Pilipi 3:1-21
3 Ke pengujung iya, bala menyadi, terus meh gaga ati ketegal Tuan kitai. Aku enda leju nulis utai ti sama ngagai kita, laban nya ulih nyelamatka kita.
2 Bejimat ari sida ke ngembuan ulah baka ukui, ke ngemediska orang, sereta sida ke ngansak orang besunat.*
3 Kitai meh orang ke amat-amat udah disunat, laban kitai ngereja pengawa ti tuchi ngena iring kuasa kudus Petara, temegah ati ke Jesus Kristus, sereta enda manggaika pengarap ba utai ke dikearapka mensia.
4 Kebendar iya, enti dibandingka enggau orang bukai, aku bisi kebuah ti manah agi deka bepanggai ba utai ti dikearapka mensia.
Enti bisi orang ngumbai diri bisi kebuah bepanggai ba utai ti dikearapka mensia, aku bisi kebuah ti manah agi:
5 Aku disunat ba hari kelapan. Aku orang Israel ari raban bansa Benjamin. Aku orang Hebrew ke diadaka orang Hebrew. Aku orang Parisi, lalu aku enggau terit nitihka adat.
6 Aku enggau ransing merinsaka raban gempuru.* Aku enggau terit nitihka utai ti ngena ke dipadah ba adat.
7 Tang ketegal Kristus, diatu aku gaga ati ninggalka semua utai ke besai reti ba aku suba.*
8 Kebendar iya, aku mega ngumbai semua utai nadai guna, enti dibandingka enggau penemu ke jauh berega agi, iya nya pasal Tuan aku, Jesus Kristus. Ketegal iya, aku udah ngelengkaka semua utai, lalu ngumbai utai nya sampah, ngambika aku tau bulih Kristus,
9 lalu beserakup enggau iya. Aku dikumbai lurus ukai ketegal aku udah ngereja semua utai ti ngena nitihka adat, tang ketegal aku arapka Kristus. Aku dikumbai Petara lurus ketegal aku arap.
10 Tuju aku iya nya deka ngelala Kristus, nemu pasal kuasa ke ngidupka iya baru ari mati, sereta sama ngenatka pemerinsa ti ditapi iya. Aku mega sanggup mati baka iya,
11 ngambika aku bisi peluang tumu agi diidupka baru ari mati.
12 Aku bedau nerima upah nya, lalu aku bedau nyadi sempurna. Jesus Kristus udah milih aku nerima upah nya. Nya alai, aku bebendar ngulihka nya.
13 Bala menyadi, aku enda ngumbai diri udah bulih upah nya. Tang tu meh utai ke dikereja aku: Aku enda ngingatka utai ke udah dilengkaka aku, tang bebendar ngulihka utai ba mua.
14 Petara udah ngangauka aku nengah Jesus Kristus, ngambika bulih pengidup ba serega. Lalu aku enggau naka ulih nentuka diri nerima upah nya.
15 Semua kitai ke tegap ba pengarap patut ngembuan runding enggau ulah ti sama tu. Enti kita limpang ngagai utai bukai, Petara deka mandangka runding enggau ulah ti betul ngagai kita.
16 Taja pia, enda ngira naka ni pemansang kitai, aram meh kitai terus mansang ngena chara ti sama tu.
17 Bala menyadi, titihka meh teladan aku. Peratika mega orang bukai ke nitihka teladan kami.
18 Diatu, mayuh nyau nyadi munsuh tiang perinsa* Kristus. Suba, aku suah nyebut pasal sida. Tang diatu, aku nyabak lebuh nyebut pasal sida.
19 Pengujung iya, sida deka dipunaska. Pengingin* sida dikumbai sida petara. Sida temegah ati ngereja utai ti ngemaluka, lalu sida semina berundingka utai ba dunya.
20 Tang kitai peranak* serega, lalu kitai keran nganti Tuan Jesus Kristus, iya nya penyelamat kitai ari serega.
21 Iya deka ngubah tubuh kitai ti lemi tu nyadi baka tubuh iya ti bemulia. Iya ngereja tu ngena kuasa iya ti besai, iya nya kuasa ti sama ke dikena iya ngasuh semua utai nunduk ngagai iya.
Nota Kaki
^ Tauka “ditutus.”
^ Tauka “sidang.”
^ Jaku Asal, “semua utai ke besai reti ba aku suba dikumbai aku pengerugi.”
^ Peda Penerang Leka Jaku.
^ Jaku Asal, “Perut.”
^ Tauka “warganegara.”
