Pengajar 6:1-12
6 Aku meda penusah bukai ke biasa nyadi ba mensia ba dunya tu:
2 Petara ti bendar meri orang pengaya, reta, enggau basa, ngambika semua utai ke dikinginka orang nya bisi magang. Taja pia, Petara ti bendar enda ngemendarka iya ngelantangka diri ngena semua utai nya. Tang, ngemendarka orang ke enda dikelala ngelantangka diri ngena utai nya. Semua nya nadai guna sereta balat ngerugika.
3 Enti orang bisi 100 iku anak lalu ulih idup betaun-taun sampai iya tuai, tang iya enda ulih ngelantangka diri ngena utai ti manah sebedau iya mati, aku ulih madah, manah agi nyadi anak mit ke mati maya ada ari ke idup baka orang nya.
4 Nadai guna anak mit nya ada. Iya mupuk dalam pemetang, lalu nama iya mega dibalut pemetang.
5 Taja pan anak mit nya nadai kala meda mata panas tauka nemu nama-nama utai, tang nya jauh manah agi ari ke idup baka orang nya.
6 Nama guna idup pengelama 2,000 taun tang nadai kala ngelantangka diri? Endaka semua orang nuju ngagai endur ti sama?
7 Mensia mati-mati gawa semina deka ngulihka utai ke diempa, tang sida enda kala puas.
8 Nama pengelebih orang ke bepenemu-dalam enti dibandingka enggau orang ke beli? Nama penguntung iya enti orang ke miskin nemu chara neruska pengidup?
9 Manah agi ngelantangka diri enggau utai ke ulih dipeda, ari ke begagaika pengingin diri. Semua nya mega nadai guna, baka ke begagaika angin.
10 Utai ke udah bisi, udah diberi nama. Ulah mensia kebendar iya mega udah ditemu; iya enda ulih ngelaban orang ke bekuasa agi ari iya.
11 Mayuh agi jaku disebut,* balat agi nya nadai guna. Nama guna nya ke mensia?
12 Pengidup mensia pandak sereta nadai guna baka bayang-bayang. Sapa ulih nemu chara idup ti pemadu manah ke iya? Sapa ulih madah ngagai iya utai ke deka nyadi ba dunya tu pengudah iya mati?
Nota Kaki
^ Tauka engka, “utai.”
