Ulang Adat 7:1-26
7 “Lebuh Jehovah, Petara kita, mai kita ngagai menua ke deka diempu kita, Iya deka muru tujuh iti bansa ti mayuh agi sereta kering agi ari kita, iya nya orang Het, orang Girgas, orang Amor, orang Kanaan, orang Peris, orang Ibi, enggau orang Jebus.
2 Jehovah, Petara kita, deka nyerahka sida ngagai kita lalu kita deka ngalahka sida. Kita mesti ngemunaska sida abis lengis. Anang ngaga sempekat enggau sida, lalu anang kasihka sida.
3 Anang jadi enggau bala sida ketegal deka ngulihka kaul ti rapat enggau sida. Anang ngasuh anak indu kita jadi enggau anak lelaki sida, lalu anang ngambi anak indu sida nyadika bini anak lelaki kita,
4 laban bala anak sida deka ngasuh bala anak kita limpang lalu nyembah petara-petara bukai. Enti utai tu nyadi, Jehovah tentu deka ringat ngagai kita lalu Iya deka ngemunaska kita tekala nya.
5 “Tu utai ke patut digaga kita: Runtuhka alta* sida, pechahka tiang batu keramat sida, tebang tiang kayu keramat sida, lalu tunu semua patung ke digaga sida.
6 Tu ketegal kita bansa ti kudus ba Jehovah, Petara kita. Jehovah udah milih kita nyadi nembiak Iya, iya nya bansa Iya ti istimewa,* ke dipilih Iya ari semua bansa ba dunya tu.
7 “Kati Jehovah nunjukka pengerindu ngagai kita sereta milih kita ketegal kita mayuh agi ari bansa bukai? Enda. Kebendar iya, kita meh bansa ti pemadu mimit ari semua bansa.
8 Jehovah sayauka kita lalu deka ngamatka semaya ke udah digaga Iya enggau aki ini kita. Nya kebuah Iya ngelepaska kita ari kuasa Firaun, iya nya raja Ejip. Jehovah ngena jari Iya ti bekuasa nyelamatka kita ari Ejip, iya nya menua alai kita nyadi ulun.
9 Kita nemu, Jehovah, Petara kita, endang Petara ti bendar sereta tau dikearapka. Iya ngamatka sempekat Iya sereta setia ngayanka pengerindu Iya ngagai beribu generasi* ke rinduka Iya sereta ngasika pesan Iya.
10 Iya deka ngemunaska orang ke begedika Iya. Iya enda kakang ati deka ngukum lalu malas orang ke begedika Iya.
11 Nya alai, titihka enggau manah semua pesan, adat, enggau atur ke dipadahka aku ngagai kita seharitu.
12 “Enti kita seruran mending sereta nitihka semua atur nya, Jehovah, Petara kita, deka seruran ngamatka sempekat Iya enggau kita sereta setia ngayanka pengerindu Iya, baka ke udah disemayaka Iya ngagai aki ini kita.
13 Iya deka sayauka kita, merekatka kita, sereta ngasuh penyampau kita nyadi mayuh. Iya deka meri kita mayuh anak. Iya deka merekatka tanah kita ngambika kita bulih bijirin, minyak, enggau wain ti baru. Iya mega deka merekatka jelu tupi kita ngambika kita bulih mayuh sapi enggau bedus. Iya deka meri kita semua berekat tu ba menua ke deka diberi Iya ngagai kita, nitihka semaya ke udah digaga Iya enggau aki ini kita.
14 Bansa kita deka bulih berekat ti besai agi ari bansa ke bukai. Semua kita deka bulih peturun, lalu jelu tupi kita ulih beranak.
15 Jehovah deka muai semua penyakit kita. Iya enda nejuka penyakit ti raya ke bisi ba menua Ejip ninggang kita. Tang, Iya deka ngasuh penyakit nya ninggang semua orang ke begedika kita.
16 Kita mesti ngemunaska semua orang ke diserahka Jehovah ngagai kita. Anang kasihka sida lalu anang nyembah petara-petara sida, laban nya deka nyadi panjuk ngagai kita.
17 “Engka kita bejaku munyi tu dalam ati kita: ‘Semua bansa nya mayuh agi ari kami. Baka ni kami ulih muru sida?’
18 Anang takutka sida. Kingatka utai ke udah digaga Jehovah, Petara kita, ngagai Firaun enggau ngagai semua orang Ejip.
19 Kingatka meh baka ni Jehovah udah ngukum sida enggau balat. Ba depan mata kita empu, Iya udah ngena mayuh tanda enggau utai ti luar biasa kena mai kita pansut ari Ejip. Enggau chara ti sama mega, Jehovah, Petara kita, deka ngena jari Iya ti kering sereta bekuasa ngemunaska semua bansa ke diketakutka kita nya.
20 Jehovah, Petara kita, deka ngasuh bala munsuh kita lemi semengat.* Iya deka ngemunaska sida ke agi idup sereta sida ke belalai ari kita.
21 Anang takutka sida, laban Jehovah, Petara kita, bisi enggau kita. Iya Petara ti bekuasa, ke patut dipebasa sereta dikenangi.
22 “Jehovah, Petara kita, deka muru sida mimit-mimit. Kita enda tau ngemunaska sida sekali gus, enggaika jelu liar majak mayuh lalu ngachau kita.
23 Jehovah, Petara kita, deka nyerahka sida ngagai kita, lalu Iya deka ngalahka sida sereta ngemunaska sida abis lengis.
24 Iya deka nyerahka bala raja sida ngagai kita, lalu nadai orang deka ingatka nama sida. Nadai siku pan orang ulih ngalahka kita. Kita deka ngemunaska sida abis lengis.
25 Kita mesti nunu patung ke digaga sida. Anang inginka lalu ngambi pirak enggau emas ke bisi ba patung ke digaga sida nya, laban nya deka nyadi panjuk ke kita. Jehovah, Petara kita, amat begedika semua utai nya.
26 Anang mai utai ke dipegedika Petara ngagai rumah kita. Enti kita mai nya, kita deka dipunaska sama enggau utai nya. Kita mesti begedika semua utai nya enggau pengabis ati kita, laban semua utai nya endang patut dianchurka.
Nota Kaki
^ Peda Penerang Leka Jaku.
^ Tauka “bansa ti berega ba Iya.”
^ Tauka “serak.”
^ Tauka engka, “balat kesal; takut.”
