Lebuh utai ti jai nyadi, kitai suah nanya, “Nama kebuah utai tu nyadi?” Kitai amat beterima kasih laban Bup Kudus meri kitai saut ngagai tanya tu!

1. Nama utai ke digaga Sitan ti ngasuh penyai berengkah nyadi ba dunya tu?

Kena nyaut tanya tu, kitai patut pulai baru ngagai utai ti nyadi ba Kebun Eden. Maya nya, Sitan nguji nipu Adam seduai Awa, lalu ngasuh seduai iya berundingka Petara nya benung ngenanka utai ti manah ari sida. Udah nya, Sitan madahka Awa, iya enda mati enti iya ngelaban Jaku Petara. Nya alai, Sitan udah ngasuh Adam seduai Awa enggau iya angkat ngelaban Petara. Kebendar iya, Sitan ngembuan runding ti jai, lalu iya deka ngerampas hak Petara nyadi Pemerintah. (Pemungkal 3:1-5) Ketegal Sitan ke mungkal pemula ti keterubah, Bup Kudus ngumbai iya “endang pemula, lalu iya endang apai pemula.”—John 8:44.

2. Nama utai ke udah digaga Adam seduai Awa?

Kebendar iya, Jehovah amat gerah jari ngagai Adam seduai Awa. Iya udah meri seduai iya mayuh macham pun buah, tang semina siti aja pun buah ke enda tau diempa seduai iya. (Pemungkal 2:15-17) Tang Adam enggau Awa milih deka makai buah ari pun ti ditagang nya. Bup Kudus madahka, Awa ngambi lalu “makai buah nya.” Udah nya, Adam mega “makai buah nya.” (Pemungkal 3:6) Seduai iya mensia ti sempurna. Nya alai, seduai iya tentu bisi pengingin deka ngereja utai ti manah. Tang pemutus ke digaga seduai iya nunjukka seduai iya sengaja ngelaban Petara lalu nulak chara Iya merintah. Ketegal nya, seduai iya bedosa sereta merinsa.—Pemungkal 3:16-19.

3. Baka ni pemutus Adam enggau Awa bisi kaul enggau kitai?

Pengudah Adam seduai Awa bedosa, seduai iya enda agi sempurna. Nya alai, bala anak seduai iya mega pan enda sempurna. Bup Kudus madahka: “Nya alai, baka dosa ti datai ngagai dunya nengah orang siku [iya nya Adam], lalu pemati datai laban dosa, nya alai pemati ngelekai ngagai semua mensia, laban semua bela udah bedosa.”—Rome 5:12.

Ketegal kitai enda sempurna, kitai empu tauka orang bukai engka ngaga pemutus ti enda manah lalu tu ulih ngasuh kitai merinsa. Kelimpah ari nya utai jai ulih nyadi ba kitai laban kitai bisi ba endur tauka maya ti enda ngena.—Bacha Pengajar 9:11.

 BELAJAR MAYUH AGI

4. Sapa ke ngasuh kitai merinsa?

Mayuh orang pechaya Petara ke nguasa dunya tu. Kati nya amat? Mainka VIDEO.

Bacha James 1:13 enggau 1 John 5:19, lalu kerandauka tanya tu:

• Kati Petara ke ngasuh penyai enggau pemerinsa nyadi?

5. Utai ke nyadi pengudah Sitan berengkah merintah

1. Adam enggau Awa ngembuan pengidup ti sempurna ba Paradais. Tang seduai iya mendingka jaku Sitan lalu angkat ngelaban Jehovah

2.   Pengawa seduai iya mai dosa, pemerinsa enggau pemati ngagai semua mensia

3. Jehovah besemaya deka muai dosa, pemerinsa enggau pemati. Mensia deka nyadi sempurna baru lalu idup ba Paradais

6. Jehovah ibuhka pemerinsa ke ditapi kitai

Kati Petara ibuhka kitai lebuh kitai merinsa? Peratika jaku Raja David enggau rasul Peter. Bacha Masmur 31:7 enggau 1 Peter 5:7, udah nya kerandauka tanya tu:

• Nama asai ati nuan pengudah macha ayat tu?

 LANSA

Antu Sitan enggau sepasang mensia ti keterubah nya meh ke ngasuh penyai nyadi ba dunya. Jehovah amat ibuhka kitai lalu besemaya deka muai pemerinsa kitai.

Ulang Kaji

• Nama pemula ke dipadah Antu Sitan ngagai Awa?

• Nama nyadi ngagai kitai ketegal Adam enggau Awa angkat ngelaban Petara?

• Baka ni kitai nemu Jehovah ibuhka kitai lebuh kitai merinsa?