Pilipi 1:1-30
1 Surat tu ari Paul enggau Timoti, ke mega ulun Jesus Kristus. Surat tu ditujuka ngagai semua nembiak Petara ti kudus ba Pilipi, ke beserakup enggau Jesus Kristus, nyengkaum bala tuai gempuru enggau penulung gempuru:
2 Ngarapka kita bulih pemanah ati ti besai sereta pengelantang ari Petara ti Apai kitai enggau ari Tuan Jesus Kristus.
3 Aku seruran beterima kasih ngagai Petara aku, lebuh aku teingatka kita.
4 Tiap kali aku bebendar besampi ke semua kita, aku besampi enggau ati ti gaga.
5 Tu ketegal pengawa kita ke ngerembaika Berita Manah kenyau ari hari ti keterubah kita ninga pasal Berita nya, nyentuk ke seharitu.
6 Petara udah ngepunka pengawa ti badas enggau kita. Aku andal Iya deka nembuka pengawa nya, lalu pengawa nya deka terus dipejalaika nyentuk ngagai hari Jesus Kristus datai.
7 Aku endang patut berunding baka tu pasal semua kita, laban kita seruran ba ati aku. Baka aku, kita mega nerima pemanah ati ti besai ari Petara. Kita mega nyukung aku lebuh aku dijil, sereta lebuh aku ngetanka Berita Manah, enggau lebuh aku bebendar ngulihka hak ari perintah ngambika ulih ngerembaika Berita Manah.
8 Petara nemu pengeran aku ke deka betemu enggau semua kita. Penyayau aku ke kita sama baka penyayau Jesus Kristus ke kita.
9 Aku enda ngetu besampi ngambika pengerindu kita majak nambah, ngambika kita bulih penemu ti ngena, sereta ngambika kita ulih meretika utai enggau dalam agi.
10 Aku besampi ngambika kita nemu ni bagi utai ke beguna* agi. Enggau nya, kita ulih ngembuan ati ti tuchi sereta enda ngasuh orang lenyau pengarap, nyentuk ngagai hari Kristus datai.
11 Aku mega besampi ngambika nengah Jesus Kristus, kita penuh laban pengawa* ti lurus, lalu mai mulia enggau puji ngagai Petara.
12 Bala menyadi, aku deka kita nemu, kebendar iya utai ke nyadi ba aku udah ngasuh Berita Manah majak ngelekai.
13 Semua Jejaga Istana sereta mayuh orang bukai nemu aku dijil ketegal nyadi murid Kristus.
14 Diatu, mayuh bala menyadi ke gawa ke Tuan kitai nyau diperansang ketegal aku dijil. Sida mega nyau enda takut, tang berani agi nusui pesan Petara.
15 Sigi amat, sekeda orang nginjil pasal Kristus ketegal sida kepapas sereta rindu belaban enggau pangan diri. Tang bisi mega sida ke bukai ke nginjil ketegal bisi tuju ati ti manah.
16 Sida nginjil pasal Kristus ketegal pengerindu. Lalu sida nemu aku udah dipilih kena ngetanka Berita Manah.
17 Tang sida ke rindu belaban enggau pangan diri enda nginjil enggau tuju ati ti betul. Sida deka ngenusahka aku lebuh aku dijil.
18 Tang nama nyadi? Pengujung iya, berita pasal Kristus ditusui nengah mayuh macham chara, enda ngira nengah tuju ati ti betul tauka enda. Lalu nya ngasuh aku gaga ati. Aku mega deka majak gaga ati,
19 laban aku nemu, ketegal kita ke bebendar besampi sereta ketegal tulung ari kuasa kudus* nengah Jesus Kristus, aku ulih diselamatka.
20 Aku andal lalu aku ngarapka diri enda malu, ngambika ulih bejaku enggau berani.* Enggau nya, enda ngira aku idup tauka mati, diatu Kristus deka dimuliaka nengah aku, baka iya ke seruran dimuliaka suba.
21 Ba aku, enti aku idup, aku idup ketegal Kristus. Tang enti aku mati, nya mega mai penguntung.
22 Seagi-agi aku idup ba dunya, aku ulih terus ngereja pengawa aku lalu bulih mayuh asil. Tang aku agi enda nemu, ni ke deka dipilih aku.
23 Aku enda nemu milih entara dua iti utai tu. Aku ingin deka dilepaska, ngambika ulih begulai enggau Kristus, laban nya tentu jauh manah agi.
24 Tang ketegal kita, manah agi enti aku mengkang idup ba dunya.
25 Nya alai, ketegal aku andal pasal nya, aku nemu aku deka mengkang idup lalu begulai enggau kita. Enggau nya, kita ulih ngaga pemansang, lalu ngasaika pengaga ti datai ari pengarap ke diayanka kita.
26 Lebuh aku begulai baru enggau kita, kita ke nyadi murid Jesus Kristus deka gaga agi ati ketegal aku.
27 Aku ngarapka pengidup kita sejalai enggau Berita Manah pasal Kristus. Enggau nya, sekalika aku datai ngagai kita tauka enda, aku ulih ninga utai ti manah pasal kita, lalu nemu kita mengkang beserakup, sepenemu, sereta gawa enggau pangan diri kena ngetanka pengarap ba Berita Manah.
28 Anang sekali-kali takutka orang ke ngelaban kita. Pemerani kita nunjukka sida deka dipunaska, tang kita deka diselamatka. Nya meh bukti ari Petara.
29 Kita udah diberi basa, ukai semina kena ngayanka diri arapka Kristus, tang mega kena ngenatka pemerinsa ketegal iya.
30 Kita napi penusah ti sama baka aku, lalu baka ke didinga kita, aku agi napi utai nya.
Nota Kaki
^ Tauka “penting.”
^ Jaku Asal, “buah.”
^ Peda Penerang Leka Jaku.
^ Peda Penerang Leka Jaku, “Bejaku enggau berani.”
