Pengajar 5:1-20
5 Peratika meh singkang nuan lebuh nuan ngagai Rumah Petara ti bendar. Manah agi nuan kin lalu mendingka utai ke dipadah ba din, ari ke meri pemeri baka orang ke beli, ke enda sedarka diri benung ngereja utai ti jai.
2 Mulut nuan anang jampat mansutka jaku, lalu ati nuan anang beguai nyebut utai ba depan Petara ti bendar, laban Petara ti bendar ba serega, tang nuan ba dunya. Anang nyebut mayuh utai lebih ari ti patut.
3 Balat agi orang irau ati, balat agi iya deka bemimpi. Pia mega, mayuh agi orang nya bejaku, mayuh agi utai ti beli ke deka disebut iya.
4 Lebuh nuan ngaga semaya enggau Petara, keamatka meh semaya nuan enggau naka pengelengkas, laban Iya enda rinduka orang ke beli. Keamatka semaya nuan.
5 Manah agi enda ibuh ngaga semaya ari ke ngaga semaya, tang enda ngamatka semaya nya.
6 Anang nejuka mulut nuan ngasuh nuan bedosa, lalu anang madahka diri nyebut utai ti salah ba depan melikat.* Nama kebuah nuan ngasuh Petara ti bendar ringat ketegal jaku nuan nyentukka Iya ngasuh pengawa nuan enda mujur?
7 Baka ati ti balat irau ke ngasuh orang bemimpi, kutap-kutap bejaku mega nadai mai penguntung. Tang, nuan patut nangika Petara ti bendar.
8 Anang tekenyit ati lebuh nuan meda pegawai tinggi nekan orang ke miskin, enda adil, sereta enda lurus ba kawasan nuan. Nya ketegal iya diperatika pegawai ke tinggi agi pangkat ari iya, lalu bisi agi orang bukai ke tinggi agi pangkat ari seduai iya.
9 Pia mega, asil tanah dibagi entara semua sida, indah raja empu pan bepanggai ba asil ke diulih ari ladang.
10 Orang ke rinduka pirak enda kala puas enggau pirak. Sama mega, orang ke rinduka pengaya enda kala puas enggau utai ke diulih iya. Semua utai nya mega nadai guna.
11 Lebuh utai ti manah betambah, orang ke ngabiska utai nya mega betambah. Nama penguntung iya ngagai orang ke ngempu utai nya? Iya semina ulih meda nya aja.
12 Pekereja ulih tinduk jenak, enda ngira utai ke diempa iya mimit tauka mayuh. Tang, orang ke kaya enda ulih tinduk jenak laban iya bisi mayuh reta.
13 Aku meda penusah ti besai nyadi ba dunya tu: Reta ke digumpul orang ngemediska orang nya empu.
14 Reta nya lenyau laban bisnis iya enda mujur nyentukka iya nadai agi utai ditinggalka ke bala anak iya.
15 Baka orang ke telanjai datai ari sarang anak indai iya, baka nya meh orang nya deka mupuk lebuh iya mati. Iya nadai ulih mai nama-nama utai ari pemendar iya gawa.
16 Tu mega penusah ti besai: Orang deka mupuk, sama baka lebuh iya datai. Nama guna iya mati-mati gawa baka ke begagaika angin? Nama penguntung iya?
17 Tiap hari, iya makai dalam pemetang enggau ati ti tusah, ringat, sereta merinsa ketegal sakit.
18 Aku sedar tu meh utai manah ke patut dikereja orang: Iya patut makai, ngirup, lalu ngelantangka diri ngena utai ke udah diulih iya ba dunya tu. Iya patut ngereja nya dalam umur iya ti pandak, ke diberi Petara ti bendar. Nya meh upah* iya.
19 Pia mega, lebuh Petara ti bendar meri orang reta enggau pengaya sereta peluang alai ngelantangka diri ngena utai nya, orang nya patut nerima upah* nya lalu gaga ati enggau utai ke diulih diri. Nya endang pemeri ari Petara.
20 Ketegal Petara ti bendar ngasuh ati iya balat gaga, pengidup iya ti pandak enda berasai ba iya.
