Rome 10:1-21
10 Bala menyadi, aku deka orang Israel diselamatka, lalu aku bebendar besampi pasal nya ngagai Petara.
2 Aku ulih nyadi saksi pasal sida ke ransing nyembah Petara. Tang sida enda nitihka penemu ti betul.
3 Laban sida enda nemu utai ke dikumbai Petara ngena, sida nitihka chara sida empu. Nyadi sida enda ngasika utai ke lurus ba Petara.
4 Kristus mai pengujung ngagai Adat. Nya alai, diatu, semua orang ke arapka iya deka dikumbai lurus.
5 Moses bisi nulis pasal utai ke dikumbai lurus ba Adat: “Orang ke nitihka Adat deka idup.”
6 Tang Bup Kudus mega madahka orang ke arap tau dikumbai lurus. Ku Bup Kudus: “Anang nyebut dalam ati nuan, ‘Sapa deka niki ke serega?’ iya nya, ngambika mai Kristus nurun,
7 tauka ‘Sapa deka nurun ngagai lubang ti amat dalam?’* iya nya, ngambika mai Kristus pansut ari bala orang mati.”
8 Tang nama dipadah Bup Kudus? “Pesan nya semak enggau kita, iya nya bisi ba mulut enggau ba ati kita empu.” Nya pesan ke ditusui kitai, lalu orang patut arap ngambika sida ulih nerima pesan nya.
9 Enti kita ngena mulut kita nusui ngagai orang mayuh pasal Jesus nya Tuan, lalu enti kita arap enggau pengabis ati Petara udah ngidupka iya ari mati, kita deka selamat.
10 Nya ketegal ari ati, kita patut ngayanka diri arap ngambika dikumbai lurus. Tang ngena mulut kita, kita nusui pesan nya ngagai orang mayuh, lalu nya ngasuh kita diselamatka.
11 Bup Kudus bisi madahka: “Semua orang ke arapka iya enda berasai asa.”
12 Orang Judah enggau orang Gerika nadai bida. Semua kitai bisi Tuan* ke sama. Iya enggau gerah jari nulung semua orang ke ngangauka Iya.
13 Laban “semua orang ke ngangauka nama Jehovah deka diselamatka.”
14 Tang baka ni ku sida ulih ngangauka Iya enti sida enda arapka Iya? Baka ni ku sida deka arapka Iya enti sida enda kala ninga pasal Iya? Baka ni ku sida deka ninga enti nadai orang madahka pasal Iya ngagai sida?
15 Lalu baka ni ku sida deka madah pasal Iya enti nadai orang ngasuh sida ngereja nya?* Bup Kudus bisi madahka: “Naka meh pemanah kaki orang ke nusui Berita Manah pasal utai ti manah!”
16 Tang ukai semua sida ngasika Berita Manah, laban Isaiah bisi madahka: “Jehovah, sapa ke deka arapka berita ke ditusui kami?”
17 Orang semina ulih arap pengudah ninga berita nya, lalu sida ninga berita nya laban bisi orang nusui pasal Kristus.
18 Tang aku nanya pasal orang Israel, Kati sida bisi peluang ninga berita nya? Au, tentu bisi. Indah Bup Kudus madahka: “Bunyi nyawa sida ngelekai nyentuk ngagai serata dunya, lalu berita ke ditusui sida datai ngagai orang ke diau ba ujung dunya.”
19 Aku mega nanya, kati orang Israel enda meretika berita nya? Sida tentu meretika berita nya. Moses bisi madahka: “Aku deka ngasuh kita chemburuka orang ari bansa bukai. Aku deka ngasuh kita ringat ketegal bansa ke beli.”
20 Udah nya, Isaiah enggau berani bejaku: “Aku ditemu sida ke enda ngiga Aku. Aku dikelala sida ke enda nanya pasal Aku.”
21 Tang ku Isaiah madahka jaku Petara pasal orang Israel: “Sepemanjai hari, Aku ngunjurka jari Aku ngagai orang ke enda ngasi sereta kieh.”*
Nota Kaki
^ Peda Penerang Leka Jaku.
^ Jaku Gerika, “Ky′ri·os.” Gelar “Tuan” ulih ditujuka ngagai Petara tauka ngagai Jesus.
^ Engka mai reti, “enti Petara nadai ngasuh sida ngereja nya?”
^ Tauka “bingking; degil.”
