Nama Petara ke ditulis ngena empat iti urup konsonan Hebrew יהוה, ayan nyauka 7,000 kali ba Sempekat Lama (Pemungkal ngagai Malaki). Empat iti urup tu dikumbai Tetragrammaton, lalu ba Salin Dunya Baru iya dikalihka nyadi “Jehovah.” Nama tu meh ke paling suah ayan ba Bup Kudus. Bala penulis Bup Kudus ke diiring kuasa kudus ngena mayuh gelar, baka “ti Pemadu Bekuasa,” “ti Pemadu Tinggi,” enggau “Tuan,” kena merujuk ngagai Petara. Tang, sida semina ngena Tetragrammaton lebuh nyebut nama Petara.

Petara Jehovah Empu ke ngasuh bala penulis Bup Kudus ngena nama Iya. Ambika chunto, Iya ngiring nabi Joel ngambika nulis: “Semua orang ke minta tulung TUHAN [Jehovah] deka dilepaska.” (Joel 2:32, peda Jaku Penerang BKB, genteran 3) Petara mega ngiring siku pemasmur ngambika nulis: “Awakka sida nemu Nuan siku aja ti TUHAN [Jehovah], Raja ti Pemadu Tinggi ke serata dunya.” (Masmur 83:18, peda Jaku Penerang BKB, genteran 3) Indah ba bup Masmur (bup puisi ke dibacha sereta dikena nembiak Petara belagu) aja, nama Petara ayan kira-kira 700 kali. Nya alai, nama kebuah nama Petara nadai ayan ba mayuh Bup Kudus ke udah dikalihka ngagai mayuh bansa jaku bukai? Nama kebuah Salin Dunya Baru ngena nama “Jehovah”? Nama reti nama Jehovah?

Nama kebuah nama Petara nadai ayan ba mayuh Bup Kudus ke udah dikalihka ngagai mayuh bansa jaku bukai? Bisi bemacham kebuah. Sekeda orang ngasaika Petara ti Pemadu Bekuasa enda ibuh bisi nama. Bisi sekeda nya, ketegal dipengaruhi tradisi orang Judah, sida nyeliahka diri ari ngena nama nya, engka ketegal sida enggai ngasuh nama nya enda tuchi. Sekeda ke bukai berunding, manah agi ngena gelar baka “Tuan” tauka “Petara,” laban nadai orang nemu chara ti betul nyebut nama Petara. Taja pia, peratika sekeda penerang tu ke nunjukka nama kebuah runding ke baka nya enda ngena:

•   Nama Petara bisi ditulis ba Jaku Petara kelia menya, nyengkaum iya ke disimpan sebedau jeman Kristus. Sida ke ngasaika Petara ti Pemadu Bekuasa enda ibuh bisi nama, kebendar iya enda pedulika bukti nya. Baka ke dipadah ba atas, Petara ngasuh nama Iya ditulis ba Jaku Iya nyauka 7,000 kali. Tu terang amat nunjukka, Iya deka kitai nemu sereta ngena nama Iya.

• Bala penterjemah ke muai nama Petara ketegal dipengaruhi tradisi orang Judah, kebendar iya enda sedarka pekara ti penting tu: Taja pan sekeda bala penulis Adat orang Judah enggai nyebut nama Petara, tang sida enda muai nama nya lebuh sida ngupi ayat Bup Kudus. Nama Petara bisi ayan ba mayuh endur, ba gulung surat kelia menya, ke ditemu ba Qumran, semak Tasik Mati. Sekeda penterjemah Bup Kudus ngena gelar “TUAN” ke ditulis dalam urup besai kena nunjukka nama Petara bisi ayan ba teks ti asal. Tang tanya iya: Nama kebuah bala penterjemah tu ngasaika sida ulih bibas nganti tauka muai nama Petara ari Bup Kudus, taja pan sida nemu nama nya bisi ayan beribu kali ba Bup Kudus? Sapa ke meri sida kuasa kena ngereja utai ke baka nya? Semina sida aja ke nemu saut iya.

• Sida ke madahka nama Petara enda patut dikena ketegal enda nemu chara ti betul kena nyebut nama nya, agi terus ngena nama Jesus. Tang, chara bala murid Jesus maya abad keterubah nyebut nama Jesus lain ari chara mayuh orang Kristian kemayaharitu nyebut nama Jesus. Orang Kristian ke bansa Judah, engka nyebut nama Jesus Ye·shuʹa‛, lalu gelar “Kristus” disebut Ma·shiʹach, tauka “Messiah.” Orang Kristian ke ngena jaku Gerika ngangauka Jesus I·e·sousʹ Khri·stosʹ, lalu orang Kristian ke ngena jaku Latin ngangauka iya Ieʹsus Chriʹstus. Tang, nengah iring kuasa kudus, nama iya dikalihka ba Bup Kudus nitihka sebutan dalam jaku Gerika. Nya alai, orang Kristian ba abad keterubah nunjukka diri bisi runding ti masuk akal, laban sida ngena sebutan nama ke biasa dikena ba bansa jaku sida empu. Pia mega, Komiti Bup Kudus Salin Dunya Baru ngasaika endang masuk akal ngena sepil “Jehovah,” taja pan sebutan sepil nya enda entu sama enggau sebutan asal nama Petara ba jaku Hebrew kelia menya.

Nama kebuah Salin Dunya Baru ngena sepil “Jehovah”? Dalam English, empat iti urup ba Tetragrammaton (יהוה) ditulis ngena konsonan YHWH. Sama baka tulisan jaku Hebrew kelia menya, Tetragrammaton mega nadai urup vokal (a, e, i, o, u). Lebuh jaku Hebrew kelia menya dikena ninting hari, bala pemacha ulih enggau senang nambah kediri empu urup vokal ti sesuai.

Urung seribu taun pengudah Sempekat Lama tembu ditulis, pakar orang Judah numbuhka siti sistem sebutan ke ngena tanda. Sistem  nya deka nunjukka nama urup vokal ke patut dikena lebuh macha jaku Hebrew. Tang, maya nya mayuh orang Judah pechayaka penemu ti salah, ke ngumbai nama Petara enda patut disebut. Nyadi, sida nganti nama Petara ngena rambai jaku bukai. Lebuh sida ngupi Tetragrammaton, sida engka ngambi urup vokal ari rambai jaku ke dikena nganti nama Petara, lalu nyegulaika urup vokal nya enggau empat urup konsonan ba Tetragrammaton nya. Nya alai, manuskrip ke ngena sistem tanda vokal nya enda ulih dikena nentuka baka ni orang nyebut nama Petara dalam jaku asal Hebrew. Bisi orang ngumbai sebutan iya “Yahweh,” tang bisi mega ke ngasaika iya patut disebut ngena chara bukai. Gulung Surat Tasik Mati ke ngembuan sebagi ari teks Bup Adat Lewi dalam jaku Gerika ngalihka nama Petara nitihka sebutan asal, iya nya Iao. Kelimpah ari nya, bala penulis jaku Gerika kelia menya mega madahka iya engka disebut Iae, I·a·beʹ, enggau I·a·ou·eʹ. Taja pia, nadai siku pan ke patut bekeras enggau penemu diri empu. Kitai enda nemu baka ni nembiak Petara kelia menya nyebut nama Iya dalam jaku Hebrew. (Pemungkal 13:4; Pemansut 3:15) Iya ke ditemu kitai, iya nya Petara suah ngena nama Iya lebuh bejaku enggau bala nembiak Iya. Bala nembiak Iya ngangauka Iya ngena nama nya, lalu sida suah ngena nama Iya lebuh bejaku enggau orang bukai.—Pemansut 6:2; 1 Raja 8:23; Masmur 99:9.

Nyadi, nama kebuah Salin Dunya Baru ngena sepil nama “Jehovah”? Nya ketegal sepil nama Petara tu udah lama dikena ba jaku English.

Nama Petara keterubah kali dikalihka ba Bup Kudus English, Pentateuch (iya nya, lima bup mit ti keterubah dalam Bup Kudus), kena taun 1530. Ba Bup Kudus nya, William Tyndale ngena sepil “Iehouah.” Nyau kelama, jaku English berubah lalu sepil nama Petara ti moden agi dikena. Ambika chunto, kena taun 1612, lebuh ngalihka  bup Masmur, Henry Ainsworth ngena sepil “Iehovah.” Udah nya, kena taun 1639, sepil nama “Jehovah” dikena lebuh bup nya diaduka baru lalu dichelak begulai enggau Pentateuch. Kena taun 1901, bala penterjemah Bup Kudus American Standard Version ngena sepil “Jehovah” lebuh ngalihka nama Petara ari teks Hebrew ba Sempekat Lama.

Kena taun 1911, Joseph Bryant Rotherham, siku pakar Bup Kudus ti dipebasa, nerangka kebuah iya ngena sepil “Jehovah” ari ke ngena sepil “Yahweh” lebuh ngasilka bup Studies in the Psalms. Iya madahka iya deka ngena “nama ke biasa agi dikena (sereta ke ulih diterima) mayuh bala pemacha Bup Kudus.” Kena taun 1930, siku pakar ke benama A. F. Kirkpatrick mega madahka utai ti sama pasal sepil nama “Jehovah.” Ku iya: “Bala pakar tatabahasa moden madahka nama nya patut disebut Yahveh tauka Yahaveh; tang sebutan JEHOVAH udah lekat amat ba jaku English. Sebutan ti betul enda entu penting. Iya ke penting agi nya, orang sedar nya endang Nama Endar, ukai semina gelar baka ‘Tuan.’”

Nama reti nama Jehovah? Ba jaku Hebrew, nama Jehovah datai ari kata kereja ke mai reti “nyadi.” Sekeda pakar ngasaika kata kereja tu mai reti kausatif (ngasuh sesiku orang tauka sesiti utai ngereja utai nitihka kata kereja tu). Nya alai, Komiti Bup Kudus Salin Dunya Baru, nyimpulka nama Petara mai reti “Iya Ngasuh Nyadi.” Bala pakar bisi mayuh runding ti enda sebaka. Nya alai, kitai enda patut bekeras pasal reti tu. Taja pia, reti tu amat sesuai enggau peranan Jehovah ke ngaga semua utai sereta ke ngamatka tuju Iya Empu. Iya ukai aja ngaga dunya raya enggau semua utai ke bisi akal runding. Tang, udah nya, Iya mega terus ngasuh peneka enggau tuju Iya dikeamatka.

Nyadi, reti nama Jehovah ukai semina nyengkaum kata kereja ke bisi ba nota kaki Pemansut 3:14: “Aku Deka Nyadi Sebarang Utai Aku Deka.” Rambai jaku tu enda nerangka reti nama Petara enggau pengabis iya. Tang, rambai jaku tu nunjukka sebagi ari sifat Petara. Dalam tiap iti situasi, Petara ulih nyadi sebarang utai kena ngamatka tuju Iya. Taja pan nya sebagi ari reti nama Jehovah, tang iya ukai reti nama Jehovah ti pengabis iya. Reti nama Jehovah mega nyengkaum, Iya ulih ngasuh utai ke digaga tauka dicipta Iya, nyadi sebarang utai ke dikedekaka Iya, lalu Iya mega ulih ngasuh tuju Iya dikeamatka nitihka peneka Iya.