Pengudah meri Jaku Ajar ba Atas Bukit, Jesus mupuk ngagai Kapernaum. Ba dia, sekeda tuai bansa orang Judah datai betemu enggau Jesus. Siku lelaki ke datai ari bansa bukai nganjung sida ngagai Jesus. Lelaki nya siku pemesai soldadu Rome.

Ulun ti amat dikesayauka pemesai soldadu nya sakit raya lalu nyauka mati. Taja pan pemesai soldadu nya datai ari bansa bukai, tang iya minta tulung ari Jesus. Orang Judah ba dia madah ngagai Jesus, ulun nya “balat amat sakit. Iya gali ba rumah lalu enda ulih engkebut.” (Matthew 8:6) Lalu tuai bansa orang Judah madah ngagai Jesus, pemesai soldadu nya endang layak ditulung iya. Ku sida madah: “Iya rinduka bansa kitai lalu udah nirika balai gempuru ba ditu.”—Luke 7:4, 5.

Nya alai, Jesus enggau tuai bansa orang Judah mupuk ngagai rumah pemesai soldadu nya. Tang lebuh sida nyauka datai ba rumah pemesai nya, iya nganjung bala kaban ngagai Jesus. Ku sida madah ngagai Jesus: “Tuan, nuan enda ibuh kiruh datai ke rumah aku. Laban aku enda chukup badas nyambut nuan datai ba rumah aku.” (Luke 7:6, 7) Pemesai soldadu nya tentu teleba ngasuh orang bukai ngereja utai, tang jaku iya nunjukka iya amat baruh ati! Tu mega nunjukka iya jauh bebida ari orang Rome ke bukai ti suah ngintu bala ulun sida enggau chara ti kasar.—Matthew 8:9.

Pemesai soldadu nya tentu nemu orang Judah enda entu begulai enggau orang ke datai ari bansa bukai. (Surat Kereja Rasul 10:28) Engka nya kebuah iya ngasuh bala kaban iya madah ngagai Jesus: “Sebut aja, lalu ulun aku tentu deka gerai.”—Luke 7:7.

Lebuh Jesus ninga nya, iya kagum lalu madahka: “Aku madah ngagai kita: Aku bedau kala tetemuka pengarap orang ti ngemesai nya, indah ba menua Israel.” (Luke 7:9) Lebuh bala kaban pemesai soldadu nya pulai ke rumah iya, sida meda ulun nya udah gerai.

Nama nyadi pengudah Jesus ngeraika ulun pemesai soldadu nya? Jesus madahka orang bansa bukai ke arap deka diberekat. Ku iya: “Mayuh orang ari timur enggau ari barat deka datai, lalu sida deka duduk begulai makai enggau Abraham, Isak, enggau Jakop, ba Perintah serega.” Baka ni enggau orang Judah ke enda arap? Jesus madah sida “deka dibuai ngagai endur ti petang, dia meh alai sida deka nyabak sereta begerit ngeli.”—Matthew 8:11, 12.

Iya ke amat, orang Judah meh ti keterubah diberi peluang ulih sama merintah enggau Kristus. Tang sida ke nulak peluang nya enda diterima Petara. Taja pia, orang bansa bukai deka diberi peluang ngambika sida ulih nyadi sebagi ari “Perintah serega.”