1, 2. Nama kebuah kitai patut betanya?

ANAK mit selalu betanya. Sida engka nanya: Nama utai nya? Sapa ngaga bintang? Nama kebuah burung ulih terebai? Nuan engka bebendar deka nyaut tanya nya, tang iya enda selalu senang. Saut pemadu manah ke diberi nuan engka ngemai ngagai siti agi tanya: Nama kebuah?

² Ukai semina anak mit aja ke betanya. Orang besai tuai pan betanya. Kitai betanya laban kitai deka nemu penunga jalai, belajar nyeliahka utai ti tau ngenusah, tauka ngemuaska ati ti deka nemu. Tang, mayuh orang ngetu betanyaka utai ti beguna bendar ba pengidup sida.

3. Nama kebuah orang enggai ngiga saut ngagai tanya ti beguna bendar?

³ Uji pikirka tanya ba mua bup tu, ba lambar 3 enggau 6, tauka  ba pun Pelajar 1 bup tu. Semua tanya nya beguna  bendar. Tang, mayuh orang enggai ngiga saut iya. Nama kebuah? Kati Bup Kudus bisi saut iya? Sekeda orang ngasaika tusah deka nemu saut ba Bup Kudus. Bisi mega irau enggaika utai ti ditanya ngasuh sida malu, sereta bepikir semina bala tuai pengarap aja ti ulih nyaut tanya nya. Baka ni enggau nuan empu deh?

4, 5. Nama tanya ti beguna bendar ke ulih ditanya nuan, lalu nama kebuah nuan patut ngiga saut iya?

⁴ Nuan engka deka ngiga saut ngagai tanya ti beguna bendar tu. Nuan engka kala nanya: ‘Nama kebuah aku idup? Kati aku semina ulih idup 70 ngagai 80 taun aja? Kati Petara amat bisi?’ Nuan patut dipuji enti betanya baka nya. Anang ngetu sebedau nuan tetemuka saut iya. Jesus Kristus, seiku pengajar ke tebilang kala bejaku: “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita.”—Matthew 7:7.

⁵ Enti nuan “terus ngiga” saut iya, nuan ulih tetemuka iya. (Jaku Dalam 2:1-5) Sekeda orang engka madah tanya nya enda ulih disaut. Tang, saut iya ulih ditemu ba Bup Kudus. Saut iya mega ulih meri pengadang tauka peluang, mai pengaga ati sereta nulung nuan ngasaika pengidup ti ngelantangka ati. Aram kitai berandauka sekeda tanya ti ngenusahka ati mayuh orang.

6. Nama kebuah mayuh orang ngumbai Petara enda ibuhka kitai?

⁶ Mayuh orang nyaut “enda.” Ku sida, ‘Enti Petara amat ibuh, dunya kitai engka enda baka tu.’ Peda meh dunya kitai. Perang, pemenchi enggau pemerinsa bisi  ba sebarang endur. Kitai empu sakit, merinsa, sereta lenyau orang ti dikesayau. Nya alai, mayuh orang bejaku, ‘Enti Petara ibuhka kitai enggau penusah kitai, Iya tentu udah nagang penyai ari nyadi.’

7. (a) Baka ni sekeda tuai pengarap ngasuh orang bepikir Petara nya enda sinu? (b) Nama utai ti bendar diajar Bup Kudus pasal penusah kitai?

⁷ Siti agi, sekeda tuai pengarap ngasuh orang bepikir Petara nya enda sinu. Nama kebuah? Laban maya penusah bisi nuntung, sida madahka nya udah diatur Petara. Enggau tu, sida nyalahka Petara ketegal utai ti nyadi. Kati nya pemendar pasal Petara? Nama utai ti bendar diajar Bup Kudus? James 1:13 madahka: ‘Orang ke kena laban penguji, enda tau nyebut, “Aku diuji Petara,” laban Petara enda ulih diuji penyai, lalu Iya Empu enda nguji orang.’ Nyadi, penyai ba dunya tu endang ukai bepun ari Petara. (Jop 34:10-12) Petara endang ngelakka penyai nyadi. Tang, bisi bida ti besai entara ngelak utai nyadi enggau ngasuh iya nyadi.

8, 9. (a) Baka ni nuan madahka bida entara ngelak penyai nyadi enggau ngasuh iya nyadi? (b) Maya mensia milih jalai ti salah, nama kebuah kitai enda patut nyalahka Petara?

⁸ Chunto, seiku apai ke bisi pengerindu diau begulai enggau seiku anak ke udah besai. Nyau kelama, anak nya ngelaban apai lalu mutus deka ninggalka rumah. Tang, apai enda nagang iya. Anak nya milih jalai pengidup ti jai lalu bulih penusah. Kati apai ke ngasuh anak iya bulih penusah? Ukai. (Luke 15:11-13) Baka nya mega, Petara enda nagang mensia maya sida milih jalai ti salah. Tang, ukai Iya ti ngasuh penusah nyadi. Nya alai, kitai enda patut nyalahka Petara ketegal semua penusah ti ninggang mensia.

⁹ Petara bisi kebuah ti manah ngelakka mensia milih  jalai ti salah. Nama kebuah? Laban Iya rinduka kitai. Nuan ulih belajar pasal kebuah nya enggau mayuh agi ba Pelajar 11. Tang, kitai pechaya penusah ti ninggang kitai ukai datai ari Petara. Laban Iya bisi meri pengadang sereta chara mutarka penusah kitai!—Isaiah 33:2.

10. Nama kebuah kitai ulih pechaya Petara deka muai semua penyai?

¹⁰ Pia mega, Petara nya kudus. (Isaiah 6:3) Reti iya, Petara tuchi enggau beresi. Nadai utai ti jai ba Iya. Kitai ulih mutus ati ngasika jaku Iya. Kelebih agi, mensia kemaya hari enda ulih dipechaya. Indah orang ke pemadu bekuasa ba dunya tu, enda ulih muai penyai ti digaga orang jai. Tang, Petara nya pemadu bekuasa. Iya ulih, lalu deka muai penyai ti digaga mensia belama iya!—Masmur 37:9-11.

11. (a) Baka ni asai ati Petara meda pengawa ti enda lurus? (b) Baka ni asai ati Petara meda pemerinsa nuan?

¹¹ Tang diatu, baka ni asai ati Petara meda utai ti nyadi ba dunya tu enggau ba pengidup nuan? Bup Kudus ngajar, Petara “rinduka atur ti lurus,” lalu Iya begedika pengawa ti enda lurus. (Masmur 37:28) Bup Kudus madah, Petara “balat amat ngesalka nya” maya dunya tu penuh enggau penyai kelia menya. (Pemungkal 6:5, 6) Petara enda berubah. (Malaki 3:6) Iya agi begedi meda pemerinsa mensia ba dunya tu. “Iya ngibun kita,” ku Bup Kudus.—1 Peter 5:7.

12, 13. (a) Nama kebuah kitai bisi pemanah baka pengerindu, lalu baka ni pengerindu tu ngubah chara kitai meda pemerinsa? (b) Nama kebuah nuan tau pechaya Petara deka muai pemerinsa ba dunya tu?

¹² Baka ni kitai nemu Petara Jehovah begedi meda  pemerinsa? Bup Kudus ngajar, mensia digaga baka gamal Petara. (Pemungkal 1:26) Nya kebuah kitai bisi pemanah. Chunto, baka ni asai ati nuan meda orang ke enda salah merinsa? Enti nuan enggai meda pengawa ti enda lurus, Petara tentu enggai agi.

¹³ Kitai mensia bisi siti pemanah ti nyulut, iya nya pengerindu. Bup Kudus ngajar, ‘Petara endang pengerindu.’ (1 John 4:8) Nyadi, kitai bisi pengerindu ti sebaka enggau enggi Petara. Enti nuan bisi pengerindu enggau kuasa, deka nuan muai pemerinsa sereta pengawa ti enda lurus ba dunya tu? Tentu nuan deka! Nyadi nuan tau pechaya Petara mega deka muai pemerinsa enggau pengawa ti enda lurus. Semaya tauka janji Petara ke dipadah ba lambar 4 enggau 5 bup tu ukai semaya ngapa. Semua nya deka dikeamatka! Enti nuan ngelala Petara enggau mayuh agi, nuan ulih pechayaka semua semaya Iya.

14. Sapa nama Petara? Nama kebuah kitai patut ngena nama Iya?

¹⁴ Nama digaga nuan ngambika orang bukai ulih ngelala nuan? Nuan tentu madahka nama diri ngagai iya. Sapa nama Petara? Sekeda orang pechaya nama Petara nya “TUHAN” tauka “Allah Taala.” Tang, nya ukai nama Iya. Nya semina  gelar, baka “tuai rumah” tauka “pengulu.” Bup Kudus madah Petara ti ngaga semua utai, bisi nama. Nama Iya, Jehovah. Bup Masmur 83:18 madah: “Awakka sida nemu Nuan siku aja ti TUHAN [Jehovah, NW], Raja ti Pemadu Tinggi ke serata dunya.” Enti deka nemu mayuh agi nama kebuah Bup Kudus enda ngena nama Petara, peda meh Penerang ba lambar 195-197 bup tu. Ba Bup Kudus jeman kelia, nama Petara bisi ayan beribu kali. Nya alai, Petara ngena Bup Kudus madahka diri ngagai nuan. Petara deka nuan nemu sereta ngena nama Iya.

15. Nama reti Jehovah?

 ¹⁵ Nama Jehovah bisi reti. Reti iya, Petara ulih ngamatka semua semaya enggau peneka Iya. * Nama Jehovah nya lain ari nama ti bukai, lalu semina Iya aja ti ulih ngena nama nya. Jehovah mega enda sebaka enggau petara ke bukai dalam sekeda pekara. Baka ni kitai nemu?

16, 17. Nama utai ulih dipelajarka kitai pasal Jehovah: (a) “ti Pemadu Bekuasa”? (b) “Raja ke meruan belama iya”? (c) “ngaga semua utai”?

¹⁶ Masmur 83:18 madahka pasal Jehovah: “Nuan siku aja ti TUHAN, Raja ti Pemadu Tinggi ke serata  dunya.” Baka nya mega, Pemandang 15:3 madahka: ‘Naka meh pemesai enggau pemanah kereja Nuan, O Jehovah Petara ti Pemadu Bekuasa!’ Gelar “Pemadu Bekuasa” tu ngajar kitai Petara nya bisi kuasa ti pemadu besai ba dunya, lalu kuasa Iya enda ulih dialahka. Jehovah mega digelar, “Raja ke meruan belama iya.” Masmur 90:2 madahka: ‘Nuan endang Petara ti meruan belama iya, nadai pun nadai ujung, lalu Nuan deka nyadi Petara belama iya.’ Enda ke tu ngerinduka ati nuan?

¹⁷ Jehovah mega lain ari petara ke bukai. Nama kebuah? Laban Iya ngaga semua utai. Pemandang 4:11 madahka: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.’ Pikirka utai ba serega, bintang di langit, buah ke tumbuh ba pun kayu, tauka ikan ba tasik enggau ba sungai. Semua utainya bisi laban digaga Jehovah!

18. Nama kebuah sekeda orang ngasaika diri enda ulih semak ngagai Petara? Tang nama ajar Bup Kudus?

¹⁸ Sekeda orang irau ati maya macha pasal pemanah Jehovah. Sida ngumbai Petara nya kelalu kudus. Nya alai, sida ngasaika diri enda ulih semak ngagai Iya tauka enda beguna ba Iya. Kati runding tu betul? Enda! Bup Kudus madahka: ‘Petara enda jauh ari kitai siku-siku.’ (Kereja Rasul 17:27) Bup Kudus pan ngansak kitai: ‘Datai semak ngagai Petara, lalu Iya deka datai semak ngagai kita.’—James 4:8.

19. (a) Baka ni kitai ulih semak ngagai Petara, lalu nama penguntung iya? (b) Nama pemanah Petara ti dikerinduka nuan?

 ¹⁹ Baka ni nuan ulih semak ngagai Petara? Keterubah, nuan patut belajar pasal Iya. Ku Jesus: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (John 17:3) Ya, Bup Kudus ngajar pasal Jehovah, tang Jesus ngemai ngagai “pengidup ti meruan belama iya”! Baka udah dipadah, ‘Petara rindu ka kitai.’ (1 John 4:16) Jehovah bisi pemanah ti bukai. Chunto, Bup Kudus madah, Jehovah nya ‘Petara ti kasih sereta siru, lubah ringat, sereta mandangka penetap ati enggau pengerindu ti besai.’ (Pemansut 34:6) Iya “endang manah enggau kami, sereta ngampun.” (Masmur 86:5) Petara sabar. (2 Peter 3:9) Iya kudus. (Pemandang 15:4) Maya nuan macha Bup Kudus, nuan ulih meda Jehovah bisi mayuh agi pemanah ti bukai.

20-22. (a) Taja pan nuan enda ulih meda Petara, patut tu nagang nuan semak ngagai Iya? Terangka. (b) Sekeda orang deka ngasuh nuan badu belajarka Bup Kudus, tang nama patut digaga nuan?

²⁰ Nuan amat enda ulih meda Petara laban Iya roh. (John 1:18; 4:24; 1 Timoti 1:17) Tang, nuan ulih ngelala Jehovah enggau mayuh agi maya belajarka Bup Kudus. Baka ke ditulis ba bup Masmur, nuan ulih ‘belematika pemadas Jehovah.’ (Masmur 27:4; Rome 1:20) Enti nuan belajar mayuh agi pasal Jehovah, nuan deka ngasaika Iya amat bisi. Nuan mega bisi kebuah deka rinduka Iya sereta semak ngagai Iya.

²¹ Nuan ulih nemu nama kebuah Bup Kudus ngumbai Jehovah nya Apai kitai. (Matthew 6:9) Iya ukai semina meri kitai nyawa, tang Iya mega deka kitai bulih pengidup ti meruan, baka apai ke sayauka anak iya. (Masmur 36:9) Bup Kudus mega ngajar, kitai ulih  nyadi pangan Petara. (James 2:23) Uji pikir—nuan ulih nyadi pangan Petara ti ngaga semua utai ba dunya!

²² Maya nuan belajar mayuh agi pasal Bup Kudus, sekeda orang deka nagang nuan belajar. Sida irau ati enggaika nuan ninggalka pengarap lama nuan. Tang, anang ngasuh sida nagang nuan bulih kaul ti berega enggau Petara.

23, 24. (a) Nama kebuah nuan patut terus betanya pasal utai ti dipelajar nuan? (b) Pengudah pelajar tu, nama utai deka dipelajar nuan?

²³ Nuan engka enda nemu sekeda utai ba Bup Kudus, tang anang malu betanya. Jesus madah, kitai patut baruh ati baka anak mit. (Matthew 18:2-4) Kitai nemu anak mit mayuh betanya. Petara deka nuan nemu saut iya. Bup Kudus muji sekeda orang ke bebendar belajar pasal Petara. Sida mansik Bup Kudus kena nentuka utai ti dipelajarka nya endang amat.—Kereja Rasul 17:11.

²⁴ Meresa Bup Kudus nya chara ti pemadu manah belajar pasal Petara. Pengudah pelajar tu, kitai deka belajar kebuah Bup Kudus enda sebaka enggau bup bukai.