1, 2. (a) Kemaya siti-siti pemeri berega bendar ba nuan? (b) Nama kebuah tebus nya pemeri ti pemadu berega ke kala diterima nuan?

 NAMA pemeri ti pemadu berega ke kala diterima nuan? Pemeri ti berega enda diitung ngena duit. Tang, enti pemeri nya ngagaka ati sereta beguna ba pengidup, nuan tentu ngumbai iya pemeri ti berega.

² Ari semua pemeri ke kala diterima nuan, bisi siti ti pemadu berega. Pemeri tu ari Petara. Jehovah meri kitai genselan nyawa Anak Iya, Jesus Kristus. (Matthew 20:28) Baka ke deka dipelajar kitai ba pelajar tu, tebus nya pemeri ti pemadu berega ke ulih diterima nuan, laban iya meri pengelantang ti bendar sereta amat beguna ba pengidup. Tebus tu nunjukka pengerindu ti pemadu besai ari Jehovah ngagai nuan.

3. Nama reti tebus, lalu nama utai ti patut ditemu kitai ngambika beterima kasih ke pemeri ti berega tu?

³ Tebus nya chara ti dikena Jehovah ngelepaska mensia ari dosa enggau pemati. (Epesus 1:7) Enti deka  nemu ajar Bup Kudus pasal utai tu, kitai patut beratika nama utai ti udah nyadi ba kebun Eden. Enti kitai nemu utai ti udah dilenyauka Adam maya iya bedosa, kitai deka beterima kasih ke tebus ti berega tu.

4. Nama reti pengidup ti sempurna ba Adam?

⁴ Maya Jehovah ngaga Adam, Iya meri Adam pengidup ti sempurna. Uji pikir, nama reti pengidup tu ba Adam. Laban tubuh enggau pikir iya sempurna, iya enda nemu sakit, nyadi tuai tauka mati. Iya mega bisi kaul ti manah enggau Jehovah. Bup Kudus madahka Adam nya ‘anak Petara.’ (Luke 3:38) Nya alai, Adam bisi kaul ti rapat enggau Petara Jehovah. Kaul seduai iya baka kaul seiku anak enggau apai ke bisi pengerindu. Jehovah bejaku enggau Adam, lalu meri iya kereja ti ngemuaska ati ba dunya tu. Jehovah mega madah ngagai Adam nama utai ti dikedeka Iya ari Adam.—Pemungkal 1:28-30; 2:16, 17.

5. Nitih ku Bup Kudus, nama reti Adam digaga ‘neladan gamal Petara’?

⁵ Adam digaga “neladan gamal Iya Empu [Petara].” (Pemungkal 1:27) Taja pia, tu ukai reti iya gamal Adam nya sebaka enggau enggi Petara. Baka ke udah dipelajar kitai ba Pelajar 1 bup tu, Jehovah nya roh. (John 4:24) Jehovah enda betubuh dagin enggau darah baka kitai. Adam digaga neladan gamal Petara, reti nya, Adam ngembuan pemanah Petara baka pengerindu, pemandai, pengelurus, enggau kuasa. Adam mega bibas milih kediri empu, sama baka Apai iya. Nya alai, Adam enda digaga baka robot ti semina ngereja utai ti udah diprogram. Iya ulih mutus kediri empu utai ti betul enggau utai ti salah. Enti iya milih meruan ngasika Petara, iya ulih idup belama ba Paradais di dunya tu.

6. Maya Adam enda ngasika Petara, nama utai dilenyauka iya, lalu baka ni pekara tu bekaul enggau peturun iya?

 ⁶ Adam udah mayar rega ti mar ke dosa iya. Laban iya enda ngasika Petara, iya diukum mati lalu ngelenyauka nyawa iya ti sempurna enggau semua berekat iya. (Pemungkal 3:17-19) Ukai semina Adam aja ke lenyau pengidup ti sempurna, tang semua peturun iya mega. Jaku Petara madah: “Baka dosa ti datai ngagai dunya nengah orang siku [Adam], lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” (Rome 5:12) Ya, kitai semua nerima dosa ari Adam. Nya alai, Bup Kudus madah iya enggau peturun iya “dijual” nyadika ulun dosa enggau pemati. (Rome 7:14) Adam seduai Hawa udah lenyau peluang idup belama iya laban seduai iya sengaja enda ngasika Petara. Tang, baka ni enggau peturun seduai iya, nyengkaum kitai?

7, 8. Nama dua iti pekara ti bisi kaul enggau tebus?

⁷ Jehovah nyediaka tebus kena ngelepaska mensia. Nama reti tebus? Tebus nya bisi kaul enggau dua iti pekara. Kesatu, tebus nya rega ti dibayar kena ngelepaska orang tauka nebus utai pulai baru. Tu baka rega ti dibayar kena ngelepaska orang ti ditangkap orang jai. Kedua, tebus nya duit ti dibayar kena nutup utai ti rusak. Chunto, seiku orang ke udah ngerusakka kerita orang bukai, patut mayar duit pampas ti sama rega enggau utai ti udah rusak laban iya.

⁸ Tang, nama utai ti ulih nganti pengerugi besai ke udah dibai Adam ngagai kitai semua? Lalu, baka ni tu ulih ngelepaska kitai ari dosa enggau pemati? Aram kitai beratika pasal tebus ti udah disediaka Jehovah, sereta berekat iya ngagai nuan.

9. Tebus ti baka ni diguna?

⁹ Adam udah ngelenyauka nyawa iya ti sempurna. Nya alai, nadai seiku orang pan ba dunya tu ulih nebus utai ti udah dilenyauka laban semua kitai enda sempurna. (Masmur 49:7, 8) Nyadi, kitai begunaka tebus ti sama rega enggau utai ti udah dilenyauka. Tu sejalai enggau jaku ajar pasal pengelurus ke bisi ba Jaku Petara, iya ti madahka: “Nyawa balas nyawa.” (Ulang Adat 19:21) Nya alai, nama utai ti ulih nutup pengidup sempurna ke udah dilenyauka Adam? Siti agi pengidup mensia ti sempurna diguna nyadi ke tebus.—1 Timoti 2:6.

10. Baka ni Jehovah nyediaka tebus?

¹⁰ Baka ni Jehovah nyediaka tebus tu? Iya ngirumka seiku ari melikat Iya ti sempurna ke dunya tu. Tang, Jehovah enda ngirumka sebarang melikat. Iya ngirumka Anak tunggal ti pemadu dikesayau Iya. (1 John 4:9) Anak tu mega deka ninggalka serega. (Pilipi 2:7) Baka ke udah dipelajar kitai ba Pelajar 4, Jehovah ngaga kereja ajih maya Iya mindahka pengidup Jesus ngagai kandung Maria. Ngena bantu roh kudus Petara, Jesus ada nyadi seiku mensia ti sempurna, lalu enda bedosa.—Luke 1:35.

11. Baka ni seiku orang ulih nyadi tebus ke bejuta iku mensia?

¹¹ Baka ni seiku orang ulih nyadi tebus ke bejuta iku mensia? Agi nuan ingat baka ni mensia tau bedosa? Adam udah ngelenyauka nyawa iya ti sempurna lebuh iya bedosa. Nya alai, iya enda ulih meri pengidup ti sempurna ngagai peturun iya. Adam semina ulih meri dosa enggau pemati. Tang, Jesus ngembuan nyawa ti sempurna, lalu iya enda kala bedosa. Ku Bup  Kudus, Jesus “Adam ti penudi.” (1 Korint 15:45) Nama kebuah? Laban Jesus udah nganti penuduk Adam ngelepaska kitai. Iya ngasi ke Petara lalu udah meri nyawa iya ti sempurna nyadi tebus kena mayar dosa Adam. Nya alai, Jesus udah meri peluang ngagai peturun Adam.—Rome 5:19; 1 Korint 15:21, 22.

12. Nama ditunjukka pemerinsa Jesus?

¹² Bup Kudus madah enggau terang pemerinsa ti diasaika Jesus sebedau iya mati. Iya balat bendar disipat, dipantang ba tiang, lalu merinsa nyentuk ke iya mati. (John 19:1, 30; Galatia 3:13; Penerang ba lambar 204-206) Nama kebuah Jesus balat merinsa? Pengudah pelajar tu, kitai deka belajar pasal Sitan ke udah nanya, sekalika bisi nembiak Jehovah ba dunya tu meruan ngasi maya sida bisi penguji. Jesus meri saut ti pemadu manah ngagai jaku jai Sitan ke ngelaban Petara. Iya udah nunjukka diri ngasika Jehovah taja pan balat merinsa. Nyadi, Jesus udah nunjukka mensia ti sempurna ulih milih ngasika Petara enda ngira nama utai ti deka digaga Sitan. Jehovah tentu gaga bendar ati meda Anak Iya ngasika Iya!—Jaku Dalam 27:11.

13. Baka ni tebus dibayar?

¹³ Baka ni tebus dibayar? Petara ngelakka Anak Iya ti sempurna sereta enda bedosa diukum mati kena 14 haribulan Nisan taun 33 M., nitihka kelinda orang Judah. Jesus nyerahka nyawa iya ti sempurna “sekali aja ke belama-lama iya.” (Hebrew 10:10) Pengudah tiga hari Jesus mati, Jehovah ngangkatka iya nyadi mensia roh. Di serega, Jesus nyerahka rega genselan nyawa iya ti sempurna ngagai Petara kena nebus peturun Adam. (Hebrew 9:24) Jehovah nerima rega genselan  nyawa Jesus kena ngelepaska mensia ari dosa enggau pemati.—Rome 3:23, 24.

14, 15. Nama patut digaga kitai enti deka Petara ‘ngampunka dosa kitai’?

¹⁴ Taja pan semua kitai bedosa, kitai tau bulih berekat ti berega ari tebus tu. Aram kitai beratika sekeda berekat ti pemadu besai ari Petara nya ngagai kitai diatu enggau jemah ila.

¹⁵ Ngampunka dosa. Laban enda sempurna, kitai tusah ngereja utai ti betul. Semua kitai kala bedosa ari jaku tauka ulah. Tang, ngena genselan nyawa Jesus, Jehovah deka ‘ngampunka dosa kitai.’ (Kolosi 1:13, 14) Enti kitai deka bulih pengampun, kitai patut nesal ati ke penyalah ti udah digaga. Kitai mega patut baruh ati minta ampun ari Jehovah, lalu manggaika pengarap ba genselan nyawa Anak Iya.—1 John 1:8, 9.

16. Nama nulung kitai nyembah Petara enggau ati ti beresi, lalu nama berekat enti kitai bisi ati ke baka nya?

¹⁶ Bisi ati ti beresi ngagai Petara. Asai ati ti salah ngasuh kitai nadai peluang, lalu ngasaika diri enda beguna. Tebus tu nulung kitai bulih pengampun ari Jehovah, lalu kitai ulih nyembah Iya enggau ati ti beresi taja pan kitai enda sempurna. (Hebrew 9:13, 14) Tu ulih nulung kitai bejaku ngagai Jehovah. Nyadi, kita ulih semak ngagai Iya ngena sampi ba sebarang maya. (Hebrew 4:14-16) Enti ati kitai meruan beresi, kitai bisi runding ti manah, bebasaka diri empu, sereta bulih pengelantang ba pengidup.

17. Ketegal pemati Jesus, nama berekat diulih kitai?

¹⁷ Peluang idup belama iya ba paradais di dunya tu. “Laban upah dosa nya pemati,” ku Rome 6:23. Ayat ti  sama madah: ‘Tang pemeri ti diberi Petara pechuma nya pengidup ti meruan belama iya dalam Jesus Kristus.’ Ba Pelajar 3, kitai udah belajarka berekat ti deka diasaika ba dunya Paradais ke deka datai. (Pemandang 21:3, 4) Laban Jesus udah mati ketegal kitai, kitai bulih semua berekat tu, nyengkaum pengerai ti sempurna enggau pengidup ti belama iya. Enti deka nerima berekat nya, kitai patut nunjukka diri beterima kasih ke tebus tu.

18. Nama kebuah kitai patut beterima kasih ngagai Jehovah ke udah nyediaka tebus?

¹⁸ Nama kebuah kitai patut beterima kasih ngagai Jehovah ke udah meri kitai tebus? Chunto, enti orang udah ngena jam, tulang tauka duit nyediaka pemeri ngagai nuan, pemeri nya tentu amat berega. Kitai gaga ati laban pemeri orang nya nunjukka pengerindu iya ngagai kitai. Tebus pemeri ti pemadu berega laban Petara udah nyerahka utai ti pemadu berega ari Iya. John 3:16 madah: ‘Laban Petara balat rinduka dunya,  nya alai Iya meri Anak tunggal Iya.’ Tebus tu ngayanka pengerindu Jehovah ti pemadu besai ngagai kitai. Tu mega ngayanka pengerindu Jesus, laban iya deka meri nyawa iya ke kitai. (John 15:13) Nya alai, tebus nya patut ngasuh kitai pechaya Jehovah enggau Anak Iya sayau bendar ke genap iku kitai.—Galatia 2:20.

19, 20. Baka ni nuan beterima kasih ke tebus ti diberi Petara?

¹⁹ Baka ni nuan beterima kasih ke tebus ti diberi Petara? Keterubah, belajar mayuh agi pasal Jehovah, Pemeri ti Pemadu Besai. (John 17:3) Belajar Bup Kudus ngena bup tu ulih nulung nuan nambahka penemu pasal Jehovah, lalu ngenalamka pengerindu nuan ngagai Iya. Enggau nya, nuan deka diperansang ngereja utai ti ngagaka ati Iya.—1 John 5:3.

²⁰ Manggaika pengarap ba genselan nyawa Jesus. Pasal Jesus, Bup Kudus madah: “Barang sapa arapka Anak [Jesus], bulih pengidup ti meruan belama iya.” (John 3:36) Baka ni kitai ulih manggaika pengarap ba Jesus? Pengarap tu enda ulih dipeda ari jaku aja. “Baka nya mega pengarap; iya mati enti iya nadai pengawa” ku James 2:26. Ya, pengarap ti bendar diayanka ari pengawa kitai. Siti chara kitai ulih ngayanka pengarap ba Jesus iya nya enggau niru teladan iya ukai semina ari jaku kitai, tang ari ulah kitai mega.—John 13:15.

21, 22. (a) Nama kebuah kitai patut datai ngintu Ngingatka Hari Pemati Jesus ninting taun? (b) Nama deka dipelajarka ba Pelajar 6 enggau 7?

²¹ Datai ngintu Ngingatka Hari Pemati Jesus ninting taun. Kena malam 14 haribulan Nisan 33 M., Jesus udah ngepunka siti pengawa ti istimewa ke dikumbai ‘malam pemakai Tuan.’ (Matthew 26:26-28, NW) Pengawa tu mega dikumbai Ngingatka Hari Pemati Jesus.  Jesus ngintu pengawa tu kena nulung bala rasul iya enggau semua orang Kristian ti ngasi ngingatka iya, ke udah nyerahka nyawa diri ti sempurna nyadi tebus. Pasal pengawa tu, Jesus meri perintah: “Kereja tu kena ngingatka aku.” (Luke 22:19) Pengawa tu ngingatka kitai pasal pengerindu besai ti diayanka Jehovah enggau Jesus ke bekaul enggau tebus. Kitai ulih nunjukka terima kasih ke tebus nya enggau datai ngintu Ngingatka Hari Pemati Jesus ninting taun. a

²² Tebus ti disediaka Jehovah tu endang pemeri ti pemadu berega. (2 Korint 9:14, 15) Pia mega, pemeri tu ulih meri berekat ke sida ti udah mati. Pelajar 6 enggau 7 deka nerangka baka ni utai tu nyadi.