Jesus baru aja ngulang jaku ajar iya pasal sampi. Lalu Jesus mega deka ngulang baru ajar iya pasal topik ke bukai. Sebedau tu lebuh Jesus ngereja pengawa ti luar biasa ba Galili, orang nuduh iya ngena kuasa ari ketuai melikat ti jai. Ba Judea, Jesus pan dituduh enggau jaku tuduh ti sama.

Lebuh Jesus muru melikat ti jai ke ngasuh siku lelaki nyadi bisu, orang mayuh balat alit ati. Tang sida ke ngelaban iya, enda berasai baka nya. Sida agi nuduh Jesus madahka: “Iya muru melikat ti jai ngena kuasa Belsebup, ketuai melikat ti jai.” (Luke 11:15) Tang orang bukai minta Jesus ngayanka tanda ari serega, laban sida deka nemu sapa Jesus ke bendar iya.

Jesus nemu sida deka nguji iya. Nya alai, iya nyaut sida enggau chara ti sama baka ke digaga iya lebuh orang ba Galili ngelaban iya. Jesus madahka perintah ti ngelaban diri empu enda ulih tan. Ku iya: “Enti Sitan bepechah-belah lalu ngelaban diri empu, baka ni ku perintah iya ulih tan?” Udah nya, Jesus nyaut sida enggau chara ti terus terang: “Enti aku muru melikat ti jai ngena kuasa kudus Petara, reti nya Perintah Petara udah bisi ba ditu, tang kita enda nemu pasal nya.”—Luke 11:18-20.

Lebuh Jesus nyebut pasal “kuasa kudus Petara,” bala peninga iya engka ingat baru pasal utai ke kala nyadi ba sejarah orang Israel kelia menya. Suba, sida ba istana Firaun ke meda Moses ngereja pengawa ti luar biasa madahka: “Tu ari kuasa Petara!” Pia mega, Petara nulis Sepuluh Pesan ba dua iti lampang batu ngena “jari Iya Empu.” (Pemansut 8:19; 31:18) Sama mega, jari Petara, iya nya kuasa kudus ke meri Jesus kuasa ngambika iya ulih muru bala melikat ti jai sereta ngeraika orang ke sakit. Ketegal nya, sida ke ngelaban Jesus enda nemu pasal penatai Perintah Petara, laban raja Perintah Petara, iya nya Jesus, bisi enggau sida ba dia ngereja pengawa ti luar biasa.

Jesus ulih muru bala melikat ti jai. Tu nunjukka iya bekuasa agi ari Sitan. Nya baka siku lelaki ti kering ke besenyata ke benung nyaga rumah iya. Tang bisi siku da agi orang ke kering agi ari iya datai nyerang, lalu ngalahka lelaki nya. Jesus mega ngulang baru jaku sempama iya pasal siku melikat ti jai ke pansut ari sesiku orang. Enti orang nya enda ngemenuhka runding iya enggau utai ti manah, melikat ti jai nya deka pulai baru enggau tujuh da agi melikat ti jai ke bukai. Tu deka ngasuh keadaan lelaki nya balat agi teruk ari ke suba. (Matthew 12:22, 25-29, 43-45) Kebendar iya, nya meh ke benung nyadi ba bansa Israel maya nya.

Siku indu ke ningaka Jesus maya nya madahka: “Gaga ati meh indai ke udah ngandungka nuan sereta udah nusuka nuan!” Bala indai orang Judah amat ngarapka diri ulih nyadi indai ngagai siku nabi kelebih agi nyadi indai Messiah. Nya alai, indu nya ngumbai Maria amat gaga ati laban iya ulih nyadi indai ngagai Jesus. Taja pia, Jesus ngemetulka runding indu nya lalu madahka pasal pun pengaga ati ti bendar. Ku Jesus: “Ukai. Iya ke gaga ati nya orang ke ninga sereta ngasika jaku Petara!” (Luke 11:27, 28) Jesus nadai kala madahka Maria patut dimuliaka. Tang, sesiku orang tau ngulihka pengaga ati ti bendar enti iya setia nyembah Petara, ukai ketegal kaul ke dikembuan iya enggau ruang bilik tauka ketegal utai ke dijapai iya.

Jesus ngerara orang ke minta tanda ari serega baka ke kala digaga iya lebuh ba Galili sebedau tu. Iya madah nadai tanda ke deka diberi ngagai sida kelimpah ari “tanda Jonah.” Baka ni Jonah tau nyadi tanda? Kesatu, ketegal iya ba dalam perut ikan pengelama tiga hari. Kedua, ketegal Jonah nginjil enggau berani nyentukka orang ba Nineweh nesal ati. Jesus madahka: “Tang kebendar iya, ba ditu bisi orang ke besai agi ari Jonah.”  (Luke 11:29-32) Lalu suba kuin ari Sheba kala betemu enggau Solomon laban deka ningaka penemu-dalam iya. Taja pia, Jesus besai agi ari Solomon.

Jesus mega madahka: “Pengudah nungkun lampu kelita, orang enda ngelalaika kelita nya tauka nangkup iya ngena bakul, tang ngengkahka kelita nya ba penuduk iya.” (Luke 11:33) Jesus engka nyebut munyi nya laban taja pan iya udah bebendar ngajar sereta ngereja pengawa ti luar biasa ba mua orang Judah, tang nya baka ke ngelalaika penampak ari lampu kelita. Ketegal mata sida enda betatika pekara ti beguna, sida enda meretika tuju Jesus ngereja semua pengawa iya.

Maya nya, Jesus baru aja muru siku melikat ti jai ke ngasuh siku lelaki nyadi bisu. Nyadi utai ke nyadi nya patut meransang orang ngemuliaka Petara lalu madah ngagai orang bukai pasal pengawa ke dikereja Jehovah. Nya alai, Jesus nyebut munyi tu ngambika ulih meri jaku tangkan ngagai orang ke ngelaban iya. Ku iya: “Nya alai, bejimat meh kita ngambika penampak ti dalam kita nya ukai pemetang. Nyadi enti semua tubuh kita tampak lalu nadai begian ti petang, semua tubuh kita deka manchar terang baka kelita ke meri kita penampak.”—Luke 11:35, 36.