Jesus baru aja ngajar bala murid iya pasal sida patut neladan anak mit, baruh ati sereta enda ibuh ngemeratka pangkat. Bala murid ke ‘nerima anak mit baka tu dalam nama Jesus, mega nerima iya.’—Matthew 18:5.

Bala rasul baru bekelikuh pasal sapa ke pemadu besai ba Perintah Petara. Nyadi, sida nemu Jesus ngerara sida. Tang diatu rasul John nyebut pasal utai ke baru nyadi: “Kami bisi meda orang siku muru melikat ti jai ngena nama nuan, lalu kami nguji nagang iya laban iya ukai siku ari kitai.”—Luke 9:49.

Kati John ngumbai bala rasul aja ulih ngeraika orang sereta muru bala melikat ti jai? Enti pia, nama kebuah lelaki bansa Judah nya ulih muru melikat ti jai? John engka ngasaika lelaki nya enda patut ngereja nya laban iya nadai begulai enggau Jesus sereta bala rasul.

Saut Jesus ngasuh John tekenyit: “Anang nagang iya, laban nadai orang ke ngaga kereja ajih ngena nama aku deka beguai bejaku jai pasal aku. Laban barang sapa ke enda ngelaban kitai, setanah enggau kitai. Enggau bendar aku madah ngagai kita: Barang sapa meri kita ai irup ketegal kita enggi Kristus, iya tentu deka nerima upah iya.”—Mark 9:39-41.

Kebendar iya, lelaki nya enda ibuh enggau Jesus kena nunjukka diri nyukung Jesus. Ba maya nya, raban gempuru Kristian bedau ditumbuhka. Nyadi taja pan lelaki tu enda enggau Jesus, tang iya enda ngelaban Jesus tauka ngajar orang pengarap pelesu. Lelaki nya arapka nama Jesus. Lalu Jesus madah lelaki nya deka nerima upah iya.

Tang bala rasul ngereja penyalah ti besai, enti jaku enggau utai ke digaga sida ngasuh lelaki nya labuh ba pengarap. Jesus madah: “Barang sapa ke ngasuh siku ari murid aku ke baka anak mit, labuh ba pengarap, manah agi enti batu kisar ti besai ke ditarit keledai digantung ba rekung orang nya, lalu iya dibuai ngagai tasik.” (Mark 9:42) Udah nya, Jesus madah bala murid iya patut sanggup muai utai ti berega ba sida baka jari, kaki tauka mata, enti utai nya ngasuh sida labuh ba pengarap. Manah agi enti sesiku orang ngelengkaka utai ti berega lalu tama ngagai Perintah Petara, ari ke bisi utai nya tang dibuai ngagai Gehena (Lebak Hinom). Bala rasul engka kala meda lebak tu semak Jerusalem, iya nya endur alai sampah ditunu. Nyadi, sida nemu Gehena merujuk ngagai orang ke dipunaska belama iya.

Jesus mega nangkan sida: “Anang sekali-kali kita ngemaruhka bala murid aku ke baka anak mit, laban bala melikat sida ti ba serega seruran merening ngagai mua Apai aku ti ba serega.” Berapa berega bala “anak mit” tu ba Jehovah? Jesus nyebut pasal siku lelaki ke bisi 100 iku bedus tang siku ari bedus nya tesat. Lelaki nya ninggalka 99 iku bedus iya, lalu bejalai ngiga siku bedus ti tesat  nya. Lebuh iya tetemuka bedus nya, iya tentu lebih agi gaga ati ke bedus nya, ari ke 99 iku bedus ke enda tesat nya. Jesus madahka: “Apai aku ti ba serega enggai nejuka indah siku ari sida ke baka anak mit tu tesat.”—Matthew 18:10, 14.

Jesus engka berunding pasal bala rasul iya ke bekelikuh pasal sapa ke pemadu besai entara sida. Nya alai iya madah: “Awakka kita baka garam, lalu mengkang bebaik enggau pangan diri.” (Mark 9:50) Garam ngasuh pemakai nyamai. Enti jaku sesiku orang baka pemakai ke dichampur garam, jaku iya deka senang diterima orang lalu ulih ngetanka kaul ti manah enggau orang bukai. Tang orang ke bekelikuh enda ulih bebaik enggau orang bukai.—Kolosi 4:6.

Kekadang penanggul ti besai enggau menyadi Kristian ulih nyadi. Lalu Jesus madahka chara mutarka penanggul nya. Ku Jesus: “Enti menyadi kita bedosa ngelaban kita, mansang kita ngagai iya, lalu padahka penyalah iya ngagai iya. Kereja nya semina entara kita enggau iya aja. Enti iya mendingka kita, reti nya kita udah nulung iya ngereja utai ti betul.” Tang baka ni enti iya enggai ninga? Jesus madah: “Bai siku tauka dua iku orang enggau kita, laban tiap iti pekara ulih ditentuka betul, enti bisi penerang ari dua tauka tiga iku orang saksi.” Enti pekara nya enda ulih diputarka, sida patut mai pekara nya ngagai “raban gempuru,” iya nya bala tuai gempuru ke bisi tanggungjawap ngaga pemutus. Tang baka ni enti orang ke bedosa nya agi enggai ninga? Jesus madah: “Kita patut ngumbai iya baka orang ari bansa bukai sereta pengumpul chukai.” Tu ketegal maya nya, orang Judah enda begulai enggau orang bansa bukai tauka bala pengumpul chukai.—Matthew 18:15-17.

Bala tuai gempuru patut ngasika Jaku Petara. Enti sesiku orang bedosa sereta begunaka disiplin, bala tuai gempuru patut ngaga pemutus ti sama baka ke udah digaga Jehovah enggau Jesus, baka ke “udah ditanchang ba serega.” Tang enti orang nya enda ngereja penyalah, pekara nya mega “dilepaska ba serega.” Iring tu deka nulung lebuh raban gempuru berengkah ditumbuhka. Lebuh bala tuai gempuru patut ngaga pemutus ti berat, Jesus madahka: “Lebuh dua tauka tiga iku orang begempuru dalam nama aku, aku bisi ba dia enggau sida.”—Matthew 18:18-20.