Kira-kira 17 taun kenyau ari maya Jesus betanyaka utai ngagai bala pengajar Adat ba Rumah Sembiang, diatu udah datai ba musin bungai taun 29 M. Maya nya mayuh orang benung bejaku pasal petunggal Jesus, iya nya John. John nginjil ba semua endur ke semak Sungai Jordan.

Jaku enggau gari ke dikena John amat narit ati orang. Gari iya digaga ari bulu unta, lalu belulang iya digaga ari kulit jelu. Iya makai buntak enggau ai manyi. Nama pesan iya? Ku iya: “Kita patut nesal ati laban Perintah serega nyau semak.”—Matthew 3:2.

Mayuh orang ari “Jerusalem, ari serata Judea enggau semua endur ke semak Sungai Jordan,” datai deka ningaka pesan ari John. (Matthew 3:5) Ketegal pesan iya, mayuh orang sedar sida patut nesal ati. Reti iya, sida patut ngubah ulah sereta nulak chara pengidup sida ti enda dikerinduka Petara. Mayuh ari sida ke ningaka John amat nesal ati. Pengudah nya, iya maptisa sida ba Sungai Jordan. Nama kebuah iya ngereja nya?

Pengawa John ke maptisa orang digaga kena nunjukka orang nya nesal ati ketegal udah ngelanggar Sempekat Adat Petara. (Surat Kereja Rasul 19:4) Tang ukai semua orang layak dibaptisa. Ambika chunto, bisi sekeda tuai pengarap datai ngagai John. Sida nya orang Parisi enggau orang Saduki, tang John ngangauka sida “anak ular ti bisa.” Ku iya: “Ayanka ulah ke nunjukka kita amat nesal ati. Anang ngumbaka diri madah: ‘Abraham nya apai kami.’ Laban Petara ulih meri Abraham peturun ari batu tu. Kapak udah diengkah ba urat kayu. Tiap iti kayu ke enda mansutka buah ti manah deka ditebang lalu dibuai ngagai api.”—Matthew 3:7-10.

Ketegal John mai pesan ti amat berat, nya alai mayuh orang beratika iya. John mega udah maptisa mayuh orang. Nyadi bala imam enggau bala orang Lewi datai ngagai iya lalu nanya iya: “Sapa nuan?”

John nyaut: “Aku ukai Kristus.”

Sida lalu nanya iya agi: “Enti pia, sapa nuan? Kati nuan tu Elijah?”

Iya nyaut: “Ukai.”

Sida lalu nanya iya agi: “Kati nuan tu Nabi ke udah disemayaka nya?” Lebuh sida nanya tanya tu, sida berunding pasal utai ke kala dipadah Moses bekaul enggau nabi ti deka datai.—Ulang Adat 18:15, 18.

John nyaut: “Ukai!”

Sida majak nanya iya: “Sapa nuan deh? Padahka ngagai kami ngambika kami ulih meri saut ngagai orang ke nganjung kami. Terangka ngagai kami sapa nuan.” Ku John nyaut sida: “Aku tu meh orang ke ngangau enggau nyawa ti inggar ba menua puang, ‘Gaga jalai Jehovah rurus,’ baka ke udah dipadah Nabi Isaiah.”—John 1:19-23.

Sida nanya iya: “Nuan ukai Kristus, Elijah, tauka Nabi ti disemaya nya. Nyadi nama kebuah nuan maptisa orang?” John nyaut sida: “Aku maptisa ngena ai. Tang iya ke enda dikelala kita bediri ba entara kita. Iya datai pengudah aku.”—John 1:25-27.

John madahka iya nyediaka jalai ngambika orang ulih nerima Messiah ti disemaya ke deka nyadi raja. Bekaul enggau Messiah, John madahka: “Iya ke datai dudi ari aku, bekuasa agi ari aku. Indah muka kasut iya deh, aku enda layak.” (Matthew 3:11) John indah madahka: “Orang ke datai pengudah aku udah dulu ari aku. Laban iya udah bisi sebedau aku.”—John 1:15.

 Nyadi, pesan John ke madahka: “Kita patut nesal ati laban Perintah serega nyau semak,” endang ngena. (Matthew 3:2) Pesan John nunjukka, pengawa nginjil Jesus Kristus, iya nya Raja ti udah dipilih Jehovah, deka berengkah enda lama da agi.