Jesus baru aja ngajar bala rasul iya pasal pemaruh ati lebuh iya masu kaki sida. Pengudah sida ngintu Pengerami Paska, iya madah baru jaku benabi ke kala disebut David: “Pangan rapat aku, iya ke pemadu dikarapka aku, ke saum empa saum suap enggau aku, deh udah nguing ngelaban aku.” Lalu iya nerangka: “Siku ari kita deka nyerahka aku ngagai munsuh.”—Masmur 41:9; John 13:18, 21.

Bala rasul merening ngagai pangan diri, lalu tiap iku sida nanya: “Ukai aku ku nuan nya, Tuan?” Indah Judas Iskariot pan nanya. Peter lalu minta John ke duduk ba sepiak Jesus ngiga sapa orang ke disebut Jesus nya. Nya alai, John nanya ngagai Jesus: “Tuan, sapa orang nya?”—Matthew 26:22; John 13:25.

Jesus nyaut: “Orang ke diberi aku roti ke disepuh aku dalam mangkuk, iya meh orang nya.” Jesus nyepuhka roti dalam mangkuk lalu nyuaka roti nya ngagai Judas, ku iya: “Anak Mensia endang deka mati munyi ti udah ditulis, tang tulah meh orang ke deka nyerahka Anak Mensia ngagai munsuh! Manah agi enti orang nya enda ada.” (John 13:26; Matthew 26:24) Maya nya, Sitan nyungkak ati Judas. Nya alai, iya terus nitihka peneka Sitan. Ketegal nya, “semina iya aja ke deka dipunaska.”—John 6:64, 70; 12:4; 17:12.

Jesus madahka Judas: “Jampat kereja utai ke deka dikereja nuan.” Ketegal Judas nyaga kutak duit, nya alai bala rasul ke bukai ngumbai Jesus ngasuh iya “meli barang ke dikena sida maya pengerami nya tauka meri sedekah ngagai orang ke seranta.” (John 13:27-30) Tang kebendar iya, Judas mupuk laban deka nyerahka Jesus.

Ba malam ti sama enggau Pengerami Paska, Jesus ngepunka makai malam ti baru. Iya  ngambi roti, besampi meri terima kasih, mechahka roti nya lalu nyuaka roti nya ngagai bala rasul. Ku iya: “Roti tu ngambarka tubuh aku, ke deka diserahka ke kita. Terus meh ngereja tu kena ngingatka aku.” (Luke 22:19) Nyadi, bala rasul nyadung roti lalu sida pan berengkah makai.

Udah nya, Jesus ngambi mangkuk wain, besampi meri terima kasih, lalu nyuaka mangkuk nya ngagai sida. Pengudah tiap iku sida ngirup ari mangkuk nya, Jesus madah: “Mangkuk tu ngambarka sempekat baru ke ditanggam ngena darah aku, ti deka dituang ke kita.”—Luke 22:20.

Nya alai, Jesus ngasuh bala murid iya ngingatka pemati iya ninting taun kena 14 Nisan. Tu deka nulung sida ngingatka utai ke udah digaga Jesus enggau Apai iya, ngambika ulih ngelepaska semua orang ke arap ari dosa enggau pemati. Pengawa Ngingatka Pemati Jesus besai agi reti ari Pengerami Paska ke diintu orang Judah. Tu ketegal, pemati Jesus deka meri pengelepas ti belama iya ngagai semua orang ke arap.

Jesus madah darah iya “deka dituang kena ngampunka dosa orang mayuh.” Bala rasul Jesus enggau orang bukai ke tetap ati baka sida deka nerima pengampun dosa. Lalu sida deka enggau iya ba Perintah Apai iya.—Matthew 26:28, 29.