjukka ngagai orang Kristian ti bendar, Jehovah ngembuan pengerindu enggau penemu ti pemadu dalam.—Bacha Isaiah 55:9; John 14:21, 23.

14, 15. (a) Pengerindu Petara ngagai nembiak Iya diayanka ba ukum ni? (b) Baka ni nuan nitihka ajar tu ngambika nyaga pengelikun?

¹⁴ Pengibuh Petara ke nembiak Iya maya jeman Israel menya ulih dipeda ari ukum Iya. Chunto, Iya deka orang Israel ngaga reraga ba tisi perabung rumah sida,  kena nyeliahka penusah ari nyadi maya ngereja pengawa ba perabung. (Ulang Adat 22:8; 1 Samuel 9:25, 26; Nehemiah 8:16; Kereja Rasul 10:9) Petara mega ngasuh ngurung sapi ke mangah. (Pemansut 21:28, 29) Enda nitihka pesan tu nunjukka diri enda bebasaka nyawa orang bukai, lalu ngujungka diri berutang darah.

¹⁵ Baka ni nuan ulih nitihka ajar ari ukum nya? Uji pikirka pasal rengka pengangkut nuan, chara nuan deriba, jelu tupi nuan, rumah enggau endur nuan bekereja sereta pemerindang ke dipilih nuan? Ba sekeda menua, mayuh orang ke biak bebadi laban sida enda nyeliahka utai ti tau ngemedis. Tang, orang biak ke deka meruan dalam pengerindu Petara bebasaka nyawa, lalu enda berantuka nyawa enggau ngereja pengawa ti tau ngemedis. Sida enda ngumbai diri enda nemu pedis. Tang sida nyaga diri enggau manah, lalu nyeliahka pengawa ti tau ngemedis.—Pengajar 11:9, 10.

16. Nama ajar Bup Kudus ke bekaul enggau bebuai anak? (Peda mega nota ba baruh lambar.)

¹⁶ Indah nyawa anak ke bedau ada pan berega ba mata Petara. Lebuh jeman Israel menya, enti orang ngemediska indu ke ngandung, lalu sekalika indu nya tauka anak dalam kandung iya mati, Petara ngumbai orang ke salah nya pemunuh, lalu pemunuh nya patut kena ukum “nyawa balas nyawa.” b (Bacha Pemansut 21:22, 23, NW.) Pikirka asai ati Jehovah maya Iya meda mayuh anak mit dibuai ari kandung ninting taun, ketegal orang berundingka diri empu tauka beberatka ati sida ti kamah.

17. Baka ni nuan ulih ngelantangka ati orang ke kala bebuai anak, sebedau iya nemu pemendar ari Bup Kudus?

¹⁷ Baka ni enti indu kala bebuai anak, sebedau iya  nemu pemendar ari Bup Kudus? Ulih Petara ngampunka iya? Ulih! Jehovah ulih ngampunka iya ngena rega tebus Jesus, enti iya amat nesal ati. (Masmur 103:8-14; Epesus 1:7) Indah Jesus empu madah: “Aku datai, ukai deka  ngangauka orang ke lurus, tang ngangauka orang ke bedosa ngasuh sida nesal ati.”—Luke 5:32.

18. Nitihka Bup Kudus, nama ngasuh orang berutang darah?

¹⁸ Enda ngemediska orang bukai aja enda chukup. Jehovah deka kitai muai utai ti ngasuh kitai berutang darah, iya nya pemenchi. “Semua orang ke begedika pangan diri endang pemunuh,” tulis rasul Paul. (1 John 3:15) Orang nya ukai semina enggai meda menyadi ke sama pengarap, tang ngarapka iya mati. Pemenchi iya engka diayanka ngena pemula tauka jaku petenah, ti ulih ngasuh iya kena ukum ari Petara. (Adat Lewi 19:16; Ulang Adat 19:18-21; Matthew 5:22) Nya alai, buai meh semua penyai ke bisi ba ati kitai!—James 1:14, 15; 4:1-3.

19. Baka ni orang ke nitihka ajar Bup Kudus meda ayat ba Masmur 11:5 enggau Pilipi 4:8, 9?

¹⁹ Orang ke bebasaka nyawa baka Jehovah sereta deka meruan dalam pengerindu Iya, mega nyeliahka semua pemangah enggau pengawa ti kasar. Masmur 11:5 madahka, Jehovah “begedika orang ke mangah.” Ayat tu ukai semina madah pasal kualiti Petara; tang madah pasal ajar ti ulih ngiring ba pengidup. Tu nulung sida ke rinduka Petara nyeliahka sebarang pemerindang ti meransang pemangah enggau pengawa ti kasar. Pia mega, ketegal Jehovah nya ‘Petara ti meri pemaik,’ tu ngasuh nembiak Iya ngisi runding enggau ati sida ngena utai ti badas, menyana enggau tau dipuji, ke ulih meri pemaik.—Bacha Pilipi 4:8, 9.

20-22. Nama penemu orang Kristian pasal dunya tu, lalu nama kebuah?

²⁰ Ba mata Petara, dunya Sitan tu berutang darah. Bup  Kudus ngumbai politik ba dunya tu baka jelu mangah ti udah munuh mayuh orang, nyengkaum nembiak Jehovah. (Daniel 8:3, 4, 20-22; Pemandang 13:1, 2, 7, 8) Pengawa dagang enggau penemu sains begempung enggau gerempung politik, ngasilka senyata ti ngenataika mayuh duit. Endang amat, “semua dunya di baruh kuasa Sitan”!—1 John 5:19.

²¹ Laban bala murid Jesus nya “ukai enggi dunya,” lalu mengkang enda enggau bepolitik sereta perang, sida nyeliahka utang darah ba diri empu enggau ba bala mayuh. c (John 15:19; 17:16) Sida nitihka teladan Jesus, iya nya enda ngelaban orang ke merinsaka sida. Tang, ngayanka pengerindu ngagai munsuh sida sereta besampika sida.—Matthew 5:44; Rome 12:17-21.

²² Kelebih agi, orang Kristian ti bendar nyeliahka kaul enggau ‘Babilon ti Besai,’ gerempung semua pengarap  pelesu ba dunya. Tu gerempung ke pemadu mayuh berutang darah. Jaku Petara madah: “Darah sida nabi, darah nembiak Tuhan, enggau darah semua orang ke udah dibunuh di dunya, ditemu magang dalam nengeri nya.” Nya alai, kitai ditangkan: “Pansut ari iya, kita ke nembiak Aku.”—Pemandang 17:6; 18:2, 4, 24.

23. Nama reti pansut ari Babilon ti Besai?

²³ Ninggalka Babilon ti Besai ukai semina pansut ari iya. Tu mega nyengkaum begedika pengawa jai ti diterima tauka dikemendarka pengarap pelesu, baka ngereja ulah ti kamah, enggau bepolitik sereta amuka pengaya. (Bacha Masmur 97:10; Pemandang 18:7, 9, 11-17) Pengawa tu suah ngujungka utang darah!

24, 25. a) Baka ni Petara nunjukka penyiru Iya ngagai orang ke berutang darah ti udah nesal ati? (b) Tu ngingatka kitai pasal atur nama maya jeman Bub Kudus?

²⁴ Sebedau megai pengarap ti bendar, genap iku kitai engka bisi nyukung dunya Sitan sereta enggau berutang darah. Taja pia, laban kitai udah ngubah ulah kitai, manggaika pengarap ba tebus Jesus, lalu nyerahka diri ngagai Petara, kitai bulih pengampun enggau jaga ari Petara. (Kereja Rasul 3:19) Jaga tu ngingatka kitai pasal nengeri alai ngerarika diri maya jeman Bub Kudus.—Penyampau 35:11-15; Ulang Adat 21:1-9.

²⁵ Baka ni atur tu dipejalaika? Enti orang Israel tekelanjur munuh orang, iya ulih rari ngagai nengeri alai ngerarika diri. Pengudah hakim mutuska pekara nya, orang ke tekelanjur munuh orang patut diau ba nengeri nya, nyentuk ke imam besai mati. Udah timpuh nya, iya tau diau ba sebarang endur ti dikedeka iya. Naka meh pemanah atur ti ngayanka penyiru Petara sereta nunjukka nyawa mensia berega ba mata Iya! Kemaya hari tu, nengeri alai ngerarika diri sebaka enggau atur ari Petara ke nyediaka  tebus Jesus, kena nyaga kitai maya ke enda sengaja ngelanggar pesan Petara pasal nyawa enggau darah. Kati nuan beterima kasih ke atur tu? Baka ni nuan ngayanka diri beterima kasih? Siti chara nya enggau mai orang bukai nerima atur ke udah disediaka Petara tu, laban “penusah ti besai” nyau semak.—Matthew 24:21; 2 Korint 6:1, 2.

26-28. Baka ni utai ti nyadi ba kitai kemaya hari tu sebaka enggau iya ke nyadi ba jeman nabi Esekiel, lalu baka ni kitai ulih meruan dalam pengerindu Petara?

²⁶ Utai ti nyadi ba nembiak Petara kemaya hari tu, ngingatka kitai pasal nabi Esekiel ke diasuh Jehovah nyaga pengarap orang Israel. “Nuan enda tau enda madahka ngagai sida jaku tangkan ti diberi Aku ngagai nuan,” ku Petara. Enti Esekiel enda ngereja utai ti diasuh, iya deka betanggungjawapka pemati orang Israel. (Esekiel 33:7-9) Tang Esekiel ngasi, lalu enda berutang darah.

²⁷ Kitai nemu dunya Sitan udah ba pengujung iya. Nya alai, Saksi-Saksi Jehovah ngumbai tanggungjawap madahka hari Petara deka bebalas nya bekaul enggau Berita Manah pasal Perintah Petara. (Isaiah 61:2; Matthew 24:14) Kati nuan bisi bebendar enggau pengawa tu? Rasul Paul beberatka pengawa nginjil. Nya alai, iya ulih madah: ‘Aku enda betanggungjawapka nyawa kita, laban aku nadai kala enggai madah ngagai kita semua juluk ati Petara.’ (Kereja Rasul 20:26, 27) Tu chunto ti patut dititihka kitai!

²⁸ Enti kitai deka meruan dalam pengerindu Petara, kitai ukai semina bebasaka nyawa enggau darah aja. Kitai mega patut mengkang tuchi tauka kudus ba mata Petara, baka ke deka dipelajarka kitai ba Pelajar 8.