Maya Hari Sabat, Jesus agi ba Jerusalem. Lebuh iya enggau bala murid iya benung bejalai, sida meda siku lelaki ke minta sedekah ke buta kenyau ari ada. Bala murid Jesus nanya iya: “Rabbi, sapa ke bedosa nyentukka lelaki tu diadaka buta? Iya tauka apai indai iya?”—John 9:2.

Bala murid Jesus engka berunding kati sesiku orang ulih bedosa lebuh iya agi dalam kandung indai iya. Jesus nyaut sida: “Lelaki tu buta ukai ketegal dosa iya empu tauka dosa apai indai iya. Utai tu nyadi ngambika orang ulih meda utai ke ulih digaga Petara.” (John 9:3) Nya alai, lelaki nya buta ketegal dosa ari Adam, ukai ketegal iya empu tauka apai indai iya bedosa. Semua mensia enda sempurna, nyadi engka bisi sekeda orang bisi penimpang lebuh sida diadaka. Tang orang ke buta nya meri Jesus peluang nunjukka utai ke ulih digaga Petara. Laban Jesus deka ngeraika orang ke buta nya, baka iya ke udah ngeraika orang bukai ke napi bemacham bansa penyakit.

Ku Jesus madah: “Lebuh hari agi siang, kitai patut ngereja pengawa ke diberi Iya ke ngirumka aku. Laban lebuh hari nyau malam, nadai orang ulih gawa. Seagi-agi aku ba dunya tu, aku meh penampak dunya.” (John 9:4, 5) Nama kebuah Jesus madahka pengawa ke diberi Petara ngagai iya patut dikereja enggau jampat? Tu ketegal enda lama da agi, Jesus deka mati lalu maya nya iya enda ulih ngereja pengawa iya. Tang lebuh Jesus agi idup, iya meh ke nyadi penampak dunya.

Tang kati Jesus deka ngeraika orang nya? Enti pia, baka ni iya deka ngereja nya? Jesus ngeludah ngagai tanah lalu nyampurka tanah nya enggau liur iya. Udah nya, iya ngunsutka tanah ba mata lelaki nya lalu madahka: “Alai, basu mata nuan ba kulam Siloam.” (John 9:7) Lelaki nya nitihka jaku Jesus, lalu iya ulih meda. Naka meh pengaga ati iya laban nya meh keterubah kali dalam pengidup iya, iya ulih meda!

Orang ke diau semak enggau iya sereta sida ke ngelala iya berasai amat alit ati. Sida nanya: “Endaka iya tu lelaki ke selalu duduk minta sedekah?” Bisi sekeda madah: “Au. Iya meh nya.” Tang sekeda pan enda pechaya lalu nyebut: “Ukai. Orang tu semina baka gamal iya.” Tang lelaki nya madahka: “Aku meh iya.”—John 9:8, 9.

Sida nanya iya: “Baka ni ku mata nuan tau ulih meda?” Iya nyaut: “Siku lelaki ke benama Jesus nyampurka utai lalu ngunsut utai nya ba mata aku. Udah nya, iya bejaku ngagai aku, ‘Alai, basu mata nuan ba kulam Siloam.’ Nya alai, aku pan mupuk. Pengudah masu mata aku, aku lalu ulih meda.” Nya alai, sida nanya: “Dini alai lelaki nya?” Iya madah: “Aku enda nemu.”—John 9:10-12.

Orang mayuh mai lelaki nya ngagai orang Parisi, laban sekeda ari sida pan deka nemu baka ni lelaki nya ulih meda. Iya madah ngagai sida: “Iya  ngunsutka tanah ba mata aku. Aku masu mata aku lalu aku ulih meda.” Iya ke amat, orang Parisi patut gaga ati laban lelaki ke buta nya ulih meda. Taja pia, sekeda ari sida ngutuk Jesus, lalu madah: “Iya ukai datai ari Petara laban iya enda nitihka adat Sabat.” Tang sida ke bukai madahka: “Baka ni ku orang ke bedosa tau ulih ngereja pengawa ajih ke baka tu?” (John 9:15, 16) Nyadi sida bepechah-belah ketegal penemu sida enggau pangan diri enda sebaka.

Ketegal penemu sida enda sama, sida lalu nanya lelaki nya: “Ketegal iya udah ngeraika mata nuan, nama runding nuan pasal iya?” Iya enda kakang ati enggau Jesus. Nyadi iya nyaut: “Iya siku nabi.”—John 9:17.

Tang orang Judah enggai pechaya utai ke baru udah nyadi nya. Sida ngumbai Jesus enggau lelaki nya bepakat deka nipu sida. Nya alai, sida deka betemu enggau apai indai lelaki nya ngambika ulih nemu sekalika iya amat-amat diadaka buta tauka enda.