Petara ngatur peturun Abraham nyadi siti bansa lalu meri sida adat Iya. Petara ngumbai bansa nya “Israel” lalu meri sida tanggungjawap megai pengarap ti bendar enggau Jaku Iya. (Masmur 147:​19, 20) Ari bansa Israel tu, bansa bukai deka bulih berekat.​—Bacha Pemungkal 22:18.

 Petara milih bansa Israel nyadi saksi-saksi Iya. Cherita pasal bansa Israel kelia bisi madahka baka ni sida bulih penguntung ari ngasika adat Petara. (Ulang Adat 4:6) Nya alai, nengah bansa Israel, orang bukai ulih nemu pasal Petara ti bendar.​—Bacha Isaiah 43:​10, 12.

 Tang udah nya, Petara nyau enda rindu agi ngagai bansa Israel laban sida enda ngasika Iya. Nya alai, Petara nganti sida ngena iklisia Kristian. (Matthew 21:43; 23:​37, 38) Diatu, Kristian ti bendar nyadi saksi-saksi Jehovah, nganti bansa Israel.​—Bacha Kereja Rasul 15:​14, 17.

 Jesus ngatur nembiak iya nusui berita manah ngagai semua bansa lalu mai sida nyadi murid iya. (Matthew 10:​7, 11; 24:14; 28:​19, 20) Pengawa tu benung ranchak dikerejaka laban pengujung dunya makin semak. Diatu Jehovah udah nyerakup bejuta-juta orang ari semua raban bansa ngagai pengarap ti bendar. (Pemandang 7:​9, 10) Raban Kristian ti bendar diajar meransang sereta nulung pangan diri. Sida mega belajar penemu Bup Kudus ti sama ba semua endur sida begempuru.​—Bacha Hebrew 10:​24, 25.

 Berengkah urung taun 1870, bisi raban orang ti belajarka Bup Kudus udah ketemuka pemendar Bup Kudus. Sida nemu, kelia Jesus bisi ngatur iklisia Kristian kena ngereja pengawa nusui berita manah. Nya alai, sida mega berengkah ngatur pengawa nusui berita Perintah Petara ba segenap menua. Berengkah taun 1931, sida ngena nama Saksi-saksi Jehovah.​—Bacha Kereja Rasul 1:8; 2:​1, 4; 5:42.

 Dalam kurun keterubah, iklisia Kristian ba mayuh menua bulih penguntung ari atur ti diberi raban pemerintah pusat ti nyukung Jesus nyadi kepala iklisia Kristian. (Kereja Rasul 16:​4, 5) Baka nya mega diatu, Saksi-saksi Jehovah bulih penguntung ari atur ti diberi Raban Pemerintah, iya nya tuai raban Kristian ti bisi peneleba. Sida tu nyaga pampang opis Saksi-saksi Jehovah ti nyalin siti jaku ngagai jaku bukai, nyelak lalu nyadung barang ti dikena belajar Bup Kudus dalam lebih 600 bansa jaku. Ngena chara tu, Raban Pemerintah tu ulih meri jaku peransang enggau ngatur lebih 100,000 iti ikilsia ba serata dunya. Ba tiap iklisia, bisi bala lelaki ti nyadi tuai tauka orang ti nyaga. Sida tu nyaga nembiak Petara ngena pengerindu.​—Bacha 1 Peter 5:​2, 3.

 Saksi-saksi Jehovah diatur awakka ulih nusui berita manah lalu mai orang nyadi nembiak Petara. Baka bala rasul, sida nusui berita tu ari rumah ka rumah. (Kereja Rasul 20:20) Sida mega ngajar Bup Kudus ngagai orang ti rinduka pemendar. Taja pia, Saksi-saksi Jehovah ukai sebarang gerempung. Sida baka diri sebilik ti beapaika Petara ti pengasih. Sida baka bala diri menyadi ti pedulika pangan diri. (2 Tesalonika 1:3) Saksi-saksi Jehovah udah diatur awakka ngereja utai ti ngenyamaika ati Petara enggau nulung orang bukai. Nya alai sida tu orang ti pengabis senang ati ba dunya.​—Bacha Masmur 33:12; Kereja Rasul 20:35.