Pengudah Jesus ditangkap ba Taman Getsemani, bala rasul rari ninggalka iya laban sida takut. Taja pia, Peter enggau “siku da agi murid,” iya nya rasul John nikal baru. (John 18:15; 19:35; 21:24) Seduai iya engka bisi meda Jesus dibai ngagai rumah Anas. Lebuh Anas nganjung Jesus ngagai Imam Besai Kaiapas, Peter seduai John nitih ari jauh. Seduai iya engka berasai takut enggaika dibunuh. Tang seduai iya mega irau enggau utai ke deka nyadi ngagai Tuan sida, Jesus.

Imam besai ngelala John, nya alai iya ulih tama ngagai laman rumah Kaiapas. Tang Peter bediri ba luar pintu penama, nyadi John pansut bejaku enggau ulun indu ke nyaga pintu. Udah nya, baru Peter dibai tama.

Ketegal malam nya chelap, nya alai sida ba laman rumah nya ngidupka api ngena arang. Peter duduk enggau sida ba dia ngambika iya enda chelap. Pia mega, iya “deka meda nama utai ke nyadi” pengudah Jesus dipechara. (Matthew 26:58) Maya nya, ulun indu ke nyaga pintu ulih meda mua Peter enggau terang agi ketegal bisi penampak ari api nya. Ku ulun indu nya madah: “Ukai enda nuan mega siku ari murid lelaki nya?” (John 18:17) Lalu bisi mega orang bukai ngelala Peter, sereta madahka utai ti sama enggau ulun indu nya.—Matthew 26:69, 71-73; Mark 14:70.

Tu ngasuh Peter berasai takut lalu deka mupuk ari endur nya. Ketegal nya, Peter enda ngaku diri kala enggau Jesus, nyentukka iya madah: “Nadai aku ngelala iya. Nadai aku nemu utai ku nuan.” (Mark 14:67, 68) Iya mega sanggup “besumpah.” Reti iya, enti utai ku Peter nya enda amat, iya empu ke deka kena tulah.—Matthew 26:74.

Ba maya ti sama, Jesus agi dipechara. Pengawa pechara nya engka dipejalaika dalam siti bilik ba tingkat atas rumah Kaiapas. Ari baruh, Peter sereta sida ke bukai ulih meda bala saksi ke datai meri penerang dalam pechara nya.

Chara Peter bejaku nunjukka iya datai ari Galili. Nya alai, orang nemu iya bula. Nambahka nya, bisi siku kaban belayan Malkus ba dia. Sebedau tu, Peter netak pending Malkus ba Taman Getsemani. Nyadi, orang nya madah: “Ukai enda nuan ke dipeda aku enggau iya ba taman nya?” Lebuh Peter udah tiga kali nyangkal utai nya, siku manuk engkukuk. Nya alai, semua utai nyadi baka ke udah dipadahka Jesus.—John 13:38; 18:26, 27.

Maya nya, Jesus engka benung bediri ba beranda tingkat atas rumah Kaiapas. Iya benung meda utai ke nyadi ba laman rumah nya. Tuan Jesus malik lalu nguing ngagai Peter. Nya tentu balat ngenusahka ati Peter. Iya engka teingatka utai ke dipadahka Jesus beberapa jam sebedau utai tu nyadi maya sida nyambut Pengerami Paska. Gambarka meh penusah ati Peter lebuh iya sedar utai ke udah digaga iya! Nya alai, Peter pansut lalu duie-duie nyabak.—Luke 22:61, 62.

Baka ni utai tu tau nyadi? Baka ni Peter ke amat yakin enggau pengarap, sereta penetap ati iya sanggup nyangkal Tuan iya? Maya nya, jaku Jesus udah diputarbelitka, lalu iya udah dituduh nyadi siku penjenayah. Iya ke amat, Peter bisi peluang ngetanka Jesus laban iya nadai ngereja penyalah. Taja pia, Peter udah melakangka Jesus ke bisi jaku ke meri pengidup ti meruan belama iya.—John 6:68.

Pengalaman Peter nunjukka sesiku orang ti ngembuan pengarap sereta setia ngagai Petara, ulih alah laban penguji enti iya enda besedia napi penguji nya. Utai ke nyadi ba Peter tentu nyadi siti amaran ngagai semua nembiak Petara!