Pengudah orang Nasaret nguji munuh Jesus, iya mupuk ngagai Kapernaum semak Danau Galili, ke mega dikumbai “Danau Genesaret.” (Luke 5:1) Tu ngamatka jaku benabi Isaiah ke madahka orang Galili ke diau semak tasik deka meda penampak.—Isaiah 9:1, 2.

Ba Galili, Jesus terus madahka “Perintah serega nyau semak!” (Matthew 4:17) Ba dia, Jesus tetemuka empat iku murid iya. Sebedau tu, sida nitihka iya. Tang pengudah sida pulai ari Judea, sida ngereja pengawa berikan baru. (John 1:35-42) Diatu, sida patut terus nitihka Jesus ngambika Jesus ulih ngelatih sida ba pengawa nginjil. Enggau nya, sida ulih terus nginjil pengudah Jesus pulai ke serega.

Lebuh Jesus bejalai ba tebing tasik, iya meda Simon Peter enggau menyadi iya, Andrew, sereta sida ke bukai ke benung masu jala sida. Jesus nepan perau Peter, lalu ngasuh Peter mai perau nya jauh mimit ari tebing. Udah nya, Jesus duduk dalam perau lalu ngajar orang mayuh pemendar pasal Perintah Petara ari perau nya.

Udah nya, Jesus madah ngagai Peter: “Kayuhka perau tu ngagai ai ti dalam, lalu ulurka pukat kita ngambika bulih ikan.” Peter lalu nyaut: “Pengajar, kami udah bebendar gawa semalam-malam tu, tang nadai bulih utai. Tang aku deka ngulurka pukat baka ke diasuh nuan.”—Luke 5:4, 5.

Sida ngulurka pukat sida lalu bulih mayuh amat ikan datai ke pukat sida nyau charik! Sida ngepai orang berikan ba perau sebuah da agi minta sida datai nulung. Dua iti perau nya penuh enggau ikan datai ke perau sida nyau deka karam. Lebuh Peter meda nya, iya lalu nyungkurka diri ngagai Jesus, ku iya: “Anang semak aku, Tuan, laban aku tu orang ke bedosa.” Jesus nyaut iya: “Anang takut. Berengkah ari diatu nuan deka ngiga orang, baka nuan ke begigaka ikan.”—Luke 5:8, 10.

Jesus madah ngagai Peter enggau Andrew: “Aram enggau aku. Aku deka ngajar seduai chara ngiga orang, baka seduai ke begigaka ikan.” (Matthew 4:19) Udah nya, Jesus mai dua iku agi orang ke berikan sama nginjil enggau iya. Seduai iya nya James enggau John, iya nya anak Sebedi. Seduai iya mega enda kakang ati nerima kangau ari Jesus. Nya alai, sida ke empat iku tu ninggalka pengawa berikan sida, lalu nyadi orang keterubah nitihka Jesus nginjil penuh jam.